Biiyaʼ guiraʼ ni nuu lu sitiu riʼ

guyé lu índice

Guyúbinu ca cosa ni dxandíʼ risaca

Guyúbinu ca cosa ni dxandíʼ risaca

«Laguiquiiñeʼ ca cosa risaca stiʼ guidxilayú riʼ para gápatu xhamígutu» (LUC. 16:9TNM).

DIIDXAʼ RIUUNDAʼ: 32 NE 154

1, 2. ¿Xiñee qué zusaana de chuʼ binni pobre lu Guidxilayú riʼ?

SISTEMA económico ni nuu yanna riʼ nagana ni ne nabé runiná ni binni. Qué ridxela ca joven dxiiñaʼ. Stale binni riguu xquendanabani ra naxoo para cheʼ ndaaniʼ ca guidxi jma ricu. Cadale binni pobre dede né ndaaniʼ ca guidxi roʼ ni napa bueltu. Ca ricu zeʼ dxi jma ziyácacaʼ ricu ne ca pobre zeʼ dxi jma ziyácacaʼ pobre. Caadxi cálculo nacubi ná 1% de ca binni nabeza lu Guidxilayú napa stale bueltu biaʼca napa guiráʼ xixé binni de planeta riʼ juntu. Dxandíʼ, cadi casi ziuunu zaninu dxandíʼ zacá ni. Nanna dxíchinu mil millón de binni guizáʼ pobre laacaʼ, peru nuu binni napa stale bueltu para ganda guibaniné caadxi generación de familia sticaʼ ni gale despué. Bisihuinni Jesús dxandíʼ ni ná ca diidxaʼ riʼ ora guníʼ: «Ca pobre la? qué ziuu dxi guiaadxa ca lade tu» (Mar. 14:7). ¿Xiñee nuu binni ricu ne nuu pobre yaʼ?

2 Nanna Jesús zaree sistema económico stiʼ guidxilayú riʼ ora maʼ gueeda Reinu stiʼ Dios. Lu Apocalipsis 18:3 riníʼ Biblia de «cani rutoo», laacabe nga cani zeeda gaca casi sistema comercial ni racalaʼdxiʼ puru para laasi. Sistema comercial, política ne sistema stiʼ religión ni qué rusiidiʼ ni dxandíʼ zeeda cani de guidxilayú stiʼ Binidxabaʼ riʼ. Ca xpinni Dios la? qué licapeʼ riuucaʼ lu política ne qué rúnicaʼ xiixa de ni runi religión ni qué rusiidiʼ ni dxandíʼ. Peru jma stale qué ganda guixeleʼ chaahuiʼ de sistema comercial ni nuu lu náʼ Binidxabaʼ.

3. ¿Xi guendarinabadiidxaʼ zacábinu?

 3 Laanu ca xpinni Cristu, naquiiñeʼ guiníʼ íquenu ximodo ridúʼyanu sistema comercial. Guinabadiidxanu laca laanu: «¿Ximodo zanda iquiiñeʼ cani napaʼ para gusihuinneʼ ruzuubaʼ stiidxaʼ Dios yaʼ? ¿Xi zanda guneʼ para ganda guixeleʼ chaahueʼ de sistema comercial riʼ yaʼ? ¿Xi ejemplu rusihuinni napa ca xpinni Dios confianza laa de guidubi ladxidoʼcaʼ yaʼ?».

HISTORIA STIʼ MAYORDOMO NI QUÉ ÑUNI NI JNEZA

4, 5. a) ¿Xi bizaaca mayordomo ni bizeeteʼ Jesús lu historia stiʼ? b) ¿Xi conseju bidii Jesús ca discípulo stiʼ?

