1 Raja-Raja 19:1-21
19 Dung i dipaboa si Ahab+ ma tu si Izebel+ sude na binahen ni si Elia. Dipaboa ma muse naung dibunu si Elia sude panurirang ni Baal mamakke podang.+
2 Disuru si Izebel ma halak mandapotton si Elia lao mandok, “Marsogot, hira-hira di tikki sisongon on, bahenokku ma tu ho songon na binahenmu tu akka panurirang na pinamatemi. Molo dang hubahen songon i tu ho, sai borat ma au hukumon ni akka debata.”
3 Gabe mabiar ma si Elia alani i. Dung i lari ma ibana asa unang dipamate.+ Sahat ma ibana di Ber-seba+ huta ni halak Juda.+ Jala ditinggalhon ibana ma disi halak na mangurupi ibana.
4 Mardalan pat ma ibana sadari manipat tu gurun. Hundul ma ibana di toru ni ramba-ramba. Dipangido ibana ma asa mate ibana. Didok ma, “Ale Jahowa, nga sae be i! Pamate ma au!+ Ai dang dumenggan au sian akka ompukku.”
5 Dung i, dipapeak si Elia ma di toru ni ramba-ramba i jala tarpodom ma ibana disi. Alai toppu ma ro sada suru-suruan, dijama ma ibana+ jala didok ma, “Hehe ma ho jala mangan.”+
6 Diida ibana ma adong akka batu na mohop di labbung ni uluna jala adong sada roti na bulat disi. Diida ibana ma muse inganan panginuman na marisi aek. Mangan ma ibana jala minum, dung i modom ma muse.
7 Ro ma muse suru-suruan ni Jahowa i. Dijama ma si Elia jala didok ma, “Hehe ma ho jala mangan, asa margogo ho. Ai ganjang dope sidalananmu.”
8 Hehe ma si Elia, mangan ma ibana jala minum. Gabe margogo ma ibana muse. Dung i mardalan ma ibana saleleng 40 ari 40 borngin tu Horeb, i ma dolok ni Debata na sittong.+
9 Dung sahat disi, masuk ma ibana tu sada liang*+ jala marborngin ma ibana disi. Dung i didok Jahowa ma tu ibana, “Marhua ho dison Elia?”
10 Dialusi si Elia ma, “Nungnga takkas hupatudu, holan Debata Jahowa Pamimpin ni Akka Tentara* i do na husomba,+ nang pe dilanggar halak Israel parjanjian naung binahenmi.+ Diruppakkon nasida do akka langgatanmu, jala dipamate nasida do akka panurirangmu* mamakke podang.+ Holan au nama na mangolu. Jala saonari dilului nasida do au asa pamateonna.”+
11 Alai didok Debata ma, “Kaluar ma ho jala jongjong ma ho di ginjang ni dolok na di jolo ni Jahowa.” Lewat ma Jahowa sian jolo ni si Elia.+ Dung i mangullus ma alogo na massai gogo. Gabe mabola ma akka dolok i jala marputtaran ma akka dolok batu na di jolo ni Jahowa.+ Alai dang di bagasan alogo i Jahowa. Dukkon i masa ma gempa,+ alai dang di bagasan gempa i Jahowa.
12 Dung i ro ma api,+ alai dang di bagasan api i Jahowa. Dukkon i tarbege ma soara na nanget jala na lambok.+
13 Disi dibege si Elia soara i, ditutup ibana ma bohina mamakke abitna.*+ Kaluar ma ibana jala jongjong ma ibana di dalan masuk ni liang i. Disukkun soara i ma ibana, “Marhua ho dison Elia?”
14 Dialusi si Elia ma, “Nungnga takkas hupatudu, holan Debata Jahowa Pamimpin ni Akka Tentara i do na husomba, nang pe dilanggar halak Israel parjanjian naung binahenmi.+ Diruppakkon nasida do akka langgatanmu, jala dipamate nasida do akka panurirangmu mamakke podang. Holan au nama na mangolu. Jala saonari dilului nasida do au asa pamateonna.”+
15 Didok Jahowa ma tu si Elia, “Mulak ma ho jala lao ma ho tu gurun na di Damaskus. Dung sahat ho disi, bahen* ma si Hasael+ gabe raja ni Siria.
16 Dung i, bahen* ma si Jehu+ pahoppu ni si Nimsi gabe raja ni Israel. Jala bahen* ma si Elisa* anak ni Sapat na sian kota Abel-mehola, gabe panurirang manggattihon ho.+
17 Manang ise na malua sian podang ni si Hasael,+ pamateon ni si Jehu ma.+ Manang ise na malua sian podang ni si Jehu, pamateon ni si Elisa ma.+
18 Adong dope 7.000 halak nai di Israel+ na so olo marsomba tu patung ni Baal,+ jala na so olo mangumma patung ni Baal.”+
19 Dung i, turun ma si Elia sian dolok i jala diida ibana ma si Elisa anak ni si Sapat. Tikki i, rap do si Elisa dohot 12 pasang lombu jantan na mambajak di jolona. Jala di labbung ni lombu jantan na parpudi do si Elisa. Dung i, didapotton si Elia ma si Elisa jala dibahen ma abitna*+ tu si Elisa.
20 Pittor ditinggalhon si Elisa ma akka lombuna i jala diihutton ibana ma si Elia. Didok ibana ma tu si Elia, “Jolo parmisi ma au tu* natua-tuakku da. Dung i, huihutton pe ho.” Didok si Elia ma, “Boi. Lao ma ho.”
21 Alani i mulak ma si Elisa tu jabuna. Dibuat ibana ma sapasang lombu jantan jala dipelehon ma i. Akka hau na sian bajak i ma na dipakke ibana gabe soban lao mangarobus jagal ni lombu i. Dibagi-bagihon ibana ma i tu akka halak jala mangan ma nasida. Dung i, diihutton ibana ma si Elia. Mulai sian i, diurupi ibana ma si Elia.+
Surat na di toru
^ Manang “gua”.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang “abit ni panurirang”.
^ Lapatanna, “Debata do Sipalua”.
^ Manang “abit ni panurirang”.
^ As. “Jolo huumma ma”.
