¡Mayaca guibáninu ndaaniʼ ti guidxilayú cubi!
Bizáʼ Dios Guidxilayú para guibani ca binni ni guzuuba stiidxabe ndaaniʼ ni para siempre (Salmo 37:29). Nga runi guluu Dios Adán ne Eva, primé hombre ne primé gunaa, ndaaniʼ jardín de Edén ne gúdxibe laacaʼ gápacaʼ xiiñicaʼ, gúnicaʼ dxiiñaʼ ndaaniʼ ni ne gápacaʼ ni (Génesis 1:28; 2:15).
Cadi nabáninu ndaaniʼ Guidxilayú riʼ modo gudixheʼ ique Dios. Peru caru diʼ guchaabe modo riníʼ íquebe. ¿Xi zúnibe para gaca Guidxilayú riʼ ti paraísu yaʼ? Casi maʼ bizíʼdinu, qué zunitilú Dios Guidxilayú ra nabáninu riʼ, sínuque zudiibe lugar guibani ca binni ni guzuubaʼ stiidxabe ndaaniʼ ni. Yanna, ¿ximodo zabani binni ndaaniʼ Guidxilayú riʼ ora gaca ni maʼ gudixheʼ ique Dios yaʼ?
Ti gobiernu ni zuni mandar guidubi Guidxilayú
Maʼ cadi candaa zuni mandar Reinu stiʼ Dios ni nuu guibáʼ guidubi Guidxilayú ne óraca zabani binni nayecheʼ, ziuu paz ne zuni binni dxiiñaʼ ni rusiecheʼ laa. Maʼ gulí Dios Jesucristu para guni mandar. Gadxé peʼ laabe de ca gobiernu ni nuu ndaaniʼ Guidxilayú riʼ. Siempre ruyubi Jesús modo guibani binni galán. Zuni mandarbe né guendarannaxhii, zácabe ti Rey ni nadxii, nachaʼhuiʼ ne ni riá binni (Isaías 11:4).
Ziuu binni tobi si lu guidubi Guidxilayú
Qué zadinde binni purtiʼ de gadxé guidxi o raza laa, sínuque lu guidubi Guidxilayú ziuu binni tobi si (Apocalipsis 7:9, 10). Guiráʼ binni guibani lu Guidxilayú riʼ zannaxhiicaʼ Dios ne zannaxhiisaacaʼ. Guiranu zúninu dxiiñaʼ tobi si, ziuunu en paz ne zápanu Guidxilayú ni maʼ bidii Dios laanu (Salmo 115:16).
Maʼ qué zuniná naturaleza binni
Ora guni mandar Reinu stiʼ Dios lu Guidxilayú riʼ, Dios ni bizáʼ guiráʼ cosa zuni controlarbe clima ne maʼ qué zuniná ni binni (Salmo 24:1, 2). Dxi guyuu Jesús lu Guidxilayú bicueeza ti tormenta naroʼbaʼ ne zaqué bisihuinni xi zanda guni né poder maʼ bidii Dios laa (Marcos 4:39, 41). Ora guni mandar Cristu maʼ qué zadxibi binni guizaaca ti desastre natural. Dxi guni mandar Reinu stiʼ Dios ziuu binni ne maniʼ tobi si, ne laaca maʼ qué ziuu tu guni contaminar Guidxilayú (Oseas 2:18).
Guirutiʼ zaca huará ne ziuu stale guendaró
Guiráʼ zaca nazaaca. Guirutiʼ zaca huará, guioʼxhoʼ o gatiʼ (Isaías 35:5, 6). Zabáninu ndaaniʼ ti Guidxilayú nayá ne galán, ndaaniʼ Guidxilayú cubi ca zápanu stale guendaró, cásica dxi guyuu Adán ne Eva ndaaniʼ jardín de Edén que (Génesis 2:9). Dxi guibáninu ndaaniʼ paraísu zápanu ni guidoʼno casi biʼniʼ prometer Dios ca israelita ni bibani dxiqué (Levítico 26:4, 5).
