1. Boasa ditoppa Jahowa saluhutna?

ANDORANG so ditoppa Jahowa dope manang aha, holan Ibana dope na adong. Alai dang hea kesepian Ibana. Sasittongna, dang porlu adong na mandongani Ibana asa boi las rohana. Alai, lomo do roha ni Jahowa asa na asing pe boi mangolu jala marlas ni roha. Jadi alani holongna, mulai ma Jahowa manoppa saluhutna.​—Ps. 36:10; 1 Joh. 4:19.

2. Boha do pakkilalaan ni Jesus dohot suru-suruan tikki ditoppa Jahowa akka toppaan na asing?

² Na parjolo, ditoppa Jahowa ma Anakna, i ma Jesus. Dung i, marhite Jesus ‘ditompa Jahowa ma saluhutna’, termasuk ma marjuta suru-suruan. (Kol. 1:16) Massai las do roha ni Jesus boi rap saulaon dohot Bapakna. (Poda 8:30) Akka suru-suruan pe, tong do marlas ni roha ala diida nasida songon dia Jahowa dohot Jesus manoppa surgo dohot tano on. Aha do buktina? Tikki ditoppa Jahowa tano on, “marolopolop” do nasida. Jala toktong do dipuji nasida Jahowa tikki ditoppa Ibana akka toppaan na asing, tarlumobi ma tikki ditompa jolma. (Job 38:7; Poda 8:31) Sian sude toppaan i, boi ma tarida bisuk dohot holong ni Jahowa.​—Ps. 104:24; Rom 1:20.

3. Songon na dipaboa di 1 Korint 15:21, 22, aha do laba ni tobusan ni Jesus?

³ Lomo do roha ni Jahowa asa sude jolma mangolu salelengna di tano on. Alai tikki mardosa si Adam dohot si Hawa tu Jahowa, dang boi be nasida mangolu salelengna. Ujungna, mate ma nasida dohot sude pinopparna. (Rom 5:12) Alai aha do na  diulahon Jahowa? Pittor dibahen Jahowa do cara lao paluahon akka jolma. (1 Mus. 3:15) Dilehon Jahowa ma Anakna gabe tobusan asa boi pinoppar ni si Adam dohot si Hawa malua sian dosa dohot hamatean. Dung i, dilehon Jahowa ma hangoluan salelengna tu akka halak na olo manomba Ibana.​—Joh. 3:16; Rom 6:23; jaha 1 Korint 15:21, 22.

4. Sukkun-sukkun aha do na lao taulas di parsiajaran on?

⁴ Godang do ra sukkun-sukkun na adong di rohatta taringot janji ni Jahowa lao paheheon halak naung mate. Misalna, boha do cara ni Jahowa paheheon halak naung mate? Boi do tatanda annon akka halak na tahaholongi tikki dipahehe nasida? Boasa haheheon i boi mambahen las rohatta? Jala molo tarimangi janji ni Jahowa taringot haheheon, boasa gabe lam taargai holong, bisuk, dohot hasabaron ni Jahowa? Taulas ma akka sukkun-sukkun on.

5. Boasa boi tadok dang dipahehe sude jolma di tikki na sarupa?

⁵ Tikki dipahehe Jesus haduan halak na mate, boi ma tadok dang dipahehe ibana nasida sude di tikki na sarupa. Boasa? Alana boi do gabe gaor situasina molo toppu gok jolma di tano on. Hape lomo do roha ni Jahowa asa taratur sudena, dang gabe gaor. Diboto Jahowa, ikkon taratur do sudena asa boi toktong mardame akka halak di tano on. (1 Kor. 14:33) Marbisuk jala sabar do Jahowa tikki rap saulaon dohot Jesus lao paradehon tano on asa boi diingani akka jolma. Songon i ma tong Jesus haduan di Pamarettaon ni Kristus Saleleng Saribu Taon. Marbisuk jala sabar do ibana tikki rap saulaon dohot akka halak na malua sian Armagedon lao paradehon jabu, sipanganon, pakkean, dohot na asing na dihaporluhon akka halak na dipahehe.

