Biiyaʼ guiraʼ ni nuu lu sitiu riʼ

guyé lu índice

¿Ñee zuni chaahuinu guendanagana gapanenu stobi ne zacanenu chuʼ guendariuudxi la?

¿Ñee zuni chaahuinu guendanagana gapanenu stobi ne zacanenu chuʼ guendariuudxi la?

RACALAʼDXIʼ Jiobá gusisaca ca xpinni guendariuudxi ne gúnicaʼ stipa pur chuʼ ni ládecaʼ. Ora rúninu zacá, laanu cani dxandíʼ xpinni Cristu rápanu stale guendariuudxi. Ne ribidxi ni stale binni ndaaniʼ congregación.

Guzéʼtenu ti ejemplu, ti hechiceru ni nabé runibiáʼ binni de guidxi Madagascar nabé guyuulaʼdxiʼ guendariuudxi ni napa ca testigu stiʼ Jiobá. Sicaríʼ guníʼ íquebe: «Pa ñuu dxi nibieeʼ ti religión ñaaʼ la? ca Testigu nga nibieeʼ». Gudiʼdiʼ si ti tiempu. Bisaanabe ca práctica espiritista que, gudiʼdiʼ beeu para bibaninebe xheelabe casi ná Biblia ne beeda gácabe testigu stiʼ Jiobá, Dios ni rudii guendariuudxi.

Cásica hechiceru riʼ, mil binni ridxela guendariuudxi ni racalaʼdxiʼ ndaaniʼ congregación stiʼ ca xpinni Cristu guiráʼ iza. Peru Biblia ná ora nuu xiana ne guendaridinde ndaaniʼ congregación la? zanda guchiá amistad napa binni ne guni laani chuʼ guendanagana (Sant. 3:14-16). Laaca rudii Biblia laanu caadxi conseju galán ni racané laanu para cadi gápanu ca guendanagana riʼ ne gacanenu para chuʼ guendariuudxi. Guidúʼyanu ximodo huayuni caadxi binni para chinándacaʼ ni ná ca conseju riʼ.

GUENDANAGANA NE MODO GACA CHAAHUIʼ CANI

«Bineniáʼ ti hermanu dxiiñaʼ, peru qué ñanda diʼ ñuudu galán. Ti dxi órapeʼ cadinde diidxadu guyuu chupa binni ne biiyacaʼ laadu» (CHRIS).

«Ti hermana ni nabé riguneʼ predicarniáʼ málasi bisaana de nireené naa, ne dede maʼ qué niniʼné naa. Qué lica ganna xi pur bíʼnibe ni» (JANET).

«Nuaaʼ lu ti conferencia pur teléfono ne xhupa binni. Tobi de laacabe que guca despedir, ngue runi guníʼ iqueʼ maʼ biʼniʼ colgar. Óraque gunieeʼ mal de laabe nezalú stobi que. Tihuaʼ qué ñuni colgarbe, ne binadiágabe guiráʼ ni gunieeʼ» (MICHAEL).

«Chupa precursora de congregación stidu gúpacaʼ guendanagana. Tobi de laacabe bizulú gudindené stobi que gatigá. Guleecaʼ gana xcaadxi tantu ridíndecaʼ» (GARY).

Ruluíʼ nga cadi naroʼbaʼ ca guendanagana riʼ. Peru ñanda ñuniná cani ca binni ni gudiʼdiʼ lúcani ne pur laacani maʼ qué ñanda ñuu guendariuudxi ndaaniʼ congregación. Galán nga yenanda guiráʼ ca hermanu riʼ cani rusiidiʼ Biblia ne gunda gucanécabe para biuu guendariuudxi. ¿Xi conseju stiʼ Biblia gucané laacabe yaʼ?

