1. Aha do pengorbanan na dibahen godang naposo ni Jahowa, jala boasa diulahon nasida i?

MARJUTA naposo ni Jahowa saonari nungnga mambahen pengorbanan. Godang do akka donganta na mamillit asa dang marhasohotan. Akka na mardongan saripe mamillit asa dang pittor marianakkon. Akka naung markeluarga mamillit asa toktong sederhana ngolu ni nasida. Dibahen nasida do keputusan sisongon i ala lomo rohana mangalehon gumodang gogo dohot tikki lao manomba Jahowa. Las do roha ni nasida di akka na adong di nasida. Jala pos rohana na lao lehonon ni Jahowa do sude na dihaporluhon nasida. Disolsoli nasida do keputusanna i? Daong. Sian dia taboto? Alana sian najolo, sai dilehon Jahowa do sude na dihaporluhon naposona. Misalna, dipasu-pasu Jahowa do si Abraham, “ama ni saluhut halak na porsea”.​—Rom 4:11.

2. (a) Songon na didok di Heber 11:8-10, 16, boasa olo si Abraham manadikkon kota Ur? (b) Aha do na lao taulas di parsiajaran on?

² Olo do si Abraham manadikkon ngoluna na tabo di kota Ur. Boasa? Ala dipaima ibana do “kota na marfondasi na hot”. (Jaha Heber 11:8-10, 16.) Aha do lapatan ni “kota” i? Aha do ambat-ambat na diadopi si Abraham tikki dipaima ibana kota i lao dipajongjong? Jala songon dia hita boi maniru si Abraham dohot akka naposo ni Jahowa di tikkinta saonari naung maniru ibana?

3. Aha do kota na dipaima si Abraham?

³ Kota na dipaima si Abraham, i ma Harajaon ni Debata. Harajaon i diuluhon Jesus Kristus dohot 144.000 halak Kristen na miniahan. Digoari si Paulus do Harajaon i “kota ni Debata  na mangolu i, i ma Jerusalem na di banua ginjang”. (Heb. 12:22; Pgk. 5:8-10; 14:1) Diajarhon Jesus do akka siseanna lao manangiakkon asa ro Harajaon i, jala asa saut lomo ni roha ni Debata di tano on, songon na di banua ginjang.​—Mat. 6:10.

4. Songon na didok di 1 Musa 17:1, 2, 6, aha do na diboto si Abraham taringot Harajaon na dijanjihon Debata?

⁴ Diboto si Abraham do songon dia Jahowa pajongjongkon Harajaon i? Daong. Saleleng marratus taon, gabe “rahasia na badia” do i. (Eps. 1:8-10; Kol. 1:26, 27) Alai, diboto si Abraham do na lao gabe raja do akka pinopparna, songon naung dijanjihon Jahowa tu ibana. (Jaha 1 Musa 17:1, 2, 6.) Massai togu do haporseaon ni si Abraham tu janji ni Jahowa. Gabe songon naung diida ibana ma Messias i, i ma Raja ni Harajaon ni Debata. Alani i, didok Jesus do tu halak Jahudi, “Marlas ni roha do amamuna si Abraham naeng marnida harorongku, saut do i diida ibana, gabe las ma rohana.” (Joh. 8:56) Takkas ma, diboto si Abraham, adong do piga-piga sian akka pinopparna na lao gabe bagian sian Harajaon ni Debata. Jala olo do ibana paimahon Jahowa pasautton janjina i.

5. Sian dia do taboto na dipaima si Abraham do kota na dibahen Debata?

⁵ Songon dia si Abraham patuduhon na dipaima ibana do kota manang Harajaon na dibahen Debata? Dang olo parsidohot si Abraham tu sude pamarettaon na adong di portibi on. Marpinda-pinda do ibana, dang dibahen ibana jabu di sada inganan asa toktong tading disi. Jala dang marpihak ibana tu raja di portibi on. Asing ni i, dang dibahen si Abraham pamarettaonna sandiri. Alai, toktong do dioloi ibana Jahowa, jala sabar do ibana paimahon Jahowa pasautton janjina. On patuduhon massai togu do haporseaon ni si Abraham tu Jahowa. Saonari, taulas ma akka ambat-ambat na diadopi si Abraham, jala aha na boi taparsiajari sian ibana.

