Saen Kamo Makanonompong nin Panlaog na Katoninongan?

Kadakol kan kalaenan kan panahon niato asin kan ki Thoreau, na nasambitan sa sinundan na artikulo. An sarong dakulang kalaenan iyo na sa ngonyan dai nagkukulang an sadol sa kun paano magkakaigwa nin katoninongan sa isip. An mga sikologo asin parasurat nin mga librong giya sa personal na pag-oswag—pati mga kolumnista sa peryodiko—nagtatao kan saindang mga ideya. An saindang sadol puedeng sarong tabang na panmadalian; alagad para sa panhaloyan na mga solusyon, sarong bagay na mas hararom an kaipuhan. Iyan an nadiskobre kan mga indibiduwal na nasambitan sa sinundan na artikulo.

SI Antonio, Marcos, Gerson, Vania, asin Marcelo magkakalaen an kamugtakan asin mga problema. Alagad igwa sinda nin kisuerra tolong bagay na magkakapareho. Enot, nagkaigwa nin panahon na sinda ‘mayo nin paglaom asin mayo nin Dios sa kinaban.’ (Efeso 2:12) Ikaduwa, naghimuyawot sinda nin katoninongan sa isip. Asin ikatolo, nanompongan ninda gabos an panlaog na katoninongan na mawot ninda pakatapos na akoon ninda an pag-adal sa Biblia kaibanan kan mga Saksi ni Jehova. Mantang sinda nag-ooswag, narealisar ninda na an Dios interesado sa sainda. Tunay nanggad, siring kan sabi ni Pablo sa mga taga Atenas kan saiyang kaaldawan, an Dios “bakong harayo sa lambang saro sa sato.” (Gibo 17:27) An pagigin odok sa boot na kombensido kaini mahalagang marhay sa pagkaigwa nin panlaog na katoninongan.

 Taano ta Kakadikit an Katoninongan?

An Biblia nagtatao nin duwang pundamental na rason sa kadaihan nin katoninongan sa kinaban —baga man panlaog na katoninongan o katoninongan sa pag-oltanan nin mga tawo. An enot ipinaliliwanag sa Jeremias 10:23: “Bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” An tawo mayo kan kadonongan ni pakarorop na pamahalaan an saiyang sadiri na mayo nin tabang, asin an solamenteng tabang na igwa nin tunay na halaga naggigikan sa Dios. An mga tawo na dai naghahagad kan paggiya nin Dios nungkang magkakamit nin nagdadanay na katoninongan. An ikaduwang rason sa kawaran nin katoninongan maheheling sa mga tataramon ni apostol Juan: “An bilog na kinaban namumugtak sa kapangyarihan kan maraot.” (1 Juan 5:19) Kun mayo kan paggiya nin Dios, an mga paghihingoa nin tawo na kamtan an katoninongan pirmeng masusudya huli sa mga aktibidad kan dai naheheling alagad totoong-totoo—asin makapangyarihan na marhay—na “maraot,” si Satanas.

Huli sa duwang rason na ini—na an kadaklan na tawo dai naghahagad kan paggiya nin Dios asin na si Satanas aktibong marhay sa kinaban—an rasa nin tawo sa kabilogan nasa miserableng kamugtakan. Tama an pagkaladawan kaiyan ni apostol Pablo: “An gabos na linalang padagos na nag-aaragrangay asin nagtitios nin kolog sagkod ngonyan.” (Roma 8:22) Siisay an puedeng kumontra sa paghusgar na iyan? Sa mayayaman na nasyon siring man sa mga dukha, an mga problema sa pamilya, krimen, inhustisya, pagkakatumang nin personalidad, pagkadaing kasegurohan sa ekonomiya, pagkainongisan nin mga tribo asin rasa, pan-aapi, helang, asin dakol pa, hinahalean an mga tawo kan saindang katoninongan sa isip.

