ŴANDUMETUME mcece ŵa Yesu ŵam’wusisye jwalakwe pacisyepela pakwamba ya maloŵe gaŵaŵecete jwalakwe, paŵatemi pa litumbi lya ma Olifi, mwakulolegana ni nyumba jakupopelela ja ku Yelusalemu. Yesu ŵaliji ali agambile kuŵeceta kwene kuti nyumba jakupopelela ja mu Yelusalemu jicijonanjikwa. Soni pandaŵi jine ŵasalile ya ‘kumala kwa ukoto wa yindu.’ (Matayo 13:40, 49) Ŵandumetume ŵakweŵa ŵawusisye kuti: ‘Tuciyiwonela cici kuti ndaŵi jikwanile jakuŵapo kwawo, soni jakumala kwa ukoto wa yindu?’—Matayo 24:3.

Yesu pakwanga, ŵasasile yayicitendekwa Yelusalemu ali asigele panandi konanjikwa. Nambo maloŵe gakwego nganigaŵa gakwamba ya Yelusalemupe. Kulocesya kwakweko kwaliji kwakuti kucikwanilicikwasoni pacilambo cosope capasi. Yesu ŵalocesye yakutendekwa yakulekanganalekangana ya pacilambo cosope capasi yayiciŵa cimanyilo. Cimanyilo celeci caliji cakuti cicamanyisya ŵandu ŵa pacilambo capasi kuti kuŵapo kwa Yesu mpela Mwenye kutandite. Mkuŵeceta kwine, cimanyiloci cicilosya kuti Yehofa Mlungu am’ŵisile Yesu kuŵa Mwenye jwa Ucimwene wa Umasiya uŵawulocesye kalakala. Cimanyiloci cicilosya kuti Ucimwenewu usigele panandi kumasya kusakala, ni kwikasya mtunjelele usyesyene kwa ŵandu. Yindu yiŵalocesye Yesu yeleyi nikuti yicilosya moŵa gambesi ga ukoto wakala wa yindu, mpela ukoto waupali moŵa agano wa dini, wa ndale, soni wa mkamulano wa ŵandu, ni kutanda kwa ukoto wasambano.

Yesu ŵaŵecete kuti pandaŵi jakuŵapo kwakwe mu Ucimwene kwinani, pacipagwa ngondo syakumenyana pasikati pa yilambo, paciŵa kusoŵa kwa yakulya, yicitendekwaga yisicinya yekulungwakulungwa, soni yilwele ni yindu yangalumbana yicitupa. Ŵakulijiganya ŵasyesyene ŵa Yesu cacilalicilaga ngani syambone sya Ucimwene wa Mlungu pacilambo cosope capasi. Yakutendekwa yosopeyi yicimalila pa “yipwetesi yekulungwa” yayiciŵa mkaniyitendekweje citandilile.—Matayo 24:21.

Ana ŵakumkuya Yesu akamanyilile catuli kuti yipwetesiyi yiŵandicile? Yesu ŵaŵecete kuti: “Mlijiganye lijiganyo lya mkuju.” (Matayo 24:32) Kawonece ka masamba ga mkuju kakusalosya kuti cuku ciŵandicile. Mwakamulana ni yeleyi, kutendekwa pandaŵi jimo kwa yosope yiŵaŵecete Yesu kuciŵa cimanyilo cangasoŵa cakuti mbesi jiŵandicile. Pangali jucacimanyilila lisiku ni ndaŵi jakutanda kwa yipwetesi yekulungwayi, akaŵe Yehofa jikape basi. Ni ligongo lyakwe Yesu ŵalimbikasisye ŵakulijiganya ŵakwe kuti: “Sambano mlolecesye, mlindilile pakuti ngamkumanyilila yandaŵijo.”—Maliko 13:33.

—Nganiji jityocele pa Matayo macaputala 24 ni 25; Maliko caputala 13; Luka caputala 21.