ULI ukumu wa boma jilijose kulimbikasya malamusi. Mpela Mwenye ja boma ja Mlungu, Masiya cacitenda yeleyi. “Kasigele kandaŵi panondi, ŵakutenda yakusakala cacimala. Elo, cimcasosasosa paŵatamaga, nambo ngasimwawona. Nambo ŵakulinondiya cacapa cilambo capasi. Nipo cacisangalala ni mtunjelele wejinji.”—Salimo 37:10, 11.

Mlungu cacikwanilisya cilanga cakwe cakupanganya “kwinani kwasambano,” kugopolela boma jakulungama jajicilamulila “cilambo capasi casambano.” (Yesaya 65:17) Majali ga ulamusi wa Masiya ngagasigajawula kwa Ayisalayelipe, nambo ku “mitundu josope,” mpela yaŵatite Yehofa pakumsalila Abulahamu. (Yesaya 2:2, 3; Genesis 22:18) Ucimwene wa Mlungu kupitila mwa Masiya, ucijanga cenene kwa wosope pa yakusisya yayipali pa lina lya Mlungu ni lisosa lyakwe.

Ŵandu caciwona kwanilicikwa kwa cilanga ca Mlungu caŵaŵecete kupitila mwa Yesaya cakuti, “Jwalakwe cacilamula pasikati pa ŵakusa, cacijijamuka mitundu jejinji ja ŵandu; nipo jemanjajo cacisyana mawupanga gawo kuti gaŵe yakulimila, ni mikondo jawo kuti jiŵe yikwakwa, mtundu ngasiwujigala upanga kumenyana ni mtundu wine, soni ngasalijiganyasoni ngondo.” Maloŵega gakwendelecela kuti: “Ngasiyiwulasya kapena kusakasya mwitumbi lyangu lyeswela; ligongo cilambo capasi cicigumbala ni umanyilisi wa Yehofa mpela mugakusagumbalila mesi m’nyasa.”—Yesaya 2:4; 11:9.

Lili lisosa lyangasinda lya Mlungu Jwamacili gosope, Yehofa, jwali Mlungu “kwinani ni pacilambo capasi.” (Yoswa 2:11) Yehofa msyenejo akutusalila kuti: “Akumbucile yindu yandanda yakalakala, kuti une ndili Mlungu, soni pangali Mlungu jwine jwakulandana ni une, nguwandisya ya mbesi kutandila pandanda, ni kutandila ndaŵi jakalakala nguŵeceta ya yindu yamkaniyitendece. Une ngusaŵeceta kuti, ‘Maloŵe gangu gacitama, soni cinjitenda yakusosa yangu yosope.’” (Yesaya 46:9, 10) Yehofa asasile kuti lisosa lyakwe licitendekwa kupitila mwa Masiya. Ana nduni jwampaka amlekasye Mlungu kutenda yeleyi?