Mga Leksion Hale sa Rekord kan Pagkamundag ni Jesus

MINILYON an nawiwili sa mga pangyayari may labot sa pagkamundag ni Jesus. Maheheling ini sa kadakoldakol na Belen na nakaeksibir asin sa mga pag-akto kan Pagkamundag na ginigibo sa bilog na kinaban sa panahon nin Pasko. Minsan ngani kawiliwili, an mga pangyayari may labot sa pagkamundag ni Jesus dai isinurat sa Biblia tanganing libangon an mga tawo. Imbes, kabtang iyan kan bilog na Kasuratan na ipinasabong nin Dios para sa pagtotokdo asin sa paghusay kan mga bagay.​—2 Timoteo 3:16.

Kun gusto nin Dios na iselebrar nin mga Kristiano an pagkamundag ni Jesus, kun siring itinao kutana sa Biblia an eksaktong petsa. Itinao daw? Pakasambita na si Jesus namundag sa panahon na an mga pastor nasa luwas sa banggi na nagbabantay sa saindang mga aripompon, an nag-espesyalisar sa Biblia kan ika-19 siglo na si Albert Barnes nagkonklusyon: “Malinaw basado digdi na an satong Paraligtas namundag bago kan ika-25 kan Disyembre . . . Malipot sa panahon na iyan, asin espesyalmente sa halangkaw asin mabukid na mga rehion harani sa Betlehem. Itinago nin Dios an panahon nin pagkamundag [ni Jesus]. . . . Ni importante man na maaraman an panahon na iyan; ta kun iyo, prineserbar kutana nin Dios an rekord kaiyan.”

Sa kabaliktaran, malinaw na ipinaaram sato kan apat na kagsurat kan Ebanghelyo an aldaw na nagadan si Jesus. Nangyari iyan sa aldaw nin Paskua, na ginigibo sa ika-14 kan Judiong bulan nin Nisan, kun tigsoli. Dugang pa, espesipikong ipinagboot ni Jesus sa saiyang mga parasunod na selebraron an aldaw na iyan sa paggirumdom sa saiya. (Lucas 22:19) Mayo sa Biblia an arog kaiyan na pagboot na selebraron  an kumpleanyo ni Jesus, sa katunayan, ni an kumpleanyo nin siisay man na tawo. Makamomondo, tibaad matahoban kan mga kontrobersia manongod sa petsa kan pagkamundag ni Jesus an mas mahalagang mangnohon na mga pangyayari kan panahon man na iyan.

Mga Magurang na Pinili nin Dios

Sa rinibong pamilya sa Israel, anong klaseng mga magurang an pinili nin Dios na magpadakula sa saiyang Aki? Kinonsiderar daw Nia na importante an mga bagay na arog nin pagkaprominente asin kayamanan? Dai. Imbes, tinawan ni Jehova nin atension an espirituwal na mga kualidad kan mga magurang. Siyasaton nindo an awit nin pag-omaw ni Maria, na nakasurat sa Lucas 1:46-55, na inawit nia pagkatapos na sabihon saiya an pribilehio na magin ina kan Mesiyas. Kabilang sa iba pang bagay, sia nagsabi: “Ibinabantog kan sakong kalag an kadakulaan ni Jehova . . . huli ta hineling nia an hababang kamugtakan kan saiyang oripon na babae.” Mapakumbaba niang minansay an saiyang sadiri bilang saro na may “hababang kamugtakan,” oripon na babae ni Jehova. Mas mahalaga, ihinahayag kan magayon na kapahayagan nin pag-omaw sa awit ni Maria na sia sarong espirituwal na tawo na dakol an kaaraman sa Kasuratan. Minsan ngani sarong makasalan na gikan ni Adan, sia an tamang-tama na pinili bilang daganon na ina kan Aki nin Dios.

Kumusta man an agom ni Maria, na nagin kag-ampon na ama ni Jesus? Si Jose tatao sa pagpapanday. Huli sa pagigin andam niang maghigos sa trabaho na ginagamit an saiyang mga kamot, nakaya niang sustentohan an sarong pamilya na sa huri nagin limang aking lalaki asin kisuerra duwang aking babae. (Mateo 13:​55, 56) Si Jose bakong mayaman. Kan panahon nang ipresentar ni Maria an saiyang panganay na aking lalaki sa templo nin Dios, siertong nadesganar si Jose na dai nia kayang itao an atang na karnero. Imbes, kinaipuhan nindang gamiton an itinataong konsiderasyon sa mga dukha. Mapadapit sa ina nin bagong mundag na aking lalaki, an ley nin Dios nagsabi: “Kun dai nia kaya an sarong karnero, dangan makua sia nin duwang agbaan o duwang pitson, an saro para sa dolot na tinotong asin an saro para sa dolot manongod sa kasalan, asin an saserdote an mabayad sa kasalan para sa saiya, asin sia magigin malinig.”​—Levitico 12:8; Lucas 2:22-24.

