MLUNGU mwapanandipanandi ŵajendelecele kwasalila kwacacityocela Masiya, soni masengo gacacitenda. Alole yisyasyo yakuyicisyayi:

Mlungu ŵamsalile Abulahamu kuti Masiya jwali “mbeju” jacilanga, cacipagwa kutyocela kwa ŵanace ŵakwe. “Nipo mitundu josope ja ŵandu ja pacilambo capasi, tijicipata upile kupitila mwa yisukulu [mbeju, NW] yenu, ligongo mmwejo mgapikene maloŵe gangu.”—Genesis 22:18.

Mlungu ŵagombelecesye cilanga caŵampele Abulahamu kuti: “Tinjilocesya kuti tiyitendece yosope yinatite m’cilanga canalumbilile baba ŵenu Abulahamu.. . . Mitundu josope ja pacilambo capasi jicipata upile kupitila mwa yisukulu [mbeju, NW] yenu.’”—Genesis 26:3, 4.

Ayisalayeli ali asigele panandi kwinjila M’cilambo Cacilanga, Musa ŵawusalile mtunduwo kuti: “Yehofa Mlungu jwenu cacapa jemanja jwakulocesya mpela une, kutyocela pasikati pawo, kutyocela kwa acanasi ŵawo, jemanja akusosekwa kumpikanila.”—Deuteronomo 18:15.

“Cinjipagwikasya mbeju jenu panyuma penu, jacijityocela mciwunu mwenu, ni cinjiwutamalikasya mwakulimba ucimwene wakwe. . . . Citengu cenu caucimwene cicitamilicika kwangamala.”—2 Samueli 7:12, 16.

“Une cinjim’ŵika kuŵa mwanace jwandanda kupagwa, soni mwenye jekulungwa pa acayimwene wosope ŵa pacilambo capasi. Cinjimlosya kunong’a mtima kwangu kwangamala mpaka kalakala, soni cilanga canamsalile ngasicijonasika. Ni cinjitamilikasya mbeju jakwe kwangamala, soni citengu cakwe caucimwene cicitama kwa masiku gejinji mpela masiku gakwinani.”—Salimo 89:27-29.

“‘Cinjimsipukacisya Daudi litunjika lyacilungamo’ . . . , pakuŵa Yehofa asasile kuti, ‘M’nyumba ja Daudi ngasimusoŵa mundu jwakutama pacitengu caucimwene ca nyumba ja Ayisalayeli.’”—Yeremiya 33:15, 17.

“Mwa jwalakwe ukuŵajilwa kutamilicika msimu wa Yehofa, msimu walunda ni wakupikanicisya, msimu wa camuko ni wamacili, msimu waumanyilisi ni wakogopa Yehofa . . . Soni mwakulungamika akuŵajilwa kwalamula ŵali ŵakulaga, soni mu umbone akuŵajilwa kupeleka camuko m’malo mwa ŵakulinandiya ŵa pacilambo capasi. . . . Atamose mitundu jine ja ŵandu jicigalawucila kwa jwalakwe kuti ŵalongolele.”—Yesaya 11:1, 2, 4, 10.

“Mmweji Betelehemu Efulata, mli msinda wamwana mnope mwati ngaŵa mkum’ŵalanjila  mwa umo wa misinda ja mtundu wa Yuda. Nambope kutyocela mwa mmwejo mucikopoka mundu jwacaciŵa jwakulamula mu Yisalayeli, jwacacitenda lisosa lyangu. Jwele munduju aŵele ali apali kutandila ndaŵi syapandanda, aŵele ali apali kutandila masiku gakalakaka.”—Mika 5:2 [5:1, TNK].

“Pana milungu 70 jajiŵisile .  . . Kutandila pa kupikanika kwa maloŵe gakuti akalinganye ni kutaŵasoni Yelusalemu mpaka ndaŵi ja Mlongola Masiya, paciŵa milungu 7, nambosoni milungu 62. . . . Pambesi pa milungu 62 Masiya cacim’wulaga, soni ngasaleka kalikose. Likuga lya ngondo lya mlongola jwakwisyajo licijonanga msindawo, soni malo gapajika. . . . Nipo paciŵa ngondo mpaka kumbesi.” (Danieli 9:24-26) M’yoyo, ŵasasile mkanipaŵe kuti Masiya caciwonecela Nyumba Jakulambilila Jaŵili mkanijijonasice.

“Milungu 70” jikwimila yaka 490. Yakayi yatandile mu 455 B.C.E. M’cakaci Mwenye ja Pelesiya Alitasasita ŵamkundile Nehemiya kuti akalinganyesoni ni kutaŵa Yelusalemu. Milungu 69 “mpaka ndaŵi ja Mlongola Masiya” jamalile mu 29 C.E. a

Yesaya ŵalocesye kuti Masiya cacimkana, “ŵamkatile m’cilambo ca ŵandu ŵacijumi,” soni umi wakwe uciŵa mpela “mbopesi ja ulemwa.” Jwalakwejo “cacitendekasya kuti ŵandu ŵajinji aŵe ŵakulungama, nipo cacitwicila yakulemwa yawo.” (Yesaya 52:13–53:12; Levitiko 7:1) Jwalakwe cacipeleka mbopesi kuti “amasye ulemwa, soni asiŵe cakulemwa.”—Danieli 9:24.

Masiya paŵapelece mbopesi jamnama, Mlungu nganasakasoni mbopesi sine. Ni ligongo lyakwe Mlungu ŵakundile kuti nyumba jakulambilila ajijonanje, soni kupeleka mbopesi kumale.