Sanayon an Iba na Umabot nin mga Pribilehio
Sanayon an Iba na Umabot nin mga Pribilehio
“An gabos na sa sangkap na paagi magigin arog kan saiyang paratokdo.”—LUC. 6:40, NW.
1. Durante kan saiyang ministeryo digdi sa daga, paano ibinugtak ni Jesus an pundasyon para sa sarong pambihirang kongregasyon?
BILANG kongklusyon sa pagkasaysay nia kan Ebanghelyo, si apostol Juan nagsurat, “Asin igua pa nin balakid na bagay na guinibo ni Jesus, na kun ini gabos isurat, sa luba ko, minsan an kinaban dai magkakanigo na bugtakan kan magña libro na ikakasurat.” (Juan 21:25) Kaiba sa gabos na nagibo ni Jesus durante kan saiyang halipot alagad mapuersang ministeryo iyo an paghanap, pagsanay, asin pag-organisar nin mga lalaki na mangengenot pagkatapos kan saiyang buhay digdi sa daga. Kan sia buminalik sa langit kan 33 C.E., iwinalat ni Jesus an pundasyon nin sarong pambihirang kongregasyon na marikas na madakula sagkod na magin rinibo an bilang.—Gui. 2:41, 42; 4:4; 6:7.
2, 3. (a) Taano ta kaipuhan na marhay na an bautisadong mga lalaki maghingoang umabot nin mga pribilehio? (b) Ano an pag-oolayan sa artikulong ini?
2 Ngonyan na may labi nang pitong milyon na aktibong parabalangibog kan Kahadean sa labing 100,000 na kongregasyon sa bilog na kinaban, padagos pa man giraray na nangangaipo nin mga lalaking mangengenot sa espirituwal na mga bagay. Halimbawa, dakula an pangangaipo para sa Kristianong mga elder. An mga naghihingoang umabot sa pribilehiong ini nin paglilingkod maninigong tawan nin komendasyon huling sinda “nagmamawot nin marahay na guibo.”—1 Tim. 3:1.
3 Minsan siring, an mga lalaki dai automatikong nagigin kualipikado sa mga pribilehio sa kongregasyon. Bako sanang sekular na edukasyon o eksperyensia sa buhay an nagpapagin andam sa saro sa gibohon na ini. Tanganing angay na makapaglingkod sa siring na katongdan, an saro dapat na makaabot sa espirituwal na mga kualipikasyon. Orog pa sa mga abilidad o nagibo, sia dapat na may espirituwal na mga kualidad. Paano matatabangan an mga lalaki sa kongregasyon na magin kualipikado? “An gabos na natokdoan sa sangkap na paagi magigin arog kan saiyang paratokdo,” an sabi ni Jesus. (Luc. 6:40) Sa artikulong ini, pag-oolayan niato an nagkapira sa mga paagi kun paano tinabangan kan Ekspertong Paratokdo na si Jesu-Cristo an saiyang mga disipulo na magin kualipikado para sa mas dakulang paninimbagan, asin maheheling ta kun anong mga leksion an makukua niato sa saiyang ginibo.
“Inapod Ko Kamong Magña Katood”
4. Paano ipinaheling ni Jesus na sia tunay na katood sa saiyang mga disipulo?
4 Trinatar ni Jesus an saiyang mga disipulo bilang mga katood, bakong bilang mas hababa sa saiya. Nakiibaiba sia sa sainda, nagtiwala sa sainda, asin ‘ipinahayag sa sainda an gabos na bagay na nadangog nia sa saiyang Ama.’ (Basahon an Juan 15:15.) Imahinara na sana an kagayagayahan ninda kan sinimbag ni Jesus an saindang hapot: “Ano an magigin tanda kan saimong presensia asin kan pagtatapos kan sistema nin mga bagay? [NW]” (Mat. 24:3, 4) Sinabi man nia sa saiyang mga parasunod an kairairaroming mga iniisip asin saboot nia. Halimbawa, kan banggi na sia pasaloiban, iniba ni Jesus si Pedro, Santiago, asin Juan sa hardin nin Getsemane, na dian odok siang namibi huling napupurisaw an saiyang puso. Posibleng dai nadangog kan tolong apostol an ipinapamibi ni Jesus, alagad siertong nasabotan ninda an kaseryosohan kan situwasyon. (Mar. 14:33-38) Bago kaini, isip-isipon man an siertong nagin epekto sa tolo kan transpigurasyon ni Jesus. (Mar. 9:2-8; 2 Ped. 1:16-18) An dayupot na pakikikatood ni Jesus sa saiyang mga disipulo nagpakosog nanggad sa sainda na gibohon an magabat na mga asignasyon na inako ninda kan huri.