«Cadi maʼ zidindesaatu neza zetu» (Gén.  45:24). Bidii José conseju riʼ ca biʼchiʼ ante guibiguétacaʼ ra nuu bixhózecaʼ. ¡Aque biáʼsipeʼ ca diidxaʼ riʼ! Pa qué randa rucueeza ti binni cani runi sentir la? qué zaca nagana para laa guchiichi xcaadxi binni. Bidii Chris cuenta ruchá bi yanni ne raca nagana para laa guni ni gabi xcaadxi binni laa. Cumu racaláʼdxibe guchaabe la? gunábabe hermanu ni gudinde diidxanebe que gutiidilaʼdxiʼ laabe ne bíʼnibe stipa pur guni controlarbe modo laabe que. Ora biʼyaʼ hermanu que stipa cayuni Chris pur guchaa, laaca biʼniʼ zaqueca. Yanna maʼ nayecheʼ nuucabe ne cayúnicabe xhiiñaʼ Jiobá juntu.

«Qué rireendú ni quixhe ique binni guni ora qué riníʼ xi chiguni» (Prov. 15:22). Bidii Janet cuenta caquiiñeʼ guni ni ná conseju riʼ, ngue runi gudixhe íquebe guiníʼnebe hermana que. Ra caníʼcabe que, gunabadiidxaʼ Janet hermana que xiñee bidxiichiné laa. Gudxiʼbahuiinicabe ridxi ora bizulúcabe, peru gunda guníʼcabe galán ora bíʼnicabe ni né diidxaʼ nadóʼ. Bidii hermana riʼ cuenta cadi lica nuu Janet lu ni bizaaca que, gadxé modo biene ni, ngue runi gunabaʼ laabe guni perdonarbe laa. Yanna maʼ cayúnicabe xhiiñaʼ Jiobá tobi si sti biaje.

«Pa zeda saanu ti ofrenda lu altar para Dios ne guietenalaʼdxu bichee neu tuuxa la? bisaana gá ofrenda stiuʼ raqué, uyé biene né ni bichee neu que» (Mat. 5:23, 24). Zándaca rietenaláʼdxinu conseju ni bidii Jesús lu dani que. Biʼniʼ sentir Michael mal ora bidii cuenta qué niníʼ ique ni gudxi hermanu que ne qué ñaca nachaʼhuiʼ né laabe. Peru gudixhe íquebe gúnibe stipa pur chuʼbe galán né laa, gúcabe humilde ne guníʼnebe hermanu que, gunábabe laa guni perdonar laabe. ¿Xi guleendube yaʼ? Michael ná: «Biʼniʼ perdonar bicheʼ naa de guidubi ladxidóʼ». Gunda guca xhamígucabe sti biaje.

«Cadi gusaana de guni huantarsaatu, ne laguni perdonar de guidubi ladxidoʼto pa tuuxa napa xiixa queja né laatu» (Col. 3:12-14). ¿Rietenaláʼdxiluʼ guiropaʼ precursora ni gupa guendanagana que la? Gucané ti ancianu laacabe para gudiicabe cuenta cayuni sentir xcaadxi mal pur ni cayúnicabe que. Ne gunabadiidxaʼ laacabe pa dxandíʼ nga qué zanda gápacabe paciencia laacabe, ti gacanécabe chuʼ guendariuudxi ndaaniʼ congregación. Bicaadiaga ca hermana riʼ conseju stiʼ ancianu que ne bíʼnicaʼ ni gúdxibe laacaʼ, maʼ nuucabe galán yanna ne qué nusaana de ñuni predicárcabe ca diidxaʼ nacubi ne galán.

Conseju ni bizéʼtenu nagasi, ni zeeda lu Colosenses 3:12-14, zanda gacané ni laanu pa chuʼ tu guniná laanu. Stale binni maʼ bidii cuenta ora naca tobi humilde jma  nagueenda runi perdonar ne rusiaandaʼ ni gúnicabe laa. Peru pa guidúʼyanu qué zanda gúninu nga la? zanda chinándanu conseju ni zeeda lu Mateo 18:15. Nécapeʼ ora cudii Jesús conseju riʼ caníʼ xi naquiiñeʼ guni tuuxa ora guni ti pecadu naroʼbaʼ, peru laaca zanda gacané ni laanu ora gápanu xiixa guendanagana né ti hermanu. Ni naquiiñeʼ si gúninu nga, gácanu humilde ne gácanu nachaʼhuiʼ, ne guinínenu hermanu ca para guni chaahuinu guendanagana ca.

