Tati feipicünuelchi dungu, rume falin-ngei. Quiñe che Chau Dios ñi üi meu entuquei quiñe feipicünuelchi dungu, feipiafui cam huirintucuafui tañi feipicünuel.

Quiñeque che raquiduamquei ñi huesalcalen feipicünual quiñe dungu, ¿chumngelu? Jesús feipilu cai: “‘Mai’ pilmün, femngechi felepe. ‘Felelai’ pilmün, felequilpe, fei tati doyelchi amulcünulu tañi dungu, fei ta cümelai” (Mat. 5:33-37). Jesús quimniefui tati pu che inaniefilu tati ley ñi elungeel ta Moisés, quiñeque mu mülefui ñi feipicünual quiñe dungu. Feimu pu poyequefilu ta Jehová ca mülefuingün ñi feipicünual quiñeque dungu (Gén. 14:22, 23; Éx. 22:10, 11). Cafei Jesús quimniefui Jehová quisu tañi üi mu feipicünui chem ñi chumal (Heb. 6:13-17). Jesús cüpa feipilai ñi huesalcalen feipicünual quiñe dungu, doi mai ngülamtuqueiñmu taiñ pecanca feipicünunoal quiñe dungu. Feimu feipicünuliyiñ quiñe dungu, mülei taiñ huechunenturpuafiel, femngechi ayühulafiyiñ ta Chau Dios.

Huelu feipingeliyiñ taiñ feipicünual quiñe dungu, ¿chumafuiñ? Hune, ngüneduamuhuaimi tami pepi huechunenturpuafiel tami feipicünuel. Pepi femnolmi, cümeafui tami feipicünunoal. Biblia ta feipi: “Feipicünulmi tami femal quiñe dungu, huelu femnolmi, doi cümeafui tami feipicünunoal” (Ecl. 5:5). Epu, ngüneduamnge chem Biblia ñi ngülam quelluaimu tami feipicünual quiñe dungu cam feipicünunoal. Fei hula inange tami quimürpuel tami cüme dullial. ¿Chuchi am quiñeque ngülam hulquelu ta Biblia?

Quiñeque feipicünuelchi dungu chaftuquenofilu Chau Dios ñi ayüqueel. Quiñe huentru ca quiñe domo poyequefilu ta Jehová nieulu, hueluquentu feipicünuuqueingu. Tañi feipicünuhuel engu, rume falin-ngei. Tüfachi feipicünuelchi dungu femqueingu Jehová ca tati pu che ñi adquiñ meu. Tati huentru ca tati domo feipiuqueingu ñi piuqueyehual, dapihual ca yamuhual. Com tüfa ñi femal tuntepule ñi mongen engu. (Quiñeque lof meu, tati curehuen cambialequei ñi feipicünuel engu, huelu tañi feipicünuel mülei ñi femngeal Jehová ñi adquiñ meu). Fei hula com pu che ñi adquiñ mu curehuen-ngeingu. Fei engu com ñi mongen mu mülei ñi quiñeucüleal engu (Gén. 2:24; 1 Cor. 7:39). Femngechi femngeel tüfachi feipicünuelchi dungu, rume cümei. Ca tüfa rume ayüquei Chau Ngünechen.

Quiñeque feipicünuelchi dungu chaftuquefilu Chau Dios ñi ayüqueel. Quiñe cristiano feipicünulayafui ñi femal tüfachi dungu: pünelayafui tralca ñi incayafiel tañi pais ca ngelayafui tañi fentecünual tañi feyentun Chau Jehová mu. Femliyiñ tüfa, chaftuafuiñ Jehová ñi huercün dungu. Pu cristiano ‘coneltulelaingün tüfachi Mapu tuhun pu che meu’, feimu ngelai ñi coneltuleal chafcahun dungu, aucan cam hueichan mu no rume (Juan 15:19, TNM; Is. 2:4; Sant. 1:27).

 Quiñeque mu quisu tañi raquiduam mu, pu cristiano mülei ñi dullial tañi feipicünual cam feipicünunoal quiñe dungu. Quiñeque mu, mülei taiñ cüme ngüneduamal quiñe feipicünualchi dungu, fei taiñ inanieafiel Jesús tañi ngülam. Quisu feipi: “Eluafimün mai tati emperador, tañi coneltuleel tati emperador, fei femngechi eluafimün ta Ngünechen tañi coneltuleel ta Ngünechen” (Luc. 20:25).

Raquiduamaiñ tüfachi dungu mu, quiñe cristiano ayüle ñi nieal quiñe nacionalidad cangelu pais mu ca ayüle ñi nieal quiñe pasaporte, mülei ñi quimal chem ñi duamnieel ñi feipicünual tati autoridad mu. Huelu feichi pais mu, feipingele tati cristiano ñi femal Jehová ñi ayüquenoelchi dungu fei ñi huechunenturpual tañi feipicünuel tati autoridad mu, tati cristiano nielu Jehová tañi quimeltun ngelafui tañi femal. Feimu tati autoridad feipiafui tati cristiano ñi cacünutual tañi feipicünuelchi dungu, femngechi tüngcüleai tañi raquiduam.

Cüpa cambialetual quiñe feipicünuelchi dungu, mülei ñi feleal ñi chem pilen Romanos 13:1, feipilei: “Itrocom che felei ñi yamnieafiel tati mülechi pu autoridad”. Feimu quiñe cristiano ngüneduamle ñi huesalcalenon tañi feipicünuel, femafui müten. Chau Ngünechen am ayüquelu taiñ femngechi femal.

Feipingelmi: “Tami feipicünual quiñe dungu, mülei tami nünieal quiñe dungu, pochongnagal, lucutuhual, ca fampüramal tami cuhu”. ¿Chumafuimi? Cümeafui tami cüme raquiduamal. Fütra cuifi mu, pu romano ca pu escita ñi feipicünual quiñe dungu pünefingün tañi fütra cuchillo, femngechi tañi dios de la guerra quellueteu ñi huechunenturpual tañi feipicünuel. Pu griego fampüramingün tañi cuhu ñi feipicünual quiñe dungu. Fei engün quimtucuingün ñi mülen quiñe dios tañi ngüneduamaeteu tañi feipin ca tañi chumün.

Quiñe cristiano ñi feipicünual quiñe dungu, ngelai ñi püneafiel quiñe bandera cam chem chemcün no rume nüucülelu tati politico dungu mu ca tati coilaque religion mu. Mülen mu tribunal mu, feipingelmi: “Mülei tami tucuhual tami cuhu huente Biblia meu, fei tami pengelal ñi rüfngen tami feipin”. ¿Chumafuimi? Quisutu dulliaimi chem tami femal. Biblia mu quiñeque poyequefilu ta Jehová ca pünefingün tañi cuhu ñi feipicünual quiñe dungu (Gén. 24:2, 3, 9; 47:29-31). Huelu loncontucunge: Chau Jehová tañi adquiñ mu, feipicünuimi tami feipial rüfngechi dungu. Feimu ramtucangelmi, mülei tami rüf lloudungual. Tami femal, duamfali tami cüme pepicahual.

Fente taiñ falintufiel taiñ huenihuen-ngen Jehová iñchiñ, mülei taiñ llellipuafiel ta Chau Dios, fei taiñ ngüneduamal ñi cümen cam ñi cümenon feipicünual quiñe dungu. Femngechi chaftulayafiyiñ Jehová ñi huercün dungu, ca taiñ raquiduam huesa duamcülelayai. Feimu feipicünulmi quiñe dungu, elunge tami huechunenturpuafiel (1 Ped. 2:12).