Biiyaʼ guiraʼ ni nuu lu sitiu riʼ

guyé lu índice

¿Xiñee naquiiñeʼ guininu «lagusisaca Jah»?

¿Xiñee naquiiñeʼ guininu «lagusisaca Jah»?

«Lagusisaca Jah, purtiʼ jneza nga gusisácanu Dios stinu né saa; galán gúninu ni ne biáʼsipeʼ laabe nga gusisácanu» (SAL. 147:1).

DIIDXAʼ RIUUNDAʼ: NE 152

1-3. a) ¿Padxí nga zándaca gucuá Salmo 147? b) ¿Xi zazíʼdinu ora guni estudiarnu Salmo 147?

STALE biaje, rusisácanu ca binni ni runi xiixa cosa galán o cani napa xiixa cualidad ni naquiiñeʼ gapa ca xpinni Cristu. Peru Jiobá nga ni jma naquiiñeʼ gusisácanu. Ne zacá naquiiñeʼ gaca ni, purtiʼ ridúʼyanu naroʼbaʼ poder nápabe para bizaʼbe guiráʼ ni nuu ne bisihuínnibe nadxii xhaatabe laanu ra biseendabe Xiiñibe beeda gati pur binni guidxilayú.

2 Hombre ni bicaa Salmo 147 que racalaʼdxiʼ gusisaca Jiobá de guidubi ladxidóʼ. Ne laaca guluube gana xcaadxi binni guni zaqueca (biindaʼ Salmo 147:1, 7, 12).

3 Qué gánnanu tu bicaa salmo riʼ, peru ruluíʼ si bibánibe dxi gulee Jiobá ca israelita que de Babilonia ne yenebe laacaʼ Jerusalén sti biaje (Sal. 147:2). Rihuínnica bisisaca hombre riʼ Jiobá pur bidxiguetaʼ ca israelita que xquídxicaʼ para guni adorarcaʼ laa sti biaje. Peru laaca gúpabe xcaadxi razón para cuʼbe guendanaróʼ stiʼ Jiobá. ¿Xi laacani yaʼ? ¿Xi razón nápanu para guininu «lagusisaca Jah» yaʼ? (Sal. 104:35; 147:1).

 RUSIANDA JIOBÁ CANI CAYUUBAʼ LADXIDÓʼ

4. Dxi gulee rey Ciro ca israelita de ra nuucaʼ, ¿ximodo biʼniʼ sentircaʼ ne xiñee?

4 Guiníʼ íquenu ximodo biʼniʼ sentir ca israelita ni nuu Babilonia. Rusituí ca babilonio que lúcabe ne rábicaʼ laacabe: «Laguundaʼ tobi de ca canción stiʼ Sión para laadu». Peru qué gápacabe gana gúʼndacabe purtiʼ binitilú Jerusalén, pur ndaʼ laani nga riuucabe nayecheʼ (Sal. 137:1-3, 6). Naná nuu ladxidóʼcabe ne caquiiñecabe tu quixhedxí ni. Peru guca cásipeʼ maca guníʼ Jiobá, biʼniʼ ganar, Ciro, rey de Persia, guidxi Babilonia ne laa gulee laacabe de raqué. Sicaríʼ guníʼ Ciro de Jiobá: «Laapebe biʼniʼ mandarbe naa gucueʼ ti yoo para laabe Jerusalén». Ne laaca guniʼbe: «Tutiica ni nuu raríʼ, ni naca de xquídxibe la? chuʼ Jiobá né laa. Cheʼ ne quibaʼ» (2 Crón. 36:23). Nanna dxíchinu gudixhedxí ndiʼ ladxidóʼ ca israelita que laga nuucaʼ Babilonia.

