Biiyaʼ guiraʼ ni nuu lu sitiu riʼ

guyé lu índice

Ni rinabadiidxaʼ cani ruundaʼ

Ni rinabadiidxaʼ cani ruundaʼ

¿Ñee jneza nga gapa ti xpinni Cristu ti pistola, ti rifle o sti tipu guiibaʼ para gapa laa de xcaadxi binni la?

Ca xpinni Cristu zanda gúnicaʼ biaʼ nuu lu nacaʼ para gápacaʼ laacaʼ ne gaca defendercaʼ. Peru naquiiñeʼ guiníʼ íquecabe ca principiu ni zeeda lu Biblia ora gúnicabe ni. Ca principiu riʼ ruluíʼ laacabe cadi jneza nga iquiiñenu pistola, rifle o sti tipu guiibaʼ para gápanu laanu de xcaadxi binni. Guidúʼyanu caadxi razón ni zacané laanu guicaanu ti decisión jneza.

Nabé risaca xquendanabani binni para Jiobá. Salmista David gunna ra nuu Jiobá nga «cadá guendanabani» (Sal. 36:9). Nga runi, pa ti xpinni Cristu quixhe ique guni biaʼ nuu lu náʼ para gaca defender o gapaʼ ca cosa stiʼ la? zuni biaʼ gándatiʼ para cadi gatiʼ sti binni ne «cadi gaʼniʼ donda» ique pa gatiʼ tuuxa (Deut. 22:8; Sal. 51:14).

Dxandíʼ, zanda guuticabe ti binni né intiica si cosa. Peru jma nagueenda guuticabe tuuxa né ti guiibaʼ, pa laapecabe guyúbicabe gúnicabe ni o pa guizaaca ni pur ti accidente. * Ne pa ti gubaanaʼ nuu nervioso ne guʼyaʼ naaze sti binni ca guiibaʼ la? jma nagana zaca ni óraca ne zándaca gatiʼ tuuxa de laacabe.

Gueelaʼ ante gatiʼ Jesús, gúdxibe ca discípulo stibe guyúbicaʼ ti espada, peru cadi para gaca defendercaʼ (Luc. 22:36, 38). Gúdxibe ni laacaʼ para gusiidibe laacaʼ ti cosa nabé risaca: cadi guyúbicaʼ tíndecaʼ, nin ora gucaalú stale binni naazeʼ guiibaʼ laacaʼ (Luc. 22:52). Dxi biaaxha Pedro luguiáʼ esclavu stiʼ sumo sacerdote né ti espada, gudxi Jesús laabe: «Guluu espada stiuʼ jlugar». Despué bisiidibe  ti cosa dxandíʼ, ti principiu ni huayacané ca xpinni Cristu dede yanna: «Irá ni cuʼ ná espada la? zati né espada» (Mat. 26:51, 52).

Casi ná Miqueas 4:3, ca xpinni Dios rúnicaʼ «espada sticaʼ cubu ni ricá ruaa aradu, ne [r]únicaʼ lanza sticaʼ podadera». Cani dxandíʼ xpinni Cristu runibiáʼcabe laacaʼ purtiʼ nácacaʼ binni ni qué ridinde. Rinándacabe conseju ni bicaa apóstol Pablo pur espíritu santu: «Neca uchee né cabe laatu, cadi uquixe tu ni laacabe» ne «laguni biaʼ ganda para cadi chuʼ dinde né tu irutiʼ» (Rom. 12:17, 18). Gudíʼdibe lu stale guendanagana, tobi de laacani nga guyuube «ra naxhoo [...] ra biree gubaana» lube (2 Cor. 11:26). Peru qué ñuu dxi nucheenebe ca principiu ni zeeda lu Biblia para gápabe laabe. Ni bíʼnibe nga gúpabe confianza Dios ne guendanuuxpiaaniʼ ni zeeda lu Biblia purtiʼ «jma galán [ni] que guiráʼ guiibaʼ ni riquiiñeʼ lu guerra» (Ecl. 9:18).

