Paghanap kan mga Maninigo sa Kenya

AN Kenya sarong nasyon na makangangalas an natural na kagayonan. Biniyayaan an nakaoogmang marhay na nasyon na ini nin matubang na mga kadlagan, mahiwason na kaplanodohan, grabe kainit na mga desierto, asin napapatos nin niebeng mga kabukidan. Iyan istaran para sa labing sarong milyon na wildebeest asin rinoseros na namemeligro nang maubos. An saro puede man na makaheling nin dakulang grupo nin mga giraffe na nag-aagi sa madoot na lugar.

Abunda man an mga linalang na nasa aire, magpoon sa mapuersa, naglalayog na mga agila sagkod sa manampulong ribong magagayon na nag-aawit na gamgam na nagtatao nin magayon na tanog sa aire paagi sa saindang masinggayang mga melodiya. Asin siisay an dai makaririsa sa mga elepante asin leon? An mga tanawon asin tanog sa Kenya dai malilingawan.

Alagad, igwa nin saro pang tanog na nadadangog sa bilog na magayon na nasyon na ini. Iyan an tanog nin rinibong tingog na nagsasabi kan mensahe nin paglaom. (Isaias 52:7) An mga tingog na ini nakakaabot na sa mga tawo na hale sa labing 40 tribo asin tataramon. Sa sentidong ini, an Kenya saro man na nasyon nin espirituwal na kagayonan.

Kadaklan kan mga tawo sa Kenya relihioso asin gustong pag-olayan an espirituwal na mga bagay. Sa ibong kaini, nagin angat an makakua nin mga tawong makakaolay, huli ta an Kenya, arog kan dakol na ibang nasyon, nakaeeksperyensia nin pagbabago.

Dahelan sa depisil na kamugtakan sa pagbuhay dakol an napiritan na liwaton an saindang paagi nin pamumuhay. An mga babae, na dati nagtatrabaho sa harong, nagtatrabaho na sa mga opisina o sa gilid nin mga tinampo na nagtitinda nin mga prutas, gulayon, sira, asin hinabol na mga basket. An mga lalaki nagtatrabaho nin halawig, nakapapagal na mga oras sa pagmamaigot na masustentohan an saindang pamilya. Dawa an mga aki, na an saradit na takyag ninda pano nin mga pakete nin sinanglag na mani asin linabonan na mga sogok, naglalakaw sa mga tinampo na iinaalok an saindang mga paninda. An resulta iyo na pipira sanang tawo an yaon sa harong kun aldaw. Kinaipuhan kan mga parabalangibog kan maogmang bareta kan Kahadean na gumibo nin pagliliwat huli sa situwasyon na ini.

Irinekomendar sa mga kongregasyon kan Mga Saksi ni Jehova na mas magkonsentrar sa mga tawo na yaon sa luwas kan saindang harong, na naggigibo kan pan-aroaldaw nindang mga aktibidad, siring man sa mga katood, paryente, kanegosyo, asin katrabaho. Asin an mga tugang naghimate, na nakikipag-olay sa mga tawo saen man sinda manompongan. (Mateo 10:11) Nagkaigwa daw nin resulta an paghihingoang ini na humiwas? Iyo nanggad! Estudyare an nagkapirang halimbawa.

 Mga Paryente—An Pinakaharaning Kataed Niato

An kabisera nin Kenya, an Nairobi, may mga tolong milyon na nag-iistar. Nakaistar sa sirangan na kampi kan siudad an sarong retiradong meidyor sa armi na haloy nang may pankagabsan na paghabo sa Mga Saksi ni Jehova, maski ngani, sa pagkahadit niang marhay, an mismong aki niang lalaki sarong Saksi. Sarong Pebrero an retiradong opisyal nagbiahe nin 160 kilometros pasiring sa harong kan aking lalaki sa banwaan nin Nakuru sa Rift Valley. Durante kan pagbisita, an aki nagtao sa saiya nin regalo​—an librong Kaaraman na Minagiya Pasiring sa Buhay na Daing Katapusan. * Inako iyan kan ama asin huminale.