5. Casi ná Salmo 147:3, ¿ximodo riquiiñeʼ Jiobá poder stiʼ?

5 Cadi guidxi Israel si nga gudixhedxí Jiobá ladxidóʼ, sínuque laaca né cada tobi de ca israelita que. Zacaca rúnibe ni yanna. Sicaríʼ guníʼ hombre bicaa Salmo 147 que de Dios: «Rusiándabe cani cayuubaʼ ladxidóʼ, ne ruchéndabe venda ra naná laacaʼ» (Sal. 147:3). Ora huaranu o nuunu deprimidu zanda gápanu confianza racalaʼdxiʼ Jiobá quixhedxí ladxidoʼno ne gusianda ni (Sal. 34:18; Is. 57:15). Rudiibe laanu stipa ne guendabiaaniʼ para gudxíʼlunu intiica guendanagana (Sant. 1:5).

6. ¿Xi rusiidiʼ Salmo 147:4 laanu? (Biiyaʼ dibuju ni zeeda ra ruzulú tema riʼ).

6 Hombre bicaa salmo que biyadxí guibáʼ ne guníʼ cugabaʼ Jiobá «panda beleguí nuu» ne «riniʼbe lá cada tobi de laacani» (Sal. 147:4). ¿Xiñee bizulú guníʼ hombre bicaa Salmo riʼ de ca beleguí ca yaʼ? Guiníʼ íquenu ndiʼ: hombre riʼ gunda biiyabe ca beleguí ca peru qué ñánnabe panda cani. Yanna riʼ, ca científicu ca maʼ randa ruuyaʼ jma stale de laacani. Ne riniʼcaʼ nuu mil millón de beleguí ndaaniʼ galaxia stinu ne nuu billón de galaxia lu universu. Peru qué zanda ugábacabe pándapeʼ cani. Tobi lucha si ni bizáʼ cani nga zanda guni ni, ne guiráʼ cani riguíxhebe cani. Nga rusihuinni risaca cada tobi de ca beleguí ca para laabe (1 Cor. 15:41). ¿Xi rusiidiʼ ndiʼ laanu yaʼ? Cásica nanna Dios paraa nuu cada tobi de ca beleguí ca guiráʼ ora, zacaca nánnabe paraapeʼ nuunu, ximodo runi sentirnu ne xi caquiiñeʼ cada tobi de laanu guiráʼ ora.

7, 8. a) ¿Xiñee riene Jiobá laanu? b) ¿Xi ejemplu rusihuinni riene Jiobá laanu?

7 Riene Jiobá ca guendanagana ridxaagalú cada tobi de laanu ne nápabe biaʼ poder caquiiñeʼ para gacanebe laanu (biindaʼ Salmo 147:5). Zándaca nuu tiru ruluíʼ nabé nagana ni cadxaagalunu ne rábinu maʼ qué zanda gudxíʼlunu ni. Peru nanna Dios pabiáʼ si zanda guni huantarnu ne «rietenaláʼdxibe de yu laanu» (Sal. 103:14). Cumu imperfectu laanu la? cada ratu rucheʼnu pur ngueca cosa. Guiranu nga raca arrepentirnu de xiixa ni rininu, de xiixa cosa malu ni riuuláʼdxinu gúninu gatigá ne pur envidia ni nuu tiru runi sentirnu. Neca qué gapa Jiobá nin tobi de ca guendanagana riʼ peru riene chaahuiʼ laanu (Is. 40:28).

8 Zándaca huayuu biaje huadúʼyanu ximodo huaquiiñeʼ Jiobá poder stiʼ para gacané laanu gudxíʼlunu ca guendanagana ca (Is. 41:10, 13). Guidúʼyanu ni bizaaca  ti precursora lá Kyoko. Dxi biseendacabe laabe chigúnibe xhiiñaʼ Jiobá sti lugar, nabé bireebe gana. ¿Ximodo bidiibe cuenta riene Jiobá ni cazaacabe que yaʼ? Bidxela Kyoko stale hermanu ni biene laa ndaaniʼ congregación cubi yendá. Biʼniʼ sentirbe casi ora ñabi Jiobá laabe: «Nadxieeʼ lii, cadi purtiʼ si nácaluʼ precursora, sínuque purtiʼ xiiñeʼ lii ne maʼ bidiiluʼ naa xquendanabániluʼ. Racalaʼdxeʼ chuʼluʼ nayecheʼ pur nácaluʼ tobi de ca testigu stinneʼ». ¿Ximodo maʼ biluíʼ Dios ni jma napa poder lii «dxiʼbaʼ guendabiaaniʼ [stiʼ] dede qué zanda guininu pabiáʼ ni» yaʼ?

