Ngani sya Mateyu 24:1-51
-
CHIMANYISYO CHA KUŴAPO KWA KLISTU (1-51)
24 Sambano Yesu paŵatyokaga ku nyumba ja Mlungu, ŵakulijiganya ŵakwe ŵayiche kwa jwalakwe kuti amlosye muŵajitaŵile nyumbajo.
2 Nambo jwalakwe ŵasalile jemanjajo kuti, “Ngati mkuyiwona yindu yosopeyi? Nditu ngumsalichisya kuti, maganga gamkugawonaga chachigagwichisya pasi soni pangali liganga atamose limo lyalichiŵasoni penani pa liganga lijakwe.”+
3 Paŵatemi pa Litumbi lya Maolifi, ŵakulijiganya ŵakwe ŵamsimene jwalakwe pambali ni kumwusya kuti, “Atusalile, ana yindu yeleyi yichitendekwa chakachi, soni ana chimanyisyo cha kuŵapo* kwawo+ soni cha mbesi ja ndaŵi* ajino chichiŵa chichi?”+
4 Yesu ŵajanjile jemanjajo kuti, “Msamale kuti jwalijose akamlambusya.+
5 Pakuŵa ŵajinji chachiyika mu lina lyangu ni chachiŵechetaga kuti, ‘Klistu jula ni une,’ mwamti chachalambusya ŵandu ŵajinji.+
6 Chimchipikana masegwe ga ngondo chapakuŵandika soni ngani syakwamba ngondo. Mkasimtenda woga ni yeleyi, pakuŵa yindu yeleyi yikusosekwa kutendekwa, nambo mbesi jichiŵa mkanijiŵe kwika.+
7 “Pakuŵa mtundu uchijimuchilana ni mtundu ujakwe soni umwenye ni umwenye ujakwe.+ Kuchiŵa sala+ soni yisichinya* m’malo gakulekanganalekangana.+
8 Yindu yosopeyi yichiŵa kutanda kwa yakusawusya mpela mwayikusaŵela ni yakupweteka ya pakuŵeleka.
9 “Kaneko ŵandu chachimpeleka jemanja kuti amlagasye+ soni chachimwulaga.+ Mitundu josope jichiŵengana ni jemanja ligongo lya lina lyangu.+
10 Nambosoni ŵajinji chachijasa chikulupi chawo, mwamti chachapeleka achimjawo kuti awulajidwe soni chachiŵenganaga.
11 Kuchiŵa ŵakulochesya ŵaunami ŵajinji soni chachalambusya ŵandu ŵajinji.+
12 Soni ligongo lya kutupa kwa ungapikanila malamusi, chinonyelo cha ŵandu ŵajinji chichinandipa.
13 Nambo mundu juchachipilila mpaka pambesi chachikulupuka.+
14 Soni ngani syambone asi syakwamba ya Umwenye sichilalichidwa pachilambo chosope chapasi kuti uŵe umboni kwa ŵandu ŵamitundu josope,+ kaneko mbesi jichiyika.
15 “Sambano patimchichiwona chindu chakunyalaya soni chakonanga chaŵachikolasile jwakulochesya Daniyele, chili chijimi pa malo geswela+ (jwakuŵalanga chamanyilile),
16 pelepo jwalijose jwali ku Yudeya chatande kutilila kumatumbi.+
17 Jwalijose jwali penani pa nyumba* akasatuluka ni kwinjila m’nyumba mwakwe kuti akajigale katundu,
18 soni jwalijose jwali kumigunda akasawujila ku nyumba kuti akajigale chakuwala.
19 Yichiŵa yakogoya kwa achakongwe ŵachachikola msigo soni ŵakonjesya ŵanache m’masiku gelego!
20 Mpitilisye kupopela kuti ndaŵi jakutilajo ngasijiŵa jakusisima kapena pa lisiku lya Sabata.
21 Ligongo pandaŵijo, kuchiŵa yakusawusya yekulungwa+ yanganiyitendekweje chipanganyichisye chilambo mpaka apano, soni ngasiyitendekwasoni.+
22 Kusala yisyene, yikaŵe kuti masikugo ngasagajipiya, pangali mundu jwakakulupwiche. Nambo ligongo lya ŵakusagulidwawo masikugo chachigajipiya.+
23 “Myoyo, naga jwine akumsalila jemanja kuti, ‘Alole, Klistu jula ali akuno,’+ kapena kuti, ‘Ali ako!’ mkasimkulupilila yeleyo.+
24 Pakuŵa kuchiŵa ŵandu ŵakulambuchisya kuti ali Klistu soni kuchiŵa ŵakulochesya ŵaunami.+ Jemanjaji chachitenda yimanyisyo yekulungwa soni yakusimonjesya ni chakulinga chakuti, naga kwakomboleka, ŵalambusye+ atamose ŵakusagulidwawo.