Pag-uli sa harong, itinao kan dating opisyal an libro sa saiyang agom, na pinonan na basahon iyan, na dai nag-aaram na iyan ipinublikar kan Mga Saksi ni Jehova. Luway-luway, nagpoon na matudok kan katotoohan sa Biblia an saiyang puso, asin isinabi kan babae an impormasyon sa saiyang agom. Huli sa pag-usyoso, pinonan man niang basahon an libro. Kan maaraman ninda kun siisay an kagpublikar, nagkonklusyon sinda na dai isinabi sa sainda an katotoohan manongod sa Mga Saksi ni Jehova. Kinontak ninda an mga Saksi sa lokal, asin sarong pag-adal sa Biblia an naponan. Basado sa mismong pagbasa ninda kan libro, naaraman ninda na bakong sa Kristiano an maggamit o magpabakal nin tabako. (Mateo 22:​39; 2 Corinto 7:1) Daing pag-alangan na rinaot ninda an gabos na sigarilyo sa saindang tindahan. Pakalihis nin nagkapirang bulan sinda nakualipikar na magin dai pa bautisadong parahayag, asin dai nahaloy nabautismohan sinda sa sarong pandistritong kombension.

Nagbubunga nin Kayamanan an Basura

Sa nagkapirang parte kan distritong kabisera, yaon an mahiwas na mga baryo na iniistaran nin ginatos na ribong tawo. Manonompongan digdi an raya-rayang mga harong na gibo sa laboy, kahoy, kapidasong mga metal, o mga sim. Kun kadikit an trabaho sa mga industriya asin pabrika, an mga tawo madaling gumibo nin paagi. An mga trabahador na Jua kali (sa Swahili “maringis na saldang”) nagtatrabahong balad sa saldang, na naggigibo nin mga sandalyas hale sa lumang mga goma nin kotse o de gas na kingke hale sa inapon nang mga lata. An iba nagkakaykay sa nakatambak na mga basura asin mga latang basurahan na naghahanap nin mga papel, lata, asin bote tanganing magamit liwat.

Puede daw magbunga nin kayamanan an basura? Iyo! Nagigirumdoman nin sarong tugang na lalaki: “Sarong pusog, daing kahusayan, asin barumbadong paghelingon na lalaki na may darang dakulang sakong plastik na pano nin iinapon na mga diaryo asin magasin an naglaog sa natad kan samong Assembly Hall. Pakapabisto nia sa sako na an ngaran nia William, sia naghapot: ‘Igwa kamong pinakabagong isyu kan An Torrengbantayan?’ Ako medyo nahandal, na nagngangalas kun ano an intension nia. Kan ipaheling ko sa saiya an limang kopya kan magasin, hineling nia nin saro-saro asin nagsabi: ‘Kukuanon ko iyan gabos.’ Nasorpresa, nagbuelta ako sa sakong kuarto asin nagbalik na dara an librong Puwede Kamong Mabuhay Sagkod Lamang sa Paraiso Digdi sa Daga. * Ipinaheling ko sa saiya an retrato kan Paraiso asin ipinaliwanag na inaadalan mi sa Biblia an mga tawo na daing bayad. Dangan isinuherir ko: ‘William, ano daw kun magdigdi ka sa aga, asin ponan tang mag-adal?’ Iyan mismo an ginibo nia!

“Sarong Domingo nagduman sia para sa enot niang pag-atender sa pagtiripon. Ako an nagtatao kan pampublikong pahayag kan aldaw na iyan. Kan maglaog si William, tolos niang hineling an mga nagdadangog, naheling ako sa plataporma, asin biglang duminalagan paluwas. Hinapot ko sia sa huri kun taano ta ginibo nia iyan. Sia nasosopog na nagsimbag: ‘An mga tawo malinig na marhay. Ninerbios ako.’

“Mantang si William nag-ooswag sa saiyang pag-adal, nagpoon na liwaton kan katotoohan sa Biblia  an saiyang buhay. Sia nagkarigos, nagpabulog, nagsulot nin malinig asin aregladong mga gubing, asin dai nahaloy regular na sa mga pagtiripon. Kan iluwas an librong Kaaraman na Minagiya Pasiring sa Buhay na Daing Katapusan, pinonan ming adalan iyan. Mientras tanto, nakatao na sia nin duwang pahayag sa Teokratikong Paadalan sa Pagmiministro asin nagin nang dai pa bautisadong parahayag. Napalukso an puso ko na akoon sia bilang sakong espirituwal na tugang kan sia mabautismohan sa espesyal na aldaw nin asamblea.”

Saen enot na naheling ni William an halaga kan magasin na Torrengbantayan? “Nakua ko an nagkapirang isyu kaibanan kan iinapon nang mga papel sa basurahan.” Iyo, nakakua sia nin kayamanan sa dai linalaoman na paagi!