4 (Biindaʼ Lucas 16:1-8). Ne versículo 9 stiʼ capítulo riʼ lu Traducción del Nuevo Mundo ná: «Laguiquiiñeʼ ca cosa risaca stiʼ guidxilayú riʼ para gápatu xhamígutu ti ora maʼ qué guisaca cani nuu tu guicaa laatu lugar ra zabánitu sin gátitu». Historia ni guníʼ Jesús stiʼ mayordomo ni qué ñuni ni jneza que, rucaa ni laanu guiníʼ íquenu. Chiguniti mayordomo que xhiiñaʼ purtiʼ bigaanicabe donda ique gudxite xpueltu xpixuaanaʼ. * Ngue runi bisihuínnibe «nexhená be» o nuu xpiaanibe ne guca xhamígube binni ni zanda gacané laabe ora maʼ guiaanabe sin dxiiñaʼ. ¿Ñee cayabi Jesús ca discípulo stiʼ gúnicaʼ ni cadi jneza para guibánicaʼ lu guidxilayú riʼ la? Coʼ. Dede gúdxibe laacaʼ zaqué nga runi «ca binni zinanda guidxilayú», o ca binni ni qué runi ni ná Dios. Né historia riʼ bisiidiʼ Jesús ti cosa nabé risaca.

5 Nagana ra gudiʼdiʼ mayordomo que. Ne Jesús nanna nagana zaca para stale de ca discípulo stiʼ guidxélacaʼ ni guibaninecaʼ ndaaniʼ guidxilayú ni qué runi ni jneza riʼ. Ngue runi bidiibe conseju riʼ laacaʼ: «Laguiquiiñeʼ ca cosa risaca stiʼ guidxilayú riʼ para gápatu xhamígutu». Ti zaqué, ora maʼ qué guisaca ca cosa que, guicaa Jiobá ne Jesús laacabe «lugar ra zabáni[cabe] sin gáti[cabe]». ¿Xi rizíʼdinu de conseju bidii Jesús riʼ yaʼ?

6. ¿Xiñee rininu cadi gudixhe ique diʼ Dios gúninu negocio?

6 ¿Xiñee guníʼ Jesús «stiʼ guidxilayú riʼ» ca cosa risaca que yaʼ? Qué rusiene diʼ Biblia ni, peru rusihuinni ni cadi gudixhe ique diʼ Dios gúninu negocio. ¿Xiñee rininu zacá yaʼ? Purtiʼ ndaaniʼ jardín ni guyuu Edén que bidii Jiobá stale cosa Adán ne Eva, jma que biaʼ caquiiñecaʼ (Gén. 2:15, 16). Ne dxi bisaba Dios espíritu santu luguiáʼ ca ungidu de primé siglu que guirutiʼ qué niníʼ «sti si ni napa, sínuque sti irá cabe ni» (Hech. 4:32). Profeta Isaías guníʼ zedandá dxi ziechené guiráʼ binni ni gudii Guidxilayú (Is. 25:6-9; 65:21, 22). Laga guedandá dxi ca la? naquiiñeʼ gusihuinni ca xpinni Cristu nuu xpiaanicaʼ né «ca cosa risaca stiʼ guidxilayú» para ganda gápacaʼ ni iquiiñecaʼ ne zaqueca gúnicaʼ stipa pur gusiéchecaʼ Dios.

IQUIIÑENU «CA COSA RISACA STIʼ GUIDXILAYÚ RIʼ» JNEZA

7. ¿Xi rizíʼdinu lu Lucas 16:10-13?

7 (Biindaʼ Lucas 16:10-13). Mayordomo ni bizeeteʼ Jesús lu historia que gupa xhamigu para gacané laa. Peru, Jesús guluu gana ca discípulo stiʼ guyúbicaʼ tu gaca xhamígucaʼ guibáʼ para cadi gusihuínnicaʼ rudxiibacaʼ laca laacaʼ. Ca versículo zeeda jma delante rusihuinni cani ni nuube gusiidibe nga zahuinni pa ruzúʼbanu stiidxaʼ Dios pur modo iquiiñenu «ca cosa risaca stiʼ guidxilayú riʼ».

8, 9. ¿Ximodo caquiiñeʼ caadxi hermanu «ca cosa risaca stiʼ guidxilayú riʼ»?

