Ulaon ni Apostel 4:1-37

  • Si Petrus dohot si Johannes ditakkup (1-4)

    • Adong 5.000 bawa na porsea (4)

  • Diadili di jolo ni Sanhedrin (5-22)

    • “Dang tarbahen hami mangulahon hatamuna” (20)

  • Martangiang asa barani (23-31)

  • Rap nappunasa do akka sisean (32-37)

4  Tikki makkatai dope si Petrus dohot si Johannes tu akka jolma i, ro ma akka malim, kepala panjaga ni bagas joro, dohot akka halak Saduse+ mandapotton nasida.  Jut do roha ni nasida ala diajari akka apostel i akka jolma. Jut do roha ni nasida ala takkas dipaboa apostel i naung mulak mangolu Jesus sian na mate.+  Ditakkup nasida ma si Petrus dohot si Johannes jala dibahen ma nasida tu penjara+ sahat tu marsogotna i, ai nungnga botari tikki i.  Alai godang do sian akka na manangihon hata ni nasida i gabe porsea. Gabe adong ma hira-hira 5.000 bawa godang ni nasida.+  Marsogotna i marpungu ma akka pamimpin ni nasida, akka pangituai,* dohot akka siboto surat* di Jerusalem,  rap dohot si Hannas+ malim kepala,* si Kayapas,+ si Johannes, si Aleksander, dohot sude keluarga ni malim kepala i.  Disuru nasida ma jongjong si Petrus dohot si Johannes di tonga-tonga ni nasida. Didok ma tu nasida, “Sian dia do huasomuna mangulahon on? Marhite goar ni ise do hamu mangulahon i?”  Dung i digohi tondi parbadia+ ma si Petrus, ninna ma tu nasida, “Hamu akka pamimpin dohot akka pangituai,  sadari on, botoonmuna ma sian hami akka aha na denggan na hubahen hami tu bawa na lumpu on,+ jala songon dia ibana boi malum. 10  Paloas hamu ma hupaboa hami tu hamu dohot tu sude halak Israel: Anggo bawa on dipamalum di bagasan goar ni Jesus Kristus halak Nasaret i+ do. Ibana do Jesus na dihukum hamu di sada hau,+ alai nungnga dipahehe Debata ibana sian na mate.+ Ibana ma na mambahen bawa on malum jala sehat jongjong di jolomuna. 11  Ibana do ‘batu na dibolokkon akka tukkangmuna, alai nungnga gabe batu parsuhi-suhi*+ na rumikkot ibana’. 12  Asing ni i, holan marhite Jesus do halak boi selamat. Ai dang adong be goar na asing+ na dipillit Debata sian tonga-tonga ni jolma di tano on lao mambahen hita selamat.”+ 13  Tikki diida nasida habaranion ni si Petrus dohot si Johannes, tarlumobi dung diboto na so parsikkola* nasida na dua, gabe heran ma nasida.+ Lam takkas ma diboto nasida na dongan ni Jesus do apostel na dua i.+ 14  Alai dang tardok ni nasida be manang aha,+ ai rap jongjong do apostel na dua i dohot bawa naung dipamalum i.+ 15  Disuru ma kaluar na tolu halak i sian inganan ni Sanhedrin* i. Dung i rapat ma nasida muse. 16  Ninna ma, “Aha ma na ikkon bahenotta tu nasida?+ Ai tutu do boi dibahen nasida masa tanda halongangan.* Sude do halak di Jerusalem mamboto i,+ jala dang boi dohonotta dang tutu i masa. 17  Alani i, asa unang lam rarat barita i, taancam ma nasida jala taorai ma asa unang makkatai be nasida tu akka halak mamakke goar i.”+ 18  Dung i dijou nasida ma apostel na dua i. Diorai ma nasida makkatahon jala mangajarhon manang aha pe marhite goar ni Jesus. 19  Dialusi si Petrus dohot si Johannes ma nasida, “Hamu sandiri ma na manottuhon, dia do na sittong di jolo ni Debata, manangihon hamu do manang manangihon Debata? 20  Alai dang tarbahen hami mangulahon hatamuna i. Ikkon dipaboa hami do aha naung diida hami dohot na dibege hami.”+ 21  Dung diancam muse si Petrus dohot si Johannes, dipalua ma nasida. Ai dang dapot ni nasida manang aha pe na boi mambahen apostel na dua i patut dihukum. Jala mabiar do nasida tu akka jolma i,+ ai sude do nasida mamuji Debata alani na masa i. 22  Nungnga lobi sian 40 taon umur ni bawa na dipamalum marhite tanda halongangan i. 23  Dung dipalua, lao ma apostel na dua i mandapotton akka sisean na asing. Dipaboa nasida ma hata ni akka malim kepala dohot akka pangituai tu nasida. 24  Mambege i, rap martangiang ma nasida tu Debata, ninna ma, “Ale Tuan Natumimbul, Ho do na manoppa langit, tano, laut dohot sude isina,+ 25  jala ditogu-togu tondi parbadiam do naposom si Daud+ ompunami lao mandok, ‘Boasa gaor akka bangso jala boasa akka na so marguna dipikkirhon akka halak? 26  Nungnga marsada be akka raja dohot akka pamimpin na di tano on lao mangalo Jahowa* dohot halak na pinillitna i.’*+ 27  Sasittongna nungnga marpungu di kota on si Herodes, si Pontius Latus,+ akka halak sian bangso na asing rap dohot akka halak Israel lao mangalo Jesus naposom na badia i, na pinillitmi.+ 28  Nungnga marpungu nasida lao mangulahon naung ditottuhon tanganmu dohot lomo ni roham.+ 29  On pe ale Jahowa,* parrohahon ma ancaman ni nasida jala bahen ma akka naposomon boi toktong barani paboahon hatami. 30  Surdukkon ma tanganmi lao pamaluppon akka sahit, jala toktong ma bahen akka tanda halongangan+ marhite goar ni Jesus naposom na badia i.”+ 31  Dung martangiang nasida sian nasa rohana tu Debata,* humutur ma inganan ni nasida marpungu i. Sude ma nasida digohi tondi parbadia,+ dung i gabe barani ma nasida makkatahon hata ni Debata.+ 32  Saroha jala sapikkiran ma sude na porsea i. Molo adong pe arta ni nasida, dang adong na mandok arta ni nasida sandiri i. Alai rade do nasida mambagi na adong di nasida tu na asing.+ 33  Marhite cara na denggan, toktong ma dipaboa akka apostel i tu na asing naung hehe Tuan Jesus.+ Jala dipaboa nasida do, na lao dapot ni ganup halak godang situtu pasu-pasu alani asi ni roha ni Debata na massai balga i. 34  Dang adong sian nasida na hurangan.+ Ai molo adong nappuna ladang manang jabu, digadis do i jala diboan do tuhorna i 35  lao dipasahat tu akka apostel.+ Dung i, dibagihon ma i tu ganup halak sesuai tu na dihaporluhon nasida.+ 36  Songon i do na diulahon si Josep tu ladangna. Halak Lepi do ibana na tubu di Siprus. Digoari akka apostel do ibana si Barnabas+ (lapatanna, “Anak ni Pangapulion”). 37  Dijual ibana ma ladangna i jala dilehon do tuhorna tu akka apostel.+

Surat na di toru

Ida di Kamus.
Manang “juru tulis”.
Ida di Kamus.
Ida di Kamus.
Na nidokna dison, i ma dang dohot sikkola rabbi, dang na so ditanda nasida surat.
Ida di Kamus.
Manang “mukjizat”.
Manang “dohot Kristusna”.
Manang “Dung gomos nasida martangiang”.