Pamati ha Pahamangno!

BUM! Han Hunyo 3, 1991, an Mount Fugen ha Japan nagbuga hin masulog nga mga gas ngan abo tikang ha bulkan, nga may maalingugngog nga daguhob. Inawas an mapaso-hinduro nga gas ngan abo tipaubos. An pagbutó nakamatay hin 43 ka tawo. Damu han haros diri matalwas an grabe nga nasunog. “Alayon, tubig, tubig,” nagsinggit an pipira. An mga bombero ngan mga polis nalisang pagdagmit ha pagbulig ha ira.

AN PAGBUGWAK han mapaso nga lapok nakita ha pungkay han Mount Fugen mga duha ka semana an naglabay, salit an mga awtoridad ngan mga umurukoy nangandam na. Mga sobra usa ka semana antes han kalamidad, iginpahibaro an pagpalagiw ha lugar. Usa ka adlaw la antes han pagbutó, ginhangyo han polis an mga membro han media nga diri kumadto ha igindidiri nga lugar. Kondi, hiton nga kulop han pagbuto an 43 nga biktima nakadto ha peligroso nga lugar.

Kay ano nga damu hinduro an nagsari ha pagsulod ha lugar o magpabilin didto? An pipira nga mga parauma nga nagbalhin na han ira panimalay binalik panginano han ira mga panag-iya ngan kaumhan. Tulo nga bulkanologo an nagsari paghirani ha bulkan tubtob han mahihimo basi makapag-usisa hin husto. An pipira nga mga reporter ngan mga pararetrato nagsari paglahos ha tubtoban han igindidiri nga lugar tungod kay karuyag nira kumuha hin impormasyon han nahitatabo ha bulkan. Tulo nga paramaneho hin sarakyan nga ginpakyaw han media an nakadto. Nagtatrabaho an mga polis ngan boluntaryo nga mga bombero. An tagsa mayada han iya kalugaringon nga hinungdan ha pagkadto ha peligroso nga lugar​—ngan an resulta amo an kawara han iya kinabuhi.

Aada Ka ba ha Peligroso nga Lugar?

Bangin diri kita ngatanan nag-uukoy hirani han aktibo nga bulkan. Kondi, anoman ko naatubang kita ha bug-os-kalibotan nga kalamidad, nagbubutang ha aton ngatanan ha peligroso nga lugar nga nagsasakop han bug-os nga kalibotan? An libro nga napamatud-an nga masasarigan nga surok han matagnaon nga impormasyon nagpapahamangno ha aton han tiarabot bug-os-kalibotan nga kalamidad ngan nagsaysay hito ha sugad hini nga paagi: “An adlaw magmamasirom, ngan an bulan diri mahatag han iya kalamrag, ngan an mga kabitoonan magkakataktak tikang ha langit, ngan an mga kusog han mga kalangitan mauuy-og. . . . An ngatanan nga katulinan ha tuna  manhahayhay.” (Mateo 24:​29, 30) An mga urusahon ha kalangitan dinhi nga aada ha bug-os nga uniberso iginsaysay sugad nga nakakaapekto ha “ngatanan nga katulinan ha tuna.” Ha lain nga mga pulong, ini nga tagna nagpapasabot han usa nga kalamidad nga makakaapekto ha kada usa ha aton.

Ini nga libro han masasarigan nga tagna amo an Biblia. Makapainteres, an konteksto han gin-unabi ha igbaw nga teksto han kasuratan naghahatag hin detalyado nga pagsaysay han mga butang nga magdadara hin kalamidad ha bug-os nga kalibotan. Sugad la nga an pagbugwak han mapaso nga lapok ngan iba nga mga tigaman han bulkan naghatag hin mga hinungdan han mga opisyal han siyudad han Shimabara ha pagdeklara kon hain an peligroso nga lugar, an Biblia naghahatag ha aton hin mga hinungdan ha pagin alerto ngan ha pag-andam han aton kalugaringon para ha katalwasan. Mahibabaro kita hin leksyon tikang ha trahedya ha Mount Fugen ngan masasabtan an peligro nga aada ha unhan.

 [Ginkuhaan han Retrato ha pahina 2]

Yomiuri/Orion Press/Sipa Press

[Ginkuhan han Retrato ha pahina 3]

Yomiuri/Orion Press/Sipa Press