An Magopay nga Buhat Naghihimaya ha Dios

ADTON nahigugma ha Dios nangangalimbasog ha pagpakita han espirituwal nga kalamrag tikang ha iya Pulong, an Biblia. Hini nga paagi, ira ginsusunod an sugo ni Jesus: “Iglawag niyo an iyo mga suga ha atubangan han mga tawo, basi hira kumita han iyo mga magopay nga buhat, ngan maghimaya hira ha iyo Amay nga aadto ha langit.” (Mateo 5:16) An mga ginyayakan sugad man an matadong nga paggawi naghihimaya ha Dios.

An mga Saksi ni Jehova nangangalimbasog nga mapalipay an Dios pinaagi han pagbuhat uyon ha Biblia ngan pinaagi han pangalimbasog ha pagbulig ha iba ha espirituwal. Ginbubuhat nira ito bisan ha mga nasud diin diri pa nakarehistro an ira publiko nga ministeryo. Ha kapital nga siyudad ha usa hini nga mga nasud, an mga Saksi nagdudumara hin tinuig nga mga kombensyon nga gintatambongan han 6,000 tubtob 9,000 nga mga tawo. Para ha sugad nga mga katirok, nagpiplete hira hin mga lugar nga ginagamit han publiko. Sugad han ira ginhimo ha naglabay nga mga tuig, antes han ira kombensyon han 1999, ginatos nga mga Saksi an maduruto nga nagtrabaho ha paglimpyo han mga pasilidad ngan pagbutang han sound system ngan yinukot nga mga lingkoran.

Naobserbahan ini ngatanan nga pangandam. An mga empleyado ha pasilidad nakaobserba hini nga mga buruhaton. Hinkit-an liwat nira nga, bisan kon 15,666 an pungkay nga tinambong, an ngatanan nagin maopay ngan mahapsay hinduro an mga Saksi. Nalipay liwat an mga empleyado ha duro nga kalimpyo katapos han kombensyon.

Ipinakita han nagdudumara han pasilidad an apresasyon para hini ngatanan pinaagi han paghatag ha mga Saksi hin priyoridad basi hira an siyahan nga may higayon ha pagplete han pasilidad ha sunod nga tuig. Kondi an nagdudumara han pasilidad nagbuhat hin labaw pa. Han Hulyo 15, 1999, ira gintagan an komite han kombensyon hin plake han apresasyon. Iginsurat ha plake an mga pulong nga “ha kongregasyon han mga Saksi ni Jehova”​—usa ka butang nga diri-linalaoman ha usa nga nasud diin igindidiri an ira buruhaton nga pagtutdo han Biblia.

Ha bug-os nga kalibotan ha 2000/2001, minilyon an ginlalaoman nga matambong ha ginatos han “Mga Magburuhat han Pulong han Dios” Distrito nga mga Kombensyon han mga Saksi ni Jehova. Ha pagtambong, maoobserbahan mo mismo kon paonan-o adton nangangalimbasog ha pagbuhat han ginsisiring ha Biblia nagbubuhat han magopay nga buhat nga naghihimaya ha Dios.