2 Cronicas 9:1-31
9 Ug ang rayna sa Sheba+ nakabalita mahitungod kang Solomon, ug siya miadto sa pagsulay kang Solomon pinaagig makapalibog nga mga pangutana+ didto sa Jerusalem, uban ang usa ka makapahingangha kaayo nga panon ug mga kamelyo+ nga nagdala ug lana sa balsamo,+ ug bulawan+ nga daghan kaayo, ug bililhong mga bato.+ Sa kataposan siya nahiadto kang Solomon ug nakigsulti kaniya bahin sa tanang butang nga duol sa iyang kasingkasing.+
2 Sa baylo, si Solomon nagsulti kaniya sa tanang buot niyang masayran,+ ug walay butang nga natago gikan kang Solomon nga wala niya isulti kaniya.+
3 Dihang nakita sa rayna sa Sheba ang kaalam ni Solomon+ ug ang balay nga iyang gitukod,+
4 ug ang pagkaon diha sa iyang lamesa+ ug ang paglingkod sa iyang mga alagad ug ang pag-alagad sa lamesa sa iyang mga tigsilbi ug ang ilang besti+ ug ang iyang mga tigsilbi sa ilimnon+ ug ang ilang besti, ug ang iyang mga halad-nga-sinunog+ nga kanunay niyang gihalad diha sa balay ni Jehova,+ niana wala nay espiritu diha kaniya.
5 Busa siya miingon sa hari: “Matuod ang pulong nga akong nadunggan sa akong yuta mahitungod kanimo ug mahitungod sa imong kaalam.+
6 Ug wala ako magbutang ug pagtuo+ sa ilang mga pulong hangtod nga ako mianhi aron ang akong kaugalingong mga mata makakita;+ ug, tan-awa! wala sa katunga sa kadako sa imong kaalam+ ang nasaysay kanako. Imong nalabwan ang taho nga akong nadungog.+
7 Malipayon+ ang imong mga tawo, ug malipayon kining imong mga alagad nga nagabarog sa imong atubangan sa kanunay ug nagapamati sa imong kaalam.+
8 Hinaot pagadayegon si Jehova nga imong Diyos,+ nga may kahimuot+ kanimo pinaagi sa pagbutang kanimo sa iyang trono+ ingong hari alang kang Jehova nga imong Diyos;+ tungod kay ang imong Diyos nahigugma+ sa Israel, aron magpabilin kini hangtod sa panahong walay tino, mao nga ikaw iyang gibutang ibabaw kanila ingong hari+ aron ipatuman ang hudisyal nga hukom+ ug pagkamatarong.”+
9 Unya iyang gihatagan ang hari ug usa ka gatos ug kawhaan ka talanton nga bulawan,+ ug lana sa balsamo+ nga daghan kaayo, ug bililhong mga bato;+ ug walay ingon niadto nga lana sa balsamo nga gihatag sa rayna sa Sheba kang Haring Solomon.+
10 Ug, gawas pa, ang mga alagad ni Hiram+ ug ang mga alagad ni Solomon nga nagdalag bulawan+ gikan sa Opir nagdala ug mga kahoyng algum+ ug bililhong mga bato.+
11 Ug ang hari naghimo ug mga hagdanan+ gikan sa mga kahoyng algum alang sa balay ni Jehova ug alang sa balay sa hari+ ug usab mga alpa+ ug kinuldasan nga mga tulonggon+ alang sa mga mag-aawit,+ ug ang ingon niini wala pa makita sukad kanhi diha sa yuta sa Juda.
12 Ug gihatag ni Haring Solomon ngadto sa rayna+ sa Sheba ang tanang gikahimut-an niya nga iyang gipangayo, gawas pa sa kantidad nga iyang gidala ngadto sa hari. Busa siya mitalikod ug mipauli sa iyang yuta, siya kauban sa iyang mga alagad.+
13 Ug ang gibug-aton sa bulawan nga miabot kang Solomon sa usa ka tuig mikabat ug unom ka gatos ug kan-umag-unom ka talanton nga bulawan,+
14 gawas pa sa mga magpapanaw ug sa mga magpapatigayon+ nga nagdala ug sa tanang hari sa mga Arabo+ ug sa mga gobernador sa yuta nga nagdala ug bulawan ug plata ngadto kang Solomon.
