Magigin mas marahay an saimong buhay pag nagtatagama ka nin panahon para sa Diyos. Kaipuhan niyato gabos an Diyos, kaya pag tinatawan mo siya nin panahon, napapaniguan mo an pangangaipong iyan. Pag-isipan an itinukdo ni Jesus manungod digdi.

An sinabi ni Jesus

 “Maugma an mga nakakamating kaipuhan ninda nin espirituwal na mga bagay.”—Mateo 5:3.

•   Gabos kita gustong maaraman an simbag sa mga hapot na arog kan: Ano an katuyuhan nin buhay? Taano ta grabe an pagsakit? Ano an nangyayari sa sato pag kita nagadan? Mauugma kita pag naaraman ta an mga simbag sa mga hapot na iyan.

 “Dapat na bakong sa tinapay sana mabuhay an tawo, kundi sa lambang tataramon na minaluwas sa nguso ni Jehova. a”—Mateo 4:4.

•   Kun paanong kaipuhan ta nin literal na kakanon, kaipuhan ta man nin espirituwal na kakanon—mga impormasyon na nagsisimbag sa importanteng mga hapot asin nakakatabang sa sato na magin harani sa Diyos. Malinaw na ipinahiling ni Jesus na dapat na pirmi kitang magsarig sa Diyos para mapaniguan an pangangaipo ta para sa espirituwal na mga bagay.

 “An saimong tataramon katotoohan.”—Juan 17:17.

•   Sinabi ni Jesus an panginot na paagi na pinapaniguan nin Diyos an satong pangangaipo para sa espirituwal na mga bagay—paagi iyan sa Saiyang Tataramon, an Bibliya.

 Tanganing mamatian mo an nagdadanay na kaugmahan, dinadagka mi ika na magtao nin panahon sa Diyos asin paniguan an saimong pangangaipo para sa espirituwal na mga bagay. Uni an pirang makakatabang saimo:

•   Basahon an Bibliya nin daing bayad.

•   Mag-request nin libreng interactive na pag-adal sa Bibliya na may personal na matabang sa saimo.