1. ¿Kunsa Diosan taqe servirinakapajj lurañ muntanjja, ukat kunatsa? (Nayrïr paginankir dibujo uñjjattʼäta).

JESUCRISTOJJ akham sasaw arkirinakapar säna: “Sarapjjam, taqe markankir jaqenakar nayan discipulojar tukuyapjjam” sasa (Mat. 28:19). Diosan taqe servirinakapaw kunjamsa uka arunak sum phoqsna uk yateqañ muntanjja (2 Tim. 4:5). Janiw kuna luräwis ukat sipan jukʼamp importantejj utjkiti, ni jukʼamp valoranisa ni wakiskiris utjkarakiti. Ukampis awisajja, kunjamtï Diosar serviñ munktan ukham serviñajj chʼamakïspawa.

2. ¿Kunatsa awisajj Diosar sum serviñajj chʼamakïspa?

² Kunayman wakiskir luräwinakaw tiempo apaqestaspa, chʼamsa tukuyarakistaspa. Familiasar kunatï wakiski uk churañatakejja, inas urun walja horanak trabajiñasächi. Jan ukajja, yaqha lurañanakaw familiasan utjaspa, usuta, wali llakita, chuymankipstata ukhamaw uñjasiraksna. Ukhamanakan uñjaskasasa, ¿kunjamsa Diosar sum sirvsna?

3. Jesusajj kuntï Mateo 13:23 texton siskäna ukajj ¿kunsa amuytʼayistu?

³ Jan walinakan uñjasitas laykojja, janiw kunjamtï Diosar serviñ munktan ukham servirjamäktanti, ukhamäkchisa, janiw aynachtʼañasäkiti. Janiw taqenis Reinon achup mä igualak achoqksnati, mä arunjja, janiw taqenis Diosar mä igualak sirvksnati, uk Jesusajj yatïnwa (Mateo 13:23 liytʼañataki). Ukampis Diosar taqe chuyma serviñatak chʼamachasiñäni ukhajja, Jupajj wali valoranitwa luratanakas uñjani (Heb. 6:10-12). Maysa toqetjja, inas Diosar serviñan jukʼamp lurirjam amuyasstan. Aka yatichäwinjja, Diosar serviñajj jakäwisan  nayrankañapatakisa, kunatï jakañatak wakiski ukampik jakasiñatakisa, jukʼamp sum predicañatakisa, yatichañatakisa, kunanak lurañas yanaptʼistaspa ukwa yatjjatañäni. Nayraqatjja, Diosar sum serviñajj kamsañsa muni ukwa uñjañäni.

4. Diosar sum serviñajj ¿kamsañsa muni?

⁴ Diosar sum serviñajja, predicañatakisa Bibliat yatichañatakis wal chʼamachasiña sañwa muni. Ukampis Jehová Diosatakejja, qhawqha horanakas yatiytan ukat sipansa, kunatsa yatiytan ukaw jukʼamp wakiskirejja. Jiwasatï Jehová Diosarusa jaqe masisarus munasstanjja, taqe almasampi taqe chʼamasampiw Jupar serviñäni (Mar. 12:30, 31; Col. 3:23). * Suma yatiyäwinak yatiyañajj Diosan mä suma bendicionapawa, uk amtañajj jukʼamp jaqenakar predicañatakiw yanaptʼistani.

5, 6. Walja lurañanakas utjkchistojja, ¿kunjamsa Diosar serviñajj jakäwisan nayrankaspa? Uk mä uñachtʼäwimp qhanañchtʼam.

⁵ Guitarra tukañ wal muniri mä waynat parltʼañäni. Jupajj tiemponïki ukhajj guitarra tukapuniwa. Mä urojja, “sabadonakampi domingonakampiw mä restauranten tukäta” sasaw sapjje. Ukampis jukʼak ganatap laykojja, lunesat vierneskamajj mä tiendan trabajiriw sararaki. Uka waynajj niya sapürus tiendan trabajkchejja, guitarra tukañaw jukʼamp gusti. Ukatwa guitarra tukañ jukʼamp yateqañ muni, ukhamat jukʼamp urunak guitarra tukas trabajiñataki. Ukañkamajja, mä ratukis guitarra tukapuniwa.

