1-3. (a) Aha do parsiajaran na parjolo sahali na ingkon tongtong taingot? (b) Boasa mansai ringkot haheheon i? (Ida gombar di mula ni parsiajaran.)

SONGON dia do alusmuna molo adong na manungkun aha do na dihaporseai hamu? Tontu, dipaboa hamu do taringot Jahowa, i ma na manompa jala na mangalehon hangoluan tu hita. Dipaboa hamu do muse taringot Jesus, na mate jala manobus hita. Manang, dipaboa hamu do taringot Paradeiso, jala disi ma naposo ni Debata mangolu salelenglelengna. Alai, olo do hamu paboahon taringot haheheon, na mambahen las rohamuna?

² Nang pe hirim rohanta boi malua sian haporsuhon bolon jala boi mangolu salelenglelengna, ringkot do molo taingot ari haheheon. Dipaboa apostel Paulus do boasa mansai ringkot ari haheheon i. Didok ibana, ”Alai anggo so adong haheheon ni angka na mate, ndang na hehe nang Kristus.” Molo ndang dipahehe Jesus, ndang boi ma ibana gabe Raja di surgo, jala ndang adong lapatanna barita na uli na tapasahat. (Jaha 1 Korint 15:12-19.) Alai,  porsea do hita molo Jesus nunga dipahehe. Ndang songon halak Saduse hita, na so porsea molo halak naung mate boi muse mulak mangolu. Nang pe direhei angka halak hita alani haporseaonta, alai tongtong do hita porsea molo Debata boi pahehehon angka halak naung mate.​—Mrk. 12:18; Ul. 4:2, 3; 17:32; 23:6-8.

³ Tangkas do dipaboa si Paulus, na porsea situtu do ibana tu haheheon. (Ul. 24:10, 15, 24, 25) Didok ibana do molo ”parsiajaran taringot tu haheheon ni na mate”, i ma ”parsiajaran parjolo”. (Heb. 6:1, 2, Bibel siganup ari) Nang pe haheheon parsiajaran na parjolo sahali taboto tingki marsiajar Bibel, alai porlu do umbagas muse taparsiajari taringot i. (Heb. 5:12) Boasa?

4. Sungkunsungkun aha do na boi ro tu rohanta taringot haheheon?

⁴ Tingki parjolo sahali sasahalak marsiajar Bibel, jotjot do dijaha nasida taringot haheheon na hea masa. Umpamana, haheheon ni si Lasarus. Jala, diparsiajari nasida do taringot angka naposo ni Debata na marhaporseaon tu haheheon di ari na naeng ro, songon si Abraham, si Job, dohot si Daniel. Alai, aha do alusmuna molo adong na manungkun, boasa pos rohamuna tu pangkirimon taringot ari haheheon na adong di Bibel, nang pe nunga marratus taon naung salpu disurathon? Jala, dipaboa do di Bibel andigan i masa? Alus ni sungkunsungkun on boi patoguhon haporseaonta.

5. Aha do na parjolo na laho taulas?

⁵ Ra, mura do dapot rohanta mangarimangi sasahalak na baru mate pintor hehe muse. (Joh. 11:11; Ul. 20:9, 10) Alai, pos do rohanta na laho dipahehe do sasahalak naung mate, nang pe nunga leleng janji i dibahen? Porsea do hita molo janji i marlangku tu angka halak naung leleng mate, manang tu halak na baru mate? Sasintongna, nunga tahaporseai taringot haheheon na hea masa nang pe nunga marratus taon janji i dibahen. Alai, haheheon na dia do i? Aha do haitan ni i tu pangkirimonta taringot haheheon di ari na naeng ro?

6. Aha do na patuduhon surirang taringot Jesus do na dipaboa di Psalmen 118?

⁶ Saonari, laho mangulas taringot haheheon naung disurirangkon piga ratus taon naung salpu, taida ma Psalmen 118. Disi didok, ”Sai palua ma hami ale Jahowa, palua ma hami! . . . Dipasupasu Debata ma ibana, na ro di bagasan goar ni Jahowa.” Surirang taringot tu Messias do on. Didok angka halak do hata on tingki Jesus ro tu Jerusalem di ari na pasiahon di bulan Nisan, pigapiga ari andorang so mate ibana. (Ps. 118:25, 26, Bibel siganup ari; Mat. 21:7-9) Alai aha do haitan ni Psalmen 118 on, tu haheheon na masa dung marratus taon? Taparrohahon ma hata na didok Psalmen i, ”Batu na binolongkon ni angka tukang batu i, nunga gabe batu ojahan.”​—Ps. 118:22, Bibel siganup ari.

