1-2. Aha do na lao taulas di artikel on?

 MARSAK do ra hita molo sai tapikkiri ngolutta na “gok hasusaan” jala na parsatokkinan on. (Job 14:1, Bibel siganup ari) Godang do akka naposo ni Debata na disurat di Bibel makkilala sisongon i. Jala adong do sian nasida na sappe mangido mate. (1 Raj. 19:2-4; Job 3:1-3, 11; 7:15, 16) Alai sai diurupi Jahowa do nasida jala dipatogu. Disurat do pengalaman ni nasida i asa boi mangajari hita jala mangapuli rohatta.​—Rom 15:4.

² Di artikel on marsiajar ma hita sian si Josep anak ni si Jakkob, si Naomi dohot parumaenna si Rut, halak Lepi na manurat Psalmen 73, dohot sian Apostel Petrus. Taida ma songon dia nasida toktong togu nang pe marsitaonon nasida. Songon dia do dibahen Jahowa patoguhon nasida? Jala aha do na boi taparsiajari sian pengalaman ni nasida? Alus ni sukkun-sukkun on paposson rohatta na “jonok do Jahowa tu halak na mandele” jala “dipalua Ibana do akka halak na marmetmet ni roha”.​—Ps. 34:18, NWT.

3-4. Aha do na masa tu si Josep tikki poso dope ibana?

³ Tikki marumur si Josep hira-hira 17 taon, hea do ibana dua hali marnipi jala sian Debata do nipina i. Arti ni nipina i paboahon na lao ussangap do ibana sian sude keluargana. (1 Mus. 37:5-10) Alai dang sadia leleng dung marnipi ibana, pittor muba ma parngoluon ni si Josep. Di tikki i, leas hian do roha ni akka abangna tu si Josep. Dijual ma ibana, dung i gabe hatoban ma ibana di Mesir di jabu ni si Potipar. (1 Mus. 37:21-28) Toppu do muba parngoluon ni si Josep. Anak hasian ni bapakna hian do ibana alai gabe  hatoban ma ibana di Mesir, di jabu ni halak na so manomba Jahowa.​—1 Mus. 39:1.

⁴ Lam haccit do muse parngoluon ni si Josep, ai ditudu do ibana naeng memerkosa istri ni si Potipar. Pittor dipenjarahon si Potipar ma ibana jala diratte. Dang jolo dipastihon si Potipar tutu do manang na dang tuduhan i. (1 Mus. 39:14-20; Ps. 105:17, 18) Poso dope si Josep di tikki i. Coba ma bayangkon songon dia pakkilalaanna ala ditudu ibana memerkosa istri ni halak. Olo do ra gabe roa goar ni Jahowa alani na masa i. Pasti metmet do roha ni si Josep di tikki i.

5. Aha do na diulahon si Josep asa unang sai torus metmet rohana?

⁵ Tikki gabe hatoban si Josep jala dipenjara, dang adong na boi tarbahen ibana manguba situasi i. Attong aha do na dibahen ibana asa unang sappe mandele? Dang sai dipikkiri akka ulaon na so boi diulahon ibana, alai ringgas do ibana makkarejoi tugasna. Torus do ibana marsitutu pasonakkon roha ni Jahowa. Ujungna, dipasu-pasu Jahowa do sude na diulahon si Josep.​—1 Mus. 39:21-23.

6. Aha do labana ala dirimangi si Josep nipina i?

⁶ Olo do ra sai dirimangi si Josep nipina i, gabe boi ma ibana togu jala marlas ni roha. Diboto do sian nipina i na lao pajuppang do ibana muse dohot keluargana jala pasti muba do situasina. Toho do saut nipina i. Masa ma i tikki marumur 37 taon si Josep jala luar biasa do cara ni Debata pasautton i.​—1 Mus. 37:7, 9, 10; 42:6, 9.

