Biiyaʼ guiraʼ ni nuu lu sitiu riʼ

guyé lu índice

 CA TEMA NI ZEEDA LU CA PRIMÉ YAZA | ÑEE ZIUU TI GOBIERNU NI ZUNI NI JNEZA LA?

Reinu stiʼ Dios: ti gobiernu ni zuni ni jneza

Reinu stiʼ Dios: ti gobiernu ni zuni ni jneza

Ti hombre ni ruuyaʼ ximodo riquiiñecabe xpueltu gobiernu de Nicaragua bisiene xiñee nagana para guiluxe guendaquéruni ni jneza, laa guníʼ: «Pa binni guidxi que runi ni jneza ne ládecabe nga biree cani runi xhiiñaʼ gobiernu la? qué zanda diʼ gaca ni jneza».

Pa lade binni guidxi ni qué runi ni jneza nga guiree ni gacaʼ gobiernu la? nagana gúnibe ni jneza. Yanna, para chuʼ ti gobiernu ni runi ni jneza la? napa xidé gueedani de gadxé lugar. Biblia ruzeeteʼ nuu ti gobiernu ni zuni zacá. Ne laani nga gudxi Jesús ca discípulo stiʼ guinábacaʼ ora guni orarcaʼ. Laani nga Reinu stiʼ Dios (Mateo 6:9, 10).

Dxandíʼ nuu Reinu stiʼ Dios ne nácani ti gobiernu ni nuu guibáʼ ne cadi candaa ziuuni lugar stiʼ ca gobiernu nuu yanna (Salmo 2:8, 9; Apocalipsis 16:14; 19:19-21). Tobi de ca cosa ni chigúnini pur laanu nga zacaneni gaca ni jneza. Guidúʼyanu xiñee qué ganda gacané ca gobiernu ca binni guni ni jneza ne xiñee zanda guni crenu zanda guni Reinu stiʼ Dios ni.

1. PODER

GUENDANAGANA: Napa ca gobiernu ca guiráʼ ni iquiiñecaʼ pur impuestu ni riguixe binni xquídxicaʼ. Cumu stale bueltu nga riquiiñecabe la? stale de cani runi xhiiñaʼ gobiernu ca ruquiindeni laacaʼ cuánacaʼ; ne nuu de laacaʼ rugadxe binni lu nacaʼ para cadi guquíxecaʼ stale impuestu. Peru ni runi gobiernu despué nga rudxiibaʼ lu impuestu stiʼ de guiráʼ para ganda gudxiguetaʼ ni biniti, peru jmaruʼ si rucaani binni guni ni cadi jneza. Nga runi qué rusaana de cuanaʼ binni ne binni nachahuiʼ nga riguixe guiráʼ bueltu ni riniti.

MODO GACA CHAAHUIʼ NI: Jiobá, Dios ni jma nandxóʼ, nga cudii poder Reinu stiʼ (Apocalipsis 11: 15). * Gobiernu riʼ cadi caquiiñeʼ guquixe impuestu para ganda guni xhiiñaʼ. Zanda gudii guiráʼ ni iquiiñeʼ ca xpinni purtiʼ nachaʼhuiʼ ne napa poder para guni ni (Isaías 40:26; Salmo 145:16).

2. TI XAÍQUE

GUENDANAGANA: Susan Rose-Ackerman, gunaa ni bizéʼtenu lu tema gudídinu ca, bizeeteʼ para ganda gaca ni jneza naquiiñeʼ «guzulú binni de luguiáʼ para xagueteʼ». Ora ti gobiernu gacalaʼdxiʼ gaca ni jneza lade ca pulicía ne lade cani runi dxiiñaʼ ra aduana, peru rudii lugar guni cani napa ti puestu risaca ni cadi jneza la? maʼ qué rapa binni confianza laacaʼ. Ne dede ca binni ni runi ni jneza nuu ra rucheecaʼ, casi na Biblia: «Nin ti hombre qué randa runi puru si ni jneza sin guchee ndaaniʼ guidxilayú» (Eclesiastés 7:20).

