LOMO do rohanta molo ditanda hita sahalak na marpangalaho na denggan. Alai saonari on, maol do patuduhon pangalaho na denggan. Alana, godang halak “mangkasogohon na denggan”. (2 Tim. 3:3) Ra, diihuthon nasida do lomo ni rohana sandiri. Ujungna, didok nasida ma ‘hajahaton i na denggan, jala na denggan i hajahaton’. (Jes. 5:20, Bibel siganup ari) Asing ni i, ala ndang sempurna hita manang ala hea dibahen na so denggan tu hita, gabe maol ma patuduhon pangalaho na denggan. Olo do ra pangkilalaanta songon si Anne naung martaon-taon gabe Sitindangi. Didok, “Ra ndang boi ahu gabe halak na marpangalaho na denggan.”

Nang pe songon i, sude hita boi do marpangalaho na denggan! Alana on sada sian parbue ni tondi. Jala umgogo do tondi on sian manang aha pe na mangambati hita patuduhon pangalaho na denggan. Saonari, taulas ma lapatan ni pangalaho na denggan jala songon dia patuduhon i.

Pangalaho na denggan lapatanna, ndang mangulahon na jahat manang na roa. Halak na marpangalaho na denggan, i ma halak na burju, tigor, jala jujur. Jala lomo do rohana mangurupi halak na asing.

Ra, hea do taida piga-piga halak patuduhon pangalaho na denggan holan tu keluargana dohot tu angka donganna. Alai ndang sae holan i. Tontu, ndang adong sian hita na boi sempurna patuduhon pangalaho na denggan. Didok Bibel, “Ndang adong jolma partigor di tano on nanggo sada, anggo tung holan na denggan diulahon, jala ndang dung mardosa.” (Pjm. 7:20) Didok apostel Paulus muse, “Huboto do ndang adong na denggan di ahu manang di dagingkon.” (Rom 7:18) Alani i, ingkon tatiru do Jahowa asa boi tongtong patuduhon pangalaho na denggan.

Holan Jahowa do na sempurna patuduhon pangalaho na denggan. Didok Bibel taringot Jahowa, “Denggan do Ho marroha jala pardengganbasa, sai ajarhon ma tu ahu angka aturanmi.” (Ps. 119:68) Taulas ma adong dua na didok di ayat i taringot pangalaho na denggan sian Jahowa.

Pardenggan basa do Jahowa. Pangalaho na denggan, i ma sada sian parange ni Jahowa. Bayangkon ma aha na masa tingki didok Jahowa tu si Musa, “Ahu pabolushon saluhut hatuaonku sian jolo ni bohim.” Tingki diida si Musa hamuliaon dohot pangalaho ni Jahowa na denggan, dibege ibana ma soara na mandok, “Jahowa, Jahowa do Debata na talup jala na asi roha, lambat tarrimas, jala godang denggan basana dohot habonaronna. Na pahothon denggan basana i pola marriburibu sundut jala marpamuati rohana mida hajahaton, pangalaosion dohot dosa, alai ndang loasonna malua sian uhum anggo halak parsala.”  (2 Mus. 33:19; 34:6, 7) Sian on taboto ma, denggan do sude parniulaon ni Jahowa. Tingki di tano on Jesus, sempurna do ibana patuduhon pangalaho na denggan. Alai didok ibana do, “Ndang adong na burju asing ni Debata.”​—Luk. 18:19.

Denggan do ulaon ni Jahowa. Pangalaho ni Jahowa na denggan, tarida do i sian sude na diulahon Ibana. Didok Bibel, “Pardengganbasa do Jahowa di saluhutna, jala dilinggom asi ni rohana do jadijadianna sudena.” (Ps. 145:9) Ala burju Jahowa jala tigor, dilehon Ibana do hangoluan tu sude jolma dohot na dihaporluhon nasida asa tongtong mangolu. (Ul. 14:17) Pangalahona na denggan i, tarida do i tingki disesa dosanta. Panurat psalmen mandok, “Ai anggo Ho, ale Tuhan, pardengganbasa jala marpamuati roham.” (Ps. 86:5) Pos ma rohanta, “ndang diholit [Jahowa] na denggan i di angka na burju marpangalaho”.​—Ps. 84:12.

Ala ditompa Debata hita suman tu Ibana, boi do hita marpangalaho jala mangulahon na denggan. (1 Mus.1:27) Alai ndang pintor boi taulahon i. Didok Jahowa, “Guruhon hamu ma mambahen na denggan.” (Jes. 1:17) Alai songon dia carana? Taulas ma tolu carana.

Na parjolo, martangiang mangido tondi parbadia. On boi mangurupi hita marpangalaho na denggan hombar tu na dihalomohon Debata. (Gal. 5:22) Tondi parbadia boi mangurupi hita mangkaholongi na denggan jala mangkasogohon na jahat. (Rom 12:9) Didok Bibel, boi do Jahowa mangurupi hita asa “tongtong mangulahon jala mangkatahon angka na denggan”.​—2 Tes. 2:16, 17.