7. Songon dia do 1 Petrus 5:10 mangurupi hita asa unang marmetmet ni roha tikki masa hasusaan?

⁷ Parsiajaranna tu hita. Pengalaman ni si Josep paingotton hita kejam do akka halak na di portibi on jala olo do susa hita dibahen. Sipata akka dongan di huria pe olo do mambahen haccit rohatta. Alai tabahen ma Jahowa inganan parlinggomatta asa unang metmet rohatta jala gabe  mandao sian Ibana. (Ps. 62:7, 8; jaha 1 Petrus 5:10.) Songon si Josep, taingot ma hira-hira marumur 17 taon do ibana tikki mandapot nipi sian Jahowa. On ma buktina na pos do roha ni Jahowa tu akka na poso. Saonari godang do akka na poso maniru si Josep. Porsea do nasida tu Jahowa. Godang do sian nasida na dipenjarahon ala dang olo nasida mangalo paretta ni Jahowa.​—Ps. 110:3.

8. Aha do na masa tu si Naomi dohot si Rut?

⁸ Tikki masa haraparon di Juda, pinda ma si Naomi dohot keluargana tu luat na asing, i ma huta ni halak Moab. Adong dua anak ni si Naomi. Di pudian ni ari mate ma suamina si Elimelek, jadi holan anakna na dua i nama donganna tinggal. Dung i mangoli ma anakna i tu boru Moab, i ma si Rut dohot si Orpa. Hira-hira sappulu taon dukkon i mate ma anak ni si Naomi na dua i, jala dang sanga dope margelleng nasida. (Rut 1:1-5) Bayangkon hamu ma songon dia lungun ni roha ni si Naomi dohot parumaenna i. Memang boi do muli muse akka parumaenna i, alai ise ma annon na mangurus si Naomi ai nungnga matua ibana. Tikki i marsak hian do si Naomi jala mandele do ibana. Sappe didok ibana do, “Unang be si Naomi ahu dok hamu, alai si Mara na ma! Ai paet do ngolungku dibahen Namarhuaso i.” Ujungna mulak do muse si Naomi tu Betlehem jala dohot do si Rut mandongani ibana.​—Rut 1:7, 18-20, Bibel siganup ari.

9. Songon na didok di Rut 1:16, 17, 22, aha do na diulahon si Rut lao patuduhon holongna tu si Naomi?

⁹ Aha do na mangurupi si Naomi asa unang mandele? Holong ni roha. Misalna, dipatudu si Rut do holong ni roha tu si Naomi jala toktong do didongani ibana simatuana i. (Jaha Rut 1:16, 17, 22.) Dung sahat di Betlehem, ringgas do si Rut papunguhon gandum asa adong allangon ni nasida. Alani i tarbarita do si Rut borua na burju jala na ringgas karejo.​—Rut 3:11; 4:15.

10. Aha do buktina na holong roha ni Jahowa tu akka na pogos songon si Naomi dohot si Rut?

¹⁰ Adong do patik na dilehon Jahowa tu halak Israel lao patuduhon asi ni rohana tu akka halak na pogos songon si Naomi dohot si Rut. Diparettahon Debata do tu bangsona asa ditinggalhon sisa ni panen na adong di pinggir ni ladang ni nasida tu akka na pogos. (3 Mus. 19:9, 10) Alani i, dang pola porlu mangido-ido sipanganon si Rut dohot si Naomi.

11-12. Aha do na dibahen si Boas lao mangurupi si Naomi dohot si Rut?

¹¹ Di ladang ni si Boas do si Rut mambuat sisa ni panen. Sahalak bawa na mora do si Boas. Massai las do roha ni si Boas mangida si Rut. Alana, dipatudu si Rut do holong ni rohana tu si Naomi. Di pudian ni ari, dibahen si Boas ma si Rut gabe istrina. Dituhor si Boas ma muse tano ni keluarga ni si Naomi, asa boi i gabe warisan ni anak ni si Rut. (Rut 4:9-13) Si Obed do goar ni anak ni nasida i. Jala ibana ma na gabe oppung ni Raja Daud.​—Rut 4:17.