Qué niná Jesús nuchaacabe laa xiixa

MODO GACA CHAAHUIʼ NI: Jesucristu, Rey stiʼ Reinu stiʼ Dios, cadi casi binni guidxilayú laa purtiʼ qué zudii lugar gucaa binni laa guni ni cadi jneza. Qué ninabe nuchaacabe laabe xiixa. Xaíque stiʼ guidxilayú riʼ, Binidxabaʼ, gúdxibe Jesús zudiibe laa «irá xixé guidxi de idubi naca guidxilayú» pa guzuxibi xañeebe ne guni adorar laabe, peru Jesús qué liica ñuni ni nabe (Mateo 4:8-10; Juan 14:30). Cumu nácabe ti binni ni runi ni jneza la? ora bidiicabe laabe ti droga para cadi guni sentirbe yuubaʼ qué ninabe ñeʼbe ni, purtiʼ pa ñeʼbe ni maʼ qué ñánnabe xi ñúnibe (Mateo 27:34). Maʼ bisihuinni Jesús zanda gaca Rey stiʼ Reinu stiʼ Dios ni nuu guibá (Filipenses 2:8-11).

3. QUÉ ZADXAA GOBIERNU RIʼ

GUENDANAGANA: Ndaaniʼ stale guidxi maca nuu tiempu runi votárcabe para cuícabe tu gaca xaíque, binni guidxi riníʼ ique zacá zanda cuee gobiernu ni qué runi ni jneza. Ni dxandíʼ nga qué raca ni jneza ora gúnicabe campaña ne ora gaca votar, dede né ndaaniʼ ca guidxi ni rábicabe países desarrollados raca zacá. Casi ca ricu la? racanecaʼ gaca campaña stiʼ ca políticu ca ti ganda gacanecaʼ laacabe despué.

Juez ni láʼ John Paul Stevens, ni nuu lu Tribunal Supremo de Estados Unidos, bicaa ni runi ca ricu «rucaani cani naca xaíque cadi guni ni jneza ne cadi gapa binni confianza laacaʼ». Nga runi qué ridxagayaanu guiníʼ ique binni qué runi ca partidu políticu ca ni jneza.

MODO GACA CHAAHUIʼ NI: Cumu qué ziuu dxi gusaana de guni mandar Reinu stiʼ Dios la? maʼ qué zaca campaña para guni votar binni ne maʼ qué ziuu tu guni ni cadi jneza (Daniel 7:13, 14). Ne cumu Dios nga chindí tu gaca Rey lu Reinu stiʼ ne cadi binni la? qué ziuu stobi xlugar ni. Nga  runi, ni quixheʼ gobiernu riʼ guni pur binni la? qué zadxaa diʼ ni ne zacané ni binni.

4. LEY

Dxandíʼ nuu Reinu stiʼ Dios ne nuuni guibáʼ

GUENDANAGANA: Nuu tu riníʼ ique para maʼ cadi guni binni ni cadi jneza la? caquiiñeʼ gacaʼ jma ley. Peru ca binni ni ruundaʼ de laani nacaʼ ora chuʼ jma ley, jma runi binni ni cadi jneza. Ne laaca nabé riniti stale bidxichi ora gacaláʼdxicabe gúnicabe ni na ca ley ni racané para cadi guni binni ni cadi jneza ne huaxiéʼ ni ribeendúcabe.

MODO GACA CHAAHUIʼ NI: Ca ley stiʼ Reinu stiʼ Dios jma risaca cani que ca ley stiʼ binni guidxilayú. Nánnanu zacá ni pur ni biʼniʼ Jesús, lugar de nucaabe xi guiráʼ naquiiñeʼ guni binni ne xi guiráʼ cadi naquiiñeʼ guni la? guniʼbe chinándacaʼ Regla de Oro riʼ: «Irá ni racalaʼdxi tu guni binni laatu la? ngue ca laguni laacaʼ» (Mateo 7:12). Peru ni jma risaca de ca ley riʼ nga cadi riníʼsicani xi naquiiñeʼ guni binni, sínuque ximodo naquiiñeʼ guni binni cani. Jesús biʼniʼ mandar: «Gunaxhii stobi cásica nadxii lu lii» (Mateo 22:39). Cumu zanda guʼyaʼ Dios xi nuu ndaaniʼ ladxidóʼ binni la? zanda gacanebe binni guni ni na ca ley stibe (1 Samuel 16:7).

5. NI RUCAANI BINNI GUNI

GUENDANAGANA: Qué runi binni ni jneza purtiʼ rachelú gapa jma ne ruyubi puru si para laa, guiropaʼ cosa riʼ guiráʼ binni napa cani dede né cani runi xhiiñaʼ gobiernu. Dxi bixá edificiu ni bizéʼtenu lu tema gudídinu ca bidiicabe cuenta bigadxe cani bicuini lu náʼ ca xpinni gobiernu, purtiʼ nánnacaʼ jma baratu zareeni ni laacaʼ que iquiiñecaʼ material nadxigui ne chinándacaʼ ca ley nexheʼ para cuíʼ edificiu.