Na paduahon, ingkon tajaha do Bibel. Tingki tajaha i, diajari Jahowa ma hita asa boi patuduhon “pangalaho na denggan” jala rade tu “angka ulaon na denggan”. (Poda 2:9; 2 Tim. 3:17) Dipatudos do rohanta songon poti inganan ni arta. Molo tajaha Bibel jala tarimangi, dos do hita songon na mangisi arta na arga tu poti i. Jala on boi parohon laba tu hita.​—Luk. 6:45; Eps. 5:9.

Na patoluhon, marsitutu ma ‘maniru na denggan’. (3 Joh. 11) Di Bibel, godang do contoh na boi tatiru. Tontu, Jahowa dohot Jesus do contoh na dumenggan. Boi do muse tatiru halak na marpangalaho na denggan na dipaboa di Bibel. Umpamana, si Tabita dohot si Barnabas. (Ul. 9:36; 11:22-24) Boi do taparsiajari taringot nasida jala aha na diulahon nasida laho mangurupi na asing. Dung i, pingkirhon ma aha na boi diulahon hamu laho mangurupi keluargamuna dohot angka dongan di huria. Jala, rimangi ma aha laba na didapot nasida ala marpangalaho na denggan. Hita pe boi do songon i.

 Saonari pe, boi do tatiru angka donganta na marpangalaho na denggan. Umpamana, pingkirhon ma angka sintua di huria na manarihon angka dongan jala “lomo rohana tu na denggan”. Asing ni i, adong do angka donganta na “mangajarhon angka na denggan” marhite pangkataion dohot parniulaonna. (Tit. 1:8; 2:3) Donganta na margoar si Roslyn mandok, “Marsitutu do donganku mangalului cara laho mangurupi jala patoguhon angka dongan di huria. Dipingkirhon ibana do situasi ni nasida jala jotjot dilehon hadiah manang mangurupi nasida. Huboto ma, sahalak na marpangalaho na denggan do ibana.”

Didok Jahowa do tu naposona, “lulu i hamu ma na denggan”. (Am. 5:14) Molo taulahon i, gabe tahaholongi angka na denggan na dihalomohon Jahowa, jala lomo rohanta mangulahon i.

Pangalaho na denggan ndang diida sian sadia godang manang sadia arga na boi talehon. Umpamana, asa boi tubu suan-suanan ndang boi pintor tasiram godang aek. Ingkon otik-otik do tasiram alai jotjot. Suang songon i ma, nang pe ndang godang na boi talehon tu angka dongan, alai molo jotjot nasida taurupi, na tapatudu do pangalaho na denggan.

Didok Bibel ingkon “rade” do hita mangulahon na denggan. (2 Tim. 2:21; Tit. 3:1) Molo sai taparrohahon angka dongan, gabe taboto ma aha na ingkon taulahon jala “mambahen na denggan laho patoguhon nasida”. (Rom 15:2) Boi do talehon angka na adong di hita. (Poda 3:27) Boi do tatogihon nasida rap mangan jala mangkata-hatai asa masipatoguan. Molo adong na marsahit, boi do tabahen surat, tajumpangi, manang manelepon nasida. Godang do cara na boi taulahon asa mangkatahon “na denggan laho patoguhon na asing, asa marlaba tu angka na manangihon”.​—Eps. 4:29.

Songon Jahowa, tapatudu ma pangalaho na denggan tu sude halak. Jala, ingkon tigor do hita maradophon nasida. Sada cara laho patuduhon i, i ma marbarita na uli tu sude halak. Dijujui Jesus do hita asa tongtong marpangalaho na denggan dohot ma i tu halak na mangkasogohon hita. (Luk. 6:27) Ndang sala molo tongtong taulahon na denggan tu na asing, jala “ndang adong patik na maralo tusi”. (Gal. 5:22, 23) Molo tongtong marpangalaho na denggan nang pe mangadopi hasusaan, ra gabe olo do halak marsiajar Bibel jala manomba Jahowa.​—1 Ptr. 3:16, 17.

“Dapotan upa do halak na burju sian na niulana.” (Poda 14:14, Bibel siganup ari) Angka aha do upa na tadapot i? Molo burju hita tu na asing, nasida pe gabe burju do tu hita. (Poda 14:22) Alai nang pe ndang burju nasida, tongtong ma tapatudu pangalaho na denggan. Ra sada tingki, olo do gabe muba rohana jala gabe burju tu hita.​—Rom 12:20.

Godang do angka donganta mandapot laba ala mangulahon na denggan jala pasidingkon na roa. Songon pengalaman ni donganta si Nancy. Didok ibana, “Tingki poso ahu, roa jala jahat do pangalahongku. Alai, dung huparsiajari jala huulahon angka na denggan na dihalomohon Jahowa, gabe las ma rohangku. Saonari, mararga situtu do huhilala ngolungku.”

Alai na rumingkot boasa olo hita patuduhon pangalaho na denggan, alana on mambahen las roha ni Jahowa. Nang pe ndang adong halak na mamboto na taulahon, alai diida Jahowa do i. Diboto Jahowa do aha na sai tapingkirhon dohot na taulahon. (Eps. 6:7, 8) Didok Bibel, “Dihalomohon Jahowa do halak na burju.” (Poda 12:2, Bibel siganup ari) Alani i, tongtong ma tapatudu pangalaho na denggan. Marjanji do Jahowa laho lehononna “hamuliaon, hasangapon, dohot hadameon tu ganup halak na mangulahon na denggan”.​—Rom 2:10.