Macalo Lucaden pa Jehovah, watute me kwo ma lubbe ki pwony pa Yecu kit ma lukwenane bene gutimo. Pwony man tito wiye wiye jami ma waye iye.

1.   Lubanga. Waworo Lubanga acel keken me ada ma nyinge Jehovah, a dok en aye Won Twer Ducu ki Lacwec. (Jabuli 83:18, New World Translation; Niyabo 4:11) En Lubanga pa Abraim, Moses, ki Yecu.​—Nia 3:6; 32:11; Jon 20:17.

2.   Baibul. Waye ni Baibul obedo Buk ma Lubanga aye oweko kicoyo pi dano. (Jon 17:17; 2 Temceo 3:16) Niyewa cung i kom bukke 66 ducu, man kwako “Cik Macon” ki “Cik Manyen.” Professor Jason D. BeDuhn otito meno ka maleng i kare ma ocoyo ni “niye ki pwony pa Lucaden pa Jehovah ducu jenge i kom gin ma Baibul waco ento pe i kom gin ma gimito ni Baibul owaci.” b

    Kadi bed waye lok ducu ma i Baibul, ento wangeyo ni lok mogo me Baibul tye macalo lapor nyo cung pi gin mukene dok pe myero water lokke kit ma tye kwede kikome.​—Niyabo 1:1, New World Translation.

3.   Yecu. Walubo pwony ki lanen pa Yecu Kricito dok watere macalo Lalarwa ki Wod pa Lubanga. (Matayo 20:28; Tic pa Lukwena 5:31) Pi meno, watye Lukricitayo. (Tic pa Lukwena 11:26) Ento, wapwonyo ki i Baibul ni Yecu pe obedo Lubanga Won Twer Ducu dok Baibul pe cwako pwony ni Lubanga tye adek i i acel.​—Jon 14:28.

4.   Ker pa Lubanga. Man obedo kom gamente kikome ma tye i polo, ento pe gin mo ma tye i cwiny Lukricitayo. Bileyo ka wang gamente pa dano dok bicobo yub pa Lubanga pi lobo. (Daniel 2:44; Matayo 6:9, 10) Jami magi dong cok timme pien lok pa Lunebi me Baibul nyuto ni dong watye ka kwo “i kare me agikki.”​—2 Temceo 3:1-5; Matayo 24:3-14.

    Yecu aye kabaka me Ker pa Lubanga me polo. En ocako loc i 1914.​—Niyabo 11:15.

5.   Larre. Larre ki i bal ki to twere pi ginkok pa Yecu. (Matayo 20:28; Tic pa Lukwena 4:12) Me nongo adwogi maber ki i ginkok meno, dano myero pe guket niyegi i kom Yecu keken ento bene gulok yo me kwogi ci gunong batija. (Matayo 28:19, 20; Jon 3:16; Tic pa Lukwena 3:19, 20) Niye makwo nen i tic. (Yakobo 2:24, 26) Kadi bed kumeno, pe onongo wapore me nongo larre​—ento pi “kica pa Lubanga” omiyo man twere.​—Jo Galatia 2:16, 21.

6.   Polo. Lubanga Jehovah, Yecu Kricito, ki dong Lumalaika ma lugen gibedo i Polo. c (Jabuli 103:19-21; Tic pa Lukwena 7:55) Kibicero jo mogo manok​—jo 144,000 keken​—me kwo i polo wek gulo kacel ki Yecu i Ker me polo.​—Daniel 7:27; 2 Temceo 2:12; Niyabo 5:9, 10; 14:1, 3.

7.   Lobo. Lubanga ocweyo lobo wek dano gubed iye pi naka. (Jabuli 104:5; 115:16; Latitlok 1:4) Lubanga bimiyo mot bot jo ma luwiny wek gubed ki yotkom dok gukwo pi naka i lobo paradic.​—Jabuli 37:11, 34.

8.   Tim maraco ki deno can. Man ocakke i kare ma lamalaika mo acel ojemo i kom Lubanga. (Jon 8:44) Lamalaika man ma kicako lwongone ni ‘Catan Larac’ i nge jemo-ni obwolo luot mukwongo me ribbe kwede i jemone dok man okelo adwogi marac i kom likwayogi. (Acakki 3:1-6; Jo Roma 5:12) Me cobo pyem ma Catan okelo-ni, Lubanga oye ni tim maraco ki deno can kong obed tye, ento En pe biye ni omedde naka.