Nga runi, para ganda guni binni ni jneza naquiiñeʼ guiziidiʼ cadi gachelú gapa jma ne cadi guyubi puru para laasi. Ne ca gobiernu ni nuu yanna riʼ qué nacaʼ gacanecaʼ binni guni zacá ne qué zanda diʼ gúnicabe ni.

 MODO GACA CHAAHUIʼ NI: Reinu stiʼ Dios zanda cuee guendanagana riʼ dede xcu ni purtiʼ zusiidiʼ ni binni xi naquiiñeʼ guni. * Ni rusiidiʼ Reinu riʼ ruchaani «xquenda biaani [binni]» o xpiaʼ (Efesios 4:23). Ne nga racané laacabe cadi gachelúcabe gápacabe jma ne cadi guyúbicabe para laasicabe, sínuque chúʼcabe nayecheʼ ne ni napasícabe ne guizaaláʼdxicabe gacanécabe sti binni (Filipenses 2:4; 1 Timoteo 6:6).

6. BINNI GUIDXI

GUENDANAGANA: Dede né ca binni ni guzá scuela ne cani nabani galán nuu de laacaʼ laapecaʼ ruyúbicaʼ gúnicaʼ ni cadi jneza. Stale binni ni biʼndaʼ de tema ca nacaʼ ndiʼ nga tobi de ca razón ni nuu xiñee qué ganda gacané gobiernu gaca ni jneza. Nécapeʼ racaláʼdxicabe gaca ni jneza ni zanda si gúnicabe nga gúʼyacabe cadi tan guninani binni.

MODO GACA CHAAHUIʼ NI: Convención de las Naciones Unidas ni ruyubi guni binni ni jneza bizeeteʼ naquiiñeʼ gacané ca gobiernu binni «cadi gucheené ley, guni ni jneza ne gaca responsable». Nécapeʼ galán ni cá íquecabe, Reinu stiʼ Dios cadi riníʼ si xi naquiiñeʼ gacaʼ, sínuque rinabaʼ ni binni gaca zacá. Biblia na qué ziuudiʼ cani rachelú gapa jma ne cani rusiguii ra guni mandar Reinu stiʼ Dios (1 Corintios 6:9-11; Apocalipsis 21:8).

Guiráʼ binni zanda guiziidiʼ guni respetar ca ley risaca napa Reinu stiʼ Dios, cásica biʼniʼ ca primé xpinni Cristu. Casi dxi gucalaʼdxiʼ Simón nugadxe ndaaniʼ náʼ ca apóstol, laacaʼ bicaanacaʼ laabe ne gúdxicaʼ laabe: «Bisaana ni cá ique lu ca ne unaba perdón». Bidii Simón cuenta cadi jneza ni racalaʼdxiʼ guni que ne gunábabe ca apóstol que guni orarcaʼ pur laabe ti cadi gúnirube ni (Hechos 8:18-24).

XIMODO ZANDA GÁCANU XPINNI REINU

Lii zanda gácaluʼ xpinni Reinu stiʼ Dios neca de intiica guidxi lii (Hechos 10:34, 35). Modo cusiidiʼ Reinu riʼ binni lu guidubi naca Guidxilayú zacaneni lii para ganda gácaluʼ xpinni ni. Ziuulaʼdxiʼ ca testigu stiʼ Jiobá guluiʼcaʼ lii ximodo rusiidicaʼ binni de Biblia. Pa nápaluʼ chupa chonna minutu cada semana, zánnaluʼ xi guiráʼ cosa galán chiguni Reinu stiʼ Dios. Tobi de ca cosa ni zaziidiluʼ nga zannaluʼ xi chiguni Dios para ganda gaca ni jneza (Lucas 4:43). Guniʼné ca Testigu nabeza gaxha de ra nuuluʼ o guyé lu sitiu ni nápadu lu Internet, jw.org/zai.

Ñuuláʼdxiluʼ niziidiluʼ de Biblia sin quíxeluʼ la?

^ párrafo 8 Biblia na Jiobá nga láʼ Dios.

^ párrafo 22 Para gúʼyaluʼ ti ejemplu biindaʼ tema «Es posible ser honrado en un mundo corrupto?» ni zeeda lu La Atalaya 1 stiʼ octubre 2012.