8 Ti modo zanda guluinu ruzúʼbanu diidxaʼ  nga ra iquiiñenu ca cosa ni nápanu para gacanenu guireeche diidxaʼ lu guidubi Guidxilayú casi guníʼ Jesús (Mat. 24:14). Guidúʼyanu ximodo runi caadxi hermanu ni. Gupa ti dxaapahuiiniʼ de guidxi India ti cajahuiiniʼ ra bisaba bueltu. Dede bisaanabe de niziʼbe juguete stibe. Ora bidxá cajahuiiniʼ que, biʼniʼ donarbe bueltu que para gacanebe guireeche diidxaʼ. Laaca ndaaniʼ guidxi ca, ti hermanu ni napa ti layú ra zuhuaa yaga coco rusihuinni nuu xpiaaniʼ. Laabe bidiibe stale coco ra oficina de traducción stiʼ idioma malayálam. Cumu caquiiñecabe ni ra oficina que la? laabe nabe jma galán gudiibe ni que gudiibe bueltu para sicaʼ ni. Zacaca runi ca hermanu de Grecia, gatigá runi donárcabe aceite de oliva, quesu ne xcaadxi guendaró para familia Betel.

9 Guidúʼyanu ni runi ti hermanu de Sri Lanka ni nabeza gadxé ladu. Cumu nápabe ti yoo ne ti sitiu xquídxibe la? rudiibe cani ca hermanu de raqué para gúnicaʼ reunión ne asamblea, ne para guiaana ca hermanu de tiempu completu. Neca runítibe stale bueltu pur ni rúnibe riʼ, zacá racanebe ca hermanu pobre. Ti lugar ra cadi libre laanu guni predicarnu, riquiiñeʼ ca hermanu lídxicaʼ casi Yoo stiʼ Reinu. Pur nga la? stale precursor ne publicador ni huaxiéʼ napa bueltu nápacaʼ ti lugar ra guidagulisaacaʼ sin quíxecaʼ.

10. ¿Ximodo nga ribeendunu ni galán ora gudiʼnu de ni nápanu?

10 Ca ejemplu riʼ rusihuinni cani ruzuubaʼ ca xpinni Dios diidxaʼ lu «caadxi huiini» si, nga nga modo riquiiñecabe ca cosa material ca, ni huaxiéʼ risaca que ca cosa espiritual (Luc. 16:10). ¿Ximodo ruuyaʼ ca hermanu riʼ ca sacrificiu ni rúnicaʼ para gaca xhamígucaʼ Jiobá yaʼ? Laacabe nánnacabe ti modo guni ganárcabe cosa ni dxandíʼ risaca nga gudiicabe de ni nápacabe (Luc. 16:11). Ti hermana ni maʼ biaa gusaba donación para guireeche stiidxaʼ Reinu lu guidubi Guidxilayú runi sentir maʼ gucuaa ti ndaayaʼ especial lu ca iza ni maʼ gudiʼdiʼ purtiʼ rudii de ni napa. Laabe nabe: «Huayuuyaʼ ra jma gudieeʼ de ca cosa material ni napaʼ, jma randa runeʼ perdonar de guidubi ladxiduáʼ, jma rapaʼ paciencia, rieneʼ ora qué gaca xiixa ni rabeʼ ñaca ne ricaaʼ conseju gudiicabe naa». Xcaadxi hermanu ruuyacaʼ ribeenducaʼ ni galán en sentidu espiritual ora rudiicaʼ de ni nápacaʼ (Sal. 112:5; Prov. 22:9).

11. a) ¿Xiñee rininu ti modo gusihuínninu nuu xpiaaninu nga ora rudiʼnu de ni nápanu? b) ¿Xi ti cosa cayuni xquidxi Dios yanna biaʼca biaʼca? (Biiyaʼ foto ni zeeda ra ruzulú tema riʼ).

