Ngani sya Mateyu 5:1-48
-
KULALICHILA KWA PETUMBI (1-48)
-
Yesu akutanda kwiganya petumbi (1, 2)
-
Yindu 9 yakumtendekasya mundu kuŵa jwaupile (3-12)
-
Njete soni lilanguka (13-16)
-
Yesu jwayiche kuti akwanilisye Chilamusi (17-20)
-
Maloŵe pakwamba ya kutumbila (21-26), chikululu (27-30), kumasya ulombela (31, 32), kulumbila (33-37), kuwuchisya (38-42), kwanonyela adani (43-48)
-
5 Yesu paŵajiweni gulu ja ŵandu, jwakwesile panandi mwitumbi ni kutama pasi. Ali atemi myoyo, ŵakulijiganya ŵakwe ŵayiche kwa jwalakwe.
2 Kaneko jwalakwe ŵatandite kuŵecheta ni kwiganyaga kuti:
3 “Ŵana upile ŵandu ŵakusamanyilila kuti akusosekwa Mlungu kuti ŵalongoleleje,*+ ligongo Umwenye wakwinani uli wawo.
4 “Ŵana upile ŵandu ŵakulila, ligongo chachamyalasya.+
5 “Ŵana upile ŵandu ŵali ŵakufasa,*+ ligongo chachipochela chilambo chapasi.+
6 “Ŵana upile ŵandu ŵajakwete sala soni njota+ ja chilungamo, ligongo chachijikuta.*+
7 “Ŵana upile ŵandu ŵakusiŵatendela ŵane chanasa,+ ligongo chachitendeledwa chanasa.
8 “Ŵana upile ŵandu ŵamtima weswela,+ ligongo chachimwona Mlungu.
9 “Ŵana upile ŵandu ŵakusayikasya mtendele,*+ ligongo chachakolanga kuti ali ŵanache ŵa Mlungu.
10 “Ŵana upile ŵandu ŵakulagasidwa ligongo lya chilungamo,+ pakuŵa Umwenye wakwinani uli wawo.
11 “Mkwete upile jemanja ŵandu pakumnyosya,+ kumlagasya+ soni kumlambuchisya yakusakala ya mtundu uliwose ligongo lya une.+
12 Msangalale mnope,+ ligongo mbote* jenu+ jili jekulungwa kwinani, pakuŵa mwelemu ni muŵalagachisye ŵakulochesya ŵaŵapali jemanja mkanimpagwe.+
13 “Jemanja mli njete+ ja chilambo chapasi. Nambo naga njete jikumala machili gakwe, ana machili gakwego mpaka gawujilesoni chamtuli? Njetejo nganijiŵa jikamwile masengo galigose nambo mpaka jisosekwe kujijasa kusa+ kuti ŵandu ajipondeponde.
14 “Jemanja mli lilanguka lya chilambo.+ Msinda nganiwuŵa usisiche naga uli petumbi.
15 Ŵandu papambile nyali, ŵangajijigala ni kujiwunichila ni lukalala,* nambo akusajiŵika pa chakuŵikapo nyali, soni jikusamulichila wosope ŵali m’nyumba.+
16 Myoyosoni jemanja mlosyeje lilanguka lyenu pameso pa ŵandu,+ kuti ŵanduwo aloleje masengo genu gambone+ ni kwachimbichisya Atati ŵenu ŵali kwinani.+
17 “Mkaganisyaga kuti nayiche kukumasya Chilamusi kapena yakulemba ya ŵakulochesya. Nganimbika kukumasya yeleyi, nambo kukukwanilisya.+
18 Nditu ngumsalichisya kuti kwinani soni chilambo chapasi mpaka yityoche mwangasawusya kulekangana ni kuti kachilembo kamwana mnope kapena kambali kamwana mnope ka chilembo katyoche m’Chilamusi mkaniyikwanilichikwe yindu yosope.+
19 Myoyo jwalijose jwakukasa limo mwa malamusi gamwanaga, soni kwajiganya ŵandu ŵane kutendasoni iyoyo, ngasaŵajilwa Umwenye wakwinani. Nambo jwakusagakuya malamusi soni kwajiganya ŵane, jwelejo tachiŵajilwa Umwenye wakwinani.
