“Natapos Na”

HAN tuig 2002, an mga Saksi ni Jehova nagdumara hin distrito nga kombensyon ha syudad han Mbandaka, ha norte-weste nga bahin han Demokratiko nga Republika han Congo. Han iginpagowa ha kombensyon an New World Translation of the Christian Greek Scriptures ha Lingala, an mga mamarati literal nga nanlukso ha kalipay, ngan nagtangis an iba. Katapos, an mga tawo nagdagmit ngadto ha entablado basi makita hin mas duok an bag-o nga Biblia, nagsisinggit, “Basuki, Basambwe,” nga nangangahulogan: “Natapos na! Naalohan hira!”

Kay ano nga an mga mamarati malipayon hinduro, ngan ano an ira karuyag sidngon pinaagi hito nga mga pulong? Ha pipira nga mga lugar han Mbandaka, an mga Saksi ni Jehova waray pakakuha hin Lingala nga mga Biblia. Kay ano? Tungod kay an iba nga mga relihiyon nagdumiri ha pagbaligya hito ha mga Saksi ni Jehova. An mga Saksi kinahanglan maghangyo hin tawo nga diri-Saksi ha pagkuha hin mga kopya. Yana malipayon hinduro hira tungod kay an iba nga mga relihiyon diri na makakapugong ha ira ha pagkaada hin mga Biblia.

An bag-o nga hubad mapapahimulosan diri la han mga Saksi ni Jehova kondi liwat han mga tawo ha kabug-osan. Usa nga lalaki nga nakabati han programa ha iya balay pinaagi han mga loudspeaker tikang ha lugar han asembleya an nagsurat ha sanga nga opisina han mga Saksi ni Jehova: “Malipayon gud ako mahitungod han pagpagowa hini nga Biblia. Magpapatin-aw ito ha amon mahitungod han damu nga mga butang. Diri ako usa han mga Saksi ni Jehova, kondi ginhuhulat ko gud ini nga Biblia nga bag-o la nga iyo iginpublikar.”

An kompleto nga New World Translation of the Holy Scriptures makukuha na yana ha 33 nga yinaknan, ngan an Christian Greek Scriptures, ha 19 nga dugang nga yinaknan, upod na an Lingala. Kon karuyag mo hin usa nga kopya, alayon paghangyo ha mga Saksi ni Jehova nga magkaada ka hin usa nga kopya hinin maopay hinduro nga hubad.