RUDII JIOBÁ NI CAQUIIÑENU

9, 10. ¿Xi runi tender Jiobá primé? Bidii ti ejemplu.

9 Nuu tiru zándaca riuʼnu xizaa pur ca cosa ni riquiiñenu casi, ni guidoʼno. Peru Jiobá bizáʼ Guidxilayú riʼ para gudiini ni gó guiráʼ cani nabani luni, dede né para «ca biaʼquiʼ nahuiiniʼ ni cadi cusaana de guinabaʼ ni gó», casi ná Salmo 147:8, 9 (biindaʼ ni). Pa ruyaanaʼ Jiobá ca pájaru riʼ la? laaca zanda gápanu confianza zudiibe laanu ni caquiiñenu (Sal. 37:25).

10 Ni jma risaca nga rudii Jiobá ni riquiiñenu para iguidxi fe stinu. Laabe rudiibe laanu guendariuudxi «dede iruti zanda guiene ximodo ni» (Filip. 4:6, 7). Guiníʼ íquenu ni bizaaca Mutsuo ne xheelaʼ, biiyacabe modo gucané Jiobá laacabe dxi guca ti tsunami Japón lu iza 2011. Gudxíʼbacabe ique lídxicabe ngue runi bilácabe, ne biníticabe casi guiráʼ ni nápacabe. Gueelaʼ que biaanacabe ndaaniʼ ti cuartu ni binitilú lu guiropa pisu stícabe; guizáʼ nananda guca ne gastiʼ biaaniʼ. Siadóʼ que biyúbicabe xiixa ni cuʼ gana laacabe en sentidu espiritual. Libru si bidxélacabe nga Anuario de los testigos de Jehová 2006. Nagueendaca biiyaʼ Mutsuo subtítulo ra ná «Los tsunamis más mortíferos de la historia». Caníʼ ni de xu roʼ ni guca lu isla stiʼ Sumatra lu iza 2004, ne biaʼ rudii binni cuenta la? pur laani nga guca caadxi tsunami ni jma bininá binni. Dede bidxá tipa nisa lú Mutsuo ne xheelaʼ ora cayuundacaʼ ca experiencia que. Biʼniʼ sentírcabe zaqué nga cusihuinni Dios nadxii laacabe ne caguu gana laacabe biáʼsipeʼ ora caquiiñecabe ni. Laaca biiyacabe guendarannaxhii stiʼ Jiobá ora yené ca hermanu lari ne guendaró para laacabe. Peru jma guyuucabe gana ra yeganna ca representante stiʼ organización stiʼ Dios congregación stícabe. Mutsuo guníʼ: «Bineʼ sentir nuu Jiobá cueʼdu cayapa laadu. Guizáʼ gudixhedxibe ladxidoʼdo». Racá ridúʼyanu primeru rudii Jiobá ni caquiiñenu en sentidu espiritual ne despué rudiibe laanu xcaadxi cosa ni caquiiñenu.

XIMODO CUEENDUNU NI GALÁN RA GACANÉ JIOBÁ LAANU

11. ¿Xi naquiiñeʼ gúninu para cueendunu ni galán ra gacané Jiobá laanu yaʼ?