15 Ug naghimo si Haring Solomon ug duha ka gatos ka dagkong taming nga sinubong nga bulawan+ (unom ka gatos ka siklo nga sinubong nga bulawan iyang gibutang sa matag dakong taming),+
16 ug tulo ka gatos ka kalasag nga sinubong nga bulawan (tulo ka mina nga bulawan iyang gihal-op sa matag kalasag).+ Unya gibutang kini sa hari didto sa Balay sa Lasang sa Lebanon.+
17 Dugang pa, ang hari naghimo ug usa ka dakong trono nga garing ug naghaklap niini ug lunsay nga bulawan.+
18 Ug dihay unom ka ang-ang ngadto sa trono, ug dihay tumbanan sa tiil nga bulawan sa trono (sila gitaod), ug dihay mga patonganan sa bukton sa isigkakilid sa lingkoranan, ug duha ka leyon+ nagbarog tupad sa mga patonganan sa bukton.+
19 Ug dihay napulog-duha ka leyon+ nga nagbarog sa isigkakilid sa unom ka ang-ang. Walay laing gingharian ang nakahimo ug sama gayod niini.+
20 Ug ang tanang ilimnan+ ni Haring Solomon hinimo sa bulawan,+ ug ang tanang sudlanan sa Balay sa Lasang sa Lebanon+ hinimo sa lunsay nga bulawan. Walay mausa nga hinimo sa plata; kini giisip sa mga adlaw ni Solomon ingon sa wala lamay bili.+
21 Kay ang mga barko nga iya sa hari mag-adtoan sa Tarsis+ uban sa mga alagad ni Hiram.+ Kausa sa matag tulo ka tuig ang mga barko sa Tarsis modunggo, nga magdala ug bulawan ug plata,+ garing,+ ug mga aliwas ug mga paboreyal.+
22 Busa si Haring Solomon milabaw kay sa tanang ubang hari sa yuta sa bahandi+ ug kaalam.+
23 Ug ang tanang hari sa yuta nangita+ sa nawong ni Solomon aron sa pagpaminaw sa iyang kaalam,+ nga gibutang sa matuod nga Diyos diha sa iyang kasingkasing.+
24 Ug ang tagsatagsa kanila nagdala ug iyang gasa,+ mga butang nga ginama sa plata ug mga butang nga ginama sa bulawan+ ug mga besti,+ mga armadura ug lana sa balsamo, mga kabayo ug mga mula ingong naandang ginabuhat tuigtuig.+
25 Ug si Solomon nakabaton ug upat ka libo ka kuwadra sa mga kabayo+ ug mga karo+ ug napulog-duha ka libo ka kabayong iggugubat, ug iyang gibutang sila sa mga siyudad sa mga karo+ ug duol sa hari sa Jerusalem.
26 Ug siya nahimong magmamando sa tanang hari gikan sa Suba hangtod sa yuta sa mga Filistehanon ug hangtod sa utlanan sa Ehipto.+
27 Dugang pa, gihimo sa hari ang plata sa Jerusalem nga ingon sa mga bato; ug ang kahoyng sedro iyang gihimo nga ingon sa mga kahoyng sikomoro+ nga anaa sa Sepela+ tungod sa kadaghan.+
28 Ug dihay mga nagdala ug mga kabayo+ kang Solomon gikan sa Ehipto+ ug gikan sa tanang uban nga kayutaan.
29 Kon bahin sa ubang mga kalihokan ni Solomon,+ ang una ug ang kataposan, wala ba sila mahisulat lakip sa mga pulong ni Natan+ nga manalagna ug diha sa panagna ni Ahias+ nga Shilonhon+ ug diha sa talaan sa mga panan-awon ni Ido+ nga bisyonaryo mahitungod kang Jeroboam+ nga anak nga lalaki ni Nebat?+
30 Ug si Solomon nagpadayon sa paghari sa Jerusalem sa tibuok Israel sulod sa kap-atan ka tuig.
31 Sa kataposan si Solomon natulog uban sa iyang mga katigulangan. Busa ilang gilubong siya didto sa Siyudad ni David nga iyang amahan;+ ug si Rehoboam+ nga iyang anak nga lalaki misugod sa paghari puli kaniya.+
