Iginsumat ni Lois Didur

Pira ka beses ka na nakasiring, ‘Unta diri ito an akon nagin desisyon’? Aw, katapos hin 50 ka tuig ha bug-os-panahon nga pag-alagad, waray ako nahihinumdoman nga maraot nga resulta han pagin aada ha too nga kamot ni Jehova. Isusumat ko ha iyo kon kay ano.

NATAWO ako han 1939 ngan nagdaku ha usa nga baryo ha Saskatchewan, Canada, upod an akon upat nga bugto nga babaye ngan usa nga bugto nga lalaki. Makalilipay an pag-ukoy ha haluag nga uma. Usa ka adlaw ginbisita han mga Saksi ni Jehova hi Tatay, ngan ginpakianhan ko hira kon may ngaran ba an Dios. Iginpakita nira ha amon an ngaran nga Jehova ha Salmo 83:18. Tungod hito naruyag ako nga mas mahibaro pa mahitungod ha Dios ngan ha iya Pulong.

Hito nga mga tuig, an mga eskwelahan ha baryo usa la nga kwarto, ngan an kabataan ha uma gintatarampo la tubtob ha ikawalo nga grado. Nangangabayo hira o nagbabaktas hin damu ka kilometro tipakadto ha eskwelahan. An magturutdo naukoy ha iba-iba nga pamilya hito nga distrito, ngan hira an nagtatagana han iya panginahanglan. Inabot an tuig nga turno na han akon mga kag-anak nga paukyon ha amon an bag-o nga maestro, hi John Didur.

Diri ako maaram nga inin batan-on nga maestro interesado liwat hinduro ha Pulong han Dios. Makausa han gindadayaw ko an komunismo ngan sosyalismo nga ginsusuportahan ni Tatay hito nga panahon, binaton hi John ha mahinay nga tingog: “Waray tawo an may katungod nga magmando ha iya igkasi-tawo. An Dios la an may katungod hito.” Tungod hito nagkaada kami damu nga makapainteres nga pag-istorya.

Natawo hi John han 1931, salit nahibaro hiya mahitungod han mga kakurian nga resulta han girra. Han nagtikang an Girra ha Korea han 1950, iya ginpakianhan an iba-iba nga klero kon husto ba nga umapi ha girra. Hira ngatanan nagsiring nga an mga Kristiano puydi umapi ha girra. Ha urhi, iginpakiana liwat niya ito ha mga Saksi ni Jehova. Iginpakita nira ha iya an Kasuratanhon nga  gintotoohan han siyahan nga mga Kristiano may kalabotan ha girra. Nabawtismohan hi John han 1955. Han sunod nga tuig, nabawtismohan liwat ako. Karuyag namon nga duha nga gamiton an amon kinabuhi ngan kusog ha pag-alagad kan Jehova. (Sal. 37:3, 4) Han Hulyo 1957, nagpakasal kami ni John.

Damu ka beses nga an anibersaryo han amon kasal nahitutuman ha panahon han kombensyon. Malipayon kami nga makaupod an yinukot nga kabugtoan nga may pagtahod ha pag-asawa. Siyahan nga tinambong kami hin internasyonal nga kombensyon han 1958. Lima kami nga nagbiyahe sakay hin awto tikang ha Saskatchewan ngadto ha New York City. Ha sulod hin usa ka semana, nagbibiyahe kami ha adlaw ngan nakaturog ha tolda ha gab-i. Nahipausa gud kami han an usa nga bugto nga amon iginkita ha Bethlehem, Pennsylvania nag-imbitar ha amon nga ha ira humuron hito nga gab-i! Tungod han iya pagkabuotan nakaabot kami ha New York City nga limpyo ngan maopay an pamostura. Hiton daku hinduro nga kombensyon nagin mas matin-aw ha amon nga makalilipay gud an pag-alagad kan Jehova! Tinuod gud an ginsiring han salmista, “ha imo too nga kamot may-ada mga kalipayan nga ha kagihaponan.”—Sal. 16:11.

PAGPAYUNIR

Paglabay hin usa ka tuig, han 1959, nagpayunir kami ngan nag-ukoy ha gutiay nga trailer ha igbaw han usa nga bungtod ha uma ha Saskatchewan. Tikang hito nakikita namon an higrayo nga lugar, ngan an iba hito amon teritoryo.

