MUNDU jwambone akusasaka ganisya, soni kutenda yindu cenene ndaŵi syosope. Ulemwa ukusagopolela kulepela kutenda cenene yeleyi. Yili mpela ukusoma cembe m’citela nambo ukukulusya.

Atamose yindu yamwanamwana mpela, nganisyo ni yitendo yakulemweceka, kutumbila mnope, kulalata, kalipila ŵanace kapena ŵamkwakwe, kumbila yakulemweceka, soni kola mtima wakulinonyela, yosopeyi yili ulemwa.

Mwambone, ana apali jwampaka aŵecete mwacilungamo kuti nganakaseje lilamusi lya likumi, lyalikusati: “Mkakumbila . . . kandu kalikose ka mjenu”? (Ekisodo 20:17 [20:14, TNK]) Kusala yisyene, tukumanyilila kuti “pangali mundu jwangakusalemwa.” (1 Mafumu 8:46) Yili yangakomboleka kulingalinga kuti tukalemwa, atamose kwa lisiku limpepe.

Kulepela kwetu kuŵambala yakusakala kukulosya kuti ulemwa wuli wamacili mnope, ngaŵa kwamba kutenda yakulemwecekape. Wosope twapagwile ŵakulemwa. Tukusalwala, kalambala ni kuwa, ngaŵa ligongo lyakuti twasagwile kutenda yakusakala, nambo ligongo lyakuti twapagwile ŵakulemwa, m’yoyo tukusatenda yakusakala. M’weji pajika ngaŵa mkupakombola kumasya yeleyi. “Ana nduni juŵapagwile ali jwamswela kutyocela kwa mundu jwangaswejela? Pangali atamose jumo.”—Yobu 14:4.

Mlungu ŵapangenye Adamu ni Hawa ŵamnama, nganakola cakulemweceka. Paŵasagwile kulemwa, ŵaŵele mpela cikombole cepindice, cacikusakoposya yidina yepindice. M’yoyo pangali campaka tutende. Nombe m’weji tuli ŵapindice mpela jemanjajo, tukwete yakulemweceka, soni tukusasaka kutenda yakusakala. Kapena kuti twajigalile ulemwa wawo. Nambo, ana yeleyi yikugopolela cici?