7. Songon dia do halak Jahudi ndang olo manjangkon Jesus?

 ⁷ ”Angka tukang” na so manjangkon Messias, i ma angka pemimpin ni halak Jahudi. Ndang dijangkon nasida Jesus jala ndang dijalo ibana gabe Kristus. Alai ndang holan i. Godang do halak Jahudi na mangido tu si Pilatus asa dipamate ibana. (Luk. 23:18-23) Tontu, martanggungjawab do nasida tu hamatean ni Jesus.

8. Songon dia do Jesus boi gabe ”batu ojahan”?

⁸ Molo ndang dijangkon jala dipamate Jesus, songon dia ma ibana gabe ”batu ojahan”? Ingkon dipahehe do ibana sian hamatean asa boi gabe batu ojahan. Dibahen Jesus ma sada tudosan, i ma songon sahalak nampunasa porlak. Disuru ibana ma angka hatobanna manjumpangi angka pangulana. Alai dipungkuli angka pangulana i do angka hatobanna. Ujungna, disuru nampunasa porlak i ma anakna manjumpangi angka pangulana. Hirim do rohana ditangihon pangulana anakna i. Alai, dipamate nasida do anakna i. Dung sae dipaboa ibana tudosan i, didok Jesus ma surirang na disurat di Psalmen 118:22. (Luk. 20:9-17) Tingki mangkatai apostel Petrus tu ”angka pangituai nang angka sintua ro di angka sibotosurat” ni halak Jahudi, dipangke ibana do ayat on. Didok ibana do taringot Jesus Kristus na sian Nasaret naung dibunu nasida di sada tiang, alai ”naung mulak mangolu dibahen Debata sian na mate”. Jala didok ibana do muse, ”Jesus i do na tinudu ni na tarsurat i, na mandok: ’Batu na niambolongkon ni hamu angka tukang i, laos i do na gabe batu ojahan.’”​—Ul. 3:15; 4:5-11, Bibel siganup ari; 1 Ptr. 2:5-7.

9. Aha do na ringkot na disurirangkon di Psalmen 118:22?

⁹ Ndang dijangkon jala dibunu do Messias. Alai dipahehe do muse ibana sian hamatean, asa boi gabe batu ojahan. Tangkas ma molo surirang na dipaboa di Psalmen 118:22, paboahon taringot haheheon na masa dungkon marratus taon. Dung dipahehe Jesus sian hamatean, gabe holan goarna ma sasadasa ”na manjalo huaso sian Debata laho paluahon hita”.​—Ul. 4:12, Bibel siganup ari; Eps. 1:20.

10. (a) Aha do na disurirangkon di Psalmen 16:10? (b) Aha do na paposhon rohanta, ndang na si Daud na ditaringoti di Psalmen 16:10?

 ¹⁰ Taulas ma muse ayat na asing na manurirangkon taringot haheheon. Jala on digohi dung marribu taon. Boi do on paposhon rohanta, na ingkon masa do haheheon i nang pe nunga leleng disurirangkon. Di Psalmen 16, didok si Daud do, ”Ai diramoti do ahu sian huaso ni hamatean, jala ndang dipasombu na hinaholonganNa i di inganan ni na mate.” (Ps. 16:10, Bibel siganup ari) Didok si Daud pe songon i, ndang na mandok ndang boi mate jala ndang di bagasan kuburan ibana. Alai, tangkas do didok hata ni Debata, molo si Daud gabe matua jala mate, ”gabe top dohot angka ompuna, jala tartanom di huta ni si Daud”. (1 Raj. 2:1, 10) Jadi, ise do na nidokna di ayat on?