5. Ano an nagkapirang paagi na matatabangan kan Kristianong mga elder an iba?
5 Arog ni Jesus, an Kristianong mga elder ngonyan nakikikatood asin nagtatabang sa iba. Kinukultibar ninda an mamomoton asin dayupot na relasyon sa saindang mga kapagtubod paagi sa pagtao nin panahon na magpaheling nin personal na interes sa sainda. Minsan ngani importante sa mga elder an pagigin kompidensial nin ibang bagay, sinda bakong masekreto. An mga elder nagtitiwala sa saindang mga tugang asin ihinihiras sa mga ini an mga katotoohan na sono sa Kasuratan na nanodan mismo ninda. Dai nanggad tinatratar nin mga elder bilang mas hababa an sarong ministeryal na lingkod na tibaad medyo hoben pa. Imbes, sia ibinibilang ninda na tawong espirituwal na may potensial asin nagsasagibo nin mahalagang paglilingkod para sa kongregasyon.
“Tinawan Ko Kamo nin Arogan”
6, 7. Iladawan an halimbawang itinao ni Jesus sa saiyang mga disipulo asin an epekto kaini sa sainda.
6 Minsan ngani an mga disipulo ni Jesus may pagpahalaga sa espirituwal na mga bagay, kun beses an saindang kaisipan naiimpluwensiahan kan saindang pinaghalean asin kultura. (Mat. 19:9, 10; Luc. 9:46-48; Juan 4:27) Minsan siring, dai ni Jesus sinermonan o tinakot an saiyang mga disipulo. Dai nia sinda pinagabatan nin bakong rasonableng mga kahagadan ni pinagibo man nin sarong bagay na dai nia mismo ginigibo. Imbes, tinokdoan nia sinda paagi sa saiyang halimbawa.—Basahon an Juan 13:15.
7 Anong klaseng arogan an iwinalat ni Jesus sa saiyang mga disipulo? (1 Ped. 2:21) Pinagdanay niang simple an saiyang buhay tanganing lubos na makapaglingkod sa iba. (Luc. 9:58) Hababa an boot ni Jesus asin pirme niang ibinabasar sa Kasuratan an saiyang katokdoan. (Juan 5:19; 17:14, 17) Sia madaling dolokon asin maboot. Pagkamoot an nagmomotibar sa saiya sa gabos na ginigibo nia. (Mat. 19:13-15; Juan 15:12) An halimbawa ni Jesus nagkaigwa nin positibong impluwensia sa saiyang mga apostol. Halimbawa, si Santiago dai nagtakig sa takot kan mapaatubang sia sa kagadanan, kundi maimbod siang naglingkod sa Dios sagkod na sia gadanon. (Gui. 12:1, 2) Si Juan maimbod na nagsunod sa mga lakad ni Jesus sa laog nin labing 60 taon.—Kap. 1:1, 2, 9.
8. Anong halimbawa an itinatao kan mga elder para sa hoben na mga lalaki asin sa iba pa?
8 An mga elder na mapagsakripisyo sa sadiri, mapakumbaba, asin mamomoton nagtatao kan halimbawa na kaipuhan kan hoben na mga lalaki. (1 Ped. 5:2, 3) Dugang pa, an mga elder na arogan sa pagtubod, sa pagtotokdo, sa Kristianong pamumuhay, asin sa ministeryo nakakamate nin satispaksion sa pakaaram na puedeng arogon nin iba an saindang pagtubod.—Heb. 13:7.
‘Pinagbotan Sinda ni Jesus Asin Isinugo’
9. Paano niato naaraman na sinanay ni Jesus an saiyang mga disipulo sa gibohon na pag-ebanghelyo?
9 Pagkatapos nin mga duwang taon nin maigot na pagmiministeryo, pinahiwas ni Jesus an paghuhulit paagi sa pagsugo sa saiyang 12 apostol na maghulit. Pero, tinawan nia nguna sinda nin mga instruksion. (Mat. 10:5-14) Bago nia milagrosong pakakanon an rinibong tawo, sinabihan ni Jesus an saiyang mga disipulo kun paano ninda oorganisaron an mga tawo asin ididistribwir an kakanon. (Luc. 9:12-17) Kun siring, malinaw na sinanay ni Jesus an saiyang mga disipulo paagi sa pagtao sa sainda nin malinaw asin espesipikong instruksion. An paaging ini nin pagsasanay, kaiba an mapuersang impluwensia nin banal na espiritu, sa huri nakatabang sa mga apostol na organisaron an mahiwas na paghuhulit na nagpoon kan 33 C.E.
