Aasahan mo na an Tataramon nin Diyos daing kaagid, asin arog talaga kaiyan an Bibliya. Binilyon nang kopya kaiyan an naimprenta sa ginatos na lengguwahe. An kadunungan na yaon sa Bibliya igwa nin puwersa na nakakapabago nin tawo para sa ikakarahay.—Basahon an 1 Tesalonica 2:13; 2 Timoteo 3:16.

An rolyo nin Isaias

Aram tang an Bibliya hali sa Diyos huli ta ihinuhula kaiyan nin daing kasala-sala an mga mangyayari pa sana. Mayo nin tawong makakagibo kaiyan kun sa sadiri sana niyang kakayahan. Kuanon tang halimbawa an libro nin Isaias. An sarong kopya kaiyan, na ginibo labing sarong siglo bago mamundag si Jesus, nakua sa sarong kuweba na harani sa Gadan na Dagat. Sinasabi kaiyan na maabot an panahon, an siyudad nin Babilonya dai na iistaran. Nagkatotoo iyan dakul na taon pagkatapos kan ministeryo ni Jesus digdi sa daga.—Basahon an Isaias 13:19, 20; 2 Pedro 1:20, 21.

Isinurat an Bibliya sa laog nin mga 1,600 na taon. Mga 40 an kagsurat kan Bibliya na saro sana an nagin tema, saka an pigsururat ninda nagkakauruyon. Paano iyan nangyari? Giniyahan sinda nin Diyos.—Basahon an 2 Samuel 23:2.

Kun minsan, nakikipag-ulay an Diyos sa mga kagsurat kan Bibliya paagi sa mga anghel, bisyon, o pangaturugan. Sa parati, kun ano an nasa isip nin Diyos ibinubugtak niya sa isip kan kagsurat tapos tinutugutan niya ini na pumili nin mga tataramon na gagamiton para ipahayag an mensahe nin Diyos.—Basahon an Kapahayagan 1:1; 21:3-5.