Para ca xpinni Cristu la? jma risaca guendanabani que ca cosa material. Nuu tu napa stale cosa risaca, peru nánnanu «cadi nga si nga enda nabani sti binni» (Luc. 12:15). Pa guiree tuuxa lunu, naquiiñeʼ guinínenu laabe né diidxaʼ nadóʼ. Pa qué gucueeza nga laabe la? galán gácanu binni nuu xpiaaniʼ ne chinándanu conseju stiʼ Jesús riʼ: «Pa ucaa lú cabe laatu la? cadi ucaa lú tu laacabe». Ndiʼ riníʼ zanda gudiʼnu lugar chinebe guiráʼ ni gacaláʼdxibe (Mat. 5:39, 40; Luc. 6:29). * Peru ni jma galán nga gatananu. Pa que guluinu cani nápanu ora maʼ ziuunu paxaraa ne pa ganna ca vecinu stinu ruyúbinu guendariuudxi purtiʼ nácanu testigu stiʼ Jiobá la? zándaca maʼ qué zuniná ca binni malu ca laanu (Prov. 18:10; 1 Juan 2:16).

Laanu ca xpinni Cristu, runi respetarnu conciencia stiʼ xcaadxi (Rom. 14:21). Pa gueeda ganna ca hermanu napa tuuxa de ndaaniʼ congregación ti guiibaʼ para gapa laa de xcaadxi binni, zándaca nuu hermanu guni ti yaya o guidxiichi. Guendarannaxhii ni nápanu ca zucaa laanu jma guizaaláʼdxinu ni cayuni sentir sti binni que ni cayuni sentirnu, ne pur nga zúninu stipa cadi gápanu ni neca rudii ley laanu derechu (1 Cor. 10:32, 33; 13:4, 5).

Ca xpinni Cristu, rúninu stipa pur gácanu ti ejemplu galán (2 Cor. 4:2; 1 Ped. 5:2, 3). Guiníʼ íquenu napa ti xpinni Cristu ti guiibaʼ para gapa laa de xcaadxi binni. Pa náparube ni neca maʼ bidiicabe laabe conseju né Biblia, qué zacadibe ti ejemplu galán. Nga runi, qué zanda guicaabe xiixa dxiiñaʼ nin xiixa privilegiu ndaaniʼ congregación. Ngaca nga rizaaca né ti xpinni Cristu ni rizané ti guiibaʼ pur dxiiñaʼ stiʼ. Pa zacá ni, ni jma jneza gúnicabe nga guyúbicabe stiʼ dxiiñaʼ. *

Cada xpinni Cristu naquiiñeʼ guʼyaʼ ximodo gapa xquendanabani ne xquendanabani familia stiʼ, ximodo guni defender cani napa ne xi dxiiñaʼ guicaa. Peru ora gúʼyabe ximodo gúnibe ni la? zuuyabe xi ná ca principiu zeeda lu Biblia, purtiʼ laacani rusihuinni cani pabiáʼ nuu xpiaaniʼ Dios ne pabiáʼ nadxiibe binni. Cumu runi respetar ca xpinni Cristu ni maʼ huaniisi en sentidu espiritual ca principiu riʼ la? riguixhe íquecaʼ cadi gápacaʼ ti guiibaʼ para gápacaʼ laacaʼ de xcaadxi binni. Nánnacabe dxandipeʼ qué zusaana de guibánicabe seguru pa gápacabe confianza Dios ne chinándacabe ni ná ca principiu ni zeeda lu Biblia (Sal. 97:10; Prov. 1:33; 2:6, 7).

Lu gran tribulación ca zapa ca xpinni Cristu confianza Jiobá ne qué zúnicaʼ pur gaca defendercaʼ.

^ párrafo 3 Zándaca náʼ ti xpinni Cristu gapa ti rifle, ti escopeta o sti tipu guiibaʼ para guinaazeʼ tuuxa maniʼ para gó, o para gapa laa de ca maniʼ guiʼxhiʼ ca. Ora maʼ cadi caquiiñebe guiibaʼ ca, jma galán cuʼ chaahuibe ni ne cuʼbe llave ra nuu ni, cueebe bala ndaaniʼ ni guchiabe ni. Pa qué rudii gobiernu lugar gapa binni guiibaʼ lugar ra nabézanu o rudii lugar iquiiñeʼ binni ni maca nuu paraa si la? ca xpinni Cristu rinándanu ca ley riʼ (Rom. 13:1).

^ párrafo 2 Zadxélaluʼ información ni caníʼ ximodo gaca defenderluʼ de ti binni rilaxoo lu tema ni láʼ «Cómo evitar una violación», ni biree lu revista ¡Despertad! 8 de marzo 1993.

^ párrafo 4 Pa racaláʼdxiluʼ gánnaluʼ jma de pa naquiiñeʼ guicaanu ti dxiiñaʼ ra rinabaʼ ni sánenu guiibaʼ o pa coʼ la? biiyaʼ revista La Atalaya 1 de noviembre de 2005, yaza 31, ne 1 de noviembre de 1983, yaza 25 ne 26.