10, 11. Sa anong mga paagi puedeng tawan nin progresibong pagsasanay an mga bagohan?
10 Ngonyan, an espirituwal na pagtotokdo nagpopoon kun an sarong lalaki mag-ako nin pag-adal sa Biblia. Tibaad kaipuhan niatong tabangan sia na magin mahusay magbasa. Nagpapadagos an satong pagtabang mantang kinokonduktahan niato sia nin pag-adal sa Biblia. Kun sia magpoon nang mag-atender nin regular sa Kristianong mga pagtiripon, progresibo siang sasanayon sa espirituwal sa panahon na sia makikabtang sa Teokratikong Paadalan sa Pagmiministro, magin dai pa bautisadong parahayag, asin iba pa. Kun sia mabautismohan na, puedeng kaiba sa saiyang pagsasanay an mga gibohon na arog kan pagtabang sa pagmantenir kan Kingdom Hall. Pag-abot nin panahon, puede siang tabangan na masabotan kun ano an kaipuhan niang gibohon tanganing makualipikar bilang ministeryal na lingkod.
11 Kun tinatawan nin asignasyon an sarong bautisadong tugang na lalaki, maboot na ipinapaliwanag nin sarong elder an angay na organisasyonal na mga prosedimiento asin itinatao nia an kinakaipuhan na instruksion. Dapat na masabotan kan tugang na sinasanay kun ano an inaasahan sa saiya. Kun nasasakitan sia sa ipinapagibo sa saiya, an sarong mamomoton na elder dai tolos makongklusyon na bako siang kualipikado. Imbes, maboot na sasabihon kan elder an espesipikong mga bagay na dapat niang paoswagon asin rerepasohon sa saiya an mga obheto asin prosedimiento. Sarong gikanan nin kaogmahan para sa mga elder na maheling an mga lalaki na positibo an reaksion sa siring na mga paghihingoa asin na an mga ini nakakamate nin kagayagayahan sa paglilingkod sa iba.—Gui. 20:35.
“An Nagkukuyog sa Hatol Madonong”
12. Taano ta epektibo an hatol ni Jesus?
12 Sinanay ni Jesus an saiyang mga disipulo paagi sa pagtao sa sainda nin personal na hatol na ibinagay sa mga pangangaipo ninda. Halimbawa, sinaway nia si Santiago asin Juan huli ta gusto nindang magpahilig nin kalayo hale sa langit sa nagkapirang Samaritano na dai nag-ako sa saiya. (Luc. 9:52-55) Kan si Jesus dolokon kan ina ni Santiago asin Juan tanganing hagadon na tawan an mga ini nin espesyal na posisyon sa Kahadean, an magtugang direktang sinabihan ni Jesus: “[An] pagtukao sa too ko asin sa wala ko, bakong sako an pagtao; kundi iyan manogñod sa magña inandaman nin sakong Ama.” (Mat. 20:20-23) Sa gabos na panahon, si Jesus nagtao nin hatol na malinaw, praktikal, asin marigon na nakabasar sa diosnon na mga prinsipyo. Tinokdoan nia an saiyang mga disipulo na mangatanosan sa mga prinsipyong iyan. (Mat. 17:24-27) Kinonsiderar man ni Jesus an mga limitasyon kan saiyang mga parasunod asin dai sia naglaom nin pagkaperpekto sa sainda. An saiyang hatol minomotibar nin tunay na pagkamoot.—Juan 13:1.
13, 14. (a) Siisay an nangangaipo nin hatol? (b) Magtao nin mga halimbawa nin personal na hatol na puedeng itao nin sarong elder sa saro na dai nag-ooswag sa espirituwal.