Nuuruʼ stale conseju lu Biblia ni zanda gacané laanu. Peru para ganda gacané cani laanu la? naquiiñeʼ gápanu ca cualidad ni rudii espíritu santu laanu: Biblia ná: «Nadxii binni ne nayeche nuu, ne nuu dxí ladxidóʼ. Qué rixhacalaʼdxi stobi, ne qué runiná binni, ne nachaʼhuiʼ. Qué zaree chu de neza sti Dios, ne nadóʼ, ne rapa xpiaʼ» (Gál. 5:22, 23). Cásica riquiiñeʼ aceite para guni ti máquina dxiiñaʼ jma naguudxi, ca cualidad ni zeeda de Dios riʼ racané cani para chuʼ binni galán né stobi.

GALÁN RIHUINNI CONGREGACIÓN PURTIʼ GUIRÁʼ CLASE BINNI NUU NDAANIʼ NI

Cada binni gadxé gadxé modo laa. Gadxé gadxé cualidad nápanu ne gadxé modo riníʼ íquenu ne dede modo rininu. Pur laacani randa rápanu xhamígunu ni qué niníʼ íquenu ñápanu. Peru laaca zanda gápanu guendanagana pur laani. Ti ancianu ni maʼ napa stale experiencia guníʼ: «Ti binni ni natuí la? zándaca qué zuni sentir galán ora chuʼ gaxha de ti binni ni nabé riníʼ. Neca ruluíʼ qué risaca ni, zanda guedané ni guendanagana». Yanna, ¿ñee qué zanda chuʼ chupa binni galán purtiʼ si gadxé gadxé modo laacaʼ la? Guiníʼ íquenu ejemplu stiʼ chupa apóstol: Pedro ne Juan. Pur cani ridúʼndanu lu Biblia, ruxuíʼlunu Pedro casi ti hombre ni riníʼ sin gucá ruaa ne nagueendaca runi xiixa. Ne ora riníʼ íquenu Juan la? ruxuíʼlunu ti hombre nabé nadxii xcaadxi ne riníʼ ique ante guni xiixa. Gadxepeʼ guiropaʼ apóstol riʼ, peru galán modo rúnicabe dxiiñaʼ juntu (Hech. 8:14;  Gál. 2:9). Ejemplu stícabe rusihuinni zanda guni ca xpinni Cristu dxiiñaʼ tobi si yanna riʼ, neca gadxé gadxé modo laacaʼ.

Zándaca chuʼ tuuxa hermanu ndaaniʼ congregación ni guiníʼ o guni xiixa ni guchiichi laanu. Neca zacá, nánnanu guti Cristu pur laabe ne naquiiñeʼ gannaxhiinu laabe (Juan 13:34, 35; Rom. 5:6-8). Nga runi, lugar de gucáʼnanu laabe o guiníʼ íquenu qué ziuu dxi gaca xhamígunu laabe la? guinabadiidxanu laca laanu: «¿Ñee cayuni hermanu riʼ xiixa ni ná Biblia cadi gúninu la? ¿Ñee nuube guninabe naa la? ¿O gadxé si modo laadu? Ne ni jma risaca, ¿xi zanda guiziideʼ de ca cualidad galán ni napa hermanu riʼ?».

Nabé risaca últimu guendarinabadiidxaʼ riʼ. Pa tuuxa nabé riuulaʼdxiʼ guiníʼ, peru laanu jma huaxiéʼ rininu la? guiníʼ íquenu pabiáʼ fácil raca para laabe guzulú guiníʼnebe binni lu predicación. Galán pa guinábanu laabe guireenebe laanu predicación ti dxi ne gúʼyanu xi zanda guizíʼdinu de ejemplu stibe. Pa hermanu riʼ jma riuulaʼdxiʼ gudii de ni napa, ¿ñanda nizíʼdinu de laabe ne ñuni sentirnu guendanayecheʼ rapa tobi ora gudii de ni napa cani maʼ huaniisi, cani huará o cani jma caquiiñeʼ ni la? Ni nuunu gusiénenu nga: neca gadxé gadxé modo laanu, zanda chuʼnu tobi si né hermanu stinu pa guidúʼyanu ca cosa galán ni nápabe. zándaca qué gácabe binni ni jma xhamígunu, peru zacané ni para chuʼnu jma galán né laabe, gatadxí ladxidoʼno ne zápanu jma guendariuudxi ndaaniʼ congregación.