11 Sti modo guluinu nuu xpiaaninu né ca cosa ni nápanu nga cadi gunítinu tiempu para gacanenu xcaadxi binni. Nuu hermanu nápacaʼ bueltu peru qué zanda gúnicaʼ serviciu de tiempu completu nin chindézacaʼ sti guidxi. Neca zacá, zanda guidxá tipa ladxidóʼcabe gánnacabe runi apoyárcabe serviciu stiʼ xcaadxi xpinni Cristu né ca donación stícabe (Prov. 19:17). Né ca donación ni rúninu, racanenu para gaca jma publicación ne guireeche cani ra nuu binni, ne racanenu gaca predicar ca lugar jma pobre ra riná stale binni guicaa mensaje zinenu. Ndaaniʼ ca guidxi casi Congo, Madagascar ne Ruanda, stale iza gupa xidé gulí ca hermanu que pa zaziʼcaʼ guendaró para familia sticaʼ o pa  zaziʼcaʼ Biblia para laacaʼ, nuu ndaʼ biaje risaca cani biaʼ riáxacabe ti semana dxiiñaʼ o ti beeu. Peru randa raca ni «biaʼca biaʼca» pur ca donación ni rudii stale hermanu. Pur nga, huayuni traducir organización stiʼ Jiobá Biblia ne huadii tobi tobi guiráʼ cani nuu ndaaniʼ cada familia ne ca binni ni racalaʼdxiʼ gunibiáʼ Dios (biindaʼ 2 Corintios 8:13-15). Zacá la? cásica cani rudii zaqueca cani ricaa zanda gaca xhamígucaʼ Jiobá.

XI GÚNINU PARA GUIXÉLENU BIAʼ GÁNDATIʼ DE CA NEGOCIO NI RUNI BINNI

12. ¿Ximodo bisihuinni Abrahán napa confianza Dios?

12 Sti modo gaca xhamígunu Jiobá nga guixélenu biaʼ gándatiʼ de sistema comercial ne cadi gunítinu tiempu luni ti ganda guyúbinu cani dxandíʼ risaca. Ngapeʼ nga ni biʼniʼ Abrahán, ti hombre ni gupa fe bibani dxiqué. Cumu racaláʼdxibe gaca xhamígube Jiobá la? bizuubabe diidxaʼ, bisaanabe guidxi Ur ne gulézabe ndaaniʼ tienda de campaña (Heb. 11:8-10). Laabe nánnabe de Jiobá nga zeeda cosa ni dxandíʼ risaca. Ngue runi, qué ñuu dxi ñaca aprovecharbe de modo nabánibe que para ñácabe ricu, purtiʼ pa ñúnibe ni nuluiʼbe qué gápabe fe (Gén. 14:22, 23). Gupa si tiempu, gudxi Jesús ti joven ricu gapa fe zaqueca: «Pa qué racalaʼdxu usiaadxa lu nin caadxi la? yeutoo ni napuʼ, ne bidii ni ca pobre ne zapu stale ni risaca ibáʼ. Oraque dananda naa» (Mat. 19:21). Qué ñapa diʼ joven que fe casi gupa Abrahán, peru nuu xcaadxi ni maʼ bisihuinni napa confianza Jiobá.

13. a) ¿Xi gudxi Pablo Timoteo? b) ¿Ximodo zanda chinándanu ni ná principiu riʼ?

13 Sti hombre bisihuinni napa fe nga Timoteo. Pablo ná nácabe «soldadu chaʼhui sti Jesucristu» ne despué gudxi laabe: «Qué zanda gaca tuuxa soldadu ne gapa sti dxiiña tobi si tiru, purti naquiiñe guiaana be para guni be irá ni na xaíque stibe» (2 Tim. 2:3, 4). Tiempu riʼ, ca xpinni Jesús rúnicaʼ stipa pur chinándacaʼ principiu riʼ. Ládecabe nuu jma de ti millón de siervu de tiempu completu. Ca xpinni Cristu rucaanacaʼ ca anunciu stiʼ cani cadoo, ne ca cosa nuu gaxha de laacaʼ ne qué riaandaʼ laacaʼ «ni riguiiñeʼ raca esclavu stiʼ binni ni rutiiñeʼ laa» (Prov. 22:7). Racalaʼdxiʼ Binidxabaʼ gunítinu tiempu ne stipa stinu ra gácanu esclavu stiʼ sistema comercial de yanna riʼ. Nuu tu laa riguiiñeʼ stale bueltu xiixa bancu para siʼ ti yoo, ti carru, quixe saca ti carrera ra universidad o dede para guni ti guendaxheelaʼ né stale luju. Pa qué gápanu cuidadu né ca decisión ni guicaanu la? zándaca stale iza zuzáʼbinu. Pa guluinu nácanu binni nuu xpiaaniʼ, zabaninenu biaʼ nápasinu ne qué zacaanu stiʼ binni para guzáʼbinu ne qué zúninu stale gastu. Zacá zácanu libre para gácanu esclavu stiʼ Dios, cadi stiʼ sistema comercial (1 Tim. 6:10).