Sinasabi kan Biblia na si Jose “matanos.” (Mateo 1:19) Halimbawa, dai sia nakidorog sa saiyang birhen na agom sagkod na ipinangaki si Jesus. Nalikayan kaini an ano man na misinterpretasyon kun siisay man nanggad an tunay na Ama ni Jesus. Para sa mag-agom na bagong kasal bakong pasil na lumikay sa seksuwal na relasyon mantang nag-iistar sa sarong harong, alagad ipinaheling kaiyan na pareho ninda pinahalagahan an pribilehio nin pagigin pinili na padakulaon an Aki nin Dios.​—Mateo 1:​24, 25.

Arog ni Maria, si Jose sarong espirituwal na tawo. Minapondo sia sa pagtrabaho kada taon asin iiniiba an saiyang pamilya sa tolong aldaw na pagbaklay hale sa Nazaret pasiring sa Jerusalem tanganing umatender sa taonan na kapiestahan kan Paskua. (Lucas 2:41) Siring man, seguradong sinanay ni Jose an aking si Jesus sa semanal na kaugalean na pakikikabtang sa pagsamba sa lokal na sinagoga, kun saen binabasa asin ipinaliliwanag an Tataramon nin Dios. (Lucas 2:51; 4:16) Huli kaini, daing duda na pinili nin Dios an tamang daganon na ina asin kag-ampon na ama para sa saiyang Aki.

Sarong Dakulang Bendisyon Para sa Hamak na mga Pastor

Apisar na depisil para sa saiyang agom, na siyam na bulan nang bados ngonyan, si Jose nagbaklay pasiring sa siudad kan saiyang mga apoon tanganing magparehistro, sa pagsunod sa dekreto ni Cesar. Kan umabot an mag-agom sa Betlehem, dai sinda makakua nin dagosan sa matawong siudad. Sa siring na sirkunstansia napiritan sindang gamiton  an sarong kuadra, kun saen namundag si Jesus asin pinahigda sa sarong bahogan. Tanganing pakosogon an saindang pagtubod, nagtao si Jehova sa hamak na mga magurang na ini nin pagkompirmar na an pagkamundag na ini talagang kabotan nin Dios. Nagsugo daw sia nin sarong delegasyon nin prominenteng kamagurangan na lalaki hale sa Betlehem tanganing aseguraron giraray an mag-agom? Dai. Imbes, ihinayag ni Jehova Dios an bagay na iyan sa mahigos na mga pastor na kan bangging iyan nagbabantay sa saindang mga aripompon sa luwas.

An anghel nin Dios nagpaheling sa sainda asin sinabihan sinda na dumuman sa Betlehem, kun saen manonompongan ninda an bagong mamundag na Mesiyas na “naghihigda sa sarong bahogan.” Nabigla daw o napasupog an hamak na mga tawong ini kan madangog na an bagong mamundag na Mesiyas yaon sa sarong kuadra? Dai nanggad! Dai nag-atraso, binayaan ninda an saindang mga aripompon asin nagpasiring sa Betlehem. Kan manompongan ninda si Jesus, isinabi ninda ki Jose asin Maria an sinabi kan anghel nin Dios. Daing duda na pinakosog kaini an pagtubod kan mag-agom na an gabos na bagay nangyayari kaoyon kan katuyohan nin Dios. “Nagpuli [na man] an mga pastor, na nagpapamuraway asin nag-oomaw sa Dios para sa gabos na bagay na saindang nadangog asin naheling.” (Lucas 2:8-20) Iyo, sa paghayag kan mga bagay sa matatakton sa Dios na mga pastor, ginibo ni Jehova an tamang pagpili.

Sa mga nasambitan sa enotan, nanodan niato kun ano an dapat na magin pagkatawo niato tanganing kamtan an pag-oyon ni Jehova. Dai niato kaipuhan na maghingoang magin prominente o mayaman. Imbes, arog ni Jose, ni Maria, asin kan mga pastor, kaipuhan na kuyogon niato an Dios asin patunayan an satong pagkamoot sa saiya paagi sa pag-enot kan espirituwal na intereses sa materyal na mga bagay. Tunay nanggad, may marahayon na mga leksion na manonodan sa paghorophorop sa rekord nin mga pangyayari kan panahon man na namundag si Jesus.

[Ritrato sa pahina 7]

Ano an ipinaririsa kan pagdolot ni Maria nin duwang pitson?

[Ritrato sa pahina 7]

Pinili nin Dios na ihayag an pagkamundag ni Jesus sa pira sanang hamak na pastor