6. Songon na dipaboa di Ulaon ni Apostel 24:15, ise do annon na lao dipahehe Jahowa?

 ⁶ Na uppetting na lao diulahon akka halak na malua sian Armagedon, i ma mangajari akka halak naung dipahehe taringot Harajaon ni Debata dohot paretta ni Jahowa. Boasa ikkon diulahon nasida i? Alana godangan sian akka halak na dipahehe i digoari do di Bibel “halak na jahat”. (Jaha Ulaon ni Apostel 24:15.) Asa boi mandapot laba sian tobusan ni Jesus, ikkon dibahen nasida do godang hamubaon. Pikkirhon ma godang ni ulaonta haduan lao mangajari marjuta halak na so mananda Jahowa dope. Adong do annon guru studi ni ganup halak songon caratta manguluhon parsiajaran Bibel saonari? Adong do annon dibahen akka huria songon saonari? Ikkon margabung do akka halak naung dipahehe i tu sada huria naung ditottuhon? Adong do annon na mangalatik nasida carana mangajari halak naung dipahehe dukkon nasida? Tapaima ma aha na lao masa. Alai na pasti, di ujung ni Pamarentaon ni Kristus Saleleng Saribu Taon, ‘gok do parbinotoan taringot Jahowa di tano on’. (Jes. 11:9) Pasti las do rohatta mangulahon sude ulaon i saleleng pamarettaon saribu taon!

7. Boasa ikkon dipatudu naposo ni Jahowa roha sapakkilalaan tikki mangajari akka halak naung dipahehe?

⁷ Saleleng Pamarentaon Saribu Taon, sude naposo ni Jahowa ikkon torus do mambahen hamubaon asa boi pasonakkon roha ni Jahowa. Jadi ikkon dipatudu nasida do roha sapakkilalaan asa boi mangurupi akka halak naung dipahehe pasidikkon pikkiran na sala jala mangihutton paretta ni Jahowa. (1 Ptr. 3:8) Hasilna gabe taronjar ma roha ni akka halak na dipahehe i lao manomba Jahowa, ala diida nasida serep do roha ni naposo ni Jahowa jala ‘marsitutu asa malua’.​—Plp. 2:12.

8. Boasa boi tatanda annon akka halak na tahaholongi tikki dipahehe nasida?

⁸ Adong do piga-piga alasan na patuduhon, boi do annon tatanda akka halak na tahaholongi tikki dipahehe nasida. Misalna, sian cara ni Jahowa paheheon halak naung mate di tikki najolo, taboto ma boi do dibahen Jahowa sarupa penampilan, soara dohot ingatan ni sasahalak dos songon andorang so mate ibana. Ingot ma, dipatudos Jesus do halak na mate i songon halak na modom. Jadi, paheheon halak na mate i dos do songon mandungoi halak na modom. (Mat. 9:18, 24; Joh. 11:11-13) Tikki dungo sasahalak, tong do sarupa penampilan, soara dohot ingatanna songon andorang so modom ibana. Pikkirhon ma contoh ni si Lasarus. Nungnga mate ibana saleleng opat ari, jala nga busuk be dagingna. Alai tikki dipahehe Jesus si Lasarus, boi do pittor ditanda akka itona ibana. Jala si Lasarus pe, tong do diingot ibana nasida.​—Joh. 11:38-44; 12:1, 2.

9. Boasa dang pittor gabe sempurna akka halak na dipahehe haduan?

⁹ Di Paradeiso haduan, marjanji do Jahowa dang adong be halak na mandok, “Na gale do ahu.” (Jes. 33:24; Rom 6:7) Jadi akka halak na dipahehe haduan sehat do dagingna. Alai dang pittor gabe sempurna nasida. Alana molo pittor gabe sempurna, gabe dang boi ma ditanda keluarga dohot donganna nasida. Jadi di Pamarentaon Saribu Taon haduan, bertahap do sude jolma gabe sempurna. Di ujung ni saribu taon i, dilehon Jesus ma Harajaon i tu Bapakna. Ujungna, marhite Harajaon ni Debata, saut ma sude na dihalomohon Jahowa, termasuk ma i mambahen jolma gabe sempurna.​—1 Kor. 15:24-28; Pgk. 20:1-3.

10. Boha do perasaanmuna tikki dipahehe Jahowa haduan halak naung mate?

¹⁰ Bayakkon ma boha do perasaanmuna tikki pajuppang muse dohot halak na dihaholongi hamu na dipahehe. Olo do ra gabe mekkel manang tangis hamu alani las ni rohamuna. Manang marende do ra hamu lao mamuji Jahowa alani i. Na pasti gabe lam holong ma rohamuna tu Jahowa dohot tu Jesus ala dipahehe nasida halak naung mate.