6. Songon dia do kota Ur i?

⁶ Ditadikkon si Abraham do kota Ur, kota na aman jala tabo do ngolu ni akka halak disi. Mamora jala timbo do sikkola ni nasida. Massai timbo do tembok ni kota i, jala adong parit na bagas di sakaliling ni kota i. Jago do akka  halak di kota on manurat dohot maretong. Godang do ra halak na martiga-tiga disi, alana akka peneliti mandok, godang do surat bisnis na didapot nasida di luat i. Massai uli do jabu ni akka halak di kota Ur. Dibahen do i sian batu bata dohot cat na bontar. Di piga-piga jabu, adong 13 manang 14 kamar, jala halamanna dibahen sian lante batu.

7. Boasa ikkon pos roha ni si Abraham jagaon ni Jahowa do ibana dohot keluargana?

⁷ Ikkon pos do roha ni si Abraham, jagaon ni Jahowa do ibana dohot keluargana. Boasa? Ingot ma, nungnga ditadikkon si Abraham dohot si Sara ngoluna na aman jala tabo di kota Ur. Jala olo do ibana tading di kemah di huta na jonok tu Kanaan. Dang adong be tembok na timbo dohot parit na bagas na mambahen aman keluargana. Gariada, boi do diserang akka musu nasida.

8. Situasi aha do na hea diadopi si Abraham?

⁸ Diulahon si Abraham do lomo ni roha ni Debata, alai hea do dang boi ibana mangalehon sipanganon tu keluargana. Mulana, disuru Jahowa do si Abraham asa lao tu sada luat. Alai sada tikki, masa ma haraparon di luat i. Gabe lam susa do ngolu ni nasida alani haraparon i. Gabe pinda ma nasida tu Misir. Alai, dung pinda tu Misir, naeng dibahen si Firaun do si Sara gabe istrina. Bayakkon ma, tottu marsak hian do si Abraham alani i. Alai, disuru Jahowa do si Firaun asa paulakkon si Sara tu si Abraham.​—1 Mus. 12:10-19.

9. Aha do masalah na diadopi keluarga ni si Abraham?

⁹ Adong do muse na diadopi keluarga ni si Abraham. Dang boi marianakkon si Sara. Saleleng martaon-taon marsak hian do roha ni nasida alani i. Ujungna, dilehon si Sara ma hatobanna, i ma si Hagar tu si Abraham, asa boi adong ianakkon ni nasida. Alai, tikki hamil si Hagar, lea do dibahen ibana si Sara. Lam maol do situasina, ujungna gabe dipalao si Sara ma si Hagar sian jabu.​—1 Mus. 16:1-6.

10. Aha do na masa tu si Ismael dohot si Isak na mambahen si Abraham boi gabe maol marhaposan tu Jahowa?

¹⁰ Ujungna, hamil ma si Sara, jala digoari ma anakna i si Isak. Holong do roha ni si Abraham tu si Isak dohot si Ismael, anakna na sian si Hagar. Alai jahat do si Ismael tu si Isak. Gabe ikkon dipalao si Abraham ma si Ismael dohot si Hagar. (1 Mus. 21:9-14) Martaon-taon dukkon i, dipangido Jahowa do si Abraham asa mamelehon si Isak gabe pelean. (1 Mus. 22:1, 2; Heb. 11:17-19) Di dua situasi i, ikkon pos do roha ni si Abraham na lao pasautton ni Jahowa do janjina taringot pinoppar ni si Abraham.

