DIOS diti goniiny que nabanyno mod nabanyno ló naareʼ. Goniiny láabu que Gudxlio nadzani de buñ ni ñap respet xcalmandarybu, nasob xilitzbu né ñap cualidades sacróyen ni napbu. Goniiny láabu nabany buñ goxt, que famil naguaʼ nakit, que nimbuyibu cós copy né que ñonyibu Gudxlio reʼ toib lagary móz.

• «Rabeʼbu guerr ló guidopynac gudxlio» (Salmo 46:9).

• Ma «bidxin tiemp [...] par guinitlólo guirá ni caxin gudxlio» (Revelación 11:18).

• «Ni toib buñ ni guibany cú guiniʼ: Caxoʼya» (Isaías 33:24).

• «Guirá ni ma golúya gony dxiin né guibaladxbu por guirá ni cayonybu» (Isaías 65:22).

¿Ximod gac cumplir profecías reʼ? Dios ma golúbu Xiimbu Jesús par gac rey ló Gobierno xtunybu ni gony mandary guidopynac Gudxlio desde lainy guibá. La Biblia rabeʼ laani Gobierno xtuny Dios (Daniel 2:44). Né láaca náni de Jesús: «Dios sadudy láabu galmandary [...], né gobierno xtunybu sioʼni por tipzó» (Lucas 1:32, 33).

Laʼga Jesús goyoʼ ló Gudxlio bunybu xidal galrradziguiaʼ par bislooybu que dzú gony mandarybu, buñ sabany sacró.

• Bisialbu guirá clas galguitz, modreʼ bislooybu que labúu cueʼbu láani por tipzó (Mateo 9:35).

• Biscueʼsbu buroʼdant, modreʼ bislooybu que labúu rony mandarybu ni noʼ ló Gudxlio (Marcos 4:36-39).

• Biyaʼanbu xidal mil buñ, modreʼ bislooybu que labúu guidudybu guirá ni caquiinno (Marcos 6:41-44).

• Ló toib lanii galtzeʼel bunybu que nís ñacni vino, modreʼ bislooybu que dzú gony mandarybu sabanyno goxtiguie (Juan 2:7-11).

¿Xí raquiin gonylo par guicaʼlo guirá galnasác ni Dios ná guidudy buñ ni nadxiʼ láabu? Noʼ toib «néz» ro non saalo. La Biblia ná que nacni toib «néz ni riné par guibany buñ», né goxeʼsi buñ radzel láani (Mateo 7:14).

¿Xí rony representar néz ni riné lóono ro guibanyno tipzó? Néz reʼ rony representarni guirá ni ranab Dios gonyno. Láacabu raibybu lóono: «Naʼ, Jehová, Dios xtunylo, ni rasuidy looy par gacnéni looy, ni rony que saalo ló néz ni non saalo» (Isaías 48:17). Órni rasaano ló néz reʼ rabanyno sacró.

 Jesús goniʼ: «Naʼ ngú néz né ni nigolú né vida» (Juan 14:6). Órni raluladxno xcalrrasuidy Jesús né rasuʼno láabu racnéni lóono guibigaxno Dios né ronyni que guibanyno sacró.

¿Ximod labúu guidzelo néz reʼ? Ná noʼ xidal religión o néz, Jesús góoch lóono gapno cuidad, láabu goniʼbu: «Diti guirá buñ ni raiby naʼ: Señor, Señor, sioʼ lainy Gobierno ni noʼ guibá, nosi sioʼ buñ ni rony ni ná Bixiosa ni noʼ guibá» (Mateo 7:21). Láaca goniʼbu: «Por xcaayibu simbuto layibu» (Mateo 7:16). La Biblia labúu gacné looy ganlo xi religión rasuidy xinésni (Juan 17:17).

¿Xí raquiin gonylo par saalo ló néz reʼ? Non guimbulo ni bisaʼ lóono. Raquiin ganlo chú láabu, ximod laabu, xi clas buñ nacbu, xi cayonybu né xi ranabbu gonyno. *

Dios diti raniiny que nosi guibanyno par gonyno dxiin, par guáno, par tzoʼ nakitno né par tzoʼ xfamilno. Dios raniiny guimbuno láabu né gacno ximigbu. Órni rasobno raslooyno que nadxiʼno láabu. Jesús goniʼ: «Ndeʼ radudy diitz galnabany tipzó, que guimbuyibu looy toibguielot Dios ni nigolú» (Juan 17:3).

Par coʼ nakitlo xcalnabany Dios ni rasuidy xinésni, sigory raquiin guisianlo tipnés cós. Sigory sasac naganlo gonylo ngú, per órni ma casaalo ló néz reʼ sacró sabanylo. Pal raniiny ganlo más de Dios, gonab toib ni guisuidy looy la Biblia ló página ni napdo ló Internet, www.jw.org/zpa. Testigos xtuny Jehová sioladxdo tzáguendo looy lagary né ór ni más rioladxlo.