11. Songon na didok Jesus di Johannes 5:28, 29, aha do na masa tu akka halak na mangihutton paretta ni Jahowa?

¹¹ Bayakkon ma boha do perasaan ni akka halak naung dipahehe ala dibahen nasida hamubaon jala mangihutton paretta ni Jahowa. Las do roha ni nasida ala boi mangolu salelengna di Paradeiso. Alai dang diloas Jahowa akka halak na mangalo tu Ibana torus mangolu salelengna jala manggugai hadameon di Paradeiso.​—Jes. 65:20; jaha Johannes 5:28, 29.

12. Pasu-pasu aha do na lao dilehon Jahowa tu akka halak di tano on?

¹² Poda 10:22 mandok, “Pasupasu ni Jahowa do mambahen mamora, jala ndang mardongan hangaluton dibahen.” Songon i ma na lao dihilala sude naposo ni Jahowa di tano na imbaru. Ala diurupi tondi parbadia ni Jahowa nasida, gabe lam sarupa ma pangalaho ni nasida songon Kristus jala ujungna gabe sempurna. (Joh. 13:15-17; Eps. 4:23, 24) Ganup ari, gabe lam sehat jala lam sempurna ma nasida. Tottu las hian do rohatta tikki masa i! (Job 33:25) Alai aha do labana saonari molo dirimangi hamu janji taringot haheheon?

13. Sian Psalmen 139:1-4, boasa haheheon i patuduhon na massai takkas do ditanda Jahowa hita?

¹³ Songon naung taulas nakkin, tikki dipahehe Jahowa sasahalak, dipaulak Jahowa do muse ingatanna, jala dibahen Jahowa do sarupa pangalahona songon andorang so mate ibana. Pikkirhon ma aha lapatan ni i. Alani holongna, diparrohahon jala diingot Ibana do sude na tapikkirhon, tahilala, tahatahon, dohot na taulahon. Jadi tikki dipahehe Jahowa hamu sian hamatean, dibahen Ibana do sarupa ingatan dohot pangalahomuna songon najolo. Raja Daud mandok, takkas do ditanda Jahowa ganup halak. (Jaha Psalmen 139:1-4.) Aha do pengaruhna tu hita dung taboto massai takkas do ditanda Jahowa hita?

14. Aha do pengaruhna tu hita molo tarimangi na massai takkas do ditanda Jahowa hita?

¹⁴ Molo tarimangi na massai takkas do ditanda Jahowa hita, gabe dang holsoan be hita. Boasa? Ingot ma, parduli do Jahowa tu hita. Mararga do ganup halak di Ibana. Diparrohahon Ibana do sude na masa di ngolutta. Tottu, gabe dipatogu do rohatta alani i! Jadi unang ma didok rohatta, holan sahalakta do hita. Alana, sai didongani Jahowa do hita, jala lomo do rohana mangurupi hita.​—2 Kron. 16:9.

15. Boasa janji taringot haheheon patuduhon na marbisuk do Jahowa?

¹⁵ Molo mabiar sasahalak tu hamatean, gabe boi do dipakke akka musu biar ni roha i lao mangancam ibana. Dibahen Sibolis do akka musu i lao mangancam akka halak asa unang setia tu donganna manang asa mangulahon na sala. Alai dang boi dipaksa nasida hita. Taboto do, nang pe dipamate akka musu hita, boi do dipahehe Jahowa hita. (Pgk. 2:10) Pos do rohatta, manang aha pe na diulahon nasida, dang boi nasida mangabbati hita asa toktong setia tu Jahowa. (Rom 8:35-39) Takkas do boi taida bisuk ni Jahowa, ala dilehon  Ibana janji taringot haheheon tu hita! Alani i, dang mabiar hita nang pe diancam akka musu, jala barani do hita toktong setia tu Jahowa.

16. Sukkun-sukkun aha do na porlu dirimangi hamu, jala boasa i boi mangurupi hamu mamboto sadia balga haporseaonmuna tu Jahowa?