Paghuhulit sa Pinagtatrabawohan

Kita daw pirmeng alisto sa mga oportunidad para sa impormal na paghuhulit sa pinagtatrabawohan niato? Si James, sarong magurang sa sarong kongregasyon sa Nairobi, iinintrodusir sa katotoohan sa Biblia sa paaging iyan. Sia nagin eksperto man sa paggamit kan paaging ini tanganing makaolay an iba. Halimbawa, sa sarong okasyon, naheling ni James an katrabaho na naglaog sa opisina na may badge kard na igwang mga tataramon na “Nagliligtas si Jesus.” Inaarog an paraebanghelyong si Felipe, hinapot ni James an katrabaho: “Naiintindihan mo daw talaga an kahulogan kan mga tataramon na iyan?” (Gibo 8:30) An hapot na iyan nagbukas nin marahay na pag-oolay. Naponan an sarong pag-adal sa Biblia, asin sa huri an lalaki nabautismohan. Nagin mapanggana daw si James sa iba pa? Togotan ta siang magpaliwanag:

“Sarong kompanya an pinagtatrabawohan mi ni Tom. Parate kaming sabay na naglulunad sa auto kan samong kompanya. Sarong aga, nanongod na kami nagin magkataed. Nagbabasa ako kan saro sa mga libro ta, asin kinapotan ko iyan sa paagi na siertong maheheling na marhay iyan ni Tom. Arog nanggad kan linalaoman ko, nakua an atension nia, asin naogma akong ipasubli sa saiya an sakong libro. Natudok na marhay sia kan saiyang nabasa asin nagtogot na mag-adal sa Biblia. Sindang mag-agom ngonyan bautisadong mga lingkod na ni Jehova.”

Si James nagpapadagos: “Sa parate durante kan pahingalo sa odto sa samong kompanya, igwa nin interesanteng marhay na mga pag-orolay-olay. Kaidto ko, sa magkasuhay na okasyon, nakamidbid si Ephraim asin Walter. Pareho nindang aram na ako sarong Saksi. Interesado si Ephraim na maaraman kun taano ta grabeng marhay an pagtumang sa Mga Saksi ni Jehova. May mga hapot si Walter manongod sa kalaenan kan mga Saksi asin ibang mga relihion. Pareho sindang nanigoan na marhay sa itinao kong sono sa Kasuratan na mga simbag asin nagtogot sa pag-adal. Marikas an nagin pag-oswag ni Ephraim. Pag-abot nin panahon, idinusay nindang mag-agom an saindang buhay ki Jehova. Naglilingkod sia ngonyan bilang sarong magurang sa kongregasyon, asin an saiyang agom sarong regular payunir. Minsan siring, si Walter napaatubang sa grabeng pagtumang kaya iinapon nia an saiyang pinag-aadalan na libro. Pero, huli sa sakong pagkadesidido, ipinadagos nia an saiyang pag-adal. Nakamtan nia man ngonyan an pribilehio na maglingkod bilang sarong magurang sa kongregasyon.” Gabos-gabos, 11 katawo an nagin tunay na mga Kristiano huli ta inaprobetsaran ni James an mga oportunidad na magpatotoo nin impormal sa pinagtatrabawohan nia.

Sarong Makangangalas na Marhay na Resulta

Sa sarong sadit na baryo sa baybayon nin Lake Victoria, nagkatiripon an mga katood asin paryente sa sarong seremonya sa lobong. Kaiba sa mga nagmomondo an sarong may edad nang Saksi. Rinanihan nia an sarong maestra na an ngaran Dolly asin ipinaliwanag sa saiya an kamugtakan kan mga gadan asin an katuyohan ni Jehova na haleon an kagadanan sagkod lamang. Namangno an saiyang paborableng reaksion, inasegurar nia sia: “Kun magbalik ka na sa saimong ginikanan na banwaan, an saro sa samong mga misyonero madalaw sa saimo asin totokdoan ka sa Biblia.”

 An ginikanan na banwaan ni Dolly iyo an ikatolong pinakadakulang siudad sa Kenya. Apat sanang Saksing misyonero an naglilingkod duman kan panahon na iyan. Dai man talaga sinabihan kan may edad nang tugang na lalaki an siisay man sa mga misyonero tanganing dalawon si Dolly. Lubos sana an saiyang paniwala na arog kaiyan an mangyayari. Asin iyan nangyari nanggad! Sa laog nin halipot na panahon, sarong misyonerang tugang an nakanupar ki Dolly asin naponan an sarong pag-adal sa saiya. Bautisado na ngonyan si Dolly, an saiyang hoben na aking babae nakalista na sa Teokratikong Paadalan sa Pagmiministro, asin bautisado na man an saiyang duwang aking lalaki. Naggayagaya ngani siang makaatender sa Paadalan sa Paglilingkod Bilang Payunir.