13 An lambang lalaki na naghihingoang umabot nin paninimbagan sa Kristianong kongregasyon nangangaipo nin hatol o sono sa Kasuratan na sadol sa panapanahon. “An nagkukuyog sa hatol madonong,” an sabi sa Talinhaga 12:15. “Narealisar ko na an pinakadepisil na angat sa sako iyo an pag-ako kan sadiri kong mga kaluyahan,” an sabi nin sarong hoben na tugang na lalaki. “An sadol nin sarong elder nakatabang sa sako na magkaigwa nin tamang pagmansay dapit dian.”
14 Kun naoobserbaran nin mga elder na an sarong kuestionableng paggawe nakakaolang sa pagtalubo sa espirituwal nin sarong lalaki, naggigibo sinda nin lakdang tanganing itanos sia sa mahoyong paagi. (Gal. 6:1) Kun beses, kaipuhan an hatol huli sa sarong bakong marahay na ugale. Halimbawa, kun garo baga dai ginigibo nin sarong tugang na lalaki an bilog niang makakaya, tibaad makakatabang kun idodoon nin sarong elder na si Jesus maigot na parabalangibog kan Kahadean na nagsugo sa saiyang mga parasunod na gumibo nin mga disipulo. (Mat. 28:19, 20; Luc. 8:1) Kun garo baga ambisyoso an sarong tugang na lalaki, puedeng ipaheling nin sarong elder kun paano tinabangan ni Jesus an Saiyang mga disipulo na maheling an mga peligro sa paghihingoang magin prominente. (Luc. 22:24-27) Paano kun an sarong tugang na lalaki may tendensia na magin bakong mapagpatawad? Magtatao sa saiya nin mapuersang leksion an ilustrasyon mapadapit sa oripon na nagsayumang patawadon an sadit na utang dawa ngani sia mismo pinatawad sa dakulaon niang utang. (Mat. 18:21-35) Kun kaipuhan an hatol, marahay na itao iyan kan mga elder sa pinakamadaling panahon na mapupuede.—Basahon an Talinhaga 27:9.
“Patuodon Mo an Saimong Sadiri”
15. Paano makakatabang an pamilya nin sarong lalaki tanganing makapaglingkod sia sa iba?
15 An mga elder an nangengenot sa pagsanay sa mga lalaki na umabot nin mga pribilehio, alagad puedeng suportaran kan iba an saindang paghihingoa. Halimbawa, an pamilya nin sarong lalaki puede asin maninigong tumabang sa saiya na umabot nin mga pribilehio. Asin kun sia saro nang elder, makikinabang sia sa suporta kan saiyang mamomoton na agom asin bakong makasadiring mga aki. Mahalagang marhay na nasasabotan ninda na kaipuhan niang gumamit nin panahon asin kosog tanganing mapanggana niang magibo an saiyang mga paninimbagan sa kongregasyon. An pagigin mapagsakripisyo ninda nagtatao nin kagayagayahan sa saiya asin pinapahalagahan na marhay nin iba.—Tal. 15:20; 31:10, 23.
16. (a) Siisay an may pangenot na paninimbagan sa pag-abot nin mga pribilehio? (b) Paano an sarong lalaki puedeng umabot nin mga pribilehio sa kongregasyon?
16 Minsan ngani puede siang tabangan asin suportaran nin iba, an tugang na lalaki mismo an may pangenot na paninimbagan sa pag-abot nin mga pribilehio. (Basahon an Galacia 6:5.) Siempre, an sarong tugang na lalaki dai man kaipuhan na magin ministeryal na lingkod o elder tanganing makatabang sa iba asin lubos na makikabtang sa ministeryo. Minsan siring, an pag-abot nin mga pribilehio sa kongregasyon nangangahulogan nin pagmamaigot na maabot an mga kualipikasyon na sinambit sa Kasuratan. (1 Tim. 3:1-13; Tito 1:5-9; 1 Ped. 5:1-3) Kaya kun an sarong lalaki nagmamawot na maglingkod bilang ministeryal na lingkod o elder alagad dai pa sia ninonombrahan, maninigo niang tawan nin atension an mga bagay kun saen kaipuhan pa siang umoswag sa espirituwal. Nangangaipo ini nin regular na pagbasa kan Biblia, mahigos na personal na pag-adal, seryosong paghorophorop, odok sa pusong pagpamibi, asin maigot na pakikikabtang sa Kristianong ministeryo. Sa siring na mga paagi, personal niang ikakaaplikar an hatol ni Pablo ki Timoteo: “Patuodon mo an saimong sadiri na diosnon na debosyon an saimong intension.”—1 Tim. 4:7, NW.
