Ngani sya Mateyu 25:1-46
25 “Umwenye wakwinani mpaka tuwulandanye ni achiŵali* 10 ŵaŵajigele nyali syawo+ ni kwawula kuti akamchingamile mlombela.+
2 Achiŵali msano ŵaliji ŵakuloŵela, nambo msano ŵanewo ŵaliji ŵakalamuka.*+
3 Achiŵali ŵakuloŵelawo ŵajigele nyali syawo nambo nganajigala mawuta gapambali.
4 Nambo achiŵali ŵakalamuka ŵala ŵajigele nyali syawo soni mawuta gapambali m’mabotolo gawo.
5 Ligongo lyakuti mlombelajo jwachelewaga kwika, achiŵali wosopewo ŵatandite kugwesela kaneko ŵagonile.
6 Nambo pasikati pa chilo kwapikaniche kugumila kuti, ‘Mlombela jula akwika! Akopoche kuti akamchingamile!’
7 Pelepo achiŵali wosope ŵajimwiche ni kutanda kutaga mawuta nyali syawo ni kusipambaga.+
8 Sambano ŵakuloŵela ŵala ŵasalile ŵakalamukawo kuti, ‘Atugayile mawuta gawo, ligongo nyali syetu sisigele panandi kusima.’
9 Pelepo achiŵali ŵakalamuka ŵala ŵajanjile kuti, ‘Mwine ngagatukwanila naga tukwagayila jemanja. Myoyo ajawule kwa ŵakusumisya kuti akasume gawo.’
10 Paŵajawulaga kuti akasume mawutago, mlombelajo jwayiche. Achiŵali ŵaŵaliji ŵakoseche ŵala ŵajinjile ni jwalakwejo m’nyumba jakutendela pwando,*+ kaneko litanga lyawugalidwe.
11 Kaneko achiŵali ŵane ŵala ŵayiche, ni kutanda kuŵecheta kuti, ‘Ambuje, Ambuje, atuwugulile!’+
12 Jwalakwejo ŵajanjile kuti, ‘Nditu, une ngangummanyilila jemanja.’
13 “Myoyosoni jemanja mŵeje mesope,+ ligongo ngamkumanyilila lisiku kapena ndaŵi jakwe.+
14 “Umwenye wakwinani ulisoni mpela mundu juŵasakaga kwawula ku chilambo chine, juŵaŵilasile achikapolo ŵakwe ni kwalechela chipanje chakwe.+
15 Jwalakwejo ŵampele jumo mbiya sya silifa syakwana matalente* msano, jwine matalente gaŵili, soni jwine talente jimo, jwalijose mwakamulana ni lunda lwakwe. Kaneko mundujo jwanyakwiche ulendo wakwawula ku chilambo chine.
16 Ndaŵi jijojo kapolo juŵapochele matalente msano jula jwapite kuja kugatendela malonda ni jwapatile matalente ganesoni msano.
17 Nombenajo juŵapochele matalente gaŵili jula jwapatile matalente ganesoni gaŵili.
18 Nambo kapolo juŵapochele mbiya sya silifa syakwana talente jimo jula jwapite kukusisolela pasi mbiya sya ambuje ŵakwesyo.
19 “Pali papite ndaŵi jelewu, ambuje ŵa achikapolo ŵala ŵayiche kuti alole yaŵatesile jemanjajo ni mbiya sila.+
20 Myoyo kapolo juŵapochele matalente msano jula jwayiche ni matalente ganesoni msano. Ni jwaŵechete kuti, ‘Ambuje, wawo ŵambele matalente msano. Alole, mbatile ganesoni msano.’+
21 Ambuje ŵakwe ŵamjanjile kuti, ‘Mtesile chenene, mmwe mli kapolo jwambone soni jwakulupichika! Pakuŵa mwakulupichiche pa yindu yamnono, chinamŵiche kuti mloleleje yindu yejinji.+ Sambano msangalale pampepe ni une ambuje ŵenu.’+
22 Kaneko jwayiche kapolo juŵapochele matalente gaŵili jula ni jwaŵechete kuti, ‘Ambuje, wawo ŵambele matalente gaŵili. Alole, mbatile ganesoni gaŵili.’+
23 Ambuje ŵakwewo ŵamjanjile kuti, ‘Mtesile chenene, mmwe mli kapolo jwambone soni jwakulupichika! Pakuŵa mwakulupichiche pa yindu yamnono, chinamŵiche kuti mloleleje yindu yejinji. Sambano msangalale pampepe ni une ambuje ŵenu.’
24 “Pambesi pakwe, kapolo juŵapochele mbiya sya silifa syakwana talente jimo jula jwayiche ni kuŵecheta kuti, ‘Ambuje, namanyililaga kuti wawo ali mundu jwakusawusya. Akusagungula panganapanda wawojo soni akusajigala yagungula yanganayikamulila masengo.+
25 Myoyo natesile woga, ni napite kukusisolela pasi. Mbiya syawo asi ajigale.’
26 Ambuje ŵakwewo ŵamsalile jwalakwejo kuti, ‘Mmwe mli kapolo jwakusakala soni jwaulesi. Ngati mwamanyililaga kuti ngusagungula panganimbanda unejo soni kuti ngusajigala yagungula yanganinayikamulila masengo?