14. ¿Xi naquiiñeʼ quixhe íquenu gúninu? Bizeeteʼ ni huayuni caadxi binni.

14 Pa racaláʼdxinu guibáninenu biaʼ nápasinu la? naquiiñeʼ gápanu ca cosa jma risaca ca primeru lu xquendanabáninu. Ti guendaxheelaʼ gúpacaʼ ti negocio ra biʼniʼ ganarcaʼ stale bueltu. Peru laacabe racaláʼdxicabe guibiguetaʼ guni servírcabe de tiempu completu. Ngue runi bitoocabe negocio que, lancha stícabe ne xcaadxi cosa. Ne gunábacabe chigacanécabe lu construcción stiʼ central mundial (Warwick, Nueva York). Nabé especial guca ngue para laacabe, purtiʼ biʼninécabe xiiñicabe ne xpigúdxicabe dxiiñaʼ Betel. Ne stale semana biʼninécabe bixhoze ne jñaa xpigúdxicabe dxiiñaʼ. Ndaaniʼ guidxi Colorado (Estados Unidos), bidxela ti precursora ra guni dxiiñaʼ huaxiéʼ hora daaniʼ ti bancu. Nabé guyuulaʼdxiʼ ca jefe stibe modo rúnibe dxiiñaʼ dede gúdxicaʼ laabe pa zúnibe guidubi dxi ne zaguíxecaʼ laabe chonna biaje jma  de biaʼ riáxabe. Peru bicaanabe dxiiñaʼ que purtiʼ nánnabe pa guicaabe ni maʼ qué zacá íquepebe guni predicarbe. Ndiʼ nga chupa si ejemplu de lade guiráʼ sacrificiu ni runi ca xpinni Jiobá. Pa maʼ gudixhe íquenu quíxhenu Reinu ca primé lu xquendanabáninu la? zusihuínninu rusisácanu amistad ni napanenu Dios ne ca cosa espiritual jma que guiráʼ ni ruluíʼ sistema comercial riʼ laanu.

ORA MAʼ QUÉ GUISACA CA COSA MATERIAL

15. ¿Xii nga ca cosa risaca ni jma ruchátipa ladxidoʼno?

15 Cadi pur si napa binni ca cosa material ca zanda guininu nápabe ndaayaʼ stiʼ Dios. Jiobá riguu ndaayaʼ cani racané binni de guidubi ladxidóʼ (biindaʼ 1 Timoteo 6:17-19). Guidúʼyanu ni bizaaca ti hermana de Italia láʼ Lucia. * Dxi binadiágabe caquiiñeʼ ca hermanu de Albania tu gacané laacaʼ para gaca predicar, gúpabe confianza Jiobá ne yendézabe lugar que lu iza 1993, neca qué gápabe ni guibaninebe. Biziidibe idioma albanés, ne dede dxiqué maʼ gucanebe jma de 60 binni chúʼnisa. Dxandíʼ, cadi guiranu ribeendunu stale cásica hermana ca ra runi predicarnu. Peru intiica gúninu para gacanenu xcaadxi guidxélacaʼ o sacaʼ lu neza ra zacaacaʼ guendanabani, zaca ni para laacaʼ casi ti tesoro ni qué ziuu dxi guinitilú ne zaqueca para laanu (Mat. 6:20).

16. a) ¿Xi chiguizaaca sistema comercial ni nuu yanna riʼ? b) Yanna ra maʼ nánnanu xi chiguizaaca ca cosa risaca stiʼ guidxilayú riʼ, ¿ximodo naquiiñeʼ guidúʼyanu cani?