Kun Saen Manonompongan an Panlaog na Katoninongan

Kan si Antonio, Marcos, Gerson, Vania, asin Marcelo mag-adal kan Tataramon nin Dios, an Biblia, may nanodan sinda na nakapabago kan saindang buhay. Sarong bagay, nanodan ninda na maabot an aldaw maliliwat an situwasyon sa kinaban. Ini bako sanang malibog na paglaom na an gabos na bagay magigin marahay sa katapustapusi. Iyan tunay, masarig an basehan na kompiansa na an Dios igwa nin katuyohan para sa katawohan asin na dawa ngonyan puede kitang makinabang sa katuyohan na iyan kun gigibohon ta an saiyang kabotan. Iinaplikar ninda sa saindang buhay an nanodan ninda sa Biblia, asin naparahay sinda. Nakanompong sinda nin orog na kaogmahan asin katoninongan kisa hinona nindang mahihimo ninda.

Si Antonio dai na nakikilabot sa mga protesta asin pakikilaban nin mga trabahador. Aram nia na an mga pagbabagong pinapangyayari sa siring na paagi limitado asin temporaryo sana. Nanodan kan dating lider na ini nin mga trabahador an manongod sa Kahadean nin Dios. Iyan an Kahadean na ipinamimibi nin minilyon kun sinda namimibi kan Pamibi kan Kagurangnan (o, an Ama Niamo) asin nagsasabi sa Dios: “Dumatong an kahadean mo.” (Mateo 6:10a, New International Version) Nanodan ni Antonio na an Kahadean nin Dios sarong tunay na langitnon na gobyerno na matao nin tunay na katoninongan sa katawohan.

Si Marcos nakanood na iaplikar an madonong na hatol kan Biblia dapit sa pag-agom. Bilang resulta, an dating politiko na ini maogma na ngonyan na kaibanan giraray an saiyang agom. Inaantisipar man nia an panahon, na madali nang dumatong, na an mahanab, paslong sistema kan kinaban na ini sasalidahan kan Kahadean nin Dios nin mas marahay na sistema. Mas hararom an pakasabot nia sa mga tataramon sa Pamibi kan Kagurangnan na nagsasabi: “Gibohon an boot mo digdi sa daga nin siring sa langit.” (Mateo 6:10b, NIV) Kun magibo na an kabotan nin Dios digdi sa daga, maeeksperyensiahan kan mga tawo an kualidad nin buhay na dai pa noarin man namatean kaidto.

Kumusta man si Gerson? Sia bako nang layas asin parahabon. An buhay kan aking ini na dati nabubuhay sa kalye igwa na ngonyan nin kahulogan huli ta ginagamit nia an saiyang kosog sa pagtabang sa iba na makanompong nin panlaog na katoninongan. Siring sa ipinaheheling kan mga eksperyensiang ini, an pag-adal sa Biblia asin pag-alikar kan sinasabi kaiyan makakapabago nin dakula sa buhay nin saro na magin mas marahay.

 Panlaog na Katoninongan sa Maribok na Kinaban

An pangenot na makasaysayan na personahe sa paghaman kan kabotan nin Dios iyo si Jesu-Cristo, asin kun an mga tawo nakikipag-adal sa Biblia sa mga Saksi ni Jehova, kadakol sindang nanonodan manongod sa saiya. Kan banggi na sia mamundag, an mga anghel nag-awit nin mga pag-omaw sa Dios: “Kamurawayan sa Dios sa kaitaasan, asin sa daga katoninongan sa mga tawo na igwa nin marahay na boot.” (Lucas 2:14) Kan si Jesus magdakula, may pagmakolog sia sa ikararahay kan buhay nin mga tawo. Inintindi nia an saindang mga saboot asin nagpaheling sia nin ekstraordinaryong pakikidamay sa mga nagsasakit nin makuri asin may helang. Asin, kaoyon kan mga tataramon kan mga anghel, nagtao sia nin igong panlaog na katoninongan sa mga mahoyo. Sa katapusan kan saiyang ministeryo, nagsabi sia sa saiyang mga disipulo: “Winawalatan ko kamo nin katoninongan, itinatao ko sa saindo an sakong katoninongan. Dai ko iyan itinatao sa saindo siring sa pagtao kaiyan kan kinaban. Dai mahadit an saindong puso ni matakot man.”—Juan 14:27.

