Biiyaʼ guiraʼ ni nuu lu sitiu riʼ

guyé lu índice

Chuʼnu pur derechu ni napa Jiobá para guni mandar

Chuʼnu pur derechu ni napa Jiobá para guni mandar

«[Jiobá] Señor Dios stidu, lii siouʼ nga naquiiñe udxiʼba du ne usisaca du ne iní du nandxóʼ loʼ. Purti lii bizáʼ lu irá xixé ni nuu» (APOC. 4:11).

DIIDXAʼ RIUUNDAʼ: NE 49

1, 2. ¿Xidé naquiiñeʼ chuʼnu seguru? (Biiyaʼ dibuju ni zeeda ra ruzulú tema riʼ).

CASI maʼ bidúʼyanu lu tema ni gudídinu que, Binidxabaʼ guníʼ qué gapa Jiobá derechu para gaca Dios ni jma nandxóʼ ne jma galán zabani binni pa guni mandarcaʼ laca laacaʼ. Peru, ¿ñee dxandíʼ ni la? Guiníʼ íquenu nibani ca binni riʼ sin ñáticaʼ. ¿Ñee jma galán nibánicabe sin ñuni mandar Dios laacabe la? ¿Raʼbuʼ lii jma nayecheʼ ñuuluʼ pa qué niquiiñeluʼ Dios ne nibániluʼ sin ñátiluʼ la?

2 Lii si zanda guicábiluʼ ca guendarinabadiidxaʼ riʼ. Guiranu naquiiñeʼ guiníʼ ique chaahuinu ni caninu riʼ. Cadi lica naquiiñeʼ gápanu duda pa Dios nga napa derechu para guni mandar ne guendaruni mandar stibe nga ni jma galán ne ni naquiiñeʼ chuʼnu pur laa. Biblia rudii laanu caadxi razón galán para chuʼnu seguru de laani. Guidúʼyanu xi rusiene ni de derechu ni napa Jiobá para guni mandar.

JIOBÁ NGA NAPA DERECHU PARA GUNI MANDAR

3. ¿Xiñee Jiobá si nga napa derechu para guni mandar?

3 Jiobá si nga napa derechu para guni mandar, purtiʼ laa nga Dios ni jma napa poder ne ni bizáʼ guiráʼ xixé ni nuu (1 Crón. 29:11; Hech. 4:24). Bihuinni 144,000 binni ni chiguni mandarné  Cristu lu ti visión, ne nacaʼ: «[Jiobá] Señor Dios stidu, lii siouʼ nga naquiiñe udxiʼba du ne usisaca du ne iní du nandxóʼ loʼ. Purti lii bizáʼ lu irá xixé ni nuu. Uyáʼ ni ne nuu ru ni purti nga ni na luʼ» (Apoc. 4:11). Jiobá bizáʼ guiráʼ xixé ni nuu, nga runi laasibe nga nápabe derechu para guni mandarbe binni guidxilayú ne ca ángel.

4. ¿Xiñee rihuinni cadi jneza caquiiñenu libertad ni nápanu ora gucáʼlunu derechu ni napa Jiobá para guni mandar?

4 Qué gapa diʼ Binidxabaʼ nin ti derechu para guni mandar universu purtiʼ gastiʼ qué nuzáʼ. Dxi laabe ne primé pareja que bidxiidéchecabe derechu ni napa Jiobá para guni mandar, bisihuínnicabe ruchácabe bi yánnicabe (Jer. 10:23). Dxandíʼ nápacabe libertad para cuícabe xi gúnicabe ne pur ngue zanda guicaacabe decisión de cadi guni mandar Dios laacabe, peru ¿nápacabe derechu para gúnicabe ni la? Coʼ. Rudii libertad riʼ lugar laanu para guicaanu stale decisión galán guiráʼ dxi, peru qué rudii ni derechu laanu para gucáʼlunu Dios ni bizáʼ laanu. Nga rusihuinni pa cucáʼlunu Jiobá la? cadi jneza diʼ caquiiñenu libertad ni nápanu para cuinu xi gúninu. Laanu, binni guidxilayú, caquiiñenu guni mandar Dios laanu.

5. ¿Xiñee zanda chuʼnu seguru jneza ca decisión stiʼ Dios?