20 Pakuŵa ngumsalichisya kuti naga chilungamo chenu ngachikupunda cha alembi ni Afalisi,+ ngasimŵajilwa ata panandi kwinjila mu Umwenye wakwinani.+
21 “Jemanja mwapikene kuti ŵandu ŵakala ŵasalile kuti, ‘Mkawulaga mundu.+ Jwalijose jwakuwulaga mundu chachiŵa kuti apalamwile magambo ga ku luŵala lwamagambo.’+
22 Nambo une ngumsalila jemanja kuti jwalijose jwakupitilisya kumtumbilila*+ mlongomjakwe, chachiŵa kuti apalamwile magambo ga ku luŵala lwamagambo. Soni jwalijose jwakumŵechetela mlongomjakwe maloŵe gachipongwe, chachiŵa kuti apalamwile magambo ga ku Luŵala Lwekulungwa Lwamagambo. Nambo jwalijose jwakumkolanga mlongomjakwe kuti ‘Mmwe chisilu changali mate,’ chachiŵajilwa kumponya ku Gehena* jwakolela moto.+
23 “Naga myiche ni mtuka wenu pamalo gakupelechela mbopesi+ ni pamli papopo, mkukumbuchila kuti mkwete ligongo ni mlongomjenu,
24 mleche mtukawo pamalo gakupelechela mbopesigo. Ni mjawule, mkajilane kaje ni mlongomjenujo, kaneko myichesoni ni kupeleka mtuka wenuwo.+
25 “Mjanguyeje kumasya ngani ni mjenu jwakumjimba magambo pakumjawusya ku luŵala lwamagambo ni chakulinga chakuti mjenujo akampeleka mmwejo kwa jwakulamula, soni kuti jwakulamulajo akampeleka kwa msilikali jwa ku luŵala lwamagambo ni kumponya mundende.+
26 Nditu ngumsalichisya, ngasimkopokamo mpaka mli mpeleche kambiya kenu kakumalisya.*
27 “Jemanja mwapikene kuti ŵatite, ‘Mkatenda chikululu.’*+
28 Nambo une ngumsalila jemanja kuti jwalijose jwakumlolechesya jwamkongwe+ mpaka kumkumbila atesile najo kala chikululu* mumtima mwakwe.+
29 Sambano, naga liso lyenu lyakumlyo likumlemwekasya, mlikolotole ni kulijasa.+ Pakuŵa kuli kwambone kwasa chiŵalo chenu chimpepe kulekangana ni kuti chilu chenu chosope akachiponye mu Gehena.*+
30 Myoyosoni, naga mkono wenu wamlyo ukumlemwekasya, mwukate ni kuwujasa.+ Pakuŵa kuli kwambone kwasa chiŵalo chenu chimpepe kulekangana ni kuti chilu chenu chosope akachiponye mu Gehena.*+
31 “Nambosoni ŵatite, ‘Jwamlume jwalijose jwakumasya ulombela ni ŵamkwakwe, ŵapeje ŵamkwakwewo chikalata chakumachisya ulombela.’+
32 Nambope, une ngumsalila jemanja kuti jwamlume jwalijose jwakwaleka ŵamkwakwe, ngaŵaga pa ligongo lyakuti ŵamkwakwewo atesile chikululu,* nikuti mpaka ŵatendekasye ŵamkwakwewo kutenda chikululu,* soni jwalijose jwakumlomba jwamkongwejo atesile chikululu.*+
33 “Jemanja mwapikenesoni kuti ŵandu ŵakala ŵasalile kuti, ‘Mkalumbilaga ni ngakwanilisya,+ nambo mkwanilisyeje yamlumbile kwa Yehofa.’*+
34 Nambope, une ngumsalila jemanja kuti, mkalumbilaga+ pakukolanga kwinani, pakuŵa ni kwawuli mpando wa Mlungu,
35 kapena kukolanga chilambo chapasi, pakuŵa ni pakusaŵika sajo* syakwe,+ kapenasoni kukolanga Yelusalemu, pakuŵa uli msinda wa Mwenye jwamkulungwa.+
36 Mkalumbilaga pakukolanga mtwe wenu, pakuŵa nganimŵa mkombwele kuchenga luwumbo lwenu lumo kuti luŵe lweswela kapena lwepiliwu.
