Huli sa pagkamuot ninda sa Diyos asin sa kapwa, nauugma an mga Saksi ni Jehova na sabihon sa gabos na tawo an mensahe kan Bibliya, kaiba na idtong mga dati nang nagsabing “Dai ako interesado.” (Mateo 22:37-39) An pagkamuot sa Diyos nagpapahiro sa samo na sunudon an pagbuot kan saiyang Aki na “lubos na magpatotoo.” (Gibo 10:42; 1 Juan 5:3) Para magibo ini, pauruutro ming ipinapakipag-ulay an mensahe nin Diyos, arog kan ginibo kan mga propeta nin Diyos kaidto. (Jeremias 25:4) Dahil namumutan mi an samong kapwa, hinihinguwa ming sabihon sa gabos an nagliligtas-buhay na ‘maugmang bareta kan Kahadian,’ kaiba na idtong kan inot dai interesado diyan.—Mateo 24:14.

 Sa parati, may nakakaulay kaming interesado pag binabalikan mi an mga harong na kan inot mayo kaming nakaulay na interesado. Pag-isipan an tulong dahilan:

•   Naglilipat nin istaran an mga tawo.

•   An ibang nakaistar sa harong interesado sa mensahe mi.

•   Nagbabago an mga tawo. Huli sa mga nangyayari sa kinaban o sa mga pagbabago sa saindang kamugtakan, an nagkapira mas “nakakamating kaipuhan ninda nin espirituwal na mga bagay” asin andam nang magdangog sa mensahe kan Bibliya. (Mateo 5:3) Dawa idtong mga nagkokontra puwedeng magbago an isip, arog kan nangyari ki apostol Pablo.​—1 Timoteo 1:13.

 Dawa arog kaiyan, dai mi ipinipirit sa kiisay man an samong mensahe. (1 Pedro 3:15) Naniniwala kami na an kada saro dapat na gumibo nin sadiring desisyon kun manungod sa saiyang pagsamba.​—Deuteronomio 30:19, 20.