Biiyaʼ guiraʼ ni nuu lu sitiu riʼ

guyé lu índice

¿Ñee ridúʼyanu modo rihuinni si binni la?

¿Ñee ridúʼyanu modo rihuinni si binni la?

TI TESTIGU stiʼ Jiobá de Canadá láʼ Don, runi stipa pur guiniʼné ca binni nabeza lu calle. Guniʼbe xi bizaacanebe tobi de laacaʼ: «Binebiaʼyaʼ ti hombre láʼ Peter, qué huayuu dxi guuyaʼ sti hombre jma nabiidiʼ casi laabe ndaaniʼ ca callejón que. Rucaalube binni ne rúnibe intiica si cosa para guiládxibe laacaʼ ra nuube. Qué rinabe gacané binni laabe». Neca zaqué, biʼniʼ Don stipa pur gaca nachaʼhuiʼ né laabe cada ganda guni ni, ne zaqué bíʼnibe ni jma de catorce iza.

Ti dxi gunabadiidxaʼ Peter Don: «¿Xiñee nabé rizaaláʼdxiluʼ naa pue? Guirútiruʼ rulabi naa. Lii, ¿xiñee ruʼnuʼ ni pue?». Biyubi Don diidxaʼ guiníʼ ne biluíʼ laabe chonna textu de lu Biblia para chindá ndaaniʼ ladxidoʼbe. Primé, gunabadiidxaʼ laabe pa nánnabe napa Dios lá ne gunabaʼ laabe gúʼndabe ni lu Biblia lu Salmo 83:18. Despué, para guluiʼbe Peter xiñee rizaaláʼdxibe laa la? gúdxibe laa guʼndaʼ Romanos 10:13, 14, ra cusiene «guiráʼ tu guiníʼ lá Jiobá, zalá». Ne últimu la? biindaʼ Don Mateo 9:36 ra caníʼ de Jesús, nani: «Ora biʼya be irá ca binni que la? biá be laacaʼ, purti qué ganna ca xi guni ca ne iruti cayaca né laacaʼ. Nuu ca casi dendxu ni qué gapa pastor». Despué gunábabe Peter guʼndaʼ ni laapeʼ. Biindasibe ni, dede daʼ nisa lube gunabadiidxabe: «¿Ñee naa nga tobi de ca dendxuʼ ca la?».

Bizulú Peter bichaa modo laa. Guzebe, bigabe guicha ruaabe ne gúcube lari bidii Don laabe. Dede dxi que, maʼ bizaaláʼdxibe chuʼbe nayá ne guzuchaahuibe galán.

Napa Peter ti cuadernu ra rucaa xi guiráʼ runi cada dxi. Ca primé yaza que nabé triste ca diidxaʼ bicaabe, peru cani bicaabe últimu que maʼ gadxé cani. Tobi de laacani ná: «Yannadxí biziideʼ lá Dios. Yanna la? ora guneʼ orar, zanda guinieniáʼ Jiobá. Guizáʼ galán runeʼ sentir maʼ nannaʼ labe. Don ná zanda gacaʼ xhamiguaʼ Jiobá, laabe nápabe tiempu para gucaadiágabe  naa guiráʼ ora, intiica dxi zanda guneʼ ni ne intiica si zanda guinieniáʼ laabe».

Ca últimu diidxaʼ bicaabe, bicaabe cani para ti bíʼchibe ne bizáʼnabe. Sicaríʼ bicaabe:

«Huaxiéʼ galán nuaaʼ yannadxí. Zuluáʼ siáʼ maʼ cayuniná ca iza riʼ naa. Peru, pa ndiʼ nga últimu dxi nabaneʼ la? nannadxicheʼ zuuyaʼ xhamiguaʼ [Don] stiʼ biaje ndaaniʼ Paraísu. Pa maʼ cayuundatu ndiʼ la? zándaca maʼ qué guinneʼ raríʼ. Peru pa ra cagaacheʼ ca gúʼyatu ti hombre gadxé laa de xcaadxi la? laguiniʼné laabe, ne rinabaʼ laatu, gúʼndatu libruhuiiniʼ azul riʼ [caniʼbe de libru ni biquiiñeʼ para guni estudiárcabe Biblia ni láʼ La verdad que lleva a vida eterna, ni gucuaabe caadxi iza ante]. * Luni riete zuuyaʼ xhamiguaʼ sti biaje ndaaniʼ Paraísu. Runeʼ cré ni de guidubi ladxiduáʼ. Bíʼchiluʼ ne bizáʼnaluʼ ni nadxii laatu, Peter».

Bigaachiʼ si Peter, Ummi, bizáʼnabe guníʼ: «Guniʼné Peter naa raca biaʼ chupa iza. Ngue nga primé biaje, despué de stale iza, binadiagaʼ laabe nayecheʼ. Ne dede cuxídxibe». Ummi, gudxi Don: «Zuundaʼ libru riʼ, zándaca especial ni, purtiʼ yendá ni ndaaniʼ ladxidóʼ bizanaʼ». Laaca guná bizáʼnabe riʼ chiganna ti testigu laa para guni estudiarcaʼ libru Xipeʼ ndiʼ cusiidiʼ Biblia.

Laanu laaca zanda guidúʼyanu jma que modo rihuinni si ti binni, gusihuínninu dxandíʼ nadxiinu ne gápanu paciencia guiráʼ clase binni (1 Tim. 2:3, 4). Pa gúninu ni, zándaca zacanenu chindá ni dxandíʼ ndaaniʼ ladxidóʼ ca binni, casi Peter, neca huaxiéʼ riuulaʼdxiʼ binni guidxiña laacabe, peru nacháʼhuicabe. Nuunu seguru zuni Dios, ni ruuyaʼ xi nuu ndaaniʼ ladxidóʼ binni, xiixa para chindá ni dxandíʼ ca ndaaniʼ ladxidóʼ cani riuulaʼdxiʼ chuʼ gaxha de laa (1 Sam. 16:7; Juan 6:44).

^ párrafo 7 Ni biʼniʼ ca testigu stiʼ Jiobá. Maʼ qué rácaruʼ ni.