11. Tingki andigan do dipatorang si Petrus taringot Psalmen 16:10?

¹¹ Dipatorang si Petrus do ise na didok di Psalmen 16:10, dung marribu taon disurathon si Daud hata on. Dipatorang ibana do on tu marribu halak Jahudi dohot na so halak Jahudi, dung pigapiga minggu Jesus mate jala dipahehe. (Jaha Ulaon ni Apostel 2:29-32.) Didok do muse tu nasida molo si Daud nunga mate jala nunga ditanom. Ndang adong disurat di Bibel, molo nasida ndang satolop tu si Petrus tingki didok ibana si Daud na ’sian pamotoanna hian dihatahon ibana disi haheheon ni’ Messias.

12. Songon dia do Psalmen 16:10 digohi, jala aha do na taboto taringot janji i?

¹² Tangkas do dipatorang si Petrus hata ni si Daud na disurat di Psalmen 110:1. (Jaha Ulaon ni Apostel 2:33-36.) Jala hatorangan ni si Petrus sian Hata ni Debata mangurupi godang halak porsea, Jesus do na gabe ’Tuan jala Messias’. Diantusi angka halak do molo Psalmen 16:10 digohi tingki Jesus dipahehe sian hamatean. Dung i, dipangke si Paulus ma hatorangan on, tingki ibana mangkatai dohot halak Jahudi na adong di kota Antiokia dohot Pisidia. Hona do on tu roha ni nasida, jala gabe taronjar ma rohanasida laho mamboto gumodang hatorangan. (Jaha Ulaon ni Apostel 13:32-37, 42.) On paposhon rohanta, na laho masa do surirang na di Bibel taringot ari haheheon, nang pe digohi dung marratus taon.

13. Sungkunsungkun aha do na ro tu rohanta taringot haheheon?

¹³ Dung mamboto molo haheheon boi masa marratus taon dungkon disurirangkon, on mambahen togu haporseaonta. Ra, adong do na manungkun, ’Leleng nai dope hupaima sasahalak na huhaholongi laho dipahehe? Andigan do masa i?’ Didok Jesus do tu angka apostelna, adong do pigapiga na so diboto jala ndang porlu botoon nasida. Na umboto arina manang tingkina, holan Ama i do. (Ul. 1:6, 7; Joh. 16:12) Alai, adong do na boi taboto taringot andigan masa ari haheheon.

14. Aha do imbarna haheheon ni Jesus dohot haheheon na asing?

¹⁴ Haheheon ni Jesus na disurat di Bibel, i ma haheheon na umringkot.  Molo ndang dipahehe ibana sian hamatean, ndang adong anggo sada pe hita boi muse pajumpang tu angka halak na tahaholongi naung mate. Adong do pigapiga halak naung dipahehe andorang so dipahehe dope Jesus. Umpamana, songon na dipahehe si Elia dohot si Elisa. Alai, ndang boi mangolu nasida salelengna. Mate do muse nasida. Alai, ”dung mulak mangolu sian na mate” Jesus i, ”ndang dirajai hamatean i be Ibana”. Jala mangolu ”salelenglelengna” do ibana di surgo.​—Rom 6:9; Pgk. 1:5, 18; Kol. 1:18; 1 Ptr. 3:18.

15. Boasa Jesus didok gabe na ”parjolo”?

¹⁵ Dipahehe do Jesus tu surgo. On ma haheheon na umringkot sian angka haheheon na asing. (Ul. 26:23) Alai ndang holan ibana na dipahehe tu surgo. Marjanji do Jesus tu angka apostelna, asa boi rap dohot ibana mamarenta di surgo. (Luk. 22:28-30) Alai, dung mate pe nasida asa boi mandapot upa i. Jala, songon Jesus, dipahehe do nasida tu surgo. Disurat si Paulus do taringot on na mandok, ”Nunga hehe Kristus i sian na mate, Ibana do parjolo ni angka na monding i.” Jala didok si Paulus, adong do muse na asing na laho dipahehe tu surgo. Didok ibana, ”Ganup ma mangihuthon parjojorna: Parjolo i Kristus, dung i angka na di Kristus i, di harorona i.”​—1 Kor. 15:20, 23.

16. Aha do na boi taboto taringot haheheon tu surgo?

¹⁶ Hata ni si Paulus boi gabe sada hatorangan na mangurupi hita mamboto andigan masa haheheon na laho tu surgo i. On masa saleleng haroro ni Kristus. Saleleng martaontaon, porsea do Sitindangi Ni Jahowa molo haroro ni Kristus dipungka sian taon 1914, hombar tu hatorangan sian Bibel naung disulingkiti nasida. Hita saonari mangolu di ari haroro ni Kristus, jala nunga lam jonok na ma ajal ni portibi na jahat on.