¹² Bayangkon ma las ni roha ni si Naomi tikki mangabing si Obed. Pasti mandok mauliate do ibana tu Jahowa. Alai dang holan i na mambahen las roha ni si Naomi dohot si Rut. Molo dung dipahehe nasida, botoonna ma si Obed do ompu ni Messias, i ma Jesus Kristus!

13. Aha do na boi taparsiajari sian pengalaman ni si Naomi dohot si Rut?

¹³ Parsiajaranna tu hita. Molo susa hita, olo do gabe metmet rohatta jala mandele.  Sipata olo do didok rohatta dang marna sae sitaononta i. Tikki tahilala songon i, pos ma rohatta tu Jahowa jala unang ma mandao hita sian akka dongan di huria. Tottu, dang sai sude dipasiding Jahowa hasusaatta i. Songon si Naomi, dang pittor dipahehe Debata suamina dohot anakna na dua i. Alai sai diurupi Jahowa do hita. Olo do dipakke Ibana akka dongan na di huria patuduhon holong tu hita.​—Poda 17:17.

14. Aha do na mambahen sahalak panurat Psalmen marmetmet ni roha?

¹⁴ Sahalak bawa marga Lepi do na manuratton Psalmen 73. Jadi martugas di bagas joro do ibana. Alai hea do metmet rohana. Boasa marmetmet ni roha ibana? Ala cemburu ibana mangida halak na jahat mamora. Tikki diida ibana halak na jahat, hira na so adong do na hurang di nasida. Mamora do nasida, sonang ngoluna, jala dang adong na dipikkiri. Jadi gabe metmet ma roha ni panurat Psalmen on mangida i. Sappe didok ibana do, “Na so adong do gunana na sai burju i ahu, dohot na sai ias tanganku sian angka hajahaton i?” (Ps. 73:2-9, 11-14, Bibel siganup ari) Molo torus do songon i pakkilalaanna, boi do gabe dang disomba ibana be Jahowa.

15. Songon na disurat di Psalmen 73:16-19, 22-25, aha do na dibahen panurat Psalmen on asa unang metmet be rohana?

¹⁵ Jaha Psalmen 73:16-19, 22-25. Dung i lao ma halak Lepi i, “tu inganan ni Debata na badia”. Disi, dibereng ibana ma akka sisomba Jahowa. Martangiang ma ibana, gabe dame ma rohana. Gabe boi ma dipadenggan ibana cara marpikkirna. Ujungna diboto ibana ma, dang marbisuk molo torus songon i pakkilalaanna. Jala boi do i manegai parale-aleonna tu Jahowa. Diattusi ibana ma na mardalan di inganan na “landit” do akka parjahat i jala ngeri do ujungna. Asa unang sai cemburu be ibana mangida akka parjahat, ikkon tiruonna do cara marpikkir ni Jahowa.  Ala diulahon ibana i, gabe las ma rohana jala dang metmet be rohana. Didok ibana ma, “Dungkon ni [Jahowa] ndang adong dihalomohon rohangku di tano on.”

16. Aha do na boi taparsiajari sian sahalak panurat Psalmen?

¹⁶ Parsiajaranna tu hita. Unang ma cemburu hita mangida halak parjahat na sonang ngoluna. Hasonangan parsatokkinan do i jala dang boi nasida mangolu saleleng ni lelengna. (Pjm. 8:12, 13) Molo cemburu hita tu nasida, boi do gabe metmet rohatta jala gabe sega parale-aleotta tu Jahowa. Molo hea tahilala songon na dihilala halak Lepi on, tatiru ma cara ni ibana mangatasi masalah i. Oloi ma poda ni Jahowa jala torus ma marale-ale tu akka halak na mangulahon lomo ni roha ni Jahowa. Molo umholong do rohatta tu Jahowa sian manang aha pe, dapotta ma las ni roha na sasittongna. Dung i, boi ma dapotta “hangoluan na saleleng ni lelengna”.​—1 Tim. 6:19.