⁶ Jiwasampejj niya ukhamarakiwa, inas qhawqtï munktan ukham jan predicañ puedkstanti. Ukampis uk lurañaw jukʼamp kusisiyistu. Sapürutjamarakiw Reinon yatiyäwipampejj jaqenakan chuymapar jukʼamp sum purtʼañatak chʼamachastanjja. Ukampis walja lurañanïtas laykojj inas akham jisktʼasstan: “¿Kunjamsa Diosar serviñajj jakäwijan nayrankaspa?” sasa.

7, 8. ¿Kunjamsa Jesusat yateqasisajj predicañar uñjañasa?

⁷ Jesusajj kunjamsa predicañar uñjäna ukajj wali yateqaskayawa. Jupatakejja, Diosan Reinopat parlañaw jukʼamp wakiskirïnjja (Juan 4:34, 35). Walja jaqenakar predicañatakejj wali jayanakaruw sarirïna. Utat utatsa, walja jaqenakajj utjki uka cheqanakansa, Diosat parlapunirïnwa. Cheqas Diosar serviñaw Jesusatakejj nayrankäna.

⁸ Diosan Reinopat taqe cheqana, taqe horasan parlasaw Cristot yateqasitas uñachtʼaysna. Ukatakejja, kunanak lurañatï gustkistu ukanak jankʼakiw apanuktanjja (Mar. 6:31-34; 1 Ped. 2:21). Yaqhep jilat kullakanakajja, precursor especialata, regularata jan ukajj auxiliaratwa servipjje. Yaqhepasti, yaqha aru yateqasaw kawkjantï yanaptʼajj munaski ukar sarjjapjjaraki. Yatiyirinakajj (publicadoranaka) ukhamarakiw wal chʼamachasipjje, Diosan arunakap yatiyasiñapatakis jupanakaw wal yanaptʼasipki. Precursorästansa janisa, Jehová Diosajj qhawqtï lurirjamäktan ukakwa mayistu. Jupajj ‘kusisiri Diosawa’, ukatwa ‘kʼajkir suma yatiyäwinakap’ kusisit yatiyañas muni (1 Tim. 1:11; Deut. 30:11).

9. 1) Trabajiñapas wakiskchïnjja, Diosan arunakap yatiyañaw Pablotakejj nayrankäna, ¿kunatsa ukham sistanjja? 2) Hechos 28:16, 30, 31 qellqatarjamajja, ¿kunjamsa Pablojj predicañar uñjäna?

⁹ Apóstol Pablotwa yateqasiraksna. Corinto markar misionerot payïr kutin sarkäna ukhajja, jukʼa qollqenïtap laykojj carpanak lurasaw mä qhawqha tiemp trabajïna. Ukampis janiw uka trabajojj jupatak nayrankkänti. Jan ukasti, Corinto markankirinakar jan ‘kuna qollqe’ mayisin predicañatakiw trabajïna (2 Cor. 11:7). Pablojj trabajkchïnsa, Diosar serviñaw jakäwipan nayrankäna, ukatwa Diosan arunakap sapa sábado yatiyirïna. Qhepatjja, janiw sint trabajiñapajj wakisjjänti, ukatwa jukʼamp predicañatak chʼamachasïna. Jupajj ‘jan tiemponiw Diosan arunakap judionakar yatiyäna, ukhamat Jesusajj Cristötap jupanakar uñachtʼayañataki’ (Hech. 18:3-5; 2 Cor. 11:9). Uka qhepatjja, pä maraw Roma markan utapan jistʼantat uñjasïna. Ukhaman uñjasisajja, visitir sarapkäna ukanakaruw predicäna, cartanaksa qellqarakïnwa (Hechos 28:16, 30, 31 liytʼañataki). Juparojj janiw kunas Diosar serviñapatak jarkʼkänti. Ukatwa akham qellqäna: “Niyakejjay [...] ukham serviñ katoqapjjstjja, janiw aynachtʼapkti” sasa (2 Cor. 4:1). Trabajiñas wakiskchejja, jiwasajj Pabljamarakiw Diosan Reinop nayrar uchañasa.