5 Nuu sti razón ni rusihuinni napa Jiobá derechu para guni mandar: jnézapeʼ riquiiñebe autoridad ni nápabe. Laca laabe guniʼbe: «Naa nga Jiobá, ni qué rusaana de gannaxhii, ni rusihuinni runi ni jneza ne runi juzgar jneza lu guidxilayú, purtiʼ nga nga ca cosa ni riuuladxeʼ» (Jer. 9:24). De laabe riree guendaruni ni jneza. Qué ruuyabe xi ná xiixa ley ni gudixhe binni ruchee para gúʼyabe xii nga ni jma jneza gúnibe. Ca ley ni bidiibe binni zeeda cani de guendaruni jneza stibe. Biblia ná: «Zuba trono stiuʼ [Jiobá] lu guendaruni ni jneza ne lu guendaruni juzgar jneza». Nga runi, zanda chuʼnu seguru jneza ca ley, ca principiu ne ca decisión stibe (Sal. 89:14; 119:128). Peru Binidxabaʼ, ni ná cadi jneza modo runi mandar Jiobá, qué ganda guni ti guidxilayú ra qué gusaana de gaca ni jneza.

6. ¿Xi ti razón rusihuinni napa Jiobá derechu para guni mandar guidxilayú?

6 Sti razón ni rusihuinni napa Jiobá derechu para gaca Dios ni jma nandxóʼ nga nánnabe ne nuu xpiaanibe ne laacani nga caquiiñebe para gápabe guiráʼ xixé ni bizaʼbe. Guiníʼ íquesinu poder ni bidiibe Xiiñibe para gusianda ca guendahuará ni qué ñanda nusianda nin ti doctor (Mat. 4:23, 24; Mar. 5:25-29). Para Dios la? cadi milagru ngue cani biʼniʼ Jesús, purtiʼ laa nanna ximodo runi xcuerpu binni dxiiñaʼ ne zanda gusianda cani. Ne pur nánnabe stale zanda guindísabe cani maʼ guti ne gucueezabe de gaca xiixa desastre natural.

7. ¿Xiñee jma dxiʼbaʼ guendanuuxpiaaniʼ stiʼ Jiobá que stiʼ guidxilayú ni nuu lu náʼ Binidxabaʼ riʼ?

7 Guidxilayú ni nuu lu náʼ Binidxabaʼ riʼ cuyúbiruʼ modo guiluxe ca guendaridinde nuu ndaaniʼ caadxi guidxi ne lu guidubi Guidxilayú. Jiobá si nga jma nuu xpiaaniʼ ne laasi nga zanda guedané guendariuudxi lu guidubi Guidxilayú (Is. 2:3, 4; 54:13). Ra jma gánnanu de guendananna stiʼ Jiobá ne de guendanuuxpiaaniʼ stibe, jma zuni sentirnu casi biʼniʼ sentir Pablo ora guníʼ: «Nabé riene Dios, iruti ru nuu xpiaani biaʼ nuu xpiaani be, ne iruti ru riene biaʼ riene be. Qué zanda di ganna nu xi na xquenda biaani be nin guiene nu xi cayuni be» (Rom. 11:33).

JIOBÁ SI NGA JMA GALÁN RUNI MANDAR

8. ¿Xi jma runiibi ladxidoʼloʼ de modo runi mandar Dios?

8 Cadi rusihuinni si Biblia napa Jiobá derechu para guni mandar. Laaca rusiene ni xiñee jma dxiʼbaʼ modo rúnibe ni que xcaadxi. Tobi de ca razón ca nga runi mandarbe né  guendarannaxhii. Modo runi mandarbe ca runiibi ni ladxidoʼno. Nácabe «ti Dios ni rilaselaʼdxiʼ ne nachaʼhuiʼ, rindaa para guidxiichi ne qué rusaana de gannaxhii ne dxandíʼ» (Éx. 34:6). Runi tratarbe ca xpínnibe galán ne respetu. Jmápeca rápabe laanu que biaʼ rápanu laanu. Qué rucueeza diʼ Jiobá de gudii cosa galán ca xpinni ni ruzuubaʼ diidxaʼ, casi guníʼ Binidxabaʼ. Dede bidiibe Xiiñibe ni nadxiibe ti ganda gápanu esperanza para guibáninu sin gátinu. Biblia ná: «Jiobá Dios nga gubidxa ne escudu; nacháʼhuibe né laanu ne rusisácabe laanu. Jiobá qué rucueeza ni galán para cani canazá sin donda» (Salmo 84:11; biindaʼ Romanos 8:32).

9. ¿Ximodo nánnanu rizaalaʼdxiʼ Dios cada tobi de laanu?

