666—Bako Sanang Sarong Misteryo

‘Mayo nin siisay man na makakabakal o makakapabakal apuera sa tawo na igwa kan tanda, an ngaran kan mabangis na hayop o an numero kan ngaran kaiyan. Uya digdi an kadonongan: An may pakasabot todan an numero kan mabangis na hayop, ta iyan numero nin tawo; asin an numero kaiyan anom na gatos may anom na polo may anom.’​—Kapahayagan 13:​17, 18.

PIRA sanang topiko sa Biblia an nakapukaw nin dakulang interes na arog kan hula manongod sa misteryosong tanda, o ngaran, kan “mabangis na hayop”​—an numerong 666. Sa telebisyon asin Internet, saka sa mga pelikula, libro, asin magasin, an tanda kan hayop an nagin tema nin daing katapusan na pagbanabana.

May mga nagtutubod na an 666 iyo an tanda kan anticristo sa Biblia. An iba nagsasabi na nangangahulogan iyan nin sarong porma nin obligatoryong identipikasyon, arog nin sarong tatu o nakatanom na microchip na may digital code na nagpapamidbid sa saro bilang lingkod kan hayop. Pero an iba naniniwala na an 666 iyo an tanda kan papadong Katoliko. Sinasalidahan nin Romanong mga numero an mga letra sa sarong porma kan opisyal na titulo kan papa, an Vicarius Filii Dei (Bikaryo kan Aki nin Dios), asin kadikit na pagmanipular kan mga numero, nakuenta ninda an 666. May mga naghihingako man na an numero man sanang iyan puedeng kalkulohon base sa Latin na ngaran kan Romanong Emperador na si Dioclesiano asin sa Hebreong bersion kan ngaran na Nero Cesar. *

Minsan siring, an inimbento sana asin inimahinar na mga interpretasyon na ini laen na marhay sa mismong sinasabi kan Biblia manongod sa tanda kan hayop, siring kan maheheling niato sa masunod na artikulo. Ihinahayag nanggad kan Biblia na an mga may tanda makaeeksperyensia kan grabeng kaanggotan nin Dios kun taposon na nia an presenteng sistema nin mga bagay. (Kapahayagan 14:9-11; 19:20) Kun siring, an pakasabot sa kahulogan kan 666 bako sanang pagresolber sa sarong interesanteng misteryo. Marahay sana ta si Jehova Dios, an mismong personipikasyon nin pagkamoot asin Gikanan nin espirituwal na liwanag, dai pinabayaan na an saiyang mga lingkod daing aram sa importanteng bagay na ini.​—2 Timoteo 3:16; 1 Juan 1:5; 4:8.

[Nota sa Ibaba]