25 Nambo une namkalamwisye chilepe jemanja.
26 Myoyo, naga ŵandu chamsalile jemanja kuti, ‘Jamani, ali ku chipululu,’ mkasimjawula kweleko, soni naga chamsalile kuti, ‘Jamani, ali m’yipinda,’ mkasimkulupilila yeleyo.+
27 Pakuŵa mpela mwayikusaŵela kuti njasi pajimesisye kungopokolyuŵa jikusawonechela mpaka kungapililolyuŵa, myoyosoni ni mwakuchiŵela kuŵapo* kwa Mwanache jwa mundu.+
28 Kulikose kwachiwilile chindu,* yimbanga yikusasongangana kukoko.+
29 “Payichigamba kumala yakusawusya ya m’masiku gelego, lyuŵa lichitenda chipi,+ mwesi ngasiwuŵala, ndondwa sichigwa kutyochela kwinani, soni yindu yamachili yakwinani yichitenganyika.+
30 Kaneko chimanyisyo cha Mwanache jwa mundu chichiwoneka kwinani, mwamti mitundu josope ja pachilambo chapasi jichiliputa pamtima ligongo lya chanasa.+ Kaneko jemanjajo chachimwona Mwanache jwa mundu+ ali mkwika m’mawunde ni machili soni uchimbichimbi wekulungwa.+
31 Ni kulila kwekulungwa kwa lipenga, jwalakwe chachitumisya malayika gakwe, soni gachasonganganya ŵakusagulidwa ŵakwe kutyochela ku mbali syosope sya chilambo, kutyochela ku mbali jine ja kwinani mpaka ku mbali jine.+
32 “Sambano mlijiganye kutyochela ku chiwanichisyo achi cha chitela cha mkuju: Pachitandite kusipuka nyambi soni kusipuka masamba, mkusamanyilila kuti chuku chiŵandichile.+
33 Mwakulandana ni yeleyi, jemanjasoni pachimchiyiwona yindu yosopeyi, chimmanyilile kuti jwalakwejo ali pakuŵandika, pa mlango pasyesyene.+
34 Nditu ngumsalichisya jemanja kuti m’bado* awu ngasiwumala wosope mpaka yindu yosopeyi yili yitendekwe.
35 Kwinani soni chilambo chapasi yichityoka, nambo maloŵe gangu gachitama mpaka kalakala.+
36 “Nambo pakwamba ya lisikulyo ni ndaŵi jakwe pangali jwakumanyilila,+ chinga malayika gakwinani kapena Mwanache, nambo Atatipe basi.+
37 Pakuŵa mpela mugaŵelele masiku ga Nowa,+ ni mwayichiŵelasoni pandaŵi ja kuŵapo* kwa Mwanache jwa mundu.+
38 M’masiku gelego Chigumula mkanichiyiche, ŵandu ŵaliji mkulya soni kumwa, achalume soni achakongwe ŵaliji mkulombela, mpaka pa lisiku lyele Nowa ŵajinjile m’chombo,+
39 mwamti ŵanduwo nganayikosya yindu yayatendekwaga pandaŵijo mpaka Chigumula chayiche ni kwapyajila wosopewo.+ Ni mwayichiŵelasoni pandaŵi ja kuŵapo* kwa Mwanache jwa mundu.
40 Pandaŵijo achalume ŵaŵili chachiŵa mumgunda. Jumo chachimjigala, jwinejo chachimleka.
41 Achakongwe ŵaŵili chachiŵa ali mkusyaga tiligu, jumo chachimjigala, jwinejo chachimleka.+
42 Myoyo mŵeje mesope ligongo ngamkumanyilila lisiku lyachachiyika Ambuje ŵenu.+
43 “Nambo jemanja mmanyilile kuti naga msyenenyumba ali ajimanyi ndaŵi jakwika jwawiyi,+ mpaka aŵe mesope soni nganaŵa akundile kuti jwawiyijo aposokole nyumbajo ni kwinjila.+
44 Pa ligongo lyeleli, jemanjasoni mŵeje ŵakoseka,+ ligongo Mwanache jwa mundu chachiyika pandaŵi jele ngamkujiganichisya.
45 “Ana ŵani kusyesyene jwali kapolo jwakulupichika ni jwalunda jwele ambuje ŵakwe ŵamŵisile kuti ŵaloleleje ŵamasengo ŵa panyumba jawo, ni kwapaga yakulya pandaŵi jakwe?+
46 Kapolo jwelejo chachiŵa jwakusangalala naga pakwika ambuje ŵakwe chachimsimana ali mkutenda yeleyo.+
47 Nditu ngumsalichisya jemanja kuti, ambuje ŵakwewo chachimŵika jwalakwejo kuti aloleleje yindu yawo yosope.
48 “Nambo naga kapolojo akuŵa jwakusakala, ni kuŵechetaga mumtima mwakwe kuti, ‘Ambuje ŵangu akuchelewa,’+
49 ni akutanda kwaputa achikapolo achimjakwe soni kulya ni kumwaga pampepe ni ŵandu ŵakolelwa ŵasyesyene,
50 ambuje ŵa kapolojo chachiyika pa lisiku lyele jwalakwejo ngakulijembecheya soni pandaŵi jakuti ngakujimanyilila.+
51 Ambuje ŵakwewo chachimpa chilango* chakogoya mnope soni chachimponya kumalo ga ŵandu ŵachinyengo. Kweleko ni chakalile soni kulumanya meno.+
Maloŵe Gamwiŵanda
^ Alole mbali jakuti, Kugopolela kwa Maloŵe.
^ Alole mbali jakuti, Kugopolela kwa Maloŵe.
^ Ŵane akusati “yisukunya; yifomelesi.”
^ Nyumba syejinji syakala syakolaga msakasa wafulati wesyasyajile pele ŵandu ŵatendelaga yindu yakulekanganalekangana.
^ Alole mbali jakuti, Kugopolela kwa Maloŵe.
^ Liloŵe lyeleli mu Chigiliki likusasala ya mtembo kapena chinyama chewe.
^ Ŵane akusati “mpago.”
^ Alole mbali jakuti, Kugopolela kwa Maloŵe.
^ Alole mbali jakuti, Kugopolela kwa Maloŵe.
^ Ŵane akusati “chamuko.”
