Masengo ga Ŵandumetume 11:1-30
11 Sambano ŵandumetume soni abale ŵaŵaliji ku Yudeya ŵapikene kuti ŵandu ŵamitundu jine nombenawo apochele maloŵe ga Mlungu.
2 Myoyo Petulo paŵapite ku Yelusalemu, ŵandu ŵakulimbichila ngani ja kuwumbala ŵatandite kulimbana najo pa maloŵe.
3 Ŵatite, “Mmwejo mwajinjile m’nyumba sya ŵandu ŵangawumbala ni kulyaga nawo.”
4 Pelepo Petulo ŵatandite kwasalila yosope yayatendekwe. Ŵatite,
5 “Une naliji mu msinda wa Yopa soni naliji mkupopela. Kaneko Mlungu ŵandosisye chindu chakuwoneka mpela chinguwo chekulungwa chili chikamulidwe m’makona mcheche chili mkutyochela kwinani ni kuchituluchisyaga panaliji une.
6 Panalolechesyaga pachinguwopo, nayiweni yinyama yangongolo mcheche ya pachilambo chapasi, yinyama yamwitinji, majoka ni achipulundwe soni yijuni yamwinani.
7 Kaneko napikene maloŵe gakusalila une kuti, ‘Petulo, mnyakuche, msikite chinyama chimo ni mlye!’
8 Nambo une najanjile kuti, ‘Iyayi Ambuje, ligongo une nganindyeje chilichose changaswejela mwakamulana ni chilamusi.’
9 Napikenesoni ali mkusalila kuti, ‘Mleche kuyisala yindu yayiswejesye Mlungu kuti yili yangaswejela.’
10 Maloŵego gapikanichesoni ulendo watatu, soni ndaŵi jijojo chinguwo chila chajigalidwe kwawula kwinani.
11 Ndaŵi jijojo, kwayiche achalume ŵatatu ku nyumba jitwatamaga. Jemanjaji ŵatumidwe kutyochela ku Kaisaleya.
12 Pelepo msimu weswela wasalile kuti njawule yimpepe ni ŵanduwo soni kuti ngakayichila ata panandi. Abale 6 ŵali apaŵa ŵapite nawosoni, mwamti twajinjile m’nyumba ja Koneliyo.
13 “Jwalakwe ŵatusalile kuti ŵaliweni lilayika lili lijimi m’nyumba jakwe ni kumsalila kuti, ‘Mwatume ŵandu ku Yopa kuti akamjigale Simoni jwakolanjidwa kuti Petulo.
14 Jwalakwe chachimsalila yindu yele yichimkulupusya mmwejo yimpepe ni liŵasa lyenu lyosope.’
15 Nambo panatandite kuŵecheta, msimu weswela wayiche pa ŵanduwo mpela muwayichile pa m’weji pandanda pene.
16 Pelepo nakumbuchile maloŵe gaŵatusalilaga Ambuje gala gakuti, ‘Yohane ŵaliji mkubatisya ni mesi, nambo jemanja chimchibatisidwa ni msimu weswela.’
17 Naga Mlungu ŵapeleche mtuka walulele kwa jemanjaji, welesoni ŵatupele m’weji ŵatwakulupilile mwa Ambuje Yesu Klistu, sambano une ndili ŵani kuti namlekasye Mlungu kutenda yakusaka?”
18 Jemanjajo paŵapikene yeleyi, ŵalesile kulimbana najo,* soni ŵamchimbichisye Mlungu. Ŵatite, “Pelepatu Mlungu ŵapele upile ŵandu ŵamitundu jine kuti agalawuche ni kupata umi.”
19 Sambano ŵandu ŵele ŵaŵabalalikangene ligongo lya kulagasidwa kwakwatandile pa Sitefano ŵatisile mpaka ŵayiche ku Foinike, ŵane ku Kupulo, soni ku Antiyokeya. Nambo jemanjaji ŵalalichilaga maloŵe kwa Ayudape.
20 Nambope, achalume ŵane mwa jemanjaji ŵakutyochela ku Kupulo ni ku Kulene ŵayiche ku Antiyokeya ni kutanda kulalichila ngani syambone sya Ambuje Yesu kwa ŵandu ŵakuŵecheta Chigiliki.
21 Pelepasoni mkono wa Yehofa waliji pa jemanjajo, mwamti ŵandu ŵajinji ŵaŵele ŵakulupilila soni ŵagalawuchile kwa Ambuje.
22 Ngani jeleji japikaniche ku mpingo wa ku Yelusalemu mwamti mpingo wa kweleko wamtumisye Balanaba ku Antiyokeya.
23 Jwalakwe paŵayiche ni kuwuwona umbone mtima wekulungwa wa Mlungu, jwasangalele mnope soni jwatandite kwalimbikasya kuti akaleka kuŵa ŵakulipeleka kwa Ambuje ni mtima wosope.
24 Balanaba jwaliji mundu jwambone, jwagumbala ni msimu weswela, soni jwakulupichika. Ligongo lya yeleyi, ŵandu ŵajinji ŵakulupilile mwa Ambuje.
25 Kaneko jwalakwe ŵapite ku Taliso kukumsosasosa Saulo.
26 Paŵampatile, ŵayiche najo ku Antiyokeya. Kwa chaka chamtundu jemanjaji ŵasonganaga ni mpingo wa kweleko soni ŵajiganyisye ŵandu ŵajinji. Ku Antiyokeya ni kwele, mwakulongoleledwa ni Mlungu, ŵakulijiganya ŵatandite kukolanjidwa kuti Aklistu.
27 M’masiku gelego ŵakulochesya ŵakutyochela ku Yelusalemu ŵapite ku Antiyokeya.
28 Jumo mwa jemanjaji, lina lyakwe Agabo, mwakulongoleledwa ni msimu weswela jwasasile kuti sala jekulungwa jikwika pachilambo chosope chapasi. Sala jeleji jayiche nditu mundaŵi ja Kilaudiyo.
29 Myoyo ŵakulijiganyawo, jwalijose mwakamulana ni yindu yaŵakwete, ŵasimichisye mumtima yakutumisya chikamuchisyo kwa ŵakulupilila achimjawo ŵakutama ku Yudeya.
30 Jemanjaji ŵatesile nditu yeleyi. Ŵatumisye chikamuchisyocho kwa achakulungwa kupitila mwa Balanaba ni Saulo.
Maloŵe Gamwiŵanda
^ Maloŵe gakwe gandanda, “ŵagambile kutama jii!”
