Oseas 4:1-19
4 Israel marka, Jehová Diosan arunakap istʼam,Jehová Diosajj markan jakirinakaruw juzgani,+markanjja janiw kunatï cheqäki ukasa, munasiñat jan jaytjasiñasa, Dios toqet yatiñas utjkiti.+
2 Falso juramentonakampi, kʼarinakampi,+ jaqe jiwayañanakampi,+lunthatasiñanakampi, adulterio jucha+ lurañanakampiw taqe cheqan utji,jaqenakajj yaqhanakan wilap wartasipkakiwa.+
3 Ukatwa markajj llakisiñan uñjasini,+markan jakirinakajj taqeniw tukusipjjani,salvaje animalanakasa, alajjpachanakankir jamachʼinakasa,lamar qotankir chawllanakas jiwarapjjaniwa.
4 “Ukampis jan khiti jaqes yaqha jaqemp chʼajjwpanti ni toqenoqpansa,+markamajj mä sacerdotemp jiskhisir jaqenakar uñtasitawa.+
5 Ukatwa jumajj urpach lanktʼasïta,profetasti arumäkaspas ukhamaw jumamp chik lanktʼasirakini.
Nayasti taykamarojj amuktʼayäwa.*
6 Nayar jan uñtʼapjjatap laykojj markajajj amuktʼayatäniwa.*
Nayar jan uñtʼañ munapjjatam laykusti,+nayatak sacerdotëñam janirakiw munjjäti.
Jumajj Diosaman leyipat* armastawa,+nayajj wawanakamat armasirakïwa.
7 Sacerdotenakajj jukʼamp waljaptasajja, naya contrajj jukʼamp juchanak lurapjjarakïna.+
Jupanakan jachʼañchasitapjja jiskʼachatäñaruw tukuyäjja.*
8 Markajajj juchachaski ukhajja, jupanakajj aychampiw likʼintapjje,jupanakajj markajan juchachasiñap wal munapjje.
9 Markarusa sacerdoterusa uka kikparakiw pasani.
Sarnaqäwinakapat jupanakarojj cuenta mayëjja,luratanakaparjamaw castigäjja.+
10 Jupanakajj manqʼapjjaniwa, ukampis janiw sistʼasipkaniti.+
Qʼañu jucha lurapjjani,* ukampis janiw mirtapkaniti,+Jehová Diosar jan akchʼas respetapjjatap layku.
11 Prostitutjam sarnaqañasa,* vinosa, machaq vinosa,kunatï walïki uk lurañ munañ apaqe.*+
12 Markajankirinakajj maderat lurat idolonakaparuw jisktʼasipjje,kuntï thujrupajj* siski ukarjamaw lurapjje,prostitutjam sarnaqañ munañaw* jupanakarojj maysar saranukuyi,prostitutjam sarnaqasajj* janiw Diosapar sujetasiñ munapkiti.
13 Jupanakajj qollu patjjanakan sacrificionak loqtapjje,+jiskʼa qollunakanwa sacrificionak jewqʼeyapjje,roble ukhamarak estoraque sat qoqanakan* jakʼapana, ukhamarak taqe jachʼa qoqanakan jakʼapana,+uka qoqanakajj sum chʼiwjjatatap layku.
Ukatwa phuchanakapajj prostitutanakäpjje,*yojjchʼanakapas adulterio jucha lurapjje.
14 Phuchanakaparojj janiw prostitutat sarnaqapjjatapat* cuenta maykäti,janirakiw yojjchʼanakaparojj adulterio jucha lurapjjatapat cuenta maykäti.
Chachanakajj prostitutanakan ukaruw sarapjje,templonkir prostitutanakampiw sacrificionak loqtapjjaraki.
Ukham jan amuytʼasir+ markajj tukjatäniwa.
15 Israel marka, jumajj prostitutatsa sarnaqkstajja,*+Judá markajj jan juchani uñjaspanti.+
Jumanakajj jan Guilgal+ markarusa ni Bet-Aven+ sat markarus jutapjjamti,janirak jumanakajj ‘¡kunjamtï Jehová Diosajj cheqpachapun jakkir Diosäkejja!’ sasin juramento lurapjjamti.+
16 Israelajj jan kasusir vacar uñtataw jan istʼasir tukjje.+
¿Jichhasti Jehová Diosajj juparojj mä orqo ovejar uñtasitat pasto oraqen* awatini?
17 Efrainajj idolonakaruw adoraski.*+
¡Juparojj jaytapjjam!
18 Cervezap* tukuntasasti,jupajj qʼañu jucha lurañaruw* katuyasjje.
Apnaqerinakapajj* phenqʼaskañanak wal lurañ munapjje.+
19 Thayaw juparojj* chheqanakapampi imjjatani,jupasti sacrificionakapat phenqʼasiniwa”.
Notanaka
^ Jan ukajja, “tukjäwa”.
^ Jan ukajja, “tukjatäniwa”.
^ Jan ukajja, “yatichäwipat”.
^ Ukajja, “Jupanakajj nayar jachʼañchañat sipansa jiskʼachasipkituwa” sasaw jaqokipasirakispa.
^ Jan ukajja, “Prostitutjamaw sarnaqapjjani”.
^ Jan ukajja, “Qʼañu jucha lurañasa”.
^ Hebreo arunjja, “chuym chhaqtayi”.
^ Jan ukajja, “jutïrit yatiñatak varapajj”.
^ Jan ukajja, “qʼañu jucha lurasajj”.
^ Jan ukajja, “qʼañu jucha lurañ munañaw”.
^ Jan ukajja, “arbolanakan”.
^ Jan ukajja, “qʼañu jucha lurapjje”.
^ Jan ukajja, “qʼañu jucha lurapjjatapat”.
^ Jan ukajja, “yaqhanakamp ikintasis qʼañu juchsa lurkstajja”.
^ Hebreo arunjja, “jachʼa lugaran”.
^ Jan ukajja, “yupaychaski”.
^ Jan ukajja, “Trigot lurat cervezap”.
^ Jan ukajja, “prostitutat sarnaqañaruw”.
^ Hebreo arunjja, “Escudonakapajj”.
^ “Juparojj” sasinjja, Efrainat parlaski.