27 Sambano uli nganimsunjisya mbiya syangusyo kwa ŵakusunga mbiya kuti pakwika chimbochele pampepe ni syakonjechesya?’
28 “Myoyo ambujewo ŵasalile ŵamasengo ŵakwe kuti, ‘Amsumule talentejo, ni ampe jwele jwakwete matalente 10.+
29 Pakuŵa jwalijose jwakwete yindu, chachipochela yejinji, soni yichitupa mnope. Nambo jwalijose jwanganakola, chachimsumula atamose yindu yamnono yakwete.+
30 Soni amponye kapolo jwangali mateju kusa kuchipi. Kweleko ni kuchakalile soni kulumanya meno.’
31 “Mwanache jwa mundu+ pachachiyika mu uchimbichimbi wakwe pampepe ni malayika gosope,+ chachitama pa mpando wakwe wauchimbichimbi.
32 Pandaŵiji mitundu josope ja ŵandu chachijisonganganya pameso pakwe, soni jwalakwejo chachilekanganya ŵandu, mpela mwakusatendela m’busa* pakulekanganya ngondolo ni mbusi.
33 Jwalakwejo chachiŵika ngondolo+ kumkono wakwe wamlyo, nambo mbusi kumchiji.+
34 “Kaneko Mwenye chachasalila ŵali kumlyo kwakwe kuti, ‘Myiche akuno jemanja ŵele Atati ŵangu ampele upile, mpochele Umwenye waŵamlinganyichisye kutyochela paŵachitamilikasisye chilambo.*
35 Ligongo pajangwete sala, jemanja mwambele yakulya, soni pajangwete njota, mwambele mesi gakumwa. Panaliji mlendo, jemanja mwambochele m’nyumba syenu.+
36 Panaliji jwangawala,* jemanja mwambwechiche.+ Panaliji mkulwala, jemanja mwasamalilaga, soni panaliji mundende, jemanja mwayiche kukundola.’+
37 Kaneko ŵakulungamawo chachimjanga jwalakwejo kuti, ‘Ambuje, ana twaweni chakachi wawo ali ni sala m’we ni kwapa yakulya, kapena ali ni njota ni kwapa mesi gakumwa?+
38 Ana twaweni chakachi ali mlendo m’we ni kwapochela m’nyumba syetu, kapena ali ŵangawala ni kwawecha?
39 Ana twaweni chakachi wawo ali mkulwala kapena ali mundende m’we ni kwika kukwalola?’
40 Mwenyewo chachajanga kuti, ‘Nditu ngumsalichisya jemanja kuti, chilichose chimwamtendele jumo mwa achalongo achimjangu ŵakutulukaŵa, mwandendelesoni une.’+
41 “Kaneko chachasalila ŵali kumchiji kwakwe kuti, ‘Mtyoche apa+ jemanja ŵatembeleledwe.* Mjawule ku moto wangamala,*+ kwele kuchachimponya Satana ni malayika gakwe.+
42 Ligongo pajangwete sala, jemanja nganimumba yakulya, soni pajangwete njota, nganimumba mesi gakumwa.
43 Panaliji mlendo, jemanja nganimumbochela m’nyumba syenu. Panaliji jwangawala, jemanja nganimumbwecha. Panaliji mkulwala, soni panaliji mundende, jemanja nganimusamalilaga.’
44 Jemanjajisoni chachimjanga jwalakwejo kuti, ‘Ambuje, ana twaweni chakachi wawo ali ni sala, ali ni njota, ali mlendo, ali ŵangawala, ali mkulwala kapenasoni ali mundende m’we ni ngatumichila?’
45 Kaneko chachajanga kuti, ‘Nditu ngumsalichisya jemanja kuti, ligongo lyakuti nganimumtendela yeleyi jumo mwa achalongo achimjangu ŵakutulukaŵa, nganimundendelasoni une.’+
46 Jemanjaji chachiwa mwamti ngasasimanikwasoni mpaka kalakala,+ nambo ŵakulungama chachitama ni umi kwa ndaŵi syosope.”+
Maloŵe Gamwiŵanda
^ Kapena kuti “asikana.”
^ Kapena kuti “ŵalunda.”
^ Ŵane akusati “chindimba.”
^ Talente jimo ja Chigiliki jasitopaga makilogalamu 20.4. Alole Yakumbesi B14.
^ Ŵane akusati “mkuchinga.”
^ Pelepa akwamba ndaŵi jiŵapagwile ŵanache ŵa Adamu ni Hawa.
^ Liloŵe lya Chigiliki lya pelepa lyangagopolela kuti ngawala chilichose. Nambo likusagopolela kuti ngawala yakuwala yakwanila.
^ Ŵane akusati “ŵalweseche.”
^ Pelepa akugopolela kuti pachachiwulajidwa ngasajimukasoni. Alole maloŵe gakuti “Gehena” pambali jakuti, Kugopolela kwa Maloŵe.
