Hechos 21:1-40
21 Ka tsʼoʼok túun u chaʼikoʼob k-lukʼleʼ naʼakoʼon tiʼ junpʼéel barcoeʼ ka binoʼon juntaatsʼ tu kaajil Cos. Ka sáaschaj tuláakʼ kʼiineʼ binoʼon Rodas, ka lukʼoʼoneʼ binoʼon tu kaajil Pátara.
2 Ka tsʼoʼok túun k-kaxtik junpʼéel barco ku bin Feniciaeʼ naʼakoʼoneʼ ka joʼopʼ k-bin.
3 Le táan k-binoʼ máanoʼon tu tojil u islail Chipre, tu tojil x-tsʼíik k-kʼab, ka seguernaj k-bin tu tojil Siria. Ka tsʼoʼokeʼ kʼuchoʼon Tiro, tumen tiʼ kun éemsbil kaʼach u kuuch le barcooʼ.
4 Teʼeloʼ máanoʼon k-kaxt le discípuloʼoboʼ ka t-ilaj tuʼux yanoʼobeʼ pʼáatoʼon siete días yiknaloʼob. Chéen baʼaleʼ tsʼaʼab u yojéeltoʼob tumen le espíritu santo baʼax kun úuchul tiʼ Pablo tu kaajil Jerusalénoʼ le oʼolal tu sen aʼaloʼobtiʼ maʼ u peʼechaʼtik le kaajoʼ.+
5 Ka tsʼoʼok u máan le siete díasoʼ jóokʼoʼon utiaʼal k-binbal. Chéen baʼaleʼ tuláakal le sukuʼunoʼoboʼ tu láakʼintoʼonoʼob tak tu jóokʼbal le kaajoʼ, junmúuchʼ yéetel koʼoleloʼob bey xan yéetel mejen paalal. Ka kʼuchoʼon tu jáal le jaʼoʼ xolajoʼoneʼ ka t-beetaj junpʼéel oración.
6 Ka tsʼoʼok k-despedirtikba tiʼ letiʼobeʼ naʼakoʼon teʼ barcooʼ, letiʼob túuneʼ suunajoʼob tu yotochoʼob.
7 Ka tsʼoʼok k-lukʼul tiʼ barco tu kaajil Tiroeʼ binoʼon Tolemaida. Teʼ túunoʼ máanoʼon k-il bix u beel le sukuʼunoʼoboʼ ka pʼáatoʼon junpʼéel kʼiin tu yiknaloʼob.
8 Ka sáaschaj tuláakʼ kʼiineʼ lukʼoʼoneʼ ka binoʼon Cesarea, teʼ túunoʼ ookoʼon tu yotoch Felipe, le máax ku máan u tsikbalt u tʼaan Diosoʼ, ka túun pʼáatoʼoniʼ. Letiʼeʼ juntúul tiʼ le siete máakoʼob+ ku yúuchul tʼaan maʼalob tu yoʼolaloʼoboʼ.
9 Felipeeʼ yaan kaʼach kantúul u hijaʼob ku profetizaroʼob. Le x-chʼúupalaloʼobaʼ maʼ tsʼokaʼan u beeloʼobiʼ.+
10 Ka máan yaʼab kʼiinoʼob tiʼ yanoʼoneʼ juntúul profeta ku kʼaabaʼtik Ágaboeʼ+ lukʼ Judeaeʼ ka éem t-iknal.
11 Le ka kʼuch Ágabo teʼ tuʼux yanoʼonoʼ tu chʼaʼaj u kʼaxnakʼ Pabloeʼ ka tu kʼaxuba, tu kʼaxaj u kʼaboʼob yéetel u yookoʼobeʼ ka tu yaʼalaj: «Le espíritu santooʼ ku yaʼalik beyaʼ: ‹Le máax tiaʼalintik le kʼaxnakʼaʼ bey kun kʼaxbil tumen le judíoʼob tu kaajil Jerusalénoʼ,+ kéen tsʼoʼokkeʼ yaan u kʼubkoʼob tu kʼab le j-táanxel luʼumiloʼoboʼ›».+
12 Ka tsʼoʼok túun k-uʼuyik lelaʼ toʼon yéetel le máaxoʼob yanoʼob teʼeloʼ joʼopʼ k-sen aʼalik tiʼ Pablo maʼ u bin Jerusalén.
13 Letiʼ túuneʼ tu yaʼalaj: «¿Baʼaxten ka wokʼoleʼex yéetel ka beetkeʼex u yaatal u yóol in puksiʼikʼal? Ojéelteʼexeʼ teneʼ in prepararminba, maʼ chéen utiaʼal ka kʼaʼaxkeniʼ, baʼaxeʼ tak utiaʼal ka kíimsaʼaken tu kaajil Jerusalén tu yoʼolal u kʼaabaʼ Yuumtsil Jesús».+
14 Tumen maʼ tu yóotaj u beet le baʼax t-aʼalajtiʼoʼ toʼoneʼ t-aʼalajtiʼ: «Úuchuk baʼax u kʼáat Jéeoba».
15 Ka tsʼoʼok túun u máan le kʼiinoʼobaʼ t-líiʼsakbaeʼ ka joʼopʼ k-bin tu kaajil Jerusalén.
16 Jujuntúul discípuloʼob tiʼ u kaajil Cesareaeʼ binoʼob xan t-éetel utiaʼal ka u bisoʼonoʼob tu yotoch Mnasón teʼ tuʼux ken k-kʼubéentbaoʼ. Letiʼeʼ juntúul úuchben discípulo sijnáal Chipre.