¹⁶ Molo didok akka musu ni Jahowa naeng dipamate nasida hamu, aha do na diulahon hamu? Pos do rohamuna paheheon ni Jahowa do hamu haduan? Boasa boi pos rohamu na boi do hamu toktong setia di situasi i? Sukkun ma dirimuna, ‘Sian keputusan na hubahen ganup ari, tarida do na pos rohakku tu Jahowa?’ (Luk. 16:10) ‘Sian carakku mamakke tikki dohot hepeng, tarida do Harajaon ni Debata na urrikkot di ngolukku, jala pos do rohakku lehonon ni Jahowa do aha na huhaporluhon?’ (Mat. 6:31-33) Molo sian saonari nungnga pos rohamu tu Jahowa, tottu gabe lam rade ma hamu mangadopi manang aha pe na masa di ari na naeng ro.​—Poda 3:5, 6.

17. (a) Songon dia haheheon i patuduhon hasabaron ni Jahowa? (b) Songon dia hita patuduhon na taargai do hasabaron ni Jahowa?

¹⁷ Nungnga ditottuhon Jahowa andigan tikkina ripassononna portibi na jahat on. (Mat. 24:36) Tarpaima do Jahowa paheheon halak na mate, alai sabar do Ibana. Dang diulahon Ibana i andorang so dapot dope tikki naung ditottuhon Ibana. (Job 14:14, 15) Dipaima Jahowa do sahat tu na ro tikkina paheheonna halak na mate. (Joh. 5:28) Tottu mandok mauliate do hita alani hasabaron ni Jahowa. Pikkirhon ma ala sabar Jahowa, godang do halak boi “marhamubaon”, termasuk ma hita. (2 Ptr. 3:9) Lomo do roha ni Jahowa asa godang halak mandapot ngolu salelengna. Jadi, tapatudu ma na taargai hasabaron ni Jahowa i. Songon dia carana? Marsitutu ma hita mangalului halak “na marpangalaho na denggan na mambahen nasida tama mandapot hangoluan saleleng ni lelengna”. Taurupi ma nasida asa makkaholongi jala manomba Jahowa. (Ul. 13:48) Hasilna, gabe boi ma diargai nasida hasabaron ni Jahowa, songon naung taulahon.

18. Boasa ikkon sabar hita tu akka donganta?

¹⁸ Sabar do Jahowa paimahon hita gabe sempurna di ujung ni pamarettaon saribu taon. Andorang so dapot dope tikki i, sai rade do Jahowa manalpuhon hasalaanta. Jadi, tatiru ma Ibana. Toktong ma taida akka parange na denggan sian akka donganta, jala sabar ma  hita tu nasida. Parrohahon ma pengalaman ni sahalak donganta borua. Jotjot do hona serangan panik suamina, jala dang ro be suamina i tu parpunguan. Didok donganta i, “Borat hian do on huhilala. Toppu do muba ngolunami. Dang boi be huulahon hami akka rencananami.” Nang pe songon i, toktong do sabar donganta on tu suamina. Marhaposan do Ibana tu Jahowa jala dang menyerah. Songon Jahowa, marsitutu do ibana mangida akka parange na denggan sian suamina. Didok ibana, “Godang do akka parange na denggan na huida sian suamikku. Jala marsitutu do ibana mengatasi sahitna i.” Jadi, ikkon sabar do hita tu keluargatta manang tu akka dongan di huria na marsitutu mangadopi hasusaan!

19. Aha do na ikkon taulahon?

¹⁹ Las do roha ni Jesus dohot akka suru-suruan tikki ditoppa tano on. Alai bayakkon ma, pasti las hian do roha ni nasida haduan tikki mangida sude jolma di tano on gabe sempurna, makkaholongi jala manomba Jahowa. Pasti las do roha ni akka na miniahan na mamaretta rap dohot Jesus di surgo haduan, tikki diida nasida sude jolma mandapot pasu-pasu sian Harajaon ni Debata. (Pgk. 4:4, 9-11; 5:9, 10) Jala bayakkon ma haduan, dang adong be ilu-ilu alani sahit, hasusaan, dohot hamatean. Las hian ma roha ni sude jolma ala nga salpu be sudena i. (Pgk. 21:4) Sahat tu na ro tikki i, tatiru ma holong, bisuk, dohot hasabaron ni Jahowa. Molo taulahon i, gabe toktong ma las rohatta manang aha pe hasusaan na masa. (Jak. 1:2-4) Mandok mauliate ma hita tu Jahowa, ala dilehon Ibana janji taringot “haheheon”!​—Ul. 24:15.