17, 18. Dung ro Kristus, aha do na masa tu pigapiga halak na miniahan?

¹⁷ Dipatorang Bibel do taringot haheheon tu surgo, ”Taringot tu angka naung monding i, asa unang marsak hamu . . . Ai molo porsea hita, naung mate Jesus dohot hehe, sandok togihonon ni Debata do rap dohot Jesus nang angka naung monding . . . mangolu pe hita, angka na mian ro di haroro ni Tuhan i, nda tung sumurung hita sian nasida naung monding i. Ai na tuat ma Tuhan i sian banua ginjang mardongan suraksurak, . . . Dung i hehe ma jumolo angka na mate di bagasan Kristus. Dung songon i, hita na mangolu dope, angka na mian i, taitonna ma hita raphon nasida di bagasan angka ombun, laho manomunomu Tuhan i tu langit an; jadi olat ni i sai tongtong ma hita rap dohot Tuhan i.”​—1 Tes. 4:13-17.

¹⁸ Haheheon na parjolo, masa dung ro Kristus. Angka halak na miniahan na mangolu saleleng haporsuhon bolon, ’taitonna di bagasan angka ombun’. (Mat. 24:31) Aha do lapatan ni i? Nasida ”taitonna” asa ”ndang na saluhutna nasida monding”. Ndang na gabe leleng nasida mate. Alai, tingki nasida mate, paubaonna do nasida, ”tompu, di bagasan sanghidopmata, di  pangkuling ni sarune na parpudi i”.​—1 Kor. 15:51, 52.

19. Aha do lapatanna ”haheheon na dumenggan”?

¹⁹ Saonari, godang do halak Kristen na marsihohot. Alai ndang sude nasida dipillit asa rap mamarenta dohot Jesus di surgo. Maimaima do nasida tu ”ari ni Tuhan i”. Jala salpuhonon ni Jahowa ma portibi na jahat on. Ndang adong na mamboto andigan masa i. Alai, angka bukti patuduhon nunga lam jonok ari i. (1 Tes. 5:1-3) Dung di portibi na imbaru, adong ma haheheon na asing. Di tingki i, angka jolma dipahehe di portibi on, mandapot hangoluan na mansai denggan salelenglelengna. On ma ”haheheon na dumenggan” sian haheheon naung salpu.​—Heb. 11:35.

20. Boasa pos rohanta na taratur do dibahen annon haheheon i?

²⁰ Bibel mandok, angka halak na dipahehe laho tu banua ginjang, ”ganup ma mangihuthon parjojorna”. (1 Kor. 15:23) Alani i, boi do hita marpos ni roha, taratur do bahenonNa haheheon na masa di portibi on annon. Ra, gabe tasungkun do di bagas rohanta, ’Ise do na parjolo dipahehe tingki dipungka Harajaon Saribu Taon i? Angka halak na baru mate do, asa boi pajumpang dohot angka halak na ditanda nasida? Manang, angka halak na boi gabe pemimpin di portibi na imbaru do? Dipahehe do angka halak na so hea mananda Jahowa? Andigan jala didia do dipahehe nasida?’ Godang do na laho tasungkun. Alai, ndang pola tapingkiri i saonari. Tapaima jala taida ma annon songon dia Jahowa mangulahon i sude. Tontu, on mambahen las rohanta.

21. Aha do pangkirimonmuna?

²¹ Huhut paimahon i, tapatogu ma haporseaonta tu Jahowa. Marjanji do Ibana marhite Jesus, sai diingot ibana do angka halak naung mate asa boi dipahehe muse. (Joh. 5:28, 29; 11:23) Angka bukti na patuduhon dipahehe Jahowa do angka halak naung mate, tarida sian hata ni Jesus taringot tu si Abraham, si Isak, dohot si Jakkob. Didok Jesus, ”Saluhut do nasida mangolu di Ibana.” (Luk. 20:37, 38) Apostel Paulus mandok, ’na mangkirim do rohana tu Debata, mulak mangolu sogot’ angka jolma. Tangkas ma, on mambahen hita marpos ni roha tu Debata.​—Ul. 24:15.