17 Le ka kʼuchoʼon Jerusaléneʼ kʼaʼamoʼon yéetel kiʼimak óolal tumen le sukuʼunoʼoboʼ.
18 Ka sáaschajeʼ Pabloeʼ bin t-éetel u yil Santiago,+ teʼeloʼ tiʼ u muchʼmuba kaʼach tuláakal le ancianoʼoboʼ.
19 Pabloeʼ tu saludartoʼobeʼ ka joʼopʼ u láaj tsikbaltiktiʼob le baʼaxoʼob tu beetaj Dios teʼ tuláakʼ luʼumoʼob tu yoʼolal le baʼax kʼubéentaʼantiʼ ka u tsikbaltoʼ.
20 Le ancianoʼoboʼ ka tsʼoʼok u yuʼubikoʼob lelaʼ káaj u alabarkoʼob Dios, ka tu yaʼaloʼob tiʼ Pablo: «Techeʼ, sukuʼun, tsʼoʼok a wilik bukaʼaj u milesil judíoʼob tsʼoʼok u beetkubaʼob discípuloil tiʼ Jesús, yéetel tuláakloʼobeʼ jach u kʼubmaj u yóoloʼob tiʼ le Leyoʼ.+
21 Chéen baʼaleʼ letiʼobeʼ tsʼoʼok u yuʼubikoʼob u tsikbaltaʼaleʼ techeʼ táan bin a kaʼansik baʼaloʼob ku bin tu contra u Ley Moisés* tiʼ le judíoʼob yanoʼob táanxel luʼumiloʼ. Táan bin a waʼaliktiʼob maʼ u circuncidartik* u paalaloʼob mix u táakpajloʼob tiʼ le jejeláas baʼaxoʼob suuk k-beetik desde úuchjeakiloʼ.+
22 ¿Baʼax túun unaj u beetaʼal yoʼolal leloʼ? Tumen letiʼobeʼ yaan u yojéeltikoʼob tsʼoʼok a kʼuchul.
23 Le oʼolaleʼ beet baʼax ken k-aʼaltech. Ichiloʼoneʼ yaan kantúul xiiboʼob u beetmoʼob junpʼéel voto tiʼ Dios.
24 Bisoʼob ta wéeteleʼ ka a limpiokíintaba tu yéeteloʼob jeʼex u yaʼalik le Leyoʼ, yéetel boʼot u kʼolistaʼal u pooloʼob. Beyoʼ tuláakal máak ken u yojéelt maʼ jaaj le baʼaxoʼob tsikbaltaʼab ta woʼolaloʼ, baʼaxeʼ ka u yiloʼob táan a bisik junpʼéel toj kuxtal yéetel táan a tsʼoʼokbesik baʼax ku yaʼalik le Leyoʼ.+
25 Tiʼ le discípuloʼob yanoʼob táanxel luʼumiloʼ tsʼoʼok k-tsʼíibtiktiʼob le baʼax tsʼoʼok k-chʼaʼtuklikaʼ: ka u náachkuntubaʼob tiʼ baʼaxoʼob kʼubaʼanoʼob tiʼ imagenoʼob,+ tiʼ kʼiʼikʼ,+ tiʼ u bakʼel baʼalcheʼob jichʼaʼan u kaaloʼob*+ bey xan tiʼ núupkʼeban».*+
26 Ka sáaschaj tuláakʼ kʼiineʼ Pabloeʼ bin yéetel le kantúul máakoʼoboʼ ka tu limpiokíintuba tu yéeteloʼob jeʼex u yaʼalik le leyoʼ.+ Tsʼoʼoleʼ ook teʼ templo utiaʼal ka u tsʼáa ojéeltbil baʼax kʼiin ken tsʼoʼokok u limpiokíinkubaʼob yéetel baʼax kʼiin kun kʼubbil le baʼalcheʼ tumen le sacerdote tu yoʼolal cada juntúul tiʼ letiʼoboʼ.
27 Le jach taʼaytak túun u tsʼoʼokol le siete díasoʼ le judíoʼob ku taaloʼob tu luʼumil Asiaoʼ tu yiloʼob Pablo teʼ templooʼ. Letiʼob túuneʼ joʼopʼ u pʼuʼujsikoʼob tuláakal le yaʼabkach máakoʼob tu contraoʼ, ka túun tu machoʼob.
