Tati che ñom piwkengelu chekawün-ngelay ka ayülay ñi doy kümelu trokingeal. Welu may yamchekey, rüf duamtukefi pu che ka eluwkey ñi inayentuafiel kakelu che ñi küme femün.

Kiñeke che llükan chengelu trokikefi tati ñom chengelu. Welu, ¿rüfngepey may tüfa? Femlay llemay, ti ñom chengelu newen piwkekünuwkey ñi feypial: “Welulkan ta iñche”, kafey kimniey chem ñi pepilnoel.

• Küme yewküleaiñ kakelu che iñchiñ. Kiñe lifru ngülamtukelu chumngechi chekawün-ngenoal ta che, feypi: “Tati pu ñom chengelu küdawtukelay ñi weniyeafiel ta kakelu che”. Ka feypi tüfa engün ‘küme yewkülekey kakelu che engün’.

• Ñom chengele tami pichikeche, küme tripayay. Tami pichikeche eluwle ñi ñom piwkengeal fewla, küdawtulayay ñi peal küdaw tremle engün. Tati doctor Leonard Sax wirintukuy kiñe lifru, nütramkalu chumngechi küme tremümafiel pu pichikeche, fey feypi: “Kiñe weche rume falintuwle ka kimtukunole chem ñi pepilnoel, fey nütramkawle ti che engu tañi eluaetew küdaw, küme llowngelayay llemay. Welu ti weche rüf falintufile chem ñi nütramkangeel, elungeafuy chi küdaw”.

Kellufinge ñi chekawün-ngenoal

BIBLIA ÑI NGÜLAM: “Iney rume kimkawünchengele, welu rüf feyngenole ñi felen, kisutu ta ngünenkawküley” (Galata 6:⁠3).

• Feypilayafimi ñi diturpual pepilfalnochi dungu. Kiñeke chaw feypikefi tañi pu yall: “Kom tami ayükeel femafuymi”, ka feypikefi: “Nielmi estudio ka küme küdawülmi, küme chengeaymi”. Femngechi yafültukungelu rume, fentren pichikeche femürpulayngün ñi feypingeel. Welu tami pichikeche eluwle ñi femal chem ñi pepilal ka küme küdawle ñi diturpual, doy küme tripayafuy ñi mongen mu.

• Sakiafimi tañi küme femkeel engün. Feypikefilnge tami pichikeche: “Kom tami femkeel küme tripakey”. Doy may sakifinge kiñeke dungu ñi küme femün, femngechi kelluafimi ñi ñom piwkengeal.

• Feypiafimi tami pichikeche tunte konafel tati redes sociales mu. Pütrün che redes sociales mew kellukelaeyew ñi ñom chengeal. Fey ayükey ñi afmatungeal kiduke engün ka pengelkeyngün fillke kümeke dungu ñi kümelu trokikefiel engün, feymu mallmawkeyngün.

•   Welulkawle tami pichikeche, ngülamtuafimi ñi pürüm feypial “perdonaen”. Kellufinge ñi kimal chem mu welulkawi ka “wiñoduamtuen” tañi feypial.

Kellufinge ñi mañumfengeal

BIBLIA ÑI NGÜLAM: “Mañumtulekeaymün” (Kolosense 3:⁠15).

• Mañumtuafiel kom ñi dewmael ta Chaw Dios. Tati pu pichikeche müley ñi kim mañumafiel kom taiñ eluetew Chaw Dios: taiñ neyülen, taiñ nien ko ka iyael, duamnieiñ kom tüfa taiñ mongeleal. Femngechi nütramkafilmi tami pichikeche, kelluafimi ñi kim mañumal.

• Falintuafiel tati pu che. Kellufinge tami pichikeche ñi kimtukual kom tati pu che doyküley kidu mew kiñeke dungu mu. Feymu kiñe che doy pepil-le kam doy adümuwle tati pichikeche mew, tüfa ngelay ñi ütrirafiel, doy may falintuafuy ka kimafuy feychi che ñi femkeel mew.

• Pengelal tañi mañumkülen. Kellufinge tami pichikeche rüf piwke mew entual tañi mañumün engün. Kim mañumfengele tati pichikeche, ñom piwkengeayngün.

Kimeltuafimi ñi fente falin-ngen kellucheal

BIBLIA ÑI NGÜLAM: ‘Ñom piwke mew doy kümelu trokiafimün ta kakelu pu che. Iney no rume ayükilpe kisu müten tañi küme feleael, welu may ka femngechi kakelu tañi ayülngeael ñi küme feleael engün’ (Filipense 2:⁠3, 4).

• Tati pichikeche kelluntukupe fillke küdaw ñi mülen ruka mew. Feypinofilmi tüfachi dungu, ti pichikeche falintulayafuy ñi kelluntukual. Feymu llemay tati pichikeche müley ñi doyümafiel kelluntukual ruka mu, fey wüla awkantuafuy. Feymu feypiafuymi: “Kelluntukulmi ruka mu, kümelkayafimi ta kakelu che, fey falintungeaymi ka yamfalgeaymi” piafimi.

• Kimeltufinge ñi fente kümen kellucheal. Tami pichikeche eluwkülele ñi kelluafiel ta kakelu che, kim chengerpuay. Feymu kimeltufinge ñi inaduamnieal iney duamniey tañi kellungeal, ka chem femafuy ñi kelluafiel. Femngechi femle tami pichikeche, sakiafimi ka kelluafimi.