MBALI 8
Ana Lisosa Lyandanda lya Mlungu kwa Ŵandu Lyaliji Lyatuli?
“M’ŵelekane, mtupe, mgumbale m’cilambo capasi.”—GENESIS 1:28.
MLUNGU ŵapangenye Adamu ni Hawa kuti atameje mwakusangalala pacilambo, soni acisamalileje. (Genesis 2:15) Jwalakwe ŵapele ndamo syakwe sine, kupwatikapo ukoto wakulisagulila. Jemanjajo akasangalele ni kulijiganya yindu ya pacilambo cosope capasi. Ŵanace ŵawo akapagwile m’cilambo camboneci.
Ana Mlungu ŵapelece upile watuli ku liŵasa lyandanda?
Ŵapelece upile wakutama ni umi wangamala m’Paladaiso, soni kuti ajendelecele kummanyilila cenene Mlungu ni yindu yapangenye. (Salimo 115:16; Mlaliki 3:10, 11) Ŵanace ŵawo ŵasosekwaga kupocela upilewu kutyocela kwa jemanjajo.
Ana Mlungu ŵapelece malamusi gapi kwa Adamu ni Hawa?
Naga akapikanile malamusi ga Mkupanganya jwawo gakwamba cambone ni cakusakala, akakwete upile wakusangalala ni umi mpela liŵasa lya yakupanganyikwa yosope ya Mlungu. Jwalakwe ŵasalile kakamulicisye masengo kambone ka ukoto wawo wakulisagulila, soni ŵakalamwisye ya kogoya kwa ungapikanila. Mwambone, akapikanile malamusi ga Mlungu, akasangalele ni umi wamnama kwangamala. Nambo nakatende yindu yakulekangana ni yeleyi, akalasile, soni kuwa kwene.—Genesis 2:16, 17.
Ana kola ukoto wakulisagulila kukusagopolela cici?
Kulisagulila yakutenda kukusakola yakuyicisya yakwe, yambone kapena yakusakala.
Ana calemwecekwe cici?
Candanda, Satana ŵamjimucile Mlungu. Kaneko, Adamu ni Hawa ŵamkuyiye Satana. Ligongo lyakusagula mwakulemwecekaku, ŵamlemwecesye Mlungu, umnama wamasile, kaneko ŵatandite kuwa.—Genesis 5:5.
Ana yaŵatesile Adamu ni Hawa yikutukwaya catuli?
Paŵalemwisye, Adamu ni Hawa nganakombola kuŵeleka ŵanace ŵamnama, ŵakatemi ni umi kwangamala. M’yoyo ŵayikasisye ulemwa ni ciwa m’cilambo capasi. Mwakulengakana ni lisosa lyandanda lya Mlungu, wosope tukusawaga ligongo lya ulemwa. Nambo, ana ulemwa ni cici?
