¡Afmatufali fente tañi quelluchequen Biblia ñi quimün! Pu che inanielu feichi quimün cüme elcünutuingün ñi mongen. Inaduamnge Ricardo ca Andrés tañi rupan.

RICARDO FEIPI: Mari quechu tripantu nielu iñche, conün quiñe troquiñ huesalcachequelu mu. Fente ñi huesalcaeteu tañi pu hueni ñi huesa femquen, ayüquefun carceltucungeal mari tripantu. ¡Müna huesa dungu cüpa femquefun! Huelu cheu ñi mülen iñche, pu che femngechi femlu müna yamfalngefui. Fei ca femngechi chengean pifun.

Feimu drogatuquefun, pod mongen yeniequefun ca quehuatuchefengefun. Quiñe pun, fütra quehuan mülequefui, tralcatumequehuiyiñ. Layan pemai pin, huelu mongetripan. Rupalu tüfa, checonan pifun, fei eluhun tañi cüme elcünutual ñi mongen. Huelu, ¿chumngechi femafun? ¿Chem quelluafeneu?

Epe com tañi pu che re huesaque dungu contueyu, fei ayüucülelaingün. Huelu quiñe tañi malle ca ñi pu che femngechi mongen nielai. Quisu engün cüme chengei ca inaqueingün Biblia ñi ngülam. Quisu engün quimeltufeneu Chau Dios ñi üi, Jehová pingei. Feimu pichin rupalu feichi tralcatun, llellipufiñ ta Chau Dios, quelluen Jehová pifiñ. Ca antü mu, amuldungupai quiñe huentru Dunguquelu Ineingen Jehová ngelu, ¡afmatulehuen tati! Feichi peñi quimeltuleleneu Biblia.

Amulechi antü mu, tañi pu cuifique hueni mangelqueneu ñi pemeafiel, huelu amulayan piquefiñ engün cüdautulu rume tañi femal. Eluhun tañi doi quimal Biblia mu, fei ¡cümecünun tañi femquen! Doi cüme elcünutun tañi mongen ca rüf ayüucületun.

Acordaniequen quiñe antü tañi ngillatufiel ta Chau Ngünechen: “Cuifi ayüquefun carceltucungeal mari tripantu, fei tañi yamfal chengeal” pifiñ. “Huelu feula llellipueyu: chumngechi tañi quellungen, ca femngechi quelluchealu mari tripantu mu. Eluen fill antü amuldungual eimi mu Chau” pifiñ. Chau Dios allcütueneu, feimu deu yenien mari regle tripantu ñi amuldunguchequen. Quiñe antü no rume carceltucungelan.

Huelu fentren tañi pu huesaque compañ alüñma carceltucungequeingün. Caquelu laingün ca. Feimu mañumniefiñ tañi pu pariente testigo de Jehová ngelu. Quisu engün inayentulai pu huesaque che tañi mongen, doi mai inaqueingün Biblia ñi quimün. Doi yamniefiñ engün feichi pu che mu tañi yamniefiel cuifi. Feimu mañumniefiñ engün, huelu doi mañumniefiñ ta Jehová, quisu quimeltueneu ñi cüme yenieal tañi mongen.

 ANDRÉS FEIPI: Cheu ñi tuhun iñche, mülefui filla, droga, hueñefe ca ngünencachequelu. Mülefui langümchelu ca pu che cullingequelu cudumafiel cangelu che. Tañi chau putufengei ca drogatuquei, quehuaqueingu tañi ñuque engu ca üyautuuqueingu.

Hueche huentrungelu iñche, putuquen ca drogatuquen. Nampiyauquefun, hueñeyauquefun ca fendequefiñ tañi hueñeel. Doi tremlu iñche, tañi chau hueniyefaluhueneu, huelu quimeltueneu ellca negociayal droga ca caquelu dungu eluñmaquenolu ti ley. Pürüm huehun alün plata. Huelu quiñe antü, pu soltau nüeneu. Quechu tripantu mu carceltucungeaimi pingen tañi epe langümfiel mu quiñe che.

Quiñe antü carcel mu com pu presu nehuentu feipingei: “Allcütupamün pu Dunguquelu Ineingen Jehová, nütramcapai Biblia mu”. Fei amuan pin, ca ayüfiñ com ñi feipiel engün, fei eluhun ñi quimeltulelngeal Biblia. Quisu engün quimeltulaeneu tañi re cüme duamcüleal müten, doi mai feipieneu chumngechi ayüniei Chau Dios tañi yenieal ñi mongen.

Huelu ñi cüme elcünutual tañi mongen, duamün quellu pin. Tañi chaf pu presu aneltueneu, huesalcamequelu troquieneu tañi femmequen, feimu duamün ñi doi quellungeal. Fei ngillatufiñ ta Jehová tañi eluaeteu quimün ca nehuen, fei ta quellueneu llemai. Feimu aneltungelu rume, eluhun ñi amuldunguafiel caquelu presu.

Acui chi antü tañi lifrengetun. Fente tañi llicalen, cüpa amutulayan carcel mu pin. Huelu amutulu iñche, fentren pu presu maichicünuingün ñi cuhu, fei peucayal pieneu. Quiñeque engün feipieneu: “Amulepe tami cüdahuelquefiel ta Chau Dios”.

Quiñeque mu ramtuuquen: “Inanofuli Chau Dios tañi quimün, ¿chumngechi feleafun iñche?”. Feimu müna mañumniefiñ ta Chau Ngünechen fente tañi piuqueyenieteu. Quisu, iñche mu maneluhui tañi cüme elcünutual tañi mongen. a