10, 11. Usutas uñjaskstanjja, ¿kunjamsa Diosar taqe chuym sirvsna?

¹⁰ Jilïrïtas layku jan ukajj usutätas laykojja, janiw kunjamtï munktan ukham utat uta predicañ puedjjsnati, ukhaman uñjasisajj ¿kunsa lursna? Yaqha toqenakatwa yatiysna. Nayrïr cristianonakajja, taqe cheqanwa yatiyapjjerïna. Utat utatsa, walja jaqenakajj utjki uka cheqanakansa, yaqha cheqanakansa yatiyapjjapunirïnwa (Hech. 17:17; 20:20). Jan sint sarnaqañ puedjjstan ukhasti, ¿kunsa luraraksna? Jaqenakajj sarnaqapki uka cheqan qontʼasisaw jupanakamp parltʼsna. Telefonotsa, cartatsa, yaqha cheqanakansa yatiyaraksnawa. Ukham yatiyasajja, wali kusisitaw usuta jan ukajj jilïri jilat kullakanakajj jikjjatasipjje.

¹¹ Ukhamajj usutas uñjaskstanjja, taqe chuymaw Diosar sirvsna. Pablot parltʼaskakiñäni, jupajj akham sänwa: “Khititejj nayar chʼam churkitu ukan chʼamapampejja taqe kunatakiw nayajj chʼamanïta” sasa (Filip.  4:13). Mä kutejj viajkasin usuntkäna ukhaw Diosan uka chʼamap wal munäna. Galacia cheqankir jilat kullakanakar akham sänwa: “Nayajj usutätaj laykuw suma yatiyäwinak qalltan jumanakar yatiyapjjayäsmajja” sasa (Gál. 4:13). Usut uñjasisajj ukhamarakiw jiwasajj doctoranakaru, enfermeronakaru, yaqha ukham jaqenakar Diosat parlsna. Yatiyir sarktan ukhajja, jupanakat waljanejj janiw utankapkiti.

12. ‘Mä toqeruk uñtaña’ siski ukajj ¿kamsañsa muni?

¹² Jesusajj akham sänwa: “Nayrajj cuerpon qhanapawa. Ukhamasti nayramatejj sumächi [jan ukajj kunjamtï notapan siskejja, mä toqeruk uñtatächi] ukhajja, taqpach cuerpomaw qhantani” sasa (Mat. 6:22). ¿Kunsa uka arunakajj sañ muni? Kunatï wakiski ukampik jakasiña sañwa muni, mä arunjja, kuntï lurañ munktan uka toqerukiw uñtañasa, janiw yaqha toqenakar uñtañasäkiti. Jesusatwa yateqassna, jupatakejj Diosar serviñaw jakäwipan nayrankäna, uka toqerukis uñtkaspa ukhamänwa. Discipulonakaparusa, Diosar serviña ukhamarak Diosan Reinopa nayrar uchapjjañapatakiw yaticharakïna. ¿Kunjamsa Jesusat yateqassna? ‘Diosan Reinopa, kunatï Jupa nayraqatan cheqapäki ukanakwa nayraqat thaqañasa’ (Mat. 6:33).

13. Diosar serviñajj jakäwisan nayrankañapatakejja, ¿kunsa lursna?

 ¹³ Diosar serviñajj jakäwisan nayrankañapatakejja, kunatï jan sint wakiskirïki ukanak lurañwa jaytañasa. Ukhamatwa jaqenakarojj Diosar uñtʼapjjañapatakisa, Jupar munasipjjañapatakis yanaptʼañäni. * Semanan jukʼamp predicañatakejja, inas minus horanak trabajiñ amtsna. Jan ukajja, kusistʼañanakar jan sint chuym uchañwa amtaraksna.