Si Jesus labi pa sa sarong humanitaryo. Ibinaing nia an saiyang sadiri sa sarong pastor, asin iinagid nia sa mga karnero an saiyang mahoyong mga parasunod kan sia magsabi: “Ako napadigdi tanganing sinda magkaigwa nin buhay asin makamtan iyan nin abunda. Ako iyo an marahay na pastor; an marahay na pastor minatao kan saiyang kalag para sa mga karnero.” (Juan 10:10, 11) Iyo, kabaliktaran sa kadakol na namomoon ngonyan na an pangenot na inaasikaso iyo an saindang sadiri, itinao ni Jesus an saiyang buhay para sa saiyang mga karnero.

Paano kita makikinabang sa ginibo ni Jesus? An dakol pamilyar sa mga tataramon na: “An Dios namoot na gayo sa kinaban na itinao nia an saiyang Aking bugtong, tanganing an lambang naggigibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) An paggibo nin pagtubod ki Jesus naghahagad nin, enot sa gabos, kaaraman manongod sa saiya asin sa saiyang Ama, si Jehova. An kaaraman dapit sa Dios asin ki Jesu-Cristo puedeng maggiya pasiring sa dayupot na relasyon ki Jehova Dios na matabang sa sato na magkaigwa nin katoninongan sa isip.

Si Jesus nagsabi: “An sakong mga karnero naghihinanyog sa sakong tingog, asin midbid ko sinda, patin sinda nagsusunod sa sako. Asin ako nagtatao sa sainda nin buhay na daing katapusan, asin dai sinda noarin man mapapahamak, asin mayo nin siisay man na maagaw sa sainda sa sakuyang kamot.” (Juan 10:27, 28) Abaa kamamomoton, kanakararangang mga tataramon! Totoo, sinabi iyan ni Jesus kaidto pang haros duwang ribong taon na an nakaagi, alagad ngonyan igwa iyan nin puersa na kapareho kaidto. Nungkang paglingawan na si Jesu-Cristo buhay asin aktibo sagkod ngonyan, na namamahala ngonyan bilang an pinatukaw sa trono na Hade sa langitnon na Kahadean nin Dios. Siring kan sia nabuhay digdi sa daga sa dakol na taon na idto na nakaagi, sia may pagmakolog pa man giraray sa mga mahoyo na naghihimuyawot nin katoninongan sa isip. Dugang pa, sia pa man giraray an Pastor kan saiyang mga karnero. Kun susundon ta sia, tatabangan nia kita na magkaigwa nin panlaog na katoninongan, na kabale an kompiadong paghalat na mamatean sa ngapit an lubos na katoninongan—na mangangahulogan nin kadaihan nin kadahasan, guerra, asin krimen.

An tunay na mga pakinabang nakakamtan paagi sa pagkaaram asin pagtubod na si Jehova, paagi ki Jesus, tatabangan kita. Natatandaan nindo si Vania, na aki pa winalatan na nin magabat na mga responsibilidad asin naghona na sia liningawan na nin Dios? Ngonyan aram ni Vania na sia dai pinabayaan nin Dios. Sabi nia: “Nanodan ko na an Dios tunay na persona na may kawiliwiling mga kualidad. An saiyang pagkamoot pinahiro sia na isugo an saiyang Aki digdi sa daga tanganing tawan kita nin buhay. Importanteng marhay na maaraman ini.”