11. Boasa ikkon sabar si Abraham paimahon Jahowa?

¹¹ Di situasi i, ikkon sabar do si Abraham paimahon Jahowa. Tikki ditadikkon ibana kota Ur, hira-hira nungnga marumur 70 taon lobi ibana. (1 Mus. 11:31–12:4) Adong ma hira-hira saratus taon ibana tading di kemah, jala marpinda-pinda do ibana tu akka luat di Kanaan. Mate ma si Abraham tikki marumur 175 taon. (1 Mus. 25:7) Alai dang diida si Abraham songon dia Jahowa mangalehon Tano na Dijanjihon i tu akka pinopparna. Jala dang diida ibana tong kota, manang Harajaon ni Debata i dipajongjong. Nang pe songon i, didok do di Bibel, “mate saur matua” do si Abraham. (1 Mus. 25:8, Bibel siganup ari) Nang pe godang hasusaan na diadopi si Abraham, alai toktong do togu haporseaonna jala sabar do ibana paimahon Jahowa. Boasa boi songon i? Alana saleleng ngolu ni si Abraham, jagaon ni Jahowa do ibana. Jala dibahen Jahowa do ibana gabe ale-alena.​—1 Mus. 15:1; Jes. 41:8; Jak. 2:22, 23.

12. Aha do na tapaima, jala aha do na lao taulas?

¹² Songon si Abraham, tarpaima do hita tu  kota na marfondasi na hot. Memang, dang tapaima be andigan kota i dipajongjong. Alana, nungnga dipajongjong Harajaon ni Debata di taon 1914, jala nungnga mamaretta be i di surgo. (Pgk. 12:7-10) Alai, tarpaima do hita andigan Harajaon i mamaretta di tano on. Tikki paimahon i, godang do ra situasi na maol na taadopi songon na diadopi si Abraham dohot si Sara. Adong do naposo ni Jahowa saonari na marhasil maniru si Abraham? Akka pengalaman na dipaboa di Joujou Paboahon patuduhon, godang do naposo ni Jahowa saonari na sabar jala marhaposan tu Jahowa, songon si Abraham dohot si Sara. Taulas ma piga-piga contohna, jala aha na boi taparsiajari sian i.

13. Aha do na boi diparsiajari hamu sian pengalaman ni donganta si Bill?

¹³ Bahen ma pengorbanan. Molo Harajaon ni Debata do na urrikkot di ngolutta, ikkon olo do hita mambahen pengorbanan songon si Abraham asa las roha ni Jahowa. (Mat. 6:33; Mrk. 10:28-30) Parrohahon ma pengalaman ni donganta si Bill Walden. * Di taon 1942, tamat do si Bill sian universitas di Amerika Serikat. Gabe sarjana do ibana. Di tikki i ma mulai marsiajar ibana dohot Sitindangi Ni Jahowa. Nungnga diatur guru ni si Bill hian, asa dapotna karejo dung tamat, alai dang olo si Bill. Dipillit ibana do lao mangalehon gumodang tikki tu Jahowa sian mandapot karejo na balga gajina. Dang leleng dukkon i, disuru pamaretta ma si Bill asa dohot gabe tentara. Alai, denggan do ditolak ibana i. Ujungna, didenda ma ibana lobi sian saratus juta rupiah, jala ikkon dipenjara do ibana saleleng lima taon. Alai dung tolu taon, dibebashon ma ibana. Dung i, diundang do ibana tu Sikkola Gilead, jala gabe utusan injil ma ibana di Afrika. Marhasohotan ma si Bill dohot si Eva, jala marhobas do nasida di Afrika. Pasti godang do pengorbanan na ikkon dibahen nasida. Ujungna, mulak do nasida tu Amerika Serikat lao mangurus omak ni si Bill. Tikki diingot si Bill pengalamanna, didok ibana, “Naeng tangis do au molo huingot  sude tugas na dilehon Jahowa tu au saleleng lobi sian 70 taon. Mandok mauliate do au tu Jahowa, ala dilehon Ibana do kesempatan tu au mamakke ngolukku lao marhobas tu Ibana.” Boi do dipakke hamu ngolumuna asa parsidohot tu dinas sepenuh waktu?

14-15. Aha do parsiajaran na boi didapot hamu sian pengalaman ni donganta si Apostolidis dohot istrina?

