Biiyaʼ guiraʼ ni nuu lu sitiu riʼ

guyé lu índice

¿Xi chiguni Reinu stiʼ Dios?

¿Xi chiguni Reinu stiʼ Dios?

Bisiidiʼ Jesús ca discípulo stiʼ guinábacaʼ gueeda Reinu. Nánnabe qué racalaʼdxiʼ Dios guizaaca cosa malu lu Guidxilayú. Laaca nánnabe Reinu si stiʼ Dios nga zuni chaahuiʼ ca guendanagana nuu yanna riʼ. Peru ¿xi zuni Reinu ca yaʼ?

NI MAʼ BIʼNIʼ REINU STIʼ DIOS

Lu artículo ni gudídinu que, bidúʼyanu ca señal ni bidii Jesús. Ca señal riʼ rusihuínnicani maʼ cayuni mandar Reinu stiʼ Dios guibáʼ ne Jesucristu nga Rey stini.

Biblia ná primé ca ni biʼniʼ Jesús dxi bizulú cayuni mandar nga guládxibe Binidxabaʼ ne ca demonio stiʼ de guibáʼ. Yanna lu Guidxilayú riʼ si nga zanda gúnicaʼ ni racaláʼdxicaʼ, ne ndiʼ nga tobi de ca razón xi pur cahuinni cosa malu dede lu iza 1914 (Apocalipsis 12:7, 9).

Neca zeʼ dxi jma zidale guendaquéiquiiñeʼ ndaaniʼ Guidxilayú, Jesús, ni naca Rey lu Reinu stiʼ Dios, huayuni stale cosa galán pur binni. Cayuuyabe guiziidiʼ stale binni de lu Biblia tiempu riʼ ne yanna millón de binni maʼ biziidiʼ ca principiu zeeda lu Biblia ne rúnicaʼ ni nani (Isaías 2:2-4). Maʼ biziidicaʼ guibánicaʼ nayecheʼ, ne qué rudiicaʼ lugar gucueeza bueltu ne dxiiñaʼ sticaʼ laacaʼ para gúnicaʼ ca cosa jma risaca. Racané Biblia laacabe guibánicabe jma galán ne racané ni laacabe para gueeda gácacabe clase binni ni racalaʼdxiʼ Dios chuʼ lu Reinu stiʼ.

 ¿XI ZUNI REINU STIʼ DIOS MAʼ CADI CANDAA?

Neca maʼ cayuni mandar Jesús guibáʼ, cayuni mandar ruʼ binni lu Guidxilayú riʼ. Peru Dios maʼ gudxi Jesús guni mandar lade ca xhenemigu (Salmo 110:2). Maʼ cadi candaa zunitilú Jesús ca enemigu stiʼ ne zabeebe guiráʼ ca guendanagana ni cayuniná ca binni ni cuzuubaʼ stiidxaʼ Dios.

Ndiʼ nga ni chiguni Reinu stiʼ Dios:

  • Zunitilú ni ca religión falsu. Ruchaaga Biblia ca religión falsu né ti prostituta ni maʼ cadi candaa zanitilú. Nga runi, zanitilú ca religión ni runi xpida binni nagana, ca ni rusiidiʼ ni cadi dxandíʼ de Dios. Ne nabé zadxagayaa binni ora guinitilúcani (Apocalipsis 17:15, 16).

  • Zunitilú ni ca gobiernu nuu lu Guidxilayú. Zunduuxe Reinu stiʼ Dios ca gobiernu nuu lu Guidxilayú (Apocalipsis 19:15, 17, 18).

  • Zunitilú ni ca binni malu. ¿Xi zazaaca né ca binni ni qué naʼ gusaana de guni cosa malu ne ni qué naʼ guzuuba stiidxaʼ Dios? «Ca malu ca la? zanitilucaʼ de lu guidxilayú» (Proverbios 2:22).

  • Zunitilú ni Binidxabaʼ ne ca demonio stiʼ. Maʼ qué zanda quite Binidxabaʼ ne ca demonio stiʼ «ca guidxi ca» (Apocalipsis 20:3, 10).

¿Xi guizaaca né ca binni ni racalaʼdxiʼ guni mandar Reinu stiʼ Dios laa yaʼ?

 ¿XI ZUNI REINU STIʼ DIOS PUR BINNI?

Dede guibáʼ zuni Jesucristu stale cosa galán pur binni, jma que biaʼ runi ca gobiernu ni nuu lu Guidxilayú riʼ. Ne maʼ gulí Dios 144,000 rey de lade binni guidxilayú para gacané laabe (Apocalipsis 5:9, 10; 14:1, 3). Zuuyaʼ Jesús gaca ni ná Dios lu Guidxilayú. ¿Xi zuni Reinu stiʼ Dios pur binni yaʼ?

  • Zabee ni guendahuará ne guendaguti. «Guirutiʼ tu cueza racá zaníʼ: “Huaraʼyaʼ”» ne «maʼ qué ziuuruʼ guendaguti» (Isaías 33:24; Apocalipsis 21:4).

  • Ziuu guendariuudxi ne maʼ qué ziuu tu guchibi binni. «Guiráʼ ca xiiñiluʼ [...] zápacabe guendariuudxi» ne «zabí cada tobi de laacaʼ xaʼnaʼ lubáʼ uva ne xaʼnaʼ yaga duʼgaʼ stiʼ, ne qué ziuu tu guchibi laacaʼ» (Isaías 54:13; Miqueas 4:4).

  • Ziuulaʼdxiʼ binni dxiiñaʼ ni guni. «Ziecheʼ ca binni ni maʼ gulieeʼ ora gúʼyacaʼ resultadu stiʼ xhiiñacaʼ. Cadi pur gana si zúnicabe stale dxiiñaʼ» (Isaías 65:22, 23).

  • Zusiá ni Guidxilayú ra maʼ biʼniʼ biidiʼ binni. «Desiertu ne ra gastiʼ nisa ziéchecaʼ, ne ra napampa casi desiertu ziuu nayecheʼ, ne zudii guieʼ casi azafrán» (Isaías 35:1).

  • Zusiidiʼ ni binni xi naquiiñeʼ guni para guibani sin gatiʼ. «Ne zacaacabe guendanabani ni qué zaluxe ra gunibiáʼcabe lii, tobi lucha Dios ni dxandíʼ, ne ra gunibiáʼcabe Jesucristu, ni biseendaluʼ» (Juan 17:3).

Racalaʼdxiʼ Dios guicaaluʼ ca ndaayaʼ riʼ (Isaías 48:18). Lu sti artículo ca zaziidiluʼ xi zanda gúniluʼ yanna para gúʼyaluʼ guiráʼ ca cosa galán ni chiguni Dios lu ca dxi ni zeeda ca.