17, 18. Ano an puedeng gibohon nin sarong bautisadong tugang na lalaki kun an kahaditan, pakamate nin kawaran nin kakayahan, o kawaran nin pagmawot nakakaolang sa saiya na umabot nin mga pribilehio?
17 Alagad paano kun an sarong lalaki dai naghihingoang umabot nin mga pribilehio huli sa kahaditan o pakamate nin kawaran nin kakayahan? Marahay na isipon nia kun gurano kadakula kan ginigibo ni Jehova Dios asin ni Jesu-Cristo para sa sato. Sa katunayan, ‘aroaldaw na dinadara ni Jehova an pasan para sa sato.’ (Sal. 68:19, NW) Kaya matatabangan kan satong langitnon na Ama an sarong tugang na lalaki na mag-ako nin paninimbagan sa kongregasyon. Magigin kapakipakinabang man para sa sarong tugang na lalaki na bako pang ministeryal na lingkod o elder na isip-isipon an bagay na may dakulang pangangaipo para sa maygurang na mga lalaki na mag-ako nin mga pribilehio nin paglilingkod sa organisasyon nin Dios. An paghorophorop sa mga puntong iyan puedeng makapahiro sa sarong tugang na lalaki na maghingoang mapangganahan an negatibong mga saboot. Puede siang mamibi para sa banal na espiritu, na ginigirumdom na kabilang sa bunga kaiyan an katoninongan asin pagpupugol sa sadiri—mga kualidad na kaipuhan tanganing mahale an kahaditan asin pakamate nin kawaran nin kakayahan. (Luc. 11:13; Gal. 5:22, 23) Asin an saro puedeng magkaigwa nin lubos na kompiansa na bebendisyonan ni Jehova an gabos na naghihingoang umabot nin mga pribilehio na may tamang motibo.
18 An kawaran daw nin motibasyon iyo an nakakaolang sa sarong bautisadong lalaki na umabot nin mga pribilehio? Ano an makakatabang sa sarong tugang na lalaki na dai nagmamawot na maglingkod? Si apostol Pablo nagsurat: “An Dios, huli sa pinagmarahay nia, iyo an nagpapahiro sa saindo tanganing kamo magmawot sagkod humiro.” (Fil. 2:13, NW) An pagmawot na maglingkod hale sa Dios, asin an espiritu ni Jehova puedeng magpakosog sa saro tanganing gumibo nin sagradong paglilingkod. (Fil. 4:13) Dugang pa, an sarong Kristiano puedeng mamibi na tabangan sia nin Dios na gibohon an tama.—Sal. 25:4, 5.
19. Ano an inaasegurar sa sato kan pagpatindog nin “pitong pastor, iyo, walong duke”?
19 Binebendisyonan ni Jehova an mga paghihingoa kan kamagurangan na sanayon an iba. An saiyang mga bendisyon naeeksperyensiahan man kan mga naghihimate asin naghihingoang umabot nin mga pribilehio sa kongregasyon. Inaasegurar kita kan Kasuratan na sa tahaw kan banwaan nin Dios “pitong pastor, iyo, walong duke”—an kahagadan na bilang nin may kakayahan na mga lalaki—an papatindogon tanganing mangenot sa organisasyon ni Jehova. (Miq. 5:5, NW) Sarong bendisyon nanggad na kadakol na Kristianong lalaki an sinasanay asin mapakumbabang naghihingoa na umabot nin mga pribilehio nin paglilingkod para sa kaomawan ni Jehova!
Ano an Isisimbag Nindo?
• Paano tinabangan ni Jesus an saiyang mga disipulo na makualipikar para sa mas dakulang paninimbagan?
• Paano maaarog nin mga elder si Jesus mantang tinatabangan nindang mangenot an mga lalaki sa kongregasyon?
• Ano an papel kan pamilya nin sarong lalaki sa pagtabang sa saiya na umabot nin mga pribilehio?
• Ano an magigibo nin sarong lalaki tanganing maabot an mga pribilehio?
[Mga Hapot Para sa Pag-adal]
[Mga Ritrato sa pahina 31]
Anong pagsasanay an puede nindong itao sa saindong tinotokdoan sa Biblia mantang naghihingoa siang umoswag?
[Ritrato sa pahina 32]
Paano ikakapaheling nin mga lalaki na naghihingoa sindang umabot nin mga pribilehio?