16 Qué niníʼ diʼ Jesús zándaca maʼ qué zasaca «ca cosa risaca stiʼ guidxilayú riʼ», sínuque ni guniʼbe nga maʼ qué zasaca cani (Luc. 16:9). Lu ca últimu dxi riʼ huaree guniti caadxi bancu ne nuu caadxi guidxi huayapa guendanagana pur gastiʼ bueltu, peru gastiʼ nga né ni chiguizaaca lu Guidxilayú riʼ maʼ cadi candaa. Ziabantaa sistema stiʼ Binidxabaʼ, casi sistema comercial, política ne religión. Profeta Ezequiel ne Sofonías maca guniʼcaʼ gastiʼ qué zasaca oro ne plata, neca gayuaa iza laacani nga ni jma huaquiiñeʼ binni lu negocio stiʼ (Ezeq. 7:19; Sof. 1:18). ¿Ximodo ñuni sentirnu pa maʼ chiguiluxe xquendanabáninu nudiʼnu cuenta bicáʼnanu ca cosa ni dxandíʼ risaca pur cuyúbinu gápanu «ca cosa risaca stiʼ guidxilayú riʼ» yaʼ? Ñándaca ñuni sentirnu casi tobi ni runi dxiiñaʼ guidubi xquendanabani para guni ganar stale bueltu ne despué gudii cuenta cadi dxandíʼ cani (Prov. 18:11). Maʼ qué zasaca ca cosa risaca stiʼ guidxilayú riʼ. Nga runi, cadi gunítinu oportunidad de iquiiñenu cani para gápanu xhamígunu guibáʼ. Intiica gúninu para chuʼnu pur Reinu stiʼ Dios zacané ni laanu para gaca xhamígunu Jiobá jma.

17, 18. ¿Xi cabeza ca xhamigu Dios?

17 Ora maʼ gueeda Reinu stiʼ Dios, guirutiʼ zaguixe renta, guirutiʼ zitiiñe, guirutiʼ zié ra nuu doctor ne guirutiʼ zaquiiñeʼ medicina. Ziuu stale guendaró para binni sin quíxecaʼ. Ziechené familia ni napa Jiobá lu Guidxilayú riʼ ca cosa ni gudii planeta riʼ. Qué zaguu chaahuinu oro, plata nin ca guié sicarú ca, ne qué zaguʼnu xpuéltunu lú cani, sínuque zaquiiñenu cani para guzuchaahuinu. Guiranu zanda gucuinu yoo sicarú de yaga, de guié ne de guiibaʼ ni jma galán. Ne ca xhamígunu zacanecaʼ laanu purtiʼ ziale ni de laacaʼ, cadi pur chitíxenu laacaʼ. Zaquiiñenu guiráʼ ni gudii Guidxilayú riʼ para gacanésaanu.

18 Laacani nga caadxi de ca cosa ni nuu lu herencia nabé risaca chicaa cani gapa xhamigu guibáʼ. Guiráʼ ca xpinni Jiobá ziéchecaʼ stale ora gunadiágacaʼ guiníʼ Jesús ca diidxaʼ riʼ: «Ma guluu Bixhoze ndaaya laatu, yanna latáʼ laicaa ra ma nexhe chaahui para laatu dede ante cha guidxilayú» (Mat. 25:34).

^ párrafo 4 Qué niníʼ diʼ Jesús pa dxandíʼ ngue ni bigaanicabe ique mayordomo que o pa coʼ. Lu diidxaʼ griegu ni bitiixhicabe Lucas 16:1 zanda guiníʼ ni cadi dxandíʼ donda bigaanicabe ique mayordomo que. Lu historia riʼ, qué nusiene diʼ Jesús xiñee guládxicabe mayordomo que, ni jma bisiénebe nga xi biʼniʼ óraque.

^ párrafo 15 Biree historia stiʼ Lucia Moussanett lu ¡Despertad! 22 de junio 2003, yaza 18 dede 22.