37 Nambo pamtite kuti ‘Elo’ jiŵeje elo, soni pamtite kuti ‘Iyayi’ jiŵeje iyayi,+ pakuŵa yiliyose yakonjechesya pelepa yili yakutyochela kwa jwakusakalajo.+
38 “Jemanja mwapikene kuti ŵatite, ‘Liso kulipila liso soni lino kulipila lino.’+
39 Nambope, une ngumsalila kuti, mkasimumwuchisya mundu jwakusakala, nambo jwalijose jwakumputa likofi pa lijeje lyenu lyakumlyo, mumgalawuchisyesoni linelyo.+
40 Soni naga mundu akusaka kumjigalila ku luŵala lwamagambo kuti akamsumule malaja genu gamkati, mumpesoni mkanjo wenu.+
41 Soni naga mundu jwaulamusi akumlamula kuti mumnyakulile katundu pa lutando lwa kilomita jimo,* mpaka mumnyakulile pa lutando lwa makilomita gaŵili.
42 Mundu pamŵendile chindu mumpeje, soni mkasimumkanya jwalijose jwakusaka kukongola* chindu kwa mmwejo.+
43 “Jemanja mwapikene kuti ŵatite, ‘Mumnonyeleje mjenu+ soni mumŵenjeje mdani* jwenu.’
44 Nambope, une ngumsalila jemanja kuti, mpitilisye kwanonyela adani ŵenu+ soni kwapopelela ŵakumlagasya,+
45 kuti mlosye kuti mli ŵanache ŵa Atati ŵenu ŵali kwinani,+ pakuŵa akusaŵalisya lyuŵa pa ŵakusakala ni ŵambone ŵakwe soni akusagwisya wula pa ŵakulungama ni ŵangalungama ŵakwe.+
46 Pakuŵa naga mkwanonyela ŵelepewo ŵakusamnonyela, ana chimchipata mbote jamtuli?+ Ana yeleyo ngaŵa ni yakusatendasoni ŵakomesya msongo?
47 Soni naga mkusimwakomasya achalongo achimjenupe, ana chipali chilichose chachilendo chamkutenda? Ana yeleyo ngaŵa ni yakusatendasoni ŵandu ŵamitundu jine?
48 Myoyo mkusosekwa kuŵa ŵamlama* mpela mwaŵelele Atati ŵenu ŵakwinani ŵali ŵamlama.+
Maloŵe Gamwiŵanda
^ Kapena kuti “ŵandu ŵakusaŵenda Mlungu kuti ŵape msimu;” “ŵandu ŵakusamanyilila kuti ali ŵakulaga mwausimu.”
^ Kapena kuti “ŵakuwusimana mtima.”
^ Kapena kuti “chachijikutila.”
^ Kapena kuti “ŵakusaŵa pamtendele ni ŵane.”
^ Ŵane akusati “mboto.”
^ Ŵane akusati “chitundu; lidengu.”
^ Kapena kuti “kumpila mtima.”
^ Gelega galiji malo gakochela yiswani gagaliji kusa kwa msinda wa Yelusalemu. Alole mbali jakuti, Kugopolela kwa Maloŵe.
^ Mu Chigiliki ŵatiga, “kwadilasi jakumalisya.” Alole Yakumbesi B14.
^ Mu Chigiliki akusati, moi·kheiʹa. Alole mbali jakuti, Kugopolela kwa Maloŵe.
^ Mu Chigiliki akusati, moi·kheiʹa. Alole mbali jakuti, Kugopolela kwa Maloŵe.
^ Alole mbali jakuti, Kugopolela kwa Maloŵe.
^ Alole mbali jakuti, Kugopolela kwa Maloŵe.
^ Mu Chigiliki akusati, por·neiˈa. Alole mbali jakuti, Kugopolela kwa Maloŵe.
^ Mu Chigiliki akusati, moi·kheiʹa. Alole mbali jakuti, Kugopolela kwa Maloŵe.
^ Mu Chigiliki akusati, moi·kheiʹa. Alole mbali jakuti, Kugopolela kwa Maloŵe.
^ Alole Yakumbesi A5.
^ Ŵane akusati “makawu.”
^ Mu Chigiliki ŵatiga, “mayilosi.” Alole mbali jakuti, Kugopolela kwa Maloŵe.
^ Ngongole jakwe jangaŵika kapenani pakuwusya.
^ Ŵane akusati “mmagongo.”
^ Kapena kuti “ŵakwanila.” Kugopolela kuti, kola chinonyelo chakwanila.