17. Aha do na mambahen metmet roha ni si Petrus?

¹⁷ Halak na semangat do Apostel Petrus. Alai olo do sipata pahatoppu makkatai jala bertindak, dang jolo dipikkiri. Alani i, gabe manolsoli ma ibana di pudian ni ari. Misalna, tikki dipaboa Jesus tu akka siseanna na ikkon marsitaonon do ibana jala mate, pittor hatop do didok si Petrus songon on, “Ndang na laho masa i tu ho.” (Mat. 16:21-23) Gabe dipissang Jesus ma ibana. Tikki ro rombongan na naeng manakkup Jesus, pittor hatop do si Petrus mambuat podangna jala ditallik ma pinggol ni sahalak hatoban ni sintua ni malim. (Joh. 18:10, 11) Dipissang Jesus ma muse ibana. Asing ni i, hea do didok si Petrus na so tinggalhononna Jesus nang pe sude apostel maninggalhon Jesus. (Mat. 26:33) Alai dang songon i na masa, mabiar do ibana tu jolma. Gariada, didok ibana do na so  ditanda ibana Jesus sappe tolu hali. Gabe metmet ma roha ni si Petrus alani i. “Laho ma ibana tu luar jala tumatangis situtu.” (Mat. 26:69-75) Sukkun-sukkun ma rohana, olo dope nuaeng Jesus manalpuhon hasalaanna i manang na dang.

18. Songon dia do Jesus mangurupi si Petrus asa unang torus marmetmet ni roha?

¹⁸ Alai dang sai marmetmet ni roha si Petrus. Torus do ibana manomba Jahowa rap dohot akka apostel na asing. (Joh. 21:1-3; Ul. 1:15, 16) Aha do na mangurupi si Petrus boi songon i? Diingot ibana do tikki ditangiakkon Jesus ibana asa unang mago haporseaonna. Diingot ibana do muse hata ni Jesus, ikkon patoguonna do akka donganna molo dung togu ibana. Ditangihon Jahowa do tangiang ni Jesus i. Alana di pudian ni ari, dijuppangi Jesus do si Petrus lao patoguhon ibana. (Luk. 22:32; 24:33, 34; 1 Kor. 15:5) Tikki manjala dekke akka siseanna di sada borngin, ro ma Jesus manjuppangi nasida. Di tikki i ma dipatogu Jesus si Petrus. Gabe adong ma kesempatan ni si Petrus lao patuduhon holongna tu Jesus. Nungnga disalpuhon Jesus be hasalaan ni si Petrus jala dilehon do tu ibana tugas.​—Joh. 21:15-17.

19. Aha do na taparsiajari taringot Jahowa sian Psalmen 103:13, 14?

¹⁹ Parsiajaranna tu hita. Asi ni roha ni Jesus tu si Petrus manggombarhon asi ni roha ni Debata. Jadi molo taulahon na sala, unang ma didok rohatta, dang na lao sesaon ni Jahowa dosatta. Ai las do roha ni Sibolis molo songon i pakkilalaatta. Taingot ma, massai holong do roha ni Jahowa tu hita. Jala diboto Ibana do na jotjot hita sala. Alani i ma rade Ibana manalpuhon hasalaatta. Hita pe molo adong dongan na mambahen haccit rohatta, tatiru ma Jahowa.​—Jaha Psalmen 103:13, 14.

20. Aha do na lao taparsiajari di artikel na mangihut?

²⁰ Sian pengalaman ni si Josep, si Naomi dohot si Rut, halak Lepi, dohot si Petrus, gabe pos ma rohatta na “jonok do Jahowa tu akka halak na mandele”. (Ps. 34:18, NWT) Olo do sipata dipasombu Ibana hita marsitaonon jala gabe marmetmet ni roha. Alai boi do hita marhasil mangadopi i molo tapangido Jahowa mangurupi hita. Tikki marhasil hita, lam togu ma haporseaotta. (1 Ptr. 1:6, 7) Di artikel na mangihut, lao taida ma songon dia akka donganta marhasil mangatasi metmet ni roha alani hagaleon manang situasi na maol. Jala taida ma songon dia Jahowa mangurupi nasida.