11 Nuuca Jiobá listu para quixhedxí «ladxidóʼ cani nadóʼ» (Sal. 147:6a). Yanna, ¿xi zanda gúninu para cueendunu ni galán ra gacanebe laanu yaʼ? Gaca xhamígunu laabe. Para nga la? naquiiñeʼ gácanu binni nadóʼ (Sof. 2:3). Ca binni nadóʼ ribézacaʼ guni chaahuiʼ Jiobá ca cosa ni cadi cayaca jneza ne gusianda yuubaʼ sticaʼ. Clase binni ca nga riuuláʼdxibe ni rúnicaʼ.

12, 13. a) ¿Xi naquiiñeʼ gucáʼnanu pa racaláʼdxinu gacané Dios laanu? b) ¿Xi naquiiñeʼ gúninu para gusiéchenu Jiobá?

12 Peru laaca runi Dios ndiʼ: «Rulaabe ca binni malu dede layú» (Sal. 147:6b).  Cadi guendariguite diʼ ca diidxaʼ riʼ. Pa racaláʼdxinu cueendunu ni galán ra qué gusaana de gannaxhii Jiobá laanu ne cadi guidxiichinebe laanu la? naquiiñeʼ gacananaláʼdxinu ca cosa ni nanaláʼdxibe (Sal. 97:10). Naquiiñeʼ gacananaláʼdxinu ca pecadu sexual. Nga caníʼ naquiiñeʼ gucáʼnanu intiica cosa ni zándaca gucaa laanu gúninu cani, casi guidúʼyanu pornografía (Sal. 119:37; Mat. 5:28). Zándaca zaca nagana para laanu gudxíʼlunu ni, peru zabeendunu ni galán pa gúninu ni, purtiʼ zápanu ndaayaʼ stiʼ Jiobá.

13 Para ganda gusaana de gúninu ni la? naquiiñeʼ guinábanu Jiobá gacané laanu. Laabe qué ziuuláʼdxibe guyúbinu gulá «stipa stiʼ caballu» laanu nin stipa napa «xcoʼreʼ hombre». Ndiʼ riníʼ qué ziuulaʼdxiʼ Jiobá ni gúninu pa gápanu confianza laca laanu o xcaadxi binni (Sal. 147:10). Ni naquiiñeʼ gúninu nga guni rogarnu laabe gacanebe laanu. Laabe qué rúnibe casi runi ca binni ni rudii conseju, qué rireebe gana gucaadiágabe oración stinu biaʼ tiica biaje gúninu ni. Salmo 147:11 ná: «Cayechené Jiobá cani ridxibi laa ne cani cabeza cadi gusaana de gannaxhiibe laacaʼ». Nga runi, zanda gápanu confianza, pur guendarannaxhii napa Dios laanu, zacanérube laanu gucueezanu laanu de gúninu ca cosa malu ni riale de laanu gúninu.

14. ¿Xi gudixhedxí ladxidóʼ salmista que?

14 Rudii Jiobá laanu stale razón para guni crenu dxandíʼ zacanebe ca xpínnibe guiráʼ biaje iquiiñecaʼ xiixa. Ora guníʼ hombre bicaa Salmo 147 que ca diidxaʼ riʼ de Jiobá, caníʼ íquebe ora guibiguetaʼ ca israelita que Jerusalén: «Laabe naguidxi bíʼnibe ca barra stiʼ ca puertaʼ stiluʼ; maʼ guluube ndaayaʼ ca xiiñiluʼ ni nuu galahuiʼ de lii. Nebe guendariuudxi lu territorio stiluʼ» (Sal. 147:13, 14). Gutadxí ladxidoʼbe ora gúnnabe zuni Dios ca puertaʼ stiʼ Jerusalén jma naguidxi para gapaʼ ca xpinni.

¿Ximodo racané Stiidxaʼ Dios laanu ora nuunu naná? (Biiyaʼ párrafo 15 dede 17).

15-17. a) ¿Ximodo ñándaca ñuni sentirnu, peru ximodo riquiiñeʼ Jiobá Stiidxaʼ para gacané laanu? b) Bidii ti ejemplu ni rusihuinni racané Dios laanu «nagueenda» ra iquiiñeʼ Stiidxaʼ.