Dxandíʼ ziuu paz ne seguridad
Ora maʼ guni mandar Reinu stiʼ Dios Guidxilayú riʼ, ziuu paz, maʼ qué zaca cosa malu ne guiráʼ binni zannaxhiisaacaʼ. Maʼ qué ziuu guerra, maʼ guirutiʼ zuquiichináʼ binni ne guiranu zápanu ni iquiiñenu. Biblia cayuni prometer: «Zabí cada tobi xaʼnaʼ lubáʼ uva stiʼ ne xaʼnaʼ yaga duʼgaʼ stiʼ, ne qué ziuu tu guchibi laacaʼ» (Miqueas 4:3, 4).
Zapa binni lidxi ne guiráʼ zuni dxiiñaʼ
Guiráʼ familia zapa lidxi ne qué zadxibi gunitini ne zabánicaʼ nayecheʼ. Nga runi, Biblia ná guiráʼ ni guibani ndaaniʼ Guidxilayú cubi «cadi pur gana si zúnicabe stale dxiiñaʼ» (Isaías 65:21-23).
Zusiidiʼ Dios binni
Biblia ná: «Guidxilayú riʼ zadxá tipa ni de guiráʼ ni rusiidiʼ Jehová» (Isaías 11:9). Zaziidiʼ guirá binni de guendanuuxpiaaniʼ stiʼ Jehová ne de guiráʼ cosa ni maʼ bizaʼbe. Qué zaquiiñenu ni maʼ bizíʼdinu ca para gúninu guiibaʼ o para guninanu xcaadxi, sínuque zaquiiñenu ni para guibáninu en paz ne gápanu Guidxilayú stinu (Salmo 37:11; Isaías 2:4).
Zacaanu guendanabani ni qué zaluxe
Bizáʼ Dios Guidxilayú riʼ para guibáninu ndaaniʼ ni nayecheʼ sin qué chuʼ dxi gátinu (Salmo 37:29; Isaías 45:18). Nga runi, «zunitilú Dios guendaguti» (Isaías 25:8). Ne Biblia cayuni prometer «maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ» (Apocalipsis 21:4). Ora gunitilú Dios guiráʼ ca cosa malu nuu ndaaniʼ Guidxilayú riʼ, zulabe ca binni runi ni jneza para guibánicaʼ ndaaniʼ ni, ne laaca zusibánibe millón de binni ne guiracaʼ zabánicaʼ ndaaniʼ ti Guidxilayú cubi (Juan 5:28, 29; Hechos 24:15).
Tiempu riʼ, millón de binni cayaca preparar para guibánicaʼ dxi guni mandar Reinu stiʼ Dios lu guidubi Guidxilayú. Neca binni ruchee laacaʼ cayúnicaʼ stipa pur gúnicaʼ ni riuulaʼdxiʼ Dios ti guibánicaʼ ndaaniʼ Guidxilayú cubi ca. Peru ¿ximodo rúnicabe ni yaʼ? Ra gunibiáʼcabe Jehová Dios, ne ra gunibiáʼcabe ni biseendabe, Jesucristu (Juan 17:3).
Mayaca guinitilú ca cosa malu nuu ndaaniʼ Guidxilayú riʼ, nga runi pa racaláʼdxiluʼ gánnaluʼ xi zanda gúniluʼ para guilaluʼ ne zacá guibániluʼ ndaaniʼ ti Guidxilayú jma galán, gunabaʼ ti testigu stiʼ Jehová gacané lii guiénelu’ ni ná Biblia sin quíxelu’, zuundanécabe lii libru ni lá ¡Zanda guibánilu nayeche’!
Laaca zándaca ziuuláʼdxiluʼ ca ndiʼ
TORRE STIʼ NI RAPA
¿Xi chiguni Reinu stiʼ Dios?
Nanna Jesús Reinu si stiʼ Dios nga zanda guni chaahuiʼ ca guendanagana nuu lu Guidxilayú. ¿Xi huayuni Reinu stiʼ Dios para guni crenu zuni chaahuiʼ ni ca guendanagana ni nuu?
TORRE STIʼ NI RAPA
Reinu stiʼ Dios: ti gobiernu ni zuni ni jneza
Biiyaʼ xhoopaʼ razón ni nápanu para guni crenu zúnini ni jneza.