28 Letiʼobeʼ tu yawtoʼob: «¡Xiibeʼex tiʼ u kaajil Israel, áantoʼoneʼexiʼ! Le máakaʼ tuláakal tuʼux táan u máan u kaʼans tiʼ tuláakal máak ka xiʼikoʼob tu contra k-kaajal, tu contra le Ley yaantoʼonoʼ yéetel tu contra le lugaraʼ. Tsʼoʼoleʼ tsʼoʼok xan u yoksik máakoʼob griegoʼob teʼ templooʼ, yéetel tsʼoʼok u mixbaʼalkúuntik le lugar santoaʼ».+
29 Leloʼ tu yaʼaloʼob tumen juntéenjeakeʼ tu yiloʼob táan kaʼach u máan Pablo teʼ kaaj yéetel Trófimooʼ,+ juntúul máak ku taal tu kaajil Éfeso, le oʼolal ku tuklikoʼob kaʼacheʼ tu yoksaj teʼ templooʼ.
30 Tuláakal túun u kajnáaliloʼob le kaajoʼ sen pʼuʼujoʼobeʼ ka binoʼob áalkabil teʼ templooʼ, ka tu machoʼob Pabloeʼ ka tu jíiltaj u jóoʼsoʼob, tu séebaʼanil túuneʼ kʼaʼal u joonajiloʼob le templooʼ.
31 Le táan u yilik u kíimskoʼob Pablooʼ bin aʼalbil tiʼ u comandante* le soldadoʼob jach pʼujaʼan tuláakal u kajnáaliloʼob Jerusalénoʼ.
32 Letiʼ túuneʼ tu séebaʼanil tu chʼaʼaj le soldadoʼob bey xan le máaxoʼob nuʼuktik le soldadoʼoboʼ ka binoʼob áalkabil teʼ tuʼux yaan le máakoʼoboʼ. Le máakoʼoboʼ ka tu yiloʼob le comandante bey xan le soldadoʼoboʼ xuʼul u jatsʼkoʼob Pablo.
33 Ka náatsʼ túun le comandanteoʼ tu beetaj u maʼachal ka tu yaʼalaj ka kʼaʼaxak yéetel kaʼapʼéel cadena.+ Tsʼoʼoleʼ ka joʼopʼ u kʼáatik máax le máakaʼ yéetel baʼax tsʼoʼok u beetik.
34 Chéen baʼaleʼ yaan tiʼ le yaʼabkach máakoʼoboʼ táan kaʼach u kʼaʼam aʼalikoʼob junpʼéel baʼal, uláakʼoʼobeʼ yaanal baʼal. Tumen chéen táan u sakachtʼaanoʼobeʼ le comandanteoʼ maʼ páajchaj u yojéeltik baʼax jach tu jaajil ku yúuchliʼ, ka túun tu yaʼalaj ka bisaʼak Pablo tu cuartel le soldadoʼoboʼ.
35 Chéen baʼaleʼ ka kʼuchoʼob tu escalerail le cuarteloʼ le soldadoʼoboʼ yanchaj tak u chʼúuyik u bisoʼob Pablo, tumen jach táaj pʼujaʼan kaʼach le máakoʼoboʼ,
36 yéetel táan kaʼach u taaloʼob tu paach táan u yawtikoʼob: «¡Kíimsaʼak!».
37 Le jach taʼaytak u yoksaʼal ichil le cuarteloʼ Pabloeʼ tu yaʼalaj tiʼ le comandanteoʼ: «¿Jeʼel wa u páajtal in waʼaliktech junpʼéel baʼaleʼ?». Le comandanteoʼ tu yaʼalaj: «¿Ka tʼaan wa ich griego?
38 ¿Maʼ wa teech le egipcio tu beetaj u líikʼil le máakoʼob tu contra le gobierno maʼ sen úuchjeakiloʼ? ¿Maʼ wa teech bis le 4,000 j-kiimsaj máakoʼob teʼ desiertooʼ?».
39 Pablo túuneʼ tu núukaj: «U jaajileʼ teneʼ judíoen,+ sijnáalen Tarso+ tiʼ u luʼumil Cilicia, in kaajaleʼ junpʼéel kaaj jach kʼaj óolaʼan. Kin much kʼáatiktech ka a chaʼa in tʼaan tu táan le kaajoʼ».
40 Ka tsʼoʼok u yaʼalaʼaltiʼ jeʼel u páajtal u tʼaaneʼ Pabloeʼ waʼalaj teʼ escaleraoʼ ka tu beetaj u kʼab tiʼ le máakoʼoboʼ. Ka xuʼul u yawatoʼobeʼ Pabloeʼ tʼaanaj ich hebreoeʼ+ ka tu yaʼalaj:
Notas
^ Ilawil «U Ley Moisés», página 2586.
^ Ilawil página 2559.
^ Ilawil página 2573.
^ Wa «tiʼ baʼalcheʼob ku kíimsaʼaloʼob maʼ jóoʼsaʼan u kʼiʼikʼeloʼobiʼ».
^ Lelaʼ juntúul máak tsʼaʼan u nuʼukt 1,000 soldadoʼob.
