WOSOPEWE tukusasaka kuti ŵandu ŵane atuwoneje kuti tuli ŵandu ŵambone. Nambope, masiku agano kulosya ndamo ja umbone mtima kuli kwakusawusya. Ligongo lyakwe lili lyakuti ŵandu ŵajinji “ŵanganonyela yambone.” (2 Tim. 3:3) Jemanjaji akusakana malamusi ga Yehofa. Mwamti cakusasala Yehofa kuŵa cambone, jemanjaji akusaciwona kuŵa “cakusakala,” soni cakusasala Yehofa kuŵa cakusakala, jemanjaji akusaciwona kuŵa “cambone.” (Yes. 5:20) Nambosoni yikusaŵaga yakusawusya ligongo lya yindu yatwatesile munyuma soni ungali umlama wetu. M’yoyo mpaka tulipikaneje mpela mlongo jwine lina lyakwe Anne. * Atamose kuti jwamtumicile Yehofa kwa yaka yejinji, jwalakwe jwasasile kuti, “Yaliji yakusawusya kukulupilila kuti mpaka mbe mundu jwambone.”

Yakusangalasya yili yakuti wosopewe mpaka tukusye ndamoji. Msimu weswela ukusatukamucisya kuti tuŵe ŵambone mtima soni uli wamacili kupunda yakusawusya yatukusasimana nayo soni ungali umlama wetu. Kwende tukambilane ngopolelo ja umbone mtima soni yampaka tutende kuti tujendelecele kulosya ndamoji.

Umbone mtima ukusapwatikapo kuŵa mundu jwandamo syambone soni jwangali kalikose kakulemwa. Mundu jwambone mtima ndaŵi syosope akusapata matala gakwakamucisya ŵane soni akusiŵatendela yindu yambone.

Ana patukwatendela yindu yambone ŵamwiŵasa mwetu soni acimjetu, nikuti tugambeje kulecela papopo? Kusala yisyene pangali mundu jwamlama, soni Baibulo jikusasala kuti “pa cilambo capasi pangali mundu jwakusatenda yindu yambonepe ni ngalemwa.” (Jwak. 7:20) Ndumetume Paulo jwasasile mwangapita mumbali kuti, “Ngumanyilila kuti mwa une mwangatama cindu cambone.” (Alo. 7:18) M’yoyo, naga tukusaka kwendelecela kukusya ndamo ja umbone mtima, tukusosekwa kulijiganya kutyocela kwa Yehofa Msyene umbone mtima.

Yehofa jwatamilikasisye malamusi gambone. Pakwamba ya jwalakwe, tukusaŵalanga kuti, “Ŵalakwe ali ŵambone, akusatenda yambone, anjiganye malamusi gawo.” (Sal. 119:68) Kwende tukambilane mbali siŵili syakwamba umbone mtima wa Yehofa syasisasile mu lilembali.

Yehofa ali jwambone. Umbone mtima jili mbali ja umundu wa Yehofa. Kwende tuganicisye yayatendekwe pa ndaŵi jiŵaŵecete Yehofa ni Mose kuti, “Cinjimlosya umbone wangu wosope.” Yehofa ŵamlosisye Mose ucimbicimbi wakwe kupwatikapo umbone mtima wakwe. Mose jwapikene maloŵe ga Yehofa gakuti, “Yehofa, Yehofa, Mlungu jwacanasa, jwangatumbila citema, jwacinonyelo cisyesyene soni jwa usyesyene. Jwakulosya cinonyelo cisyesyene kwa ŵandu masawusande, jwakululucila yakulepela soni yakulemwa yawo, nambo jwangamleka jwalemwisye ngampa cilango.” (Eks. 33:19; 34:6, 7, NW) Yeleyi yikulosya kuti Yehofa ali jwambone mtima m’matala gosope. Atamose kuti Yesu jwaliji mundu jwambone nambo jwaŵecete kuti, “Pakuti jwambone jika ni Mlungupe.”—Luk. 18:19.

Masengo ga Yehofa gali gambone. Yindu yiliyose yakusatenda Yehofa yili yambone. “Ambuje ali ŵambone kwa wosope, ni akusayitendela canasa ya cijumi yosope yiŵayipanganyisye.” (Sal. 145:9) Ligongo lyakuti Yehofa ali jwambone mtima soni jwangali lusagu, jwalakwe akusiŵapa ŵandu umi soni yindu yakusosecela kuti ajendelecele kutama ni umi. (Mase. 14:17)  Akusalosyasoni kuti ali jwambone mtima pakutukululucila yakulemwa yetu. Jwamasalimo jwalembile kuti, “Ŵalakwe Ambuje ali ŵambone, ni ŵakululucila ŵandu ŵawo.” (Sal. 86:5) Mpaka tuŵe ŵakusimicisya kuti “jwalakwejo jwangakanya yindu yambone kwa ŵele ŵakwenda mwagoloka.”—Sal. 84:11.

Yehofa jwatupanganyisye m’ciwanicisyo cakwe. M’yoyo, mpaka tukombole kuŵa mundu jwambone soni kutenda yindu yambone. (Gen. 1:27) Nambope, Maloŵe ga Mlungu gakusigalimbikasya ŵakutumicila ŵakwe kuti “alijiganyeje kutenda yindu yambone.” (Yes. 1:17) Nambo ana mpaka tulijiganye camtuli kutenda yindu yambone? Kwende tukambilane matala gatatu gampaka tutendele yeleyi.

Litala lyandanda, tumŵendeje Yehofa kuti atupe msimu weswela. Msimu weswela ukusiwakamucisya Aklistu kuŵa ŵandu ŵambone m’meso mwa Mlungu. (Aga. 5:22) Yisyene, msimu wa Mlungu mpaka utukamucisye kuti tunonyeleje yindu yambone ni kuyiŵengaga yindu yakusakala. (Alo. 12:9) Baibulo jikusasala kuti Yehofa mpaka atupe “macili gakutenda ni kuŵeceta yindu yambone ndaŵi syosope.” 2 Ates. 2:16, 17.

Litala lyaŵili, tuŵalanjeje maloŵe ga Mlungu. Patukuŵalanga Baibulo, Yehofa akusaŵaga ali mkutujiganya “litala lili lyose lyambone” soni kutukosecelesya pa “masengo gambone galigose.” (Mis. 2:9; 2 Tim. 3: 17) Patukuŵalanga Baibulo ni kuganicisyaga mwakusokoka yatukuŵalangayo, tukusagumbasya mumtima mwetu yindu yambone yakwamba Yehofa soni cakulinga cakwe. Tukusaŵaga tuli mkonjecesya mulibokosi mwamuli yindu ya mtengo wapenani yatuciyikamulicisya masengo pandaŵi jine.—Luk. 6:45; Aef. 5:9.

Litala lyatatu, tulinjejelinjeje “kuya yayili yambone.” (3 Yoh. 11, NW) M’Baibulo mwana yisyasyo yampaka tuyikuyeje. Cisyasyo cambone mnope cili ca Yehofa soni Yesu. Nambo mpaka tuganicisyejesoni ya ŵandu ŵane ŵaŵamanyikaga ni ndamo jambone. Ŵandu ŵaŵili mwine ŵampaka twaganicisye mpaka aŵe Tabita soni Banaba. (Mase. 9:36; 11:22-24) Patukulijiganya Baibulo mpaka tupindule mnope ni yisyasyo yawo yambone. Pandaŵiji tuloleje yindu yaŵatesile jemanjaji pakwakamucisya ŵandu ŵane. Tuganicisyeje yampaka tutende pakwakamucisya ŵandu ŵamwiŵasa mwetu soni ŵa mumpingo mwetu. Nambosoni tuloleje yindu yambone yayamtendecele Tabita soni Banaba ligongo lyakwatendela ŵane yindu yambone. M’yoyo patukuganicisya yisyasyo ya jemanjaji mpaka yitukamucisye.

Mpaka tuganicisyesoni ya ŵandu ŵane ŵa masiku agano ŵakusatenda yindu yambone. Mwacisyasyo, mpaka tuganicisye ya masengo gakusakamula acakulungwa ŵa mumpingo mwakulimbicila ‘ŵakusanonyela yambone.’ Nambosoni tuganicisyeje ya alongo ŵakulupicika ŵele kupitila muyitendo soni kaŵecete kawo ali “ŵakwiganya yayili yambone.” (Tit. 1:8; 2:3) Mlongo jwine, lina lyakwe Roslyn jwasasile kuti, “Mjangu akusatenda yiliyose yakomboleka kuti ŵakamucisye ŵandu ŵane mumpingo. Jwalakwe akusaganicisya  mwayiŵelele yindu paumi wa ŵandu ŵane ni akusiŵapaga mituka jangadula kapena akusiŵakamucisya m’matala gane. Ngusinam’wona kuŵa mundu jwambone.”

Yehofa akusiŵalimbikasya ŵandu ŵakwe kuti “atendeje yindu yayili yambone.” (Amo. 5:14) Patukutenda yindu yambone, tucitanda kunonyela malamusi gakwe soni tucindelecela kutenda yindu yambone.

Kuti tuŵe mundu jwambone ngatukusosekwa kwatendela ŵane yindu yapenani mnope kapena kwapa mituka jakudula. Kuti tupikanicisye yeleyi, kwende tuwanicisye m’yi. Kuti mbeju jikule cenene ngatukusagamba kwitila mesi gejinji ndaŵi jimo nambo tukusajitilila panandipanandi kwandaŵi jelewu. Mwakulandana ni yeleyi, naga ndaŵi ni katema tukusitwakamucisya ŵane ni yindu yatukwete atamose yiwonece kuŵa yamwanamwana, yikusalosya kuti tuli mundu jwambone mtima.

Baibulo jikusatulimbikasya kuti tuŵeje “ŵakoseka” soni “ŵacile” kutenda yindu yambone. (2 Tim. 2:21, NW; Tit. 3:1) Naga tukusatenda lung’wanu ni yindu yayikwatendecela ŵandu ŵane tucipata matala ngakumsangalasya mjetu ni yindu “yambone, kuti pakutenda m’yoyo alimbikasye cikulupi ca jwalakwejo.” (Alo. 15:2) Yeleyi yikupwatikapo kwapa yindu yine yatukwete. (Mis. 3:27) Mpaka tumŵilanjile mundu jwine kumangwetu kuti tulye najo cakulya kapena gamba kwika kukunguluka kuti tulimbikasyane. Naga pana mundu jwine jwatukummanyilila kuti akulwala, mpaka tumlembele kacikalata, kwawula kukumlola kapena kumjimbila foni. Yisyene, mpaka tupate matala gamajinji gakuŵecetela “maloŵe ago pego gagali gambone ni kulimbikasya mitima mpela mugakusosecela, kuti acimjenu ŵakugapikana maloŵego apindule nago.”—Aef. 4:29.

Mpela Yehofa, tukusasaka kwatendela yambone ŵandu wosope. M’yoyo, tukusitwatendela ŵandu ŵane yindu mwangali lusagu. Litala limo lyampaka twatendele ŵane yindu mwangali lusagu mpela mwakusatendela Yehofa, lili kulalicila ngani syambone sya Ucimwene kwa wosope. Mpela muŵatulamulile Yesu, tukusitwatendela ŵandu yambone atamose ŵakusatuŵenga. (Luk. 6:27) Nganikuŵa kulemwa kwatendela ŵane yambone, ligongo “pangali lilamusi lyakulekasya yeleyi.” (Aga. 5:22, 23) Patukutenda yambone atamose ŵandu pakututendela yangali cilungamo kapena patusimene ni yakusawusya, mpaka tutendekasye kuti ŵane awumanyilile usyesyene soni acimbicisye Mlungu.—1 Pet. 3:16, 17.

Baibulo jikusasala kuti, “Mundu jwambone tacipocela mbote ja masengo gakwe.” (Mis. 14:14) Ana tukusapata mbote syamtuli? Naga tukwatendela ŵandu ŵane yindu yambone, jemanjaji taciŵa ŵakusacilila kututendelasoni yindu yambone. (Mis. 14:22) Atamose kuti ŵandu ŵane ngakusatutendela yindu yambone, nambope tukusosekwa kwendelecela kwatendela yambone. Yakuyicisya yakwe cacicenga ni kututendelaga yindu yambone.—Alo. 12:20.

Patukutenda yindu yambone ni kuleka kutenda yindu yakusakala, yikusatukamucisyagasoni m’weji. Kwende tulole yaŵasimene nayo Nancy. Jwalakwe jwasasile kuti, “Panakulaga natendaga yindu yaciwawa, yakusakala soni pangali jwanam’cimbicisyaga. Nambope, panatandite kulijiganya ni kukamulicisyaga masengo malamusi ga Mlungu, natandite kulipikana kuŵa jwakusangalala. Sambano ngusatenda yindu mwakulicimbicisya.”

Ligongo lyekulungwa lyalikusatutendekasya kusya ndamo ja umbone mtima lili lyakuti kutenda yeleyo kukusamsangalasya Yehofa. Atamose kuti ŵandu ŵane ngaŵa mkuyiwona yindu yambone yatukusatenda, nambo Yehofa akusayiwona. Jwalakwe akusamanyilila ndaŵi jilijose patukutenda soni ganicisya yindu yambone. (Aef. 6:7, 8) Ana jwalakwe akusatupa mbote jamtuli? Baibulo jikusasala kuti, “Mundu jwambone akusapata upile kutyocela kwa Ambuje.” (Mis. 12:2) M’yoyo, kwende tujendelecele kukusya ndamo ja umbone mtima. Yehofa akusatusalila kuti “tipaciŵa lumbili, ucimbicimbi ni mtendele yakutyocela kwa Mlungu pa ŵandu wosope ŵakutenda yindu yambone.”—Alo. 2:10.