Evodia ne Síntique nga chupa xpinni Cristu ni bibani lu primé siglu. Zándaca gadxé gadxé modo laacabe. Neca zacá guluu Pablo gana ca gunaa riʼ «chuʼ ca tobi si» (Filip. 4:2). ¿Ñee zúninu zacaca para gacanenu chuʼ guendariuudxi ndaaniʼ congregación la?

CADI GUDIʼNU LUGAR GUIROOBAʼ GUENDARIDINDE STINU

Zanda guchaaganu ca sentimientu cadi jneza rápanu pur sti binni casi guixi malu ni rindani ndaaniʼ ti jardín, pa qué gáxhanu ni la? zaroobaʼ ni jma. Zacaca rizaaca ora guicaa xcu  ca sentimientu ca ndaaniʼ ladxidóʼ ti binni, zanda guniná ni guidubi congregación. Peru, pa nadxiinu Jiobá ne ca hermanu stinu, zúninu guiráʼ ni gándatiʼ para cadi gudiʼnu lugar pur modo nácanu maʼ qué chuʼ guendariuudxi ndaaniʼ congregación.

Pa nácanu humilde ne rúninu stipa pur chuʼ guendariuudxi, zabeendunu ni galán.

Pa gúninu stipa pur guni chaahuinu ca guendanagana stinu para gacanenu chuʼ guendariuudxi, zándaca dede zadxagayaanu guiráʼ ni cueendunu. Guiníʼ íquenu experiencia stiʼ hermana riʼ: «Bineʼ sentir cayuni tratar ti hermana naa casi ti xcuidi, nabé bichiichi ngue naa. Cumu zeʼ dxi jma bidxiicheʼ la? maʼ gucaʼ naduxhuʼ né laabe. Guníʼ iqueʼ: “Qué runi respetarbe naa casi naquiiñeʼ gúnibe ni, nga runi laaca qué zuneʼ respetar laabe”».

Despué, bizulú hermana riʼ guníʼ ique lu cani runi: «Bizuluáʼ biiyadxieeʼ ca cosa ni cadi jneza runeʼ pur modo naa, ne qué ñuuladxeʼ laca naa. Bidieeʼ cuenta caquiiñeʼ guchaaʼ modo riníʼ iqueʼ. Bineʼ orar Jiobá de laani. Despué, guziéʼ ti regaluhuiiniʼ para hermana que ne bicaa ti nota ra cayabeʼ laabe gutiidiláʼdxibe naa pur actitud cadi jneza stinneʼ que. Gudiidxidu ne gudixhe íquedu gusiáʼndadu ni bizaaca que. De dxiqué qué huayápadu jma guendanagana».

Tiempu riʼ, cuyubi lele binni gapa guendariuudxi. Peru stale maca cuyubi tinde ora guni xiixa, nuu tu runi ni pur ruchá bi yanni o purtiʼ nuu tu rucaa laa guni ni. Zacá actitud napa binni yanna riʼ, peru ndaaniʼ xquidxi Jiobá naquiiñeʼ chuʼ guendariuudxi ne chuʼcaʼ tobi si. Sicaríʼ gudxi Jiobá Pablo gucaa: «Rinaba laatu sa tu jneza. Cadi udxiiba tu laca laatu, sínuque lagaca nadóʼ, ne cadi casi ze tu idxiichi né tu stobi. Lagacané saa ti ihuinni nadxii saa tu. Ma biʼni Espíritu Santu laatu tobi si. Nga runi cadi chuʼ dinde tu, ti cadi ilaa saa tu» (Efes. 4:1-3). Nabé risaca nga chuʼ guendariuudxi. Nga runi, quixhe íquenu gusihuínninu ni guiráʼ ora ne guni chaahuinu intiica guendanagana gápanu.