14. Jukʼamp predicañatakejja, ¿kun lurañsa mä jilatampi esposapampejj amtapjjäna?

¹⁴ Elías sat jilïr irpir jilatampi esposapampejj kunsa lurapjjäna uk uñjañäni. Jilatajj akham siwa: “Janiw ukapachajj precursorat serviñ puedipkayätti. Ukampis jukʼamp predicañatakejj mä qhawqha cambionakwa lurapjjayäta. Nayraqatjja, qollqe jan sint gastañwa amtapjjayäta. Niyakejjay kusistʼañanakajj walja tiempo apaqapjjchitänjja, ukanakar jan sint chuyma uchañwa amtapjjarakiyäta. Minus horanak trabajiñwa mayipjjarakiyäta. Taqe ukanak lurañajja, jaypʼu toqer yatiyañataki, jukʼamp jaqenakar Bibliat yatichañatakiw yanaptʼapjjetäna. Phajjsinjja, pay kutirakiw semanan yatiyir mistupjjayäta. Ukham lurasajj wali kusisitaw jakasipjjayäta” sasa.

15, 16. 1 Timoteo 4:13, 15 qellqatarjamajja, ¿kun lurañas jukʼamp sum predicañatakisa yatichañatakis yanaptʼistani? (“ ¿Diosar sum serviñatakejj kunanak lurañas yanaptʼistaspa?” sat recuadro uñjjattʼarakïta).

¹⁵ Jukʼamp suma yatichirïñatak chʼamachasisaw Diosar sum serviraksna. Profecionani yaqhep jaqenakarojja, jukʼamp wakichtʼasipjjañapatakiw  mayipjje, ukhamat suma yatjjattʼatäpjjañapataki, trabajonsa jukʼamp sum trabajipjjañapataki. Jiwasajj ukhamarakiw suma yatichirïñatakejj wakichtʼasiskakiñasa (Prov. 1:5; 1 Timoteo 4:13, 15 liytʼañataki).

¹⁶ ¿Kun lurañas ukatak yanaptʼistani? Cristianjam Jakañataki ukat Yatiyañataki tantachäwin kunatï yatichaski uk sum istʼañasawa. Uka tantachäwinjja, Diosan arunakap jukʼamp sum yatiyañwa yateqtanjja. Ukhamasti, tantachäw sarayir jilatajj plataforman arstʼirinakar ewjjtʼki uk sum istʼañasawa, ewjjtʼanakapajj kunjamsa jiwasar yanaptʼistaspa ukwa amuytʼañasaraki. Ukat ukarjam lurañatakiw chʼamachasiñasa. Maysa toqetjja, grupo uñjiri jilataruw (superintendente de grupo) yanaptʼa maysna, jan ukajj jiwasamp predicañapatakiw mayiraksna. Sum yatichañ yatipki uka jilat kullakanakampiw yatiyir sararaksna, jupanakat yaqhepajj precursoräpjjaspawa, jan ukajj congregacionanak tumptʼir jilatäspawa. Ukanak lurañaw Bibliat yatichañatak utjkistu uka qellqatanakampi videonakampi sum yatichañatak yanaptʼistani. Ukhamatwa predicasasa yatichasas jukʼamp kusisitäñäni.

17. ¿Kunjamsa Diosar sum servisajj jakasiñäni?

¹⁷ ‘Diosamp chika trabajiñajj’ wali kusiskañawa (1 Cor. 3:9). ‘Kunatejj wali wakiskirïki’ ukanak nayraqat lurtan ukat Diosar serviña jakäwisan nayrar uchtan ukhajja, ‘kusisit chuymampiw Diosar yupaychtanjja’ (Filip. 1:10; Sal. 100:2). Kuna jan walinakansa uñjaskchiñänejja, “Diosaw jupar sum serviñatak chʼam churitani” sasaw confiytanjja (2 Cor. 4:1, 7; 6:4). Qhawqtï lurirjamäktan ukarjam waljsa jan ukajj jukʼaksa yatiystanjja, Diosar taqe chuym serviñajj kusisit jakasiñatakiw yanaptʼistu (Gál. 6:4). Diosar ukham servisajja, qhawqsa Juparusa jaqe masisarus munastan ukwa uñachtʼaytanjja. ¿Kuna bendicionanaksa ukham luratasat katoqañäni? Bibliajj akham siwa: “Ukhamatwa juma pachpas salvasïta, ukhamaraki khitinakatï jumar istʼapktam ukanakas salvasipjjani” sasa (1 Tim. 4:16).