Pag-asikaso kan Pagdakol

An pagdodoon sa impormal na paghuhulit an nagpangyari na madangog kan rinibo pa an maogmang bareta sa Kenya. Labing 15,000 na parahayag an sibot ngonyan sa pinakaimportanteng gibohon na ini, asin labing 41,000 an nag-atender sa Memorial kan kagadanan ni Cristo kan sarong taon. Sa bilog na Kenya, an mga nag-aatender sa pagtiripon sa parate doble an kabilangan sa mga parahayag kan Kahadean. Nagbunga ini nin pangangaipo para sa dugang pang mga Kingdom Hall.

Itinotogdok an mga Kingdom Hall sa mayor na mga siudad sagkod sa hararayong lugar. An saro kaini iyo an yaon sa napapasuway na banwaan kan Samburu mga 320 kilometros sa amihanan-sirangan kan Nairobi. Kan 1934, an banwaan inapod na Maralal, na nangangahulogan na “nagkikilyab” sa tataramon na Samburu, huli ta an enot na sim na atop na ginamit duman nagkikilyab sa saldang. Pakalihis nin 62 na taon saro pang edipisyo na may atop na sim an itinogdok sa Maralal. Iyan man “nagkikilyab” asin “nagkikintab” huli ta iyan an lokal na lugar para sa tunay na pagsamba.

Naggibo an 15 parahayag nin marahayon na paghihingoa tanganing ikatogdok an enot na Kingdom Hall sa harayo na parteng ini kan Kenya. An pondo limitado, kaya an mga tugang guminamit nin lokal na materyales. Naggibo sinda nin lanob hale sa pulang daga na binasa nin tubig asin dinusok nin higot sa tahaw nin nakatindog na mga palo. An mga lanob pinulido asin pinalitadahan nin minesklang odo nin baka asin abo, na nagin matagas na palitada na matagal nin dakol na taon.

Tanganing makakua nin mga palo para sa edipisyo, an mga tugang nagkua nin permiso sa pagpalod nin mga kahoy. Alagad an pinakaharaning kadlagan mga 10 kilometros an rayo. An mga tugang na lalaki asin babae kaipuhan na maglakaw pasiring sa kadlagan, magpalod nin mga kahoy, tarasan iyan, asin darahon an mga palo pabalik sa tinotogdokan na lugar. Sarong beses, sa saindang pagbaklay hale sa kadlagan, an mga tugang binagat kan mga pulis, na nagsabing imbalido an saindang permiso. Sinabihan kan pulis an sarong espesyal payunir na sia arestado huli sa pagpalod nin mga kahoy. Sarong lokal na tugang na babae, na midbid na marhay sa komunidad asin kan mga pulis, an nagsabi: “Kun arestaron nindo an tugang mi, kaipuhan na gabos kami arestaron nindo, huli ta gabos kami nagpalod nin mga kahoy!” Dangan tinogotan sinda gabos kan opisyal na humale.

May mga layas na hayop sa kadlagan, kaya an paglakaw dian bakong daing peligro. Sarong aldaw nagpalod nin kahoy an sarong tugang na babae. Kan iyan buminagsak sa daga, naheling nia an sarong hayop na luminukso asin duminalagan. Sa biglang heling nia kan kombinasyon na kolor kahel asin de kape an paghona nia iyan saro sanang impala, alagad sa huri naheling nia sa mga gira na idto sarong leon! Sa ibong kan siring na mga peligro, natapos kan mga tugang an edipisyo, asin iyan nagtitindog bilang sarong “nagkikilyab” na gikanan nin pag-omaw ki Jehova.

Makahulogan na aldaw an Pebrero 1, 1963, sa teokratikong kasaysayan kan Kenya. Binuksan sa aldaw na iyan an enot na sangang opisina, saro sanang kuarto na may sokol na 7.4 metro kuadrado. An Oktubre 25, 1997, saro pang makahulogan na pangyayari sa teokratikong kasaysayan kan Kenya​—an aldaw na idinedikar an bagong grupo nin mga edipisyo kan Bethel na may sokol na 7,800 metro kuadrado! An natapos nang proyekto sarong marahayon na kulminasyon kan tolong taon nin dusay na pagtrabaho. Liniwat kan mga boluntaryo na hale sa 25 manlaenlaen na nasyon an malaboy, madoot na 3.2 ektaryang oma na magin sarong magayon na garo hardin na kamugtakan para sa pasilidad kan bagong sangang opisina, na istaran nin 80 miembro kan pamilyang Bethel.

Igwa kita kan gabos na dahelan na maggayagaya sa ginibo ni Jehova para sa saiyang banwaan. Huli sa tabang nia napahiro an puso kan saiyang mga lingkod tanganing humiwas asin dagdagan an paghanap sa mga maninigo sa Kenya, na ginigibo iyan na nasyon nin espirituwal na kagayonan.

[Nota sa Ibaba]