Si Marcelo nagpapatotoo na tunay an saiyang relasyon sa Dios. An dating mahilig sa mga parti na ini nagsasabi: “Sa parate dai aram kan mga hoben kun ano an gigibohon, asin sa kahurihurihi ipinapahamak sana ninda an saindang sadiri. An nagkapira nagdodroga, arog kan ginibo ko. Linalaoman ko na dakol pa an mabebendisyonan, arog ko, paagi sa pag-adal kan katotoohan manongod sa Dios asin sa saiyang Aki.”

Paagi sa maingat na pag-adal sa Biblia, si Vania asin Marcelo nakapatalubo nin makosog na  pagtubod sa Dios asin nin kompiansa sa saiyang pagigin andam na tabangan sindang maresolberan an saindang mga problema. Kun aarogon ta an ginibo ninda—pag-adalan an Biblia asin iaplikar an sinasabi kaiyan—makanonompong kita nin igong panlaog na katoninongan, siring sa sainda. Kun siring an pagparigon sa boot ni apostol Pablo talagang maaplikar sa kamugtakan niato: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.”—Filipos 4:6, 7.

Pakanompong nin Tunay na Katoninongan Ngonyan

Ginigiyahan ni Jesu-Cristo an mga tawong nagugutom sa katotoohan sa dalan na pasiring sa buhay na daing katapusan sa sarong daganon na paraiso. Mantang ginigiyahan nia sinda sa dalisay na pagsamba sa Dios, nakaeeksperyensia sinda nin katoninongan na kapareho kan ilinaladawan sa Biblia: “An sakuyang banwaan kaipuhan na mag-erok sa matoninong na erokan asin sa mga harong na may lubos na kompiansa patin sa trangkilong mga pahingaloan.” (Isaias 32:18) Asin iyan panamit sana kan katoninongan na kakamtan ninda sa ngapit. Satong mababasa: “An mga mahoyo mismo makasasadiri kan daga, asin manonompongan nanggad ninda an saindang nangongorog na dakulang kaogmahan sa nagsosopay na katoninongan. An mga matanos mismo magmamana kan daga, asin sinda mag-eerok dian sagkod lamang.”—Salmo 37:11, 29.

Kaya puede daw kitang magkaigwa nin panlaog na katoninongan ngonyan? Iyo. Apuera dian, makaseseguro kita na sa harani nang ngapit, bebendisyonan nin Dios an makinuyog na katawohan nin katoninongan na orog kasuarin man. Kun siring, taano ta dai hagadon sa saiya sa pamibi na itao sa saindo an saiyang katoninongan? Kun kamo may mga problema na nakahahale kan saindong katoninongan, mamibi nin arog kan pamibi ni Hadeng David: “An mga kasakitan kan sakuyang puso nagdakol; kaldahon mo ako sa sakuyang mga kasakitan. Helinga an sakuyang kasakitan asin an sakuyang problema, asin patawadan an gabos kong kasalan.” (Salmo 25:17, 18) Makasisierto kamo na an Dios naghihinanyog sa siring na mga pamibi. Inuunat nia an saiyang kamot asin itinatao an katoninongan sa gabos na naghahanap kaiyan nin odok sa puso. Kita mamomoton na inaasegurar: “Si Jehova harani sa gabos na nag-aarang sa saiya, sa gabos na nag-aapod sa saiya sa katotoohan. Ootobon nia an mawot kan mga natatakot sa saiya, asin dadangogon nia an agrangay ninda na tabangan, asin sinda saiyang ililigtas.”—Salmo 145:18, 19.

[Blurb sa pahina 5]

An tawo mayo kan kadonongan ni pakarorop na pamahalaan an saiyang sadiri na mayo nin tabang, asin an solamenteng tabang na igwa nin tunay na halaga naggigikan sa Dios

[Blurb sa pahina 6]

An kaaraman dapit sa Dios asin ki Jesu-Cristo puedeng maggiya pasiring sa dayupot na relasyon ki Jehova Dios na matabang sa sato na magkaigwa nin katoninongan sa isip

[Ritrato sa pahina 7]

An pagsunod sa hatol kan Biblia nakakokontribwir sa matoninong na buhay pampamilya