¹⁴ Unang ma didok rohamu dang adong masalah na lao diadopi hamu. Sian contoh ni si Abraham boi ma taida, akka halak na manomba Jahowa pe toktong do mangadopi masalah. (Jak. 1:2; 1 Ptr. 5:9) On ma na dihilala donganta si Aristotelis Apostolidis. * Tardidi ma ibana taon 1946 di Yunani. Dung i taon 1952, martunangan ma ibana dohot donganta si Eleni. Lomo do roha ni nasida mangalehon na dumenggan tu Jahowa. Alai marsahit ma si Eleni, didok dokter adong tumor di otakna. Diangkat dokter ma tumorna i. Alai martaon-taon dung marhasohotan nasida, tubu ma muse tumorna i. Dioperasi dokter ma muse ibana. Gabe lumpuh sambola ma si Eleni, jala gabe maol ma ibana makkatai. Alai toktong do ringgas ibana marbarita nang pe marsahit, jala nang pe dianiaya pamaretta nasida di tikki i.

¹⁵ Saleleng 30 taon denggan do diurus si Aristotelis istrina. Saleleng di tikki i do tong marhobas ibana gabe sahalak sintua, mangurupi gabe panitia kebaktian, jala dohot tu pembangunan Bale Kebaktian. Dung i di taon 1987, kecelakaan ma si Eleni tikki marbarita. Saleleng tolu taon ma ibana koma, jala ujungna mate do ibana. Tikki paboahon pengalamanna i, didok donganta si Aristotelis ma, “Saleleng martaon-taon, godang do masalah na huadopi. Tompu do i masa, jala dang hurippu masa i. Jadi sai berupaya do au asa boi martahan. Jala dang hupaloas masalah i mambahen metmet rohakku. Alai toktong do dilehon Jahowa tu au gogo, asa boi huadopi i sude.” (Ps. 94:18, 19) Dihaholongi Jahowa do akka naposona na mangalehon na dumenggan tu Ibana nang pe mangadopi masalah.

16. Aha do poda na denggan na dilehon donganta si Knorr tu istrina?

¹⁶ Toktong ma pikkiri hamu janji ni Debata di ari na naeng ro. Toktong do dipikkiri  si Abraham pasu-pasu na lao lehonon ni Jahowa tu ibana. Jala i do na mangurupi ibana boi martahan mangadopi hasusaan di ngoluna. Songon i ma na dihilala donganta si Audrey Hyde. Nungnga mate suamina na parjolo alani kanker, i ma donganta si Nathan H. Knorr. Jala suamina na paduahon pe, tong do marsahit na posi, i ma donganta si Glenn Hyde. * Alai toktong do dipikkiri si Audrey janji ni Debata di ari na naeng ro. Didok si Audrey, boi do toktong marlas ni roha ibana ala mangingot hata ni donganta si Knorr, di piga-piga minggu andorang so mate suamina i. Didok si Audrey, “Dipaingot si Knorr do au, ‘Dung mate hita, takkas do adong harapan jala dang ikkon marsitaonon be hita. Bereng ma tu jolom, disi do adong harapan.’ . . . Didok ibana muse, ‘Marsitutu ma hamu mamakke ngolumuna lao mangurupi na asing, ala on do na boi mambahen hamu marlas ni roha.’” Massai denggan do poda i tu hita. Boi do i mangurupi hita asa toktong mangulahon na denggan tu na asing, jala ‘marlas ni roha di bagasan pangkirimon’.​—Rom 12:12.

17. (a) Boasa ikkon toktong tapikkiri janji ni Debata di ari na naeng ro? (b) Songon dia Mika 7:7 mangurupi hita lao mandapot pasu-pasu di ari na naeng ro?

¹⁷ Saonari, ikkon lam tapikkiri do janji ni Debata di ari na naeng ro. Alana akka na masa saonari di portibi on patuduhon nungnga mangolu hita di ujung ni ari parpudi. Tokkin nai dang tapaima-ima be Harajaon ni Debata mamaretta di tano on. Sada pasu-pasu na boi tahilala i ma, boi hita pajuppang muse dohot halak na mate na tahaholongi. Di tikki i, pasu-pasuon ni Jahowa do si Abraham ala sabar jala marhaposan tu Jahowa. Paheheon ni Jahowa ma ibana dohot keluargana asa mangolu salelengna di tano on. Boi do pajuppang hamu dohot nasida? Boi. Molo ditiru hamu si Abraham. Bahen hamu ma pengorbanan tu Harajaon ni Debata, toktong ma hamu marhaposan nang pe mangadopi hasusaan, jala sabar ma hamu paimahon Jahowa.​—Jaha Mika 7:7.