9.   To. Ngat muto pe medde ki kwo i yo mo keken. (Jabuli 146:4; Latitlok 9:5, 10) Pe tye ka deno can i mac me kapiny.

    Lubanga bicero dano bilion mapol ma guto. (Tic pa Lukwena 24:15) Ento kibijwero jo ma gukwero lubo yo pa Lubanga i nge nicer, dok gen mo keken dong bibedo pe pigi.​—Niyabo 20:14, 15.

10.   Kwo me ot. Walubo cik pa Lubanga ni nyom obedo ribbe i kin laco acel ki dako acel, dok ni myero pe kiket keny kono pi tim me tarwang keken. (Matayo 19:4-9) Wape ki akalakala mo ni cik me Baibul twero konyo jo me ot me bedo ki yomcwiny.​—Jo Epeco 5:22–6:1.

11.   Worowa. Pe waworo yatariya nyo cal mo keken. (Nwoyo Cik 4:15-19; 1 Jon 5:21) Worowa kwako timo jami magi:

    •   Lega bot Lubanga.​—Jo Pilipi 4:6.

    •   Kwano Baibul i yo matut.​—Jabuli 1:1-3.

    •   Lwodo lok i kom gin ma wakwano ki i Baibul.​—Jabuli 77:12.

    •   Wot i cokke pi lega, kwano Baibul, wer, tito pi niyewa, ki dong cuko cwiny Lucaden luwotwa ki jo mukene.​—Jo Kolocai 3:16; Jo Ibru 10:23-25.

    •   Tito “lok me kwena maber me Ker.”​—Matayo 24:14.

    •   Konyo jo ma tye i peko.​—Yakobo 2:14-17.

    •   Gero ki gwoko Ot me Ker kacel ki odi mukene ma watiyo kwedgi me pwonyo lok me Baibul i twok lobo ducu.​—Jabuli 127:1.

    •   Miyo kony ka ma can ma poto atura otimme iye.​—Tic pa Lukwena 11:27-30.

12.   Dulwa. Watye ki kacokke mapatpat, dok luelda aye doro jo me kacokke magi. Ento luelda magi pe gitye ki rwom mo ma kite pat dok pe kiculogi mucara. (Matayo 10:8; 23:8) Pe waculo dul acel me apar dok pe wajogo ajog i cokkewa. (2 Jo Korint 9:7) Ticwa ducu cung i kom mot ma dano miyo labongo nyutte bot lwak.

    Gurup matidi pa Lukricitayo muteggi i yo me cwiny ma kilwongogi ni  The Lukiko Madit dok gitiyo ki i gang kalwa madit gimiyo tira bot Lucaden pa Jehovah ma i twok lobo ducu.​—Matayo 24:45.

13.   Kit ma wanote kwede. Wan ducu watye ki niye acel. (1 Jo Korint 1:10) Watute matek me bedo labongo apokapoka i kinwa pi rangi del komwa, kakawa, nyo rwomwa. (Tic pa Lukwena 10:34, 35; Yakobo 2:4) Kadi bed kumeno, note man weko wabedo agonya me yero gin ma wamito. Lacaden acel acel tiyo ki Baibul me moko tam pire kene ma lubbe ki cwiny ma ngolle kop.​—Jo Roma 14:1-4; Jo Ibru 5:14.

14.   Kitwa. Watute me nyuto mar me ada i gin ma watimo ducu. (Jon 13:34, 35) Wagwokke ki timo gin mo keken ma pe yomo cwiny Lubanga calo tic ki remo i yo ma pe opore, man kwako medo remo i komwa. (Tic pa Lukwena 15:28, 29; Jo Galatia 5:19-21) Wabedo ki kuc dok pe wadonyo i lweny. (Matayo 5:9; Icaya 2:4) Waworo luloc me gamente ma i kabedowa dok walubo cikgi tek-ki pe turo cik pa Lubanga.​—Matayo 22:21; Tic pa Lukwena 5:29.

15.   Watwa ki jo mukene. Yecu ocikowa ni: “Mar lawoti macalo imarre keni.” En bene owaco ni Lukricitayo “pe jo me lobo.” (Matayo 22:39; Jon 17:16) Pi meno, watute me ‘timo gin maber bot dano ducu,’ ento bene pe warwako wiwa i lok me wibye dok pe wanywako i woro pa dini mukene-ni. (Jo Galatia 6:10; 2 Jo Korint 6:14) Kadi bed kumeno, waworo twero pa jo mukene me moko tamgi i lok ma kit meno.​—Jo Roma 14:12.

 Ka itye ki lapeny mukene madok i kom niye pa Lucaden pa Jehovah, ci itwero kwano lok mapol madok i komwa ki i kabedowa me Intanet, kubbe ki opicwa macok kwedi, cito i cokkewa i Ot me Ker macok kwedi, nyo lok ki Lacaden mo ma i kabedowu.