Jesaya 1:1-31
1 On ma parnidaan ni si Jesaya*+ anak ni si Amos taringot tu Juda+ dohot Jerusalem di tikki ni akka raja ni Juda, i ma si Usia,+ si Jotam,+ si Ahas,+ dohot si Hiskia:+
2 Ale langit, tangihon ma, jala ho tano, parrohahon ma,+Songon on ma didok Jahowa,
“Nungnga hupagodang-godang akka dakdanak i, jala huurus,+Alai mangalo do nasida tu Au.+
3 Ditanda lombu do panuhorna,Jala ditanda halode do inganan panggagatan na pinarade ni tuanna,Alai anggo halak Israel dang ditanda Au,*+Dang diattusi bangsokki manang aha.”
4 Marjea ma hamu bangso na mardosa,+Akka halak na mangulahon godang hajahaton,Punguan na jahat, akka dakdanak naung sega!
Nungnga ditinggalhon nasida Jahowa,+Dang dipasangap nasida Debata Nabadia ni Israel i,Ditadikkon nasida do Ibana.
5 Dang adong be sian dagingmu na so hona pukkul, alai boasa dope hamu sai mangalo?+
Nungnga haccit be sude ulumuna,Jala nungnga hona sahit be sude ate-atemuna.+
6 Dang adong be na sehat, mulai sian ujung ni patmuna sahat tu ujung ni ulumuna.
Lukka do sude, marsalaon, jala tarseat,Dang diubati,* dang dibukkus, jala dang didaisson miak.+
7 Tarulang do tanomuna.
Matutung do akka kotamuna.
Diallang halak na sian bangso na asing do hasil ni ladangmuna.+
Tandus do tanomuna i, dos songon na dihancurhon halak na sian bangso na asing.+
8 Nungnga ditadikkon be kota* Sion dos songon sopo-sopo di ladang anggur,Songon sopo-sopo di ladang accimun,Songon kota na dikepung.+
9 Autsura dang dipasombu Jahowa Pamimpin ni Akka Tentara* i adong deba na malua,Pasti nungnga songon Sodom hita,Pasti nungnga songon Gumora hita.+
10 Bege hamu ma hata ni Jahowa, hamu akka na mangarajai* Sodom.+
Parrohahon hamu ma patik* ni Debatanta, hamu akka halak Gumora.+
11 “Aha ma guna ni peleanmuna na godang i di Au?”+ ninna Jahowa.
“Dang di Au be biru-biru jantan+ pelean situtungonmuna i, dohot tabo-tabo ni binatangmuna na mokmok i.+Dang lomo be rohakku tu mudar+ ni anak ni lombu,+ anak ni biru-biru, dohot hambing.+
12 Tikki ro hamu tu jolokku,+Didege-dege hamu do alamanku,+Ise na manuru hamu mangulahon i?
13 Unang pola boan hamu be pelean sipanganon* na so marguna i.
Magigi do Au tu dupamuna i.+
Dirayahon hamu do perayaan bulan baru,+ Sabat,+ jala dibahen hamu do akka parpunguan na balga,+Alai dang tarpaida-ida Au be hamu mamakke ilmu sihir+ di akka parpunguan na binahenmuna i.
14 Sogo do rohakku tu perayaan bulan baru dohot akka perayaanmuna i.Gabe boban do di Au sudena i.
Nungnga loja Au mamboan-boan i.
15 Tikki dipaherbang hamu tanganmuna doppak ginjang lao martangiang,Dang olo Au mangida hamu.+
Nang pe sai martangiang hamu,+Dang olo Au manangihon,+Ai nungnga godang na dipamate hamu.*+
16 Maridi ma hamu, paias hamu ma dirimuna,+Bolokkon hamu ma hajahatonmuna i sian jolokku,Unang be ulahon hamu na jahat.+
17 Marsiajar ma hamu mangulahon na denggan, ulahon hamu ma na tigor,+Pasingot hamu ma halak na mambahen susa,Partahatton hamu ma hak ni dakdanak na so marama,*Jala patigor hamu ma hukum lao mambela akka ina na mabalu.”+
18 “Beta, ro ma hamu, asa tapasae akka parsoalatta,” ninna Jahowa.+
“Nang pe songon merah ni mudar dosamuna,Bottar do i bahenokku songon salju.+Nang pe songon merah ni kain na massai merah dosamuna,Bottar do i bahenokku songon wol.
19 Molo rade do rohamuna mangoloi,Panganonmuna ma akka hasil na denggan sian luat on.+
20 Alai molo dang olo hamu jala mangalo,Dipamate ma hamu sude pakke podang,+Ai pamangan ni Jahowa sandiri do na mandok i.”
21 Kota na setia i,+ nungnga gabe songon boru-boru na so hasea!+
Akka na tigor hian do diulahon,+Hatigoran hian do maringanan disi,+Alai saonari akka pambunu nama disi.+
22 Dang murni be perakmuna,+Jala birmuna* pe nungnga encer ala dicampur dohot aek.
23 Akka sijogal rukkung do pamimpinmuna, mardongan do nasida dohot panakko,+
Lomo do roha ni nasida manjalo suap, jala dipangido do asa disogok nasida.+
Dang tikkos dibahen nasida hukum tu dakdanak na so marama,*Jala dang olo nasida pasaehon parsoalan ni ina na mabalu.+
24 Alani i Tuan na sittong, Jahowa Pamimpin ni Akka Tentara,Debata ni Israel na Gogo i mandok,
“Ida ma! Palaookku nama sude akka musukku,Jala balosokku ma sude na mangalo Au.+
25 Hukumokku nama hamu,Paiasokku ma sude kotoranmuna* mamakke garam alkali,Jala bolokkonokku ma nasa na mambahen hamu kotor.+
26 Lehonokku ma muse tu hamu akka hakimDohot akka penasehat songon najolo i.+
Dung i digoari ma hamu Kota Hasittongan dohot Kota na Setia.+
27 Ditobus ma Sion di bagasan hatigoran,+Dohot akka pangisina na mulak di bagasan hasittongan.
28 Rap dipamate do akka pangalo dohot akka pardosa,+Dipasuda do sude halak na manadikkon Jahowa.+
29 Maila ma hamu alani akka hau na balga na dihalomohon hamu,+Jala maila ma hamu alani akka ladang* na dipillit hamu.+
30 Dos ma hamu songon hau na balga na malos bulungna,+Jala songon ladang na so adong aekna.
31 Gabe songon ramba na koring* ma halak na gogo,Jala akka ulaonna songon percikan ni api,Rap tartutung ma duassa,Jala dang adong na boi pamatehon apina.”
Surat na di toru
^ Lapatanna, “Haluaon sian Jahowa”.
^ Manang “tuanna”.
^ As. “didappol”.
^ As. “boru”.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang “akka diktator di”.
^ Manang “tudu-tudu”.
^ Manang “nungnga gok mudar tanganmuna”.
^ Manang “na so marama na so marina”.
^ Manang “bir gandummuna”.
^ Manang “na so marama na so marina”.
^ Na nidokna, i ma sampah hasil sian mangalala logam.
^ Akka hau dohot akka ladang na nidokna dison ra adong do kaitanna tu debata na so sittong na disomba nasida.
^ Ramba na boi gabe tali na mura tartutung.