15 Zándaca ziuu ora zadídinu lu xiixa guendanagana ni gucaa laanu guni sentirnu ansiedad. Peru Jiobá zanda gudii laanu guendabiaaniʼ. Hombre bicaa salmo que, sicaríʼ guníʼ de Dios: «Cuseendabe stiidxabe lu guidxilayú, nagueenda ruxooñeʼ stiidxabe». Laaca guníʼ rusaba Dios «nieve casi lana; rucheechebe hielu biuxe casi rireeche dé ludé» ne «culaabe hielu stibe». De raqué gunabadiidxaʼ salmista que: «¿Tu laa zanda guni huantar nanda stibe ne guzuhuaaʼ nezalube yaʼ?». Ne últimu sicaríʼ guniʼbe de Jiobá: «Ruseendabe stiidxabe ne rusiá cani» (Sal. 147:15-18). ¿Xi rizíʼdinu de guiráʼ ndiʼ yaʼ? Zanda guni controlar Dios nieve ne granizu purtiʼ runibiaʼbe guiráʼ xixé cosa ne laabe nga ni jma nandxóʼ. Nga runi laaca zanda gacanebe laanu guni huantarnu intiica guendanagana.

16 Yanna riʼ riquiiñeʼ Jiobá Stiidxaʼ, Biblia, para gusiene laanu xi gúninu. Zanda guininu «nagueenda ruxooñeʼ stiidxabe», purtiʼ laabe rusiénebe laanu en sentidu espiritual xi gúninu órapeʼ caquiiñenu ni. Guiníʼ íquenu cani ribeendunu pur cani rusiidiʼ Biblia laanu, ca publicación ni rudii «mozo ni nuu xpiaani ne ni runi jneza», canal JW Broadcasting, sitiu jw.org, ca ancianu ne xcaadxi hermanu (Mat. 24:45). ¿Cadi dxandíʼ «nagueenda» ruluíʼ Jiobá laanu xi gúninu casi ná salmo ca la?

 17 Ti hermana láʼ Simone guníʼ ique qué risaca ne ná qué ziuulaʼdxiʼ Dios ni cayuni. Neca qué gápabe gana, qué nusaanabe de ninábabe Jiobá gacané laabe. Laaca bíʼnibe stipa pur cadi gusaanabe de guni estudiarbe Biblia. ¿Ñee huayuni sentirbe pabiáʼ poder napa stiidxaʼ Dios la? Laabe guniʼbe: «Modo tiica guyuaaʼ ante, peru runeʼ sentir rudii Jiobá naa stipa ne ruluíʼ naa xi guneʼ». Nga huayacané laabe chuʼbe jma nayecheʼ.

18. ¿Xiñee runi sentirluʼ maʼ bidii Dios lii ti privilegiu naroʼbaʼ, ne xi razón nápaluʼ para guiniʼluʼ «lagusisaca Jah»?

18 Salmista que nanna naroʼbaʼ privilegiu napa ca israelita que purtiʼ laasícabe gulí Dios para gudii laacabe stiidxaʼ, «ca ley ni caníʼ modo guibani binni ne modo runi juzgarbe binni» (biindaʼ Salmo 147:19, 20). Laanu laca naquiiñeʼ guni sentirnu nápanu ti privilegiu naroʼbaʼ purtiʼ maʼ gulí Jiobá laasinu para chinenu lá. Runibiaʼnu Dios ne ruluíʼ Stiidxabe laanu xi gúninu. Pur guiráʼ nga zanda gaca xhamígunu laabe. Nga runi de guidubi ladxidoʼno rudiʼnu xquíxepeʼ. Cásica hombre bicaa Salmo 147 que, laanu laaca nápanu stale razón para guininu «lagusisaca Jah» ne para guni invitarnu xcaadxi binni guni zacaca.