9 Rizaalaʼdxiʼ Jiobá chuʼ xquidxi galán casi grupu, peru laaca nabé rizaaláʼdxibe cada tobi. Guiníʼ íquenu ni bizaaca tiempu stiʼ ca juez ni guyuu guidxi Israel. Biaʼ chonna gayuaa iza, biquiiñeʼ Jiobá caadxi juez para gulá ca israelita de ca enemigu sticaʼ. Peru biiyadxibe Rut, ti gunaa ni cadi naca israelita, peru biʼniʼ stale sacrificiu para gaca parte de xquídxibe, nécaxa ti tiempu ra nabé nagana ngue. Guluu Jiobá ndaayaʼ laabe ra bidii ti xheelabe ne ti xiiñibe. Ne ora guiasa Rut de lade gueʼtuʼ, zánnabe beeda gaca xiiñibe tobi de cani beeda Mesías que de laa. Ne zánnabe gucuá historia stibe lu ti libru ni ziné labe lu Biblia. ¿Ñee ruxuíʼluluʼ ximodo guni sentirbe la? (Rut 4:13; Mat. 1:5, 16).

10. Derechu ni napa Jiobá para guni mandar, ¿ñee rucueeza ni binni de guni xiixa la? Bisiene ni.

10 Cadi naca diʼ Jiobá casi ca gobiernu ni ruquiichináʼ binni ne ni qué riná guchaa cani maʼ gudixhe guni. Ca binni ni runi mandarbe runi sentircaʼ libre laacaʼ ne nayecheʼ riuucaʼ (2 Cor. 3:17). Zacapeʼ bisihuinni David ni né ca diidxaʼ riʼ: «Nuu guendanandxóʼ ne guendarisaca ra [nuu Jiobá], stipa ne guendanayecheʼ nuu ra nabézabe» (1 Crón. 16:7, 27). Ne ti salmista láʼ Etán guníʼ: «Nayecheʼ nga guidxi ni rucaa ridxi né guendanayecheʼ. Zizácabe lu biaaniʼ ni caree de luluʼ, Jiobá. Nayecheʼ nuucabe guidubi dxi pur laluʼ, ne rusisácaluʼ laacabe pur guendaruni jneza stiluʼ» (Sal. 89:15, 16).

11. ¿Xi zanda gúninu para chuʼnu jma seguru modo runi mandar Dios nga ni jma galán?

11 Ra jma guiníʼ íquenu guendanachaʼhuiʼ stiʼ Jiobá, jma ziuʼnu seguru modo runi mandarbe ca nga ni jma galán. Zuni sentirnu casi biʼniʼ sentir salmista ni guníʼ: «Purtiʼ jma galán chuaaʼ ti dxi lu ca patiu stiluʼ que chuaaʼ mil dxi sti lugar» (Sal. 84:10). Gástiruʼ sti modo zanda gaca ni. Jiobá bizáʼ laanu, nga runi nánnabe xi caquiiñenu para chuʼnu nayecheʼ ne rudiibe ni laanu né stale guendanachaʼhuiʼ. Intiica guinábabe laanu gúninu rúnibe ni para gacanebe laanu, ne ora ruzúʼbanu diidxaʼ riuʼnu nayecheʼ, neca nuu biaje naquiiñeʼ gúninu caadxi sacrificiu. Biblia ná: «Ndiʼ nga ni maʼ guníʼ Jiobá, Dios ni guzíʼ lii sti biaje, Dios ni nayá stiʼ Israel: “Naa, Jiobá, naa nga Dios stiluʼ, ni cusiidiʼ lii para cueenduluʼ ni galán. Ni cayabi lii gunáʼ nga neza ra naquiiñeʼ saluʼ[”]» (Isaías 48:17).

12. ¿Gunáʼ nga razón ni jma risaca nápanu para chuʼnu pur derechu ni napa Jiobá para guni mandar?

12 Biblia ná tiidiʼ si ti mil iza de cayuni mandar Cristu, ziuu binni zucaalú derechu ni napa Jiobá para guni mandar (Apoc. 20:7, 8). ¿Xiñee zúnicabe zacá yaʼ? Purtiʼ zaree Binidxabaʼ de ra deguyoo ne zacalaʼdxiʼ quiteʼ binni ra gucaa laacabe guyúbicabe puru para laasicabe, casi maca huayuni ni. Zándaca gucaa binni guni cré zabánicaʼ sin gáticaʼ neca qué guzuubacaʼ stiidxaʼ Jiobá. Nánnanu qué zaca diʼ ndiʼ. Peru naquiiñeʼ guinabadiidxanu pa zagubayú guendarusiguii ca laanu. Pa nadxiinu Jiobá ne rúninu ni nabe purtiʼ nacháʼhuibe ne purtiʼ laasibe nga nápabe derechu para guni mandarbe lu universu la?  zabixhiláʼdxinu guendarusiguii stiʼ Binidxabaʼ. Qué zacaláʼdxinu guireʼnu xaʼnaʼ náʼ gobiernu stiʼ Dios, ti gobiernu ni napa derechu guni mandar ne nadxii binni.

CADI GUSAANA DE CHUʼNU PUR DERECHU NI NAPA DIOS PARA GUNI MANDAR

13. ¿Ximodo nga rusihuínninu nuunu pur derechu ni napa Dios para guni mandar ora rúninu casi runi?

13 Casi maʼ bidúʼyanu, napa Jiobá derechu para guni mandar, ne modo rúnibe ni nga ni jma galán. Rihuinni dxíchica naquiiñeʼ chuʼnu pur derechu ni napa Jiobá para guni mandar. Rusihuínninu ni ora rúninu ni nabe sin guchéʼnenu laabe. Laaca rusihuínninu ni ora rúninu ca cosa ca casi riuuláʼdxibe. Zacá cadi zusihuínnisinu nuunu pur modo runi mandarbe laanu, sínuque laaca ruluinu pabiáʼ nadxiinu ni (biindaʼ Efesios 5:1, 2).

14. ¿Ximodo zanda chinanda ca ancianu ne ca xaíque stiʼ ca familia modo runi Jiobá?

14 Biblia rusiidiʼ laanu riquiiñeʼ Jiobá autoridad stiʼ né guendarannaxhii. Nga runi cani naca xaíque ndaaniʼ familia ne ca ancianu ni nadxii derechu ni nápabe de guni mandarbe, qué zanábacaʼ gácapeʼ ni nacaʼ, casi ora laaca nápacaʼ derechu quíxhecaʼ modo gaca mandar, sínuque zúnicaʼ casi runi Jiobá. Zacá biʼniʼ Pablo ni, laa biʼniʼ casi runi Dios ne Xiiñiʼ (1 Cor. 11:1). Qué nusituibe lú xcaadxi ne qué nucaabe laacaʼ gúnicaʼ ni jneza, sínuque guluube gana laacaʼ gúnicaʼ ni né guendarannaxhii (Rom. 12:1; Efes. 4:1; Filem. 8-10). Zacá nga runi Jiobá ca cosa ca. Ne zacaca nga naquiiñeʼ guni cani nadxii laabe ne cani riuu pur modo runi mandarbe.

15. ¿Xiñee ora runi respetarnu modo naguixhe Jiobá gaca dxiiñaʼ ndaaniʼ xquidxi rusihuinni ni nadxiinu derechu ni nápabe para guni mandarbe?

15 ¿Xi sti modo zanda chuʼnu pur gobiernu stiʼ Dios yaʼ? Ra gápanu respetu ora gacanenu cani maʼ bidiibe autoridad. Zinándanu modo naguixhe Jiobá gaca dxiiñaʼ ndaaniʼ xquidxi dede né ora qué guiene chaahuinu xiñee gucuaacabe xiixa decisión o cadi cayuuláʼdxinu ni. Gadxepeʼ actitud riʼ de actitud  stiʼ binni guidxilayú, peru zacá nga raca ca cosa ca ora rinándanu modo runi mandar Dios (Efes. 5:22, 23; 6:1-3; Heb. 13:17). Pa ruzúʼbanu diidxaʼ la? zabeendunu ni galán, purtiʼ racalaʼdxiʼ Jiobá ni galán para laanu.

16. ¿Xi ruuyaʼ cani riuu pur derechu ni napa Jiobá para guni mandar ante guicaacaʼ ti decisión?

16 Ca decisión stinu laaca rusihuinni cani pa nuunu pur derechu ni napa Dios para guni mandar. Qué rábibe laanu xi naquiiñeʼ gúninu lu cada cosa. Lugar de nga, rábibe laanu ximodo riníʼ íquebe. Guzéʼtenu ti ejemplu, qué rudiibe laanu ti lista ra náʼ xi lari gácunu, sínuque rábibe laanu racaláʼdxibe gácunu lari jneza ni naquiiñeʼ gacuʼ ti xpinni Cristu (1 Tim. 2:9, 10). Ne qué racaláʼdxibe pur laanu guirenda ñee xcaadxi nin guchiichinu laacaʼ pur ca decisión stinu (1 Cor. 10:31-33). Ora rinándanu modo riníʼ ique Jiobá lu ca decisión stinu ne cadi modo riníʼ íquenu la? rusihuínninu nadxiinu derechu ni nápabe para guni mandarbe ne riuʼnu pur laani.

Chuʼnu pur derechu ni napa Dios para guni mandar ora guicaanu decisión ne ndaaniʼ familia (Biiyaʼ párrafo 16 dede 18).

17, 18. Bizeeteʼ caadxi modo zanda gusihuinni ca guendaxheelaʼ nuucaʼ pur derechu ni napa Jiobá para guni mandar.

17 Guidúʼyanu ximodo zanda chuʼ ca guendaxheelaʼ ni naca xpinni Cristu pur modo runi mandar Dios. Zándaca cadi casi guníʼ ique chupa binni nga gaca guendaxheelaʼ sticaʼ. Dede zándaca zápacaʼ guendanagana naroʼbaʼ. ¿Xi zanda gúnicabe yaʼ? Zanda guiníʼ íquecabe modo guyuu Dios né guidxi Israel. Laabe guniʼbe beeda gácabe casi ti hombre ni napa xheelaʼ (Is. 54:5; 62:4). Nabé nagana guca «guendaxheelaʼ» riʼ. Peru cadi casi zeʼ Jiobá biree gana. Stale biaje biʼniʼ perdonarbe ca israelita ne qué nucheenebe pactu ni bíʼninebe laacaʼ. Biblia ná: «Stale biaje rulabe laacaʼ, peru rudxiidéchecaʼ laabe ne qué ruzuubacaʼ stiidxabe, rusituibe lucaʼ purtiʼ maʼ bicheecaʼ. Peru ruuyabe modo racanacaʼ ora runadiágabe rucaacaʼ ridxi gacanécabe laacaʼ. Rietenaláʼdxibe de pactu bininebe laacaʼ, ne ziabe laacaʼ purtiʼ qué rusaanabe de gannaxhiibe» (Salmo 106:43-45). ¿Cadi dxandíʼ ruchiña guendarannaxhii stiʼ Jiobá laanu ra nuu la?

18 Ca xpinni Cristu ni maʼ bichaganáʼ ni nadxii Jiobá rúnicaʼ stipa pur gúnicaʼ casi rúnibe. Neca nápacaʼ guendanagana, qué ruyúbicaʼ guilaa xquendaxheelacaʼ pa gastiʼ razón ni rudii Biblia para gúnicaʼ ni. Riénecabe Jiobá nga biʼniʼ laacabe tobi si ne racalaʼdxiʼ chúʼcabe juntu. Biblia ná pur inmoralidad sexual si nga zanda gaca divorciar ti binni ne guichaganáʼ sti biaje (Mat. 19:5, 6, 9). Ra gúnicabe stipa pur gaca chaahuiʼ guendaxheelaʼ stícabe, zusihuínnicabe nuucabe pur derechu ni napa Jiobá para guni mandar.

19. ¿Xi naquiiñeʼ gúninu ora gucheʼnu?

19 Cumu nácanu imperfectu la? ziuu ora zúninu xiixa ni zuniná Jiobá. Laabe nánnabe ni, peru pur nadxiibe laanu biseendabe Xiiñibe gudii xquendanabani para quixe pur laanu ti guilanu. Nga runi naquiiñeʼ guinábanu Jiobá guni perdonar laanu ora gucheʼnu (1 Juan 2:1, 2). Cadi gudiʼnu lugar gatigá guniná ca cosa ni cadi jneza bíninu laanu, gúninu stipa pur guizíʼdinu de laacani. Pa chuʼnu gaxha de Dios la? laabe zuni perdonarbe laanu ne zacanebe laanu gusiáʼndanu cani runiná laanu, ne gudxíʼlunu cani guidxaagalunu despué (Sal. 103:3).

20. ¿Xiñee naquiiñeʼ chuʼnu pur derechu ni napa Jiobá para guni mandar?

20 Zuni mandar Jiobá guiráʼ binni lu guidxilayú cubi ca, ne guiranu zazíʼdinu de ca neza stibe (Is. 11:9). Peru maʼ cazíʼdinu stale de laacani. Ne maʼ gaxha nuu dxi ra guirutiʼ zucaalú derechu ni napa Jiobá para guni mandar. Yanna nga tiempu para chuʼnu pur derechu ni napa Jiobá para guni mandar ra guzúʼbanu stiidxabe, gúninu ni nabe sin gucheʼnu ne gúninu stipa pur gúninu casi rúnibe lu guiráʼ cosa.