Usa ka adlaw may inabot nga makalilipay nga surat tikang ha sanga nga opisina. Kinadto dayon ako kan John, nga may gin-aayad ha traktor. An surat usa nga imbitasyon ha amon nga magin espesyal payunir ha Red Lake, Ontario. Diri kami maaram kon hain ito dapit, salit ginbiling dayon namon ito ha mapa.

Iba gud ito nga lugar ha hagluag nga kaumhan! May-ada ito hagluag nga kagurangan ngan gudtiay nga bungto hirani ha mga minahan hin bulawan. Ha siyahan nga adlaw namon didto, han namimiling kami hin mauukyan, nabatian han usa nga bata nga babaye an amon pakiistorya ha ira amyaw. Inuli hiya ngan nagsumat ha iya nanay, nga nagpahuron ha amon ha ira balay hito nga gab-i. An katre nakadto ha sirong han balay nga an bungbong ngan salog tuna. Kinabuwasan, nakabiling kami hin balay nga hinimo ha troso. May duha ito nga kwarto pero waray koneksyon hin tubig ngan waray mga gamit, may-ada la pugon nga hinimo ha lata ha pagpapaso han balay. Namalit kami hin segunda-mano nga mga gamit ngan waray pag-iha kontento na kami ha amon kahimtang.

An pinakahirani nga kongregasyon 209 ka kilometro an kahirayo. Damu nga trabahador ha mga minahan hin bulawan an tikang ha Europa, ngan naghangyo hira ha amon hin Biblia ha ira yinaknan. Waray pag-iha, nagkaada kami 30 nga mag-opay gud nga Bible study. Waray pa mag-unom ka bulan, nagkaada na gutiay nga kongregasyon.

An bana han usa nga babaye nga amon ginba-Bible study nagtawag ha ira padi basi hangyoon hiya nga kumadto ha ira ngan kaistoryahon an iya asawa nga sayop an iya hinbabaroan tikang ha amon. Pagkirigta namon, ginsidngan kami han padi nga labaw ha ngatanan, sadang namon itutdo an Trinidad. Ginkuha han babaye an ira Biblia nga kanan Katoliko ngan ginhangyo an padi nga pamatud-an an iya ginsiring. Gin-itsa han padi an Biblia ha luyo nga bahin han lamesa ngan nagsiring nga waray hiya kinahanglan pamatud-an. Han naglalakat hiya tipagawas, siring niya ha Ukrainian nga pinulongan nga kinahanglan paiwason kami ha balay ngan diri na gud pabalikon. Diri hiya maaram nga hi John nakakasabot hin Ukrainian!

Waray pag-iha katapos hito, binaya kami ha Red Lake kay babansayon hi John nga magin paramangno han sirkito. Kondi paglabay hin mga usa ka tuig, han nagpapahayag hi John para ha bawtismo ha usa nga distrito nga kombensyon, usa han mga kandidato ha bawtismo an bana han babaye! An nahitabo upod han padi nagpagios ha iya nga usisahon an Biblia.

 OKUPADO HA PAGBISITA HA MGA KONGREGASYON HA SIRKITO

Han nabisita kami ha mga kongregasyon ha sirkito, naeksperyensyahan namon an naiiba nga kalipay han pag-ukoy upod han iba-iba nga pamilya. Nagin duok gud kami ha kabugtoan nga nagpaukoy ha amon. Usa ka beses nakadto kami ha kwarto ha igbaw han balay nga waray pampapaso ha kathagkot. Temprano ha aga, nababatian namon an edaran na nga bugto nga babaye nga hinay-hinay nga nasulod ha amon kwarto basi magharing ha gutiay nga kalan. Diri nag-iiha, nabalik hiya nga may dara nga planggana nga may mapaso nga tubig basi makapangandam kami para ha mga buruhaton hito nga adlaw. Damu an akon hinbaroan ha iya pagin malumo ngan buotan.

An amon pagbisita ha mga kongregasyon nakabulig ha akon nga magin mas duok kan Jehova. Pananglitan, sakop han usa nga sirkito ha Alberta an usa nga bungto nga may minahan ha Hirayo nga Norte, diin may naukoy nga bugto nga babaye. Paonan-o gintagad han organisasyon ni Jehova inin hirayo hinduro nga bugto? Kada unom ka bulan ginbibisita namon hiya. Ha sulod hin usa ka semana gin-uupdan namon hiya ha ministeryo ngan nagkakatirok kami sugad han ginbubuhat ha dagku nga kongregasyon ha syudad. Makapabantad ito nga pahinumdom nga mahigugmaon nga gintatagad ni Jehova an tagsa nga nagsisingba ha iya.

Padayon nga nakigkomunikar kami ha damu nga kabugtoan nga nagpaukoy ha amon. Nagpapahinumdom ito ha akon han usa han siyahan nga mga regalo ha akon ni John—usa nga kahon nga damu an kolor ngan puno hin papel nga sururatan. Nalipay gud kami pakigsuratay ha amon kasangkayan gamit ito nga mga papel. Tubtob yana, gintitipigan ko pa gihapon ito nga burutangan hin surat.

Han nakadto kami ha usa nga sirkito ha Toronto, gintawagan kami han usa nga bugto ha Bethel ha Canada, ngan nagpakiana kon karuyag ba namon mag-alagad ha Bethel. San-o niya karuyag hibaroan an amon baton? “Buwas dayon kon puydi!” Pagkabuwas, binaton kami hin oo.

PAG-ALAGAD HA BETHEL

Ha tagsa nga pagbag-o han amon toka, nakita namon an iba-iba nga klase han kalipay ha pag-alagad kan Jehova. Nagpadayon ito han nagin Bethelite kami han 1977. An pakig-upod ha pipira nga dinihogan naghatag ha amon hin higayon nga makita an ira iba-iba nga personalidad ngan an ira daku nga pagtahod ha Pulong han Dios.

Naruyagan namon an amon bag-o nga rutina ha Bethel. Pananglitan, an amon mga bado nakabutang na ha drawer imbes nga ha maleta, ngan may permanente na kami nga kongregasyon. Labot han akon trabaho, pirme ako nalilipay pag-tour han mga nabisita ha Bethel. Ginsusumat ko ha ira an mga buruhaton ha Bethel, nababatian an ira mga komento, ngan ginbabaton an ira mga pakiana.

Madagmit nga linabay an mga tuig, ngan han 1997 hi John gin-imbitar nga umiskwela ha School for Branch Committee Members ha Patterson, New York. Katapos, ginpakianhan kami kon puydi kami bumalhin ha Ukraine. Gin-aghat kami nga hunahunaon ito hin maopay ngan ig-ampo. Hito nga gab-i, nagdesisyon kami nga bumalhin.

USA PA NGA PAGBAG-O—PAG-ALAGAD HA UKRAINE

Nakatambong kami ha internasyonal nga kombensyon ha St. Petersburg, Russia han 1992 ngan katapos ha internasyonal nga kombensyon ha Kiev, Ukraine han 1993. Tungod hito nga mga kombensyon mas ginhigugma namon an kabugtoan ha Este nga Europa. An amon bag-o nga gin-uukyan ha Lviv, Ukraine nakadto ha ikaduha nga andana han usa nga daan nga balay. Tikang ha bintana nakikita namon an usa nga libong nga may gutiay nga hardin, usa nga daku nga pula nga sunoy, ngan damu nga ugang. Baga ako hin nakadto ha usa nga uma ha Saskatchewan. Dose kami nga naukoy hito nga balay. Kada aga temprano kami nga nagbibiyahe ngadto ha Bethel ha luyo nga bahin han syudad.

Ano an amon gin-abat ha amon pag-alagad ha Ukraine? Daku nga pribilehiyo nga makaupod an damu  nga kabugtoan nga nakaeksperyensya hin mga pagsari, pagdiri han gobyerno, ngan kapriso. Pero nagpabilin nga marig-on an ira pagtoo. Kon ginkukumendasyonan namon hira, nasiring hira, “Ginbuhat namon ito para kan Jehova.” Waray gud hira umabat nga ginpabay-an hira. Bisan yana, kon pasalamatan mo an usa nga bugto tungod han iya pagkabuotan, masiring hiya, “Pasalamati hi Jehova,” ha pagkilala han Gintitikangan han ngatanan nga mag-opay nga butang.

Ha Ukraine, damu an nagbabaktas ngadto ha mga katirok, salit may panahon hira ha pag-uroistorya ngan pagdinasigay. Mga usa ka oras o sobra pa an ira pagbaktas. Sobra 50 an mga kongregasyon ha Lviv, ngan 21 hito an nagamit hin mga Kingdom Hall ha usa nga daku nga pasilidad. Kon Domingo, maopay gud pagkit-on an damu nga kabugtoan nga sunod-sunod nga nagkakaabot ha mga katirok.

Nagin komportable dayon kami ha kabugtoan, nga mga buotan ngan andam pagbulig ha iba. Kon nakukurian ako pagsabot han ira linggwahe, bisan yana, mapailubon gud hira. Nakikita ito ha ira mahigugmaon nga mga pulong ngan ekspresyon han nawong.

Usa nga ehemplo han tinuod nga pagsarig han aton kabugtoan an nahitabo durante han internasyonal nga kombensyon ha Kiev han 2003. Paglulusad pa la namon ha damu an tawo nga estasyon han tren ha subway han dinaop ha amon an usa nga bata nga babaye ngan kalmado nga nagsiring, “Nawawara ako. Diri ako maaram kon hain na hi Lola.” Nakita niya an amon badge card ngan maaram hiya nga mga Saksi kami. Diri hiya nahahadlok ngan waray magtangis. Gindara hiya han amon kaupod nga asawa han usa nga paramangno han sirkito ha Lost and Found Department ha estadyum. Waray pag-iha nagkita na hira han iya lola. Nabantad gud ako han daku nga pagsarig hini nga bata, bisan ha butnga han yinukot nga tawo.

An kabugtoan tikang ha damu nga nasud kinadto ha Ukraine han Mayo 2001 basi tumambong ha dedikasyon han aton bag-o nga sanga nga opisina. Katapos han espesyal nga pahayag ha estadyum ha Domingo han aga, damu hinduro nga kabugtoan an akon nakita nga nagkakaabot ha bag-o nga Bethel basi mag-tour. Diri ko gud ito hingangalimtan! Nabantad ako nga makita an kabugtoan nga organisado gud ngan diri maaringasa. Mas naapresyar ko an kalipay nga resulta han pag-alagad ha Dios.

DAKU GUD NGA PAGBAG-O

Makasurubo nga han 2004, hinbaroan nga hi John may kanser. Kinadto kami ha Canada basi ipatambal hiya. Ha siyahan niya nga chemotherapy, haros waray ito mailob han iya lawas, ngan pipira ka semana hiya ha ICU. Maopay na la kay nakamata pa hiya. Bisan kon nakukurian gud hiya pagyakan, pirme nakikita ha iya mga mata nga gin-aapresyar niya an ngatanan nga nabisita ha iya.

Pero waray na hiya mag-opay, ngan namatay hiya han Nobyembre 27, 2004. Daku hinduro nga bahin han akon kinabuhi an nawara. Malipayon gud kami ni John ha pag-alagad kan Jehova nga magkaupod. Ano an akon bubuhaton? Nagdesisyon ako nga bumalik ha Ukraine. Mapasalamaton gud ako ha daku nga gugma nga iginpapakita ha akon han pamilya han Bethel ngan han kongregasyon.

Ha bug-os namon nga kinabuhi, waray gud kami magbasol ha amon mga nagin desisyon. Makalilipay an amon kinabuhi, ngan naagian namon an pinakamaopay nga mga kaupod. Maaram ako nga damu pa an kinahanglan ko hibaroan mahitungod han pagkamaopay ni Jehova, ngan naglalaom ako nga magpadayon ha pag-alagad ha iya ha waray kataposan tungod kay naagian ko gud ‘an kalipay ha too nga kamot ni Jehova.’

[Blurb ha pahina 6]

“Ha bug-os namon nga kinabuhi, waray gud kami magbasol ha amon mga nagin desisyon”

[Retrato ha pahina 3]

Han ginkasal kami ni John

[Retrato ha pahina 4]

Han espesyal payunir ako ha Red Lake, Ontario

[Retrato ha pahina 5]

Kami ni John ha Ukraine han 2002