Ano an Buot Sabihon kan Pagdatong ni Cristo?

I-PLAY

An simbag kan Bibliya

Dakul na beses na sinambit sa Kasuratan an manungod sa maabot na panahon na diyan madatong si Jesus para husgaran an mga tawo digdi sa daga. a Halimbawa, ini an sabi sa Mateo 25:31-33:

“Pag-abot kan Aki nin tawo [Jesu-Cristo] na may kamurawayan, kaiba an gabos na anghel, matukaw siya sa saiyang mamuraway na trono. An gabos na nasyon titiripunon sa atubangan niya, asin pagsusuwayon niya an mga tawo, kun paanong isinusuway nin pastor an mga karnero sa mga kanding. Asin ibubugtak niya sa saiyang tuo an mga karnero, pero sa saiyang wala an mga kanding.”

An panahon na ini nin paghukom magigin parte nin sarong “dakulang kasakitan” na dai pa lamang nangyari sa kasaysayan nin tawo. An kasakitan na ini matatapos sa giyera nin Armagedon. (Mateo 24:21; Kapahayagan 16:16) An mga kaiwal ni Cristo, na ilinadawan sa saiyang ilustrasyon bilang mga kanding, “huhukuman nin daing sagkod na kalaglagan.” (2 Tesalonica 1:9; Kapahayagan 19:11, 15) Alagad, an saiyang maimbod na mga lingkod, an mga karnero, magkakaigwa kan paglaom na “buhay na daing katapusan.”—Mateo 25:46.

Nuarin maabot si Cristo?

Sinabi ni Jesus: “Mapadapit sa aldaw asin oras na iyan, daing siisay man na nakakaaram.” (Mateo 24:36, 42; 25:13) Pero, nagsambit man siya nin sarong nahihiling na “tanda” na kompuwesto nin manlain-lain na pangyayari na magpapamidbid sa panahon na masagkod sa saiyang pag-abot.—Mateo 24:3, 7-14; Lucas 21:10, 11.

Maabot daw si Cristo na may espiritung hawak o hawak na laman?

Binuhay liwat si Jesus na may espiritung hawak, kaya imbes na mag-abot na may hawak na laman, maabot siya bilang sarong espiritung linalang. (1 Corinto 15:45; 1 Pedro 3:18) Ini an dahilan kaya nasabi ni Jesus sa mga apostol niya kan aldaw bago siya magadan: “Dikit na sanang panahon, dai na ako mahihiling kan kinaban.”—Juan 14:19.

Komun na salang mga pakasabot manungod sa pag-abot ni Cristo

Salang pakasabot: Pag sinasabi kan Bibliya na mahihiling kan mga tawo si Jesus na “minaabot na nasa mga panganuron,” nangangahulugan iyan na mahihiling kan mga tawo an pag-abot niya.—Mateo 24:30.

An totoo: Parating ikinokonektar kan Bibliya an mga panganuron sa sarong bagay na nalilipudan kaya dai iyan nahihiling. (Levitico 16:2; Bilang 11:25; Deuteronomio 33:26) Halimbawa, sinabi nin Diyos ki Moises: “Madiyan ako sa saimo sa mahibog na panganuron.” (Exodo 19:9) Dai literal na nahiling ni Moises an Diyos. Sa kaagid na paagi, si Cristo ‘maabot na nasa mga panganuron,’ an buot sabihon, mamamansayan kan mga tawo an pag-abot niya dawa ngani dai ninda siya literal na mahihiling.

Salang pakasabot: Literal an kahulugan kan ekspresyon na “mahihiling siya kan lambang mata” na ginamit sa Kapahayagan 1:7 manungod sa pag-abot ni Cristo.

An totoo: An Griegong mga tataramon sa Bibliya para sa “mata” asin “paghiling” kun minsan ginagamit sa paaging an kahulugan pagmansay imbes na literal na paghiling. b (Mateo 13:15; Lucas 19:42; Roma 15:21; Efeso 1:18) Sinasabi kan Bibliya na an binuhay liwat na si Jesus “an solamenteng . . . nag-iirok sa liwanag na dai nanggad maranihan, siya na dai . . . mahihiling nin siisay man na tawo.” (1 Timoteo 6:16) Kaya, an ekspresyon na “mahihiling siya kan lambang mata” nangangahulugan na mamamansayan kan gabos na tawo na si Jesus an saro na nagpapaabot kan paghukom nin Diyos.—Mateo 24:30.

Salang pakasabot: Ipinapahiling kan mga tataramon sa 2 Juan 7 na maabot si Jesus na may hawak na laman.

An totoo: Sinasabi sa tekstong iyan: “Dakul na paradaya an nagralataw sa kinaban, idtong mga dai minimidbid na si Jesu-Cristo nag-abot bilang tawo [sa literal, ‘nag-abot sa laman,’ nota sa ibaba].”

Kan panahon ni apostol Juan, may mga nagsasabi na dai man talaga nag-abot digdi sa daga si Jesus bilang tawo na may hawak na laman. Inaapod sindang mga Gnostiko. Isinurat an 2 Juan 7 para pahimutikan an saindang paghihingako.

a Dawa ngani ginagamit kan mga tawo an mga terminong “ikaduwang pag-abot” o “ikaduwang pagdatong” para ipanungod sa pag-abot kan Cristo, an mga terminong iyan dai mahihiling sa Bibliya.

b Hilingon an The New Thayer’s Greek-English Lexicon of the New Testament (1981), pahina 451 asin 470.

Konektadong mga Tema

Jesus Simbag sa mga Hapot sa Bibliya

Puwede Mo Man Magustuhan

AN TORRENGBANTAYAN

Mga Saksi ni Jehova