MBALI 17
Yesu Akwiganya Pakwamba ya Ucimwene wa Mlungu
Yesu akwajiganya ŵakulijiganya ŵakwe yindu yejinji, nambo ngani jekulungwa jakwiganya jikuŵa jakwamba ya Ucimwene wa Mlungu
ANA masengo ga Yesu pacilambo capasi galiji gatuli? Jwalakwe msyene ŵaŵecete kuti: “Une ngwenela kulalicila Ngani Syambone sya Ucimwene wa Mlungu . . . , pakuŵa ni yele Mlungu yiŵandumile kuyitenda.” (Luka 4:43) Kwende tulole yiŵajiganyisye Yesu pakwamba ya Ucimwene welewu, wawaliji ngani jekulungwa pa kulalicila kwakwe.
1. Yesu ŵaliji jwakuti caciŵa Mwenye. Yesu ŵasasile mwangasisa kuti jwalakwe ŵaliji Masiya juŵamlocesye kala. (Yohane 4:25, 26) Ŵalosisyesoni kuti jwalakwe ŵaliji Mwenye juŵawonece kwa jwakulocesya Daniyele mu sagamisi. Yesu ŵasalile ŵakulijiganya ŵakwe kuti jwalakwejo lisiku line cacitama “pacitengu cakwe ca lumbili,” soni kuti ŵakulijiganya ŵakwewo cacitamasoni m’yitengu ya ucimwene. (Matayo 19:28) Likuga lya ŵakulamulilali ŵalikolasile kuti ‘kampingo kakwe ka ngondolo,’ soni ŵaŵecete kuti ŵakwete “ngondolo sine” syanganisiŵa mu likuga lyeleli.—Luka 12:32; Yohane 10:16.
2. Mu Ucimwene wa Mlungu muciŵa cilungamo cisyesyene. Yesu ŵalosisye kuti Ucimwenewo ucimasya kusoŵa cilungamo kwekulungwa, mwakuswejesya lina lya Yehofa Mlungu ni kulityocesya cipongwe caŵele Satana mkulitendela kutandila pa kupanduka kwa mu Edeni. (Matayo 6:9, 10) Yesu ŵalosisyesoni ungali lusagu, mwakwajiganya wosope mwangasagula, kutandila acalume, acakongwe, ŵakusicila ni ŵakulaga ŵakwe. Atamose kuti masengo gakwe kusyesyene galiji kwajiganya Ayisalayeli, jwalakwe ŵakamucisyesoni Asamaliya, ŵa ngosyo sine kapena kuti ŵanganaŵa Ayuda. Jwalakwe nganalosya lusagu lulilose, atamose kuti ndamo jalusaguji ni jiŵakwete acimlongola ŵa dini ŵa pandaŵijo.
3. Ucimwene wa Mlungu nganiwuŵajilwa kuŵa wa cilambo acino. Yesu ŵapali pandaŵi jajaliji jakusawusya mnope pangani jandale. Cilambo caŵatamagaci caliji pasi pa ulamusi wa cilambo cine. Nambo ŵandu paŵalinjile kumtendekasya kwinjilila mu yandale ya moŵago, jwalakwe ŵakanile. (Yohane 6:14, 15) Yesu ŵamsalile jwandale jwine kuti: “Ucimwene wangu nganiuŵa wa cilambo capasi cino.” (Yohane 18:36) Ŵasalilesoni ŵakumkuya ŵakwe kuti: “Jemanja Nganim’ŵa ŵacilambo capasi.” (Yohane 15:19) Jwalakwe nganiŵakunda ŵakulijiganya ŵakwewo kamulicisya masengo yida yangondo, atamose paŵasakaga kumcinjilicisya nayo.—Matayo 26:51, 52.
“Yesu ŵaliji mkwendajenda m’misinda ni m’misi, acilalicilaga ni kwasalila ŵandu ngani syambone sya ucimwene wa Mlungu.”—Luka 8:1
4. Ulamusi wa Klistu uciŵa wacinonyelo. Yesu ŵaŵecete kuti cacapumusya ŵandu, mwakwamacisya yakusawusya yawo. (Matayo 11:28-30) Jwalakwe ŵatesile mwakamulana ni maloŵe gakwega. Ŵaŵecete maloŵe gacinonyelo ni gakamucisya pa kutyosya nganisyo, pakutama cenene ni ŵane, pakamucisya kuti mundu akaŵa jwakunonyela yipanje, soni kuti aŵeje jwakusengwa. (Matayo, macaputala 5-7) Ligongo lyakuti ŵaliji jwacinonyelo, ŵandu nganamjogopaga. Ŵandu ŵaliwose, atamose ŵakulaga mnope, ŵayikaga kwa jwalakwe, ligongo ŵakulupililaga kuti cakapocele cenene, soni cakalosye cinonyelo. Pelepatu yikulosya kuti Yesu caciŵa Jwakulamulila jwambone mnope!
Lyapalisoni litala line lyamacili mnope liŵakamulicisye masengo Yesu pakwiganya ya Ucimwene wa Mlungu. Ŵatesile yakusimonjesya yejinji. Ligongo